2 Ex o cyil ju pantyón otok tzꞌel kꞌiꞌn ju abj ttziꞌ;

3 e ocxtzun,

pero mintiꞌ cnet t-ximlal Kajaw Jesús cyuꞌn.

4 Biꞌx naj cynabl tuꞌn jlu,

pero minaben at cabe xinak e cub weꞌ cytxlaj toc cyxbalun in koptzꞌaj.

5 Atzun cye xuꞌj tzaj nimxix cyxobil ex e cub mocꞌeꞌ.

Xitzun cymaꞌn xinak cye:

—¿Tikuꞌn in cyjyoꞌne cyxol cyimni aju itzꞌ?

6 Mi aꞌl at tzalu;

ma jatz ankꞌin.

Cynaꞌntze aju yol o tma cyeye tej atxtok tuj Galiley,

7 porque chi Jesús:

Ilxix tiꞌj tuꞌn nxiꞌ kꞌoꞌne tuj cykꞌab xjal aj il,

akine scꞌoꞌmaj kine tuꞌn Dios tuꞌn ntene cyucꞌil xjal,

ex il tiꞌj tuꞌn njaw kꞌoꞌne twitz crus,

ex tuꞌn njatz ankꞌine tuj toxin kꞌij,

chi Jesús,

che chi xinak.

8 Atzun cye xuꞌj ul tiꞌj cycꞌuꞌj aju tyol Jesús,

9 ex tej cyaj meltzꞌaj ttzi pantyón,

xi cymaꞌn tkanil tiꞌj tcyakil jlu cye junlaj apostl ex cye mastl.

10 Akeju xuꞌj e kꞌmante tkanil cye apostl atzun ke jlu:

Mariy aj Magdala tucꞌix Juana ex Mariy aju ttxuꞌ Jacobo ex cyucꞌix mastl xuꞌj cyucꞌil.

11 Atzun cye apostl,

tuj cynabl ka tuj cywitz xuꞌj otok tzaj,

ex mintiꞌ xi cyniman cyyol xuꞌj.

12 Masque icju,

pero cub be tuꞌn Pedro,

xi kelan ttzi pantyón;

tejtzun tocx tqueꞌyin tujxi,

o til oꞌcx ke xbalun wokl,

ex aj meltzꞌaj tja in labin tiꞌj tcyakil jlu.

13 Tujx ju kꞌij lu at cabe t-xnakꞌtzben Jesús cyjaꞌ cyxiꞌ tuj jun tal tnam Emaús tbi,

atlo junlaj kilómetro t-xol tucꞌil tnam Jerusalén.

14 In che yolintok cyxolx tiꞌj tcyakilju otok baj.

15 Ex matok in che yolin cyxolx ex in che xjelintok cyxolx,

axte Jesús pon lakꞌeꞌ cytxlaj,

ex junx o bet cyucꞌil.

16 Masque o cyil,

pero mintiꞌ el cynicꞌ tiꞌj.

17 Xitzun tkanin Jesús cye:

—¿Alcye in che yoline tiꞌj cyxolxe tuj cybeye?

¿Ex tikuꞌn in che bisune?

18 Ex at jun cye,

Cleopas tbi,

tzaj ttzakꞌweꞌn:

—¿Oꞌcxpetzun aya jun betin xjal at tuj Jerusalén mintiꞌ ma tbiya tcyakilju ma baj tuj tnam ew ex cabje?

19 Xitzun tmaꞌn Jesús cye:

—¿Titzun ma baj?

Atzun cye xi cymaꞌn:

—At jun ma baj tiꞌj Jesús aj Nazaret,

aju t-sanjel Dios,

attok tipumal tbinchben ex at tipumal tyol twitz Dios ex cywitz cycyakil xjal.

20 Atzun cye nejenel cye pal cyucꞌix ke aj sanjelal tuj ktanmiye cub cykꞌoꞌn t-sentens tuꞌn tcyim,

ex jaw cykꞌoꞌn twitz crus.

21 Otok keꞌ kcꞌuꞌje tiꞌj ka tuꞌn cycolpet aj Israel tuꞌn.

Ex mya oꞌcx jlu,

at juntl,

jaꞌlo toxin kꞌij tbajlen jlu;

22 ex at junjun xuꞌj kxole ma ko jaw secꞌpaje cyuꞌn,

porque ma cheꞌx aj ttzi pantyón tej xko skix,

23 ex tuꞌnju mintiꞌ xcnet t-ximlal Jesús cyuꞌn,

ẍe ultzun kucꞌile ex saj cymaꞌn keye ka otok cyil txkan anjel ex saj kꞌmaꞌn cye cyuꞌn anjel ka ma jaw ankꞌin te Jesús.

24 Ex ma cheꞌx aj cabe keye ttzi pantyón,

ex ma cyil ic tzaꞌnx ma cyma xuꞌj,

atzunte Jesús mi aꞌl ma cyil.

25 Xitzun tmaꞌn Jesús cye:

—Mintiꞌ nnoꞌcx tuj cywiꞌye ex yaj in xi cyocslaꞌne tcyakilju o cyma t-sanjel Dios.

26 ¿Myapetzun il tiꞌj tuꞌn ticꞌx tcyakil jlu tuꞌnju Crist aju at toclen tuꞌn Dios,

ex tuꞌn ticꞌx tuꞌn naꞌnxtok tjaw nimsaꞌn?

27 Octzun ten Jesús txꞌolbalte tcyakilju in tmaꞌn tuj Tuꞌjil tiꞌj,

tzajnix keꞌ cyuj ke uꞌj cyaj ttzꞌiban Moisés ex tuj cyuꞌjil cycyakil t-sanjel Dios.

28 E pontzun tuj tal tnam jatum at cyponel,

cyjaꞌtok ticꞌ tiꞌntl tbe Jesús.

29 Atzun cye e cubsanxix twitz tuꞌn tcyaj ten cyucꞌil,

ex xi cymaꞌn te:

—Tencja kucꞌile,

porque ma tzꞌoc kax,

ex chꞌix koc yupj.

Ocxtzun Jesús tuja ex cyaj ten cyucꞌil.

30 Ex tej tcub keꞌ cyucꞌil tiꞌj mes,

jaw ttzyuꞌn ju pan,

cub tcyꞌiwlaꞌn,

ex cub tpiẍcꞌuꞌn,

ex xi tkꞌoꞌn cye.

31 Atzun cye o spicꞌbanjtz tuj cywitz,

ex el cynicꞌ tiꞌj;

atzunte Jesús cub naj cywitz.

32 Ex cyma cyxolx:

—Ax toc ma knaꞌ jun tzalajbil tuj kanmi tej matok in yolin kucꞌil tuj be ex tej saj ttxꞌolbaꞌn aju tzꞌiban tuj Tuꞌjil.

33 Entons biꞌx cub be cyuꞌn,

e ajtz meltzꞌaj tuꞌn cyul tuj tnam Jerusalén,

atzun e cnet ke junlaj apostl cyuꞌn cybuyin cyib cyucꞌix ke mastl.

34 Tzajtzun cymaꞌn apostl:

—Ax toc ma jatz ankꞌin Kajaw,

ex ma cub tyecꞌun tib twitz Simón.

35 Atzun cye keju cabe xi cytxꞌolbaꞌn aju otok baj cyiꞌj tuj be,

ex tzaꞌn tten el cynicꞌ tiꞌj Jesús tej tcub tpiẍcꞌuꞌn ju pan.

36 Matok in che yolin tiꞌj tcyakil jlu,

cub tyecꞌun tib Jesús cyxol,

ex xi tkꞌoꞌn jun kꞌolbebl cye,

chi cyjaꞌ:

—Ke cycꞌuꞌje,

chi Jesús.

37 Atzun cye e jaw secꞌpaj ex tzaj cyxobil,

tuj cynabl ka nok jun xlenꞌx nnoꞌc cyqueꞌyin.

38 Pero xi tmaꞌn Jesús cye:

—¿Tikuꞌn ma che jaw secꞌpaje,

ex tikuꞌn in cub cyximane jlu tuj cyanmiye?

39 Cyqueꞌyintze ke nkꞌabe ex ke nkane,

axwe kin;

chin cymacoꞌnque ex chin cyqueꞌyintze;

porque jun xlenꞌx mintiꞌ tchibjal ex mintiꞌ tbakil ic tzaꞌn nnoꞌc cyqueꞌyine at weye.

40 Tej t-xi tmaꞌn jlu,

e jeꞌx tyecꞌun ke tkꞌab ex ke tkan.

41 Atzun cye nim e tzalaj ex in che labin tiꞌj,

pero mintiꞌ xi cyocslaꞌnxix ka ax toc ate Jesús.

Cyjaꞌtzun xi tmaꞌn Jesús cye:

—¿Atpe chꞌin wabj cyucꞌile tzalu te nwaye?

42 Xitzun cykꞌoꞌn te,

jun piẍ cyiẍ tzkꞌaj [tucꞌix jun piẍ colmen.]

43 Xi ttzyuꞌn Jesús cyiẍ,

ex xi tchyoꞌn cywitz [ax icx xi tloꞌn jun piẍ colmen.]

44 Ex xi tmaꞌn cye:

—Aju ma baj wiꞌje,

atzunju xi nmaꞌne cyeye tej atinxtoke cyucꞌile;

xi nmaꞌne ka ilxix tiꞌj tuꞌn tjapun tcyakil jlu aju tzꞌiban wiꞌje tuj tley Moisés ex tuj cyuꞌjil t-sanjel Dios ex cyuj salmo.

45 Jakettzun cynabl tuꞌn Jesús tuꞌntzun tcanun tuj cynabl aju tzꞌibamaj tuj Tuꞌjil;

46 ex tma cye:

—Ictzun tzꞌibamaj;

in tmaꞌn ka ilxix tiꞌj tuꞌn tcyim ju Crist aju at toclen tuꞌn Dios,

ex tuꞌn tjatz ankꞌin cyxol cyimni tuj toxin kꞌij,

47 ex tuꞌn t-xi kꞌoꞌn cyoclene tuꞌn t-xi cypacbane jlu cye xjal tuj tcyakil nasyon,

tuꞌntzun tajtz tiꞌj cyanmi xjal ex tuꞌn tnajset cyil,

ex tuꞌn t-xi keꞌ cypacbane tuj tnam Jerusalén.

48 Akeye testiw tiꞌj tcyakil jlu.

49 Ex akine chin tzajel samante aju tziyimaj tuꞌn Nmane tuꞌn ttzaj tkꞌoꞌn cyeye;

pero ax che tencje tzalu tuj tnam Jerusalén,

maxi che elexe oc cycꞌmonteye cyipumale ctzajel tuj cyaꞌj,

chi Jesús cye.

50 E jeꞌtztzun kꞌiꞌn tuꞌn Jesús tiꞌjxi tnam,

e pon tuj Betania;

e jawtzun tkꞌoꞌn Jesús ke tkꞌab ex e cub tcyꞌiwlaꞌn.

51 Ex cybajlenxi tcyꞌiwlaꞌn ke,

el tpaꞌn tib Jesús cyiꞌj,

ex jax kꞌiꞌn tuj cyaꞌj.

52 Atzun cye,

cybajlenxi cꞌulun te e aj meltzꞌaj tuꞌn cypon tuj Jerusalén,

nimxix in che tzalaj;

53 ex ax e ten tcyakil kꞌij tuj tja Dios,

in cynimsaꞌn tbi Dios,

ex in cykꞌoꞌn chjonte te.

Icxwitju.