3 Xitzun tmaꞌn Simón Pedro cye tucꞌil:

—Ma chinx weye tzyul cyiẍ.

Atzun cye tucꞌil xi cymaꞌn te:

—Ax icx keye ma koꞌxe tucꞌila.

E jeꞌxtzun ex e ocx tuj jun barc;

pero ex akꞌbil cyuꞌn ex mintiꞌ jun cyiẍ tzyet cyuꞌn.

4 Tejtzun chꞌixtok tjaꞌwil kꞌij,

lu Jesús waꞌltok ttzi laguna;

atzun cye t-xnakꞌtzben mintiꞌ el cynicꞌ tiꞌj ka ate Jesús.

5 Xitzun tmaꞌn Jesús cye:

—¿Atpe cyiẍ ma tzyet cyuꞌne,

akeye wucꞌile?

—Mintiꞌ,

che chi.

6 Xitzun tmaꞌn Jesús cye:

—Cykꞌoncuꞌxe xyub tuj aꞌ ttxlaj barc tuj bankꞌabaj,

cneteltzun cyiẍ cyuꞌne,

chi cye.

Cuꞌxtzun cykꞌoꞌn ju xyub,

ex ya mintiꞌ bant tuꞌn tjatz cyuꞌn tuꞌnju nim cyiẍ otok tzyet cyuꞌn.

7 Atzunte ju xnakꞌtzben cꞌujlaꞌnxix tuꞌn Jesús xi tmaꞌn te Pedro:

—Ate Kajaw jlu.

Tejtzun tbinte Simón Pedro ka ate Kajaw,

oc tkꞌoꞌn t-xbalun (porque otok tzꞌel tiꞌn),

ex cuꞌx tuj aꞌ.

8 Atzun ke mastl xnakꞌtzben e tzaj tuj barc,

jawoꞌn xyub cyuꞌn jatum cycuꞌx cyiẍ,

porque mya najchak taꞌ ttzi txꞌotxꞌ,

balo cyaje ech.

9 Tej cyul canun ttzi txꞌotxꞌ o cyil otok cub pekꞌchaj kꞌakꞌ,

ex tocx jun cyiẍ twitz kꞌakꞌ,

ex tucꞌix wabj attok.

10 Xi tmaꞌn Jesús cye:

—Cyiꞌntze cab ox cyiẍ aju ma xtzyet cyuꞌne jaꞌlo,

chi Jesús.

11 Ocxtzun Simón Pedro tuj barc,

ex icꞌtz tiꞌn xyub ttzi txꞌotxꞌ,

nojni tuꞌn 153 cyiẍ matij;

masque nim cyiẍ tuj xyub,

pero mintiꞌ cub tzakj.

12 Xitzun tmaꞌn Jesús cye:

—Cytzaje,

che waꞌne.

Ex mi jun xnakꞌtzben oc tnimarin tib tuꞌn t-xi tkanin:

¿Alcyeya?

chiwt,

porque baꞌn cyuꞌn ka ate Kajaw.

13 Atzunte Jesús tzaj lakꞌeꞌ,

ex tzaj tiꞌn wabj,

xi tkꞌoꞌn cye,

ax icx tzaj tiꞌn cyiẍ ex xi tkꞌoꞌn cye.

14 Atzun toxinmajiꞌn jlu cub tyecꞌun tib Jesús cywitz ke t-xnakꞌtzben tjatzlenxi ankꞌin cyxol cyimni.

15 Tejtzun cybaj waꞌn,

xi tkanin Jesús te Simón Pedro:

—Aya Simón tcyꞌajal Jonás,

¿maspe cꞌujlaꞌn kine tuꞌna ic tzaꞌn cye jlu?

Chi Jesús.

—Cꞌujlaꞌna wuꞌne,

Tat;

baꞌn tuꞌna ka cꞌujlaꞌna wuꞌne,

chi Pedro.

Xitzun tmaꞌn Jesús te:

—Che tcwentin oca ke tal nẍneꞌle.

16 Xitzun tmaꞌn Jesús te tcabmajiꞌn:

—Aya Simón tcyꞌajal Jonás,

¿cꞌujlaꞌnpe kine tuꞌna?

—Cꞌujlaꞌna wuꞌne,

Tat;

baꞌn tuꞌna ka cꞌujlaꞌna wuꞌne,

chi Pedro.

Xitzun tmaꞌn Jesús te:

—Che tcwentin oca ke nẍneꞌle.

17 Xitzun tmaꞌn te toxinmajiꞌn:

—Aya Simón tcyꞌajal Jonás,

¿cꞌujlaꞌnpe kine tuꞌna?

Tzajtzun tbis Pedro tuꞌnju tzaj kꞌmaꞌn te toxinmajiꞌn:

¿Cꞌujlaꞌnpe kine tuꞌna?

Xitzun ttzakꞌweꞌn:

—Tat,

tcyakil baꞌn tuꞌna;

baꞌn tuꞌna ka cꞌujlaꞌna wuꞌne.

Xitzun tmaꞌn Jesús te:

—Che tcwentin oca ke nẍneꞌle.

18 Ax toc cxel nmaꞌne teya,

tej matok cuꞌxuna,

oc tcꞌaloꞌn tcꞌuꞌja,

ex xiꞌya nok jatum tajbila;

octzun ttijina,

cjawil tiꞌn tkꞌaba,

ex cꞌoquel cꞌaloꞌn tcꞌuꞌja tuꞌn juntl,

ex cxel kꞌiꞌna jatum mya tajbila tuꞌn t-xiꞌya.

19 Tma Jesús jlu tuꞌn ttzaj tchicꞌbaꞌn tzaꞌn tten tuꞌn tcyim Pedro tuꞌntzun tjaw nimsaꞌn tbi Dios.

Tej tmante jlu ax icx xi tmaꞌn:

—Lpeꞌca wiꞌje.

20 Ajtz tqueꞌyin Pedro ex o til lepchoꞌc cyiꞌj aju xnakꞌtzben cꞌujlaꞌnxix tuꞌn Jesús,

axju xnakꞌtzben aju xi txaleꞌ twiꞌ ttzi t-xuꞌc Jesús tej cywaꞌn tiꞌj mes ex xi tmaꞌn te:

Tat,

¿alcyetzun cxel kꞌonte teya tuj cykꞌab xjal?

21 Tej tlonte Pedro xnakꞌtzben lu,

xi tmaꞌn te Jesús:

—Tat,

¿yajtzun te jlu ti cbajel tiꞌj?

22 Xitzun tmaꞌn Jesús te Pedro:

—Ka wajbile tuꞌn tcyaj ten atx ocxi wule,

¿tiꞌ taja tiꞌj?

Lpeꞌc teya wiꞌje.

23 Aju yol lu el lakꞌeꞌ tkanil cyxol erman ka mintiꞌ tuꞌn tcyim ju xnakꞌtzben lu.

Pero mintiꞌ xi tmaꞌn Jesús te tuꞌn miꞌn tcyim,

nok oꞌcx tma:

Ka wajbile tuꞌn tcyaj ten atx ocxi wule,

¿tiꞌ taja tiꞌj?

24 Atzunju xnakꞌtzben lu in tchicꞌbaꞌn axix toc tiꞌj tcyakil jlu,

ex ma cyaj ttzꞌiban tcyakil jlu.

Ex baꞌn kuꞌn aju yol tzaj tchicꞌbaꞌn axix toc.

25 Ex at nimcu mastl o tbincha Jesús,

nokwit ma che cub tzꞌibet teyle junjun,

tuj nnable mlay bant cyten ke libro twitz txꞌotxꞌ nokwit ẍe tzꞌibanjtz.

Icxwitju.