In che jyon xjal tumel tzaꞌn tten tuꞌn ttzyet Jesús
26
Tej tbaj tmaꞌn Jesús tcyakilju yol lu,
xi tmaꞌn cye t-xnakꞌtzben:
2 —Biꞌn cyuꞌne caꞌj cub icꞌset Xjan Kꞌij,
ex akine scꞌoꞌmaj kine tuꞌn Dios tuꞌn ntene cyucꞌil xjal chin xel kꞌoꞌne tuj cykꞌab xjal tuꞌn njaw kꞌoꞌne twitz crus,
chi Jesús cye.
3 Bajtzun cychmon cyib ke nejenel cye pal,
cyucꞌix ke xnakꞌtzal tiꞌj ley,
cyucꞌix ke cytijil xjal judiy,
baj cychmon cyib twitz tja nejenel cye pal,
Caifás tbi.
4 Banttzun tiꞌj cyuꞌn nok minaben tuꞌn ttzyet Jesús cyuꞌn tuj ewaj ex tuꞌn tcub cybyoꞌn.
5 Pero cyma cyxolx:
—Mya tuj ninkꞌij tuꞌn ttzyet kuꞌn,
tuꞌntzun miꞌn cyjaw tilj xjal.
Jax koꞌn perjum tibaj twi Jesús tuꞌn jun xuꞌj
6 Tej tten Jesús tuj Betania tuj tja Simón aju at txꞌaꞌc tiꞌj nej,
aju txꞌaꞌc mintiꞌ kꞌanbil tiꞌj,
7 pon jun xuꞌj tucꞌil Jesús,
kꞌiꞌn jun tal botey perjum tuꞌn,
puro wiꞌyilxix;
jax tkoꞌn xuꞌj perjum tibaj twi Jesús tej kꞌukltok Jesús tiꞌj mes.
8 Tej cylonte ke t-xnakꞌtzben jlu,
tzaj cykꞌoj:
—¿Tikuꞌn nokx gan ma naj perjum lu?
9 Porque mawtlo txi cꞌayit jlu tuꞌn tcyaj nim pwak twiꞌ ex tuꞌn t-xi kꞌot cye meba,
che chi.
10 Tejtzun tel tnicꞌ Jesús tiꞌj,
xi tmaꞌn cye:
—¿Tikuꞌn ma tzaj cykꞌoje tiꞌj xuꞌj lu?
Porque ate xuꞌj lu ma tbincha jun baꞌn wiꞌje.
11 Porque ke meba cucx che tel cyucꞌile,
atzun weye mya cucx chin tele cyucꞌile.
12 Porque tej xjax tkoꞌn xuꞌj perjum wibaje,
ma tbincha jlu tuꞌn tbant ntene tuꞌn ncuꞌx makuꞌne.
13 Ax toc cxel nmaꞌne cyeye,
tuj tcyakil twitz txꞌotxꞌ,
nok jaꞌx tumel cpacbetel tkanil colbil lu,
ax icx cxel txꞌolbaꞌn aju ma tbincha xuꞌj lu te nabl te.
Xi cꞌayin Jesús tuꞌn Judas
14 At jun cyxol keju cablaj t-xnakꞌtzben Jesús,
Judas Iscariote tbi,
xiꞌ cyucꞌil nejenel cye pal
15 ex xi tmaꞌn cye:
—¿Alcye ctzajel cykꞌoꞌne weye ka ma txi nkꞌoꞌne Jesús tuj cykꞌabe?
Chi Judas.
Tzajtzun kꞌoꞌn 30 sak pwak te.
16 Biꞌxtzun oc ten Judas jyol tumel tzaꞌn tten tuꞌn t-xi kꞌoꞌn Jesús tuj cykꞌab.
Waꞌn Jesús cyucꞌil t-xnakꞌtzben tuj Xjan Kꞌij
17 Tujtzun tnejel kꞌij te ninkꞌij tuꞌn cywaꞌn xjal pan mintiꞌ t-samel tuꞌn tjaw mal tcꞌuꞌj,
e pon lakꞌeꞌ t-xnakꞌtzben Jesús ttxlaj ex xi cymaꞌn te:
—¿Jatum taja tuꞌn tbaj kbinchaꞌne wabj tuꞌn twaꞌna tuj Xjan Kꞌij?
18 Xitzun tmaꞌn Jesús cye:
—Cyxiꞌye tucꞌil jun xjal tuj tnam ex cymanxe te:
Chi xnakꞌtzal cyjaꞌ:
Chꞌix tpon or weye;
tuj tjaya cbel wicꞌsaꞌne Xjan Kꞌij cyucꞌil nxnakꞌtzbene,
che chicuye te.
19 Cybincha xnakꞌtzben ic tzaꞌn o tma Jesús cye,
baj cybinchaꞌn wabj tuꞌn ticꞌset Xjan Kꞌij.
20 Tejtzun koc yupj,
cub keꞌ Jesús tiꞌj mes cyucꞌix cablaj t-xnakꞌtzben.
21 Matok in che waꞌn,
tma Jesús:
—Ax toc cxel nmaꞌne cyeye,
ax jun cyeye cxel kꞌonte weye tuj cykꞌab xjal.
22 Tzajtzun nimxix cybis ke t-xnakꞌtzben,
ex teyle junjun oc ten kanil te Jesús cyjaꞌ:
—¿Kape a kine Tat?
Che chi.
23 Xi ttzakꞌweꞌn Jesús:
—Aju cbelex tmuꞌn twa junx wucꞌile tuj lak,
atzunju cxel kꞌonte weye tuj cykꞌab xjal.
24 Ax toc chin xel kꞌoꞌne tuj cykꞌab xjal ic tzaꞌnx in tmaꞌn tuj Tuꞌjil wiꞌje,
akine scꞌoꞌmaj kine tuꞌn Dios tuꞌn ntene cyucꞌil xjal;
pero becꞌbil twitz ju xjal aju cxel kꞌonte weye tuj cykꞌab xjal.
Mas baꞌn miwt o itzꞌj ju xjal lu,
chi Jesús.
25 Xitzun ttzakꞌweꞌn Judas,
aju attok t-xiꞌyil kꞌonte Jesús tuj cykꞌab xjal:
—¿Kape akine Xnakꞌtzal?
Xi tmaꞌn Jesús te:
—Atzuna.
26 Matok in che waꞌn,
tzaj ttzyuꞌn Jesús pan,
xi tkꞌoꞌn chjonte te Dios ex cub tpiẍcꞌuꞌn,
xi tkꞌoꞌn cye t-xnakꞌtzben,
ex xi tmaꞌn:
—Cytzyunxe ex cywaꞌnxe;
atzun nximlale jlu.
27 Ex tzaj ttzyuꞌn ju vas,
xi tkꞌoꞌn chjonte te Dios,
xi tkꞌoꞌn cye,
ex xi tmaꞌn:
—Cycꞌanxe jlu cycyakile,
28 porque atzun nchcꞌele jlu te cyuwsabl te acꞌaj yol,
aju ma cyaj bant tiꞌj tuꞌn Dios cyucꞌile;
atzun nchcꞌele cꞌelel chitj tuꞌn cylaj nimcu xjal,
tuꞌn tnajset cyil.
29 Cxel nmaꞌne cyeye,
texju jaꞌlo mlay txi ncꞌaꞌntle taꞌl twitz uva,
maxitzun cxel ncꞌaꞌne juntl maj junx cyucꞌile tuj tkꞌijlalil oc tul tcawbil Nmane,
chi Jesús cye.
Chin bel tewana ox maj chi Jesús te Pedro
—Cycyakile cꞌelel cypaꞌn cyibe wiꞌje te konicꞌan jaꞌlo,
porque in tmaꞌn tuj Tuꞌjil:
Cbel nbyoꞌne pastor,
ex che elel sputj ke t-ẍneꞌl.
32 Octzun njatz ankꞌine,
nej chin xeꞌle cywitze tuj Galiley,
chi Jesús cye.
33 Xi ttzakꞌweꞌn Pedro:
—Masque cycyakil cꞌelel cypaꞌn cyib tiꞌja,
pero weye mlayx tzꞌel npaꞌn wibe tiꞌja,
chi Pedro.
34 Xi tmaꞌn Jesús te:
—Ax toc cxel nmaꞌne teya,
te konicꞌan jaꞌlo naꞌnxtok ttzaj okꞌ tzecꞌ,
ox maj cbel tewana cywitz xjal ka mintiꞌ ojtzkiꞌn kine tuꞌna,
chi Jesús te.
35 Xi tmaꞌn Pedro:
—Ma bant-x ka ma chin cyime tucꞌila,
pero mlay cub wewane.
Ax icx cyma cycyakil xnakꞌtzben.
In naꞌn Jesús Dios tuj Getsemaní
36 Pontzun Jesús cyucꞌix ke t-xnakꞌtzben tuj jun lugar Getsemaní tbi ex xi tmaꞌn cye t-xnakꞌtzben:
—Che kecuye tzalu,
atzun weye ma chinxe naꞌl Dios ma chixin.
37 Xi tucꞌin Jesús Pedro tucꞌil,
cyucꞌix keju cabe tcyꞌajal Zebedey.
Tzajtzun nim tbis ex tzaj taꞌw tuj tanmi.
38 Xitzun tmaꞌn Jesús cye:
—Nimxix in bisun wanmiye,
chꞌix ncyime tuꞌn bis.
Che tencje tzalu ex che xkꞌukine wucꞌile.
39 Ex xi lakꞌeꞌ chꞌintl,
cub mutzeꞌ,
oc ten naꞌl Dios ex tma:
—Nman,
ka at tumel,
cuchiwt tuꞌn miꞌn ticꞌx jlu wuꞌne;
pero mya tuꞌn tbant aju weye wajbil,
nok oꞌcx tuꞌn tbant aju teya tajbil,
chi Jesús.
40 Ultzun cyucꞌil t-xnakꞌtzben,
e cnet tuꞌn in che tan;
xitzun tmaꞌn te Pedro:
—¿Maj mintiꞌ ma cyipaye tuꞌn cyxkꞌukine jun or wucꞌile?
41 Che xkꞌukine ex che naꞌne Dios tuꞌn miꞌn cyoque tuj joybil cyiꞌje;
ax toc taj cyanmiye tuꞌn cyxkꞌukine,
atzun cyximlale mintiꞌ tipun.
42 Xi lakꞌeꞌ juntl maj Jesús,
oc ten naꞌl Dios tcabmajiꞌn ex tma:
—Nman,
ka mintiꞌ tumel tuꞌn miꞌn ticꞌx jlu wuꞌne,
bant-xwit aju tajbila,
chi Jesús.
43 Ul juntl maj cyucꞌil t-xnakꞌtzben,
ex e cnet tuꞌn in che tan,
porque attok nim watl tuj cywitz.
44 E cyajtzun tkꞌoꞌn,
xi lakꞌeꞌ juntl maj,
oc ten naꞌl Dios toxmajiꞌn,
ex ax yol xi tmaꞌn.
45 Ultzun cyucꞌil t-xnakꞌtzben ex xi tmaꞌn cye:
—Che tanxtzune jaꞌlo ex che ojlane.
Lu ma pon or tuꞌn nxi kꞌoꞌne tuj cykꞌab xjal aj il,
akine scꞌoꞌmaj kine tuꞌn Dios tuꞌn ntene cyucꞌil xjal.
46 Che weꞌctze,
koꞌke;
cyqueꞌyinxe,
ma tzul lakꞌeꞌ aju cxel kꞌonte weye tuj cykꞌab xjal,
chi Jesús cye.
Tej t-xi kꞌiꞌn Jesús pres
47 Matok in yolin Jesús,
pon Judas,
jun cyxol keju cablaj xnakꞌtzben,
ex tucꞌix nim xjal tucꞌil kꞌiꞌn spad cyuꞌn tucꞌix tzeꞌ,
e tzaj samaꞌn cyuꞌn nejenel cye pal ex cyuꞌn cytijil xjal judiy.
48 Otok txi tmaꞌn Judas cye tzaꞌn tten tuꞌn t-xi tkꞌoꞌn tuj cykꞌab.
—Aju cꞌelel ntzꞌubane twitz,
atzunju,
cytzyuntztzune,
chi Judas xi tmaꞌn cye.
49 Pon lakꞌeꞌ naj Judas ttxlaj Jesús ex tma:
—Jeꞌc,
Xnakꞌtzal.
—Aya wucꞌil,
¿alcye t-sanjelala?
E pontzun lakꞌeꞌ ke xjal,
tzyettzun Jesús cyuꞌn ex xi cyiꞌn pres.
51 Pero at jun cye keju ateꞌtok tucꞌil Jesús jatz tiꞌn t-spad,
oc ttxꞌemin jun tmajen nejenel cye pal ex biꞌx el t-ẍcyin tuꞌn.
52 Xitzun tmaꞌn Jesús te:
—Kꞌoꞌn cuꞌxa t-spadiya tuj tjayil.
Porque cycyakil keju kꞌiꞌn spad cyuꞌn,
ax tuꞌn spad che najel.
53 ¿Mintiꞌpe biꞌn tuꞌna ka jacu txi nkanine te Nmane tuꞌn ttzaj t-samaꞌn naj mas te cablaj cꞌloj anjel?
54 Pero nokwit ma txi nkanine,
¿tzaꞌntzun tten tuꞌn tjapun aju yol tzꞌiban tuj Tuꞌjil in tmaꞌn ka il tiꞌj tuꞌn ttzaj tcyakil jlu wiꞌje?
55 Entons xi tmaꞌn Jesús cye xjal:
—¿Maj ma che tzaje wiꞌje ic tzaꞌn tiꞌj jun elekꞌ,
kꞌiꞌn spad cyuꞌne tucꞌix tzeꞌ tuꞌn ntzyete cyuꞌne?
Tcyakil kꞌij in cub keꞌye cyucꞌile tuj tja Dios,
xi nkꞌoꞌne xnakꞌtzbil,
ex mintiꞌ in tzaj cytzyuꞌne.
56 Pero tcyakil jlu ma bant tuꞌntzun tjapun aju tzꞌiban tuj cyuꞌjil t-sanjel Dios,
chi Jesús cye.
Cyajtzun kꞌoꞌn Jesús cyuꞌn cycyakil xnakꞌtzben,
ex e jeꞌl ok.
Pon kꞌiꞌn Jesús cywitz Aj Sanjelal
57 Akeju e tzaj tzyunte Jesús,
xi kꞌiꞌn Jesús cyuꞌn twitz ju nejenel cye pal,
Caifás tbi,
atzun cychmon cyib ke xnakꞌtzal tiꞌj ley cyucꞌix ke cytijil xjal.
58 Atzunte Pedro lepchix t-xiꞌ najchak,
pon ttxaꞌn tpeꞌn nejenel cye pal;
ocxtzun Pedro ex cub keꞌ cyucꞌil ke polisiy,
tuꞌn tqueꞌyinte ti cbajel.
59 Atzun cye nejenel cye pal cyucꞌix ke cytijil xjal cyucꞌix cycyakil Aj Sanjelal cye xjal Judiy in che jyon tiꞌj testiw tuꞌn cynicꞌan yol tiꞌj Jesús,
tuꞌntzun tcub t-sentens Jesús tuꞌn tcyim.
60 Pero mintiꞌ cnet jun til cyuꞌn,
masque nimcu testiw e pon nicꞌal yol tiꞌj.
Pero te mancbilxi pon cabe testiw nicꞌal yol
61 ex cyma:
—O tma xjal lu:
Jacu bant tuꞌn tcub xitj tja Dios wuꞌne,
ex tuꞌn tjaw nbinchaꞌne juntl maj tuj ox kꞌij,
chi ju xjal lu,
che chi.
62 Jawtzun weꞌ aju nejenel cye pal ex xi tmaꞌn te Jesús:
—¿Maj mintiꞌ jun yol in tzaj ttzakꞌweꞌna?
¿Chi toc tuꞌna tiꞌj ju in cymaꞌn xjal lu tiꞌja?
63 Atzunte Jesús mintiꞌ o kꞌajt.
Xitzun tmaꞌn nejenel cye pal te:
—Cxel ncyuwsaꞌne teya twitz Dios itzꞌ,
kꞌmantza keye ka aya ju Crist Tcꞌwaꞌl Dios,
aju at toclen tuꞌn Dios.
64 Xi tmaꞌn Jesús te:
—Akine ic tzaꞌn ma tmaya;
ax icx cxel nmaꞌne cyeye,
tzul kꞌij oc cyilaꞌye kꞌukl kine tuj bankꞌabaj ttxlaj Dios nim tipumal,
ex oc cyilaꞌye oc ntzaje tuj muj twitz cyaꞌj,
akine scꞌoꞌmaj kine tuꞌn Dios tuꞌn ntene cyucꞌil xjal.
65 Atzunte nejenel cye pal el t-sbitꞌun t-xbalun tiꞌj ex tma:
—Ma yolin te jlu mya baꞌn tiꞌj Dios.
¿Ti til mastl testiw ke?
Lu ma cybiye jaꞌlo ma xmayin tiꞌj Dios.
66 ¿Chi toc cyuꞌne?
Atzun cye xi cytzakꞌweꞌn:
—At til,
baꞌn tuꞌn tcyim.
67 Octzun cytzuban tuj twitz Jesús,
oc cybajuꞌn tuꞌn cykꞌab,
ex junjuntl e oc ten tzꞌajal twitz,
68 in cymaꞌn:
—Aya Crist at toclena tuꞌn Dios,
kꞌmantza keye alcye ma tzꞌoc bajun teya,
che chi.
Cub tewan Pedro ka mintiꞌ ojtzkiꞌntok Jesús tuꞌn
69 Atzunte Pedro kꞌukltok ttxaꞌn peꞌn;
ex pon lakꞌeꞌ jun criad ttxlaj ex xi tmaꞌn te:
—Ax icx teya o tena tucꞌil Jesús aju aj Galiley.
70 Atzunte Pedro cub tewan cywitz cycyakil ex tma:
—Mintiꞌ biꞌn wuꞌne aju in tmaꞌna.
71 Etztzun Pedro ttzi ja,
o ilwaj tuꞌn juntl criad ex xi tmaꞌn criad cye xjal axtok ateꞌ:
—Ax icx te jlu o ten tucꞌil Jesús aj Nazaret,
chi criad.
72 Pero cub tewan Pedro juntl maj,
xi tmaꞌn tzkan Dios.
—Mintiꞌ ntzkiꞌne twitz xjal lu,
chi Pedro.
73 Te matokx e pon lakꞌeꞌ ke xjal axtok ateꞌ ex xi cymaꞌn te Pedro:
—Ax toc icx teya ajuna cyucꞌil,
porque tiꞌj tyola junxitl tbinx nneꞌl knicꞌe tiꞌja.
74 Xitzun tmaꞌn Pedro:
—Tzkan Dios ax toc nyole,
baꞌn tuꞌn ttzaj jun ncastiwoye tuꞌn Dios ka mya ax toc nyole.
Mintiꞌ ntzkiꞌne xjal lu,
chi Pedro.