El ttxꞌjoꞌn Jesús cykan ke t-xnakꞌtzben
13
Naꞌnxtok tul canun aju ninkꞌij Xjan Kꞌij tbi,
baꞌntok tuꞌn Jesús otok pon tkꞌijlalil tuꞌn ticꞌ tzalu twitz txꞌotxꞌ ex tuꞌn tpon tucꞌil Tman;
tuꞌnju at tcꞌujlalil cyiꞌj ke t-xnakꞌtzben ateꞌ tzalu twitz txꞌotxꞌ,
cyjaꞌtzun xi tyecꞌun tcꞌujlalil nimxix cye.
2-4 Otok tma tajaw il tuj tanmi Judas Iscariote,
aju tcyꞌajal Simón,
tuꞌn t-xi kꞌoꞌn Jesús tuj cykꞌab xjal tuꞌn,
ex baꞌn tuꞌn Jesús tcyakil otok tzaj kꞌoꞌn tuj tkꞌab tuꞌn Tman,
ex baꞌntok tuꞌn ka tucꞌil Dios otok tzaj ex tucꞌil Dios tuꞌn tpon,
cyjaꞌtzun jaw weꞌ tiꞌj mes matok in che waꞌn,
el tiꞌn txowbil tiꞌj ex tzaj tiꞌn jun xbalun oc tcꞌaloꞌn tcꞌuꞌj.
Jesús lava los pies de los discipulos (Juan 13.1-17)
5 Cuꞌx tkoꞌn chꞌin aꞌ tuj jun cꞌoẍ,
oc ten txꞌjolte cykan ke t-xnakꞌtzben,
ex el t-suꞌn tiꞌj cykan tuꞌnju xbalun aju cꞌaloꞌntok tcꞌuꞌj.
6 Pontzun Jesús twitz Simón Pedro;
xitzun tmaꞌn Pedro te:
—Tat,
¿maj aya cꞌelel txꞌjonte nkane?
7 Xi ttzakꞌweꞌn Jesús:
—Aju in nbinchaꞌne mintiꞌ nneꞌl tnicꞌa tiꞌj jaꞌlo,
cꞌelel tnicꞌa tiꞌj pero yajxi.
8 Xitzun tmaꞌn Pedro te:
—Mlayx tzꞌel ttxꞌjoꞌna nkane.
Xitzun tmaꞌn Jesús te:
—Ka mintiꞌ ma tzꞌel ntxꞌjoꞌne tkana,
mintiꞌ toclena wucꞌile.
9 Xitzun tmaꞌn Simón Pedro:
—Tat,
mya nok oꞌcx nkane tuꞌn tel ttxꞌjoꞌna,
ax icx ke nkꞌabe tucꞌix nwiꞌye.
10 Pero xi tmaꞌn Jesús te:
—Alcye ma baj txꞌjoꞌn tiꞌj,
mya il tiꞌj tuꞌn ttxꞌjet juntl maj,
nok oꞌcx ke tkan tuꞌn cytxꞌjet,
porque sak tiꞌj tcyakil;
atzun cyeye sak cyiꞌje,
pero mya cycyakile,
chi Jesús.
11 Porque baꞌn tuꞌn Jesús alcye tuꞌn t-xi kꞌonte te tuj cykꞌab xjal;
cyjaꞌtzun o tma:
Mya cycyakile sak cyiꞌje.
12 Tejtzun tbaj txꞌjet cykan tuꞌn,
oc tkꞌoꞌn juntl maj ju txowbil tiꞌj,
cub keꞌ juntl maj tiꞌj mes,
ex xi tmaꞌn cye:
—¿Mape tzꞌel cynicꞌe tiꞌj ju ma nbinchaye cyeye?
13 In cymaꞌne ka akine Xnakꞌtzal cyeye ex Cyajawe;
baꞌn in cymaꞌne,
porque ax toc Xnakꞌtzal kine,
ex akine Cyajawe.
14 Ma tzꞌel ntxꞌjoꞌne cykane,
ex akine Xnakꞌtzal cyeye ex Cyajawe,
cyjaꞌtzun icx cyeye tuꞌn tel cytxꞌjoꞌne cykane cyxolxe.
15 Porque ma txi nyecꞌune cyeye,
ic tzaꞌn ma nbinchaye cyeye,
icxtzun cyeye tuꞌn cybinchanteye.
16 Ax toc cxel nmaꞌne cyeye,
aju majen mya mas at toclen twitz ju tpatrón,
ex aju in xi samaꞌn mya mas at toclen twitz ju samal te.
17 Ka ma tzꞌel cynicꞌe tiꞌj jlu,
at-xix tzalajbil cyeye ka ma cybinchaye.
18 Mya cyiꞌje cycyakile in chin yoline;
baꞌn wuꞌne alcye keju ma che jaw nscꞌoꞌne;
pero il tiꞌj tuꞌn tjapun aju in tmaꞌn tuj Tuꞌjil chi cyjaꞌ:
Aju ma waꞌn wucꞌile,
ma tzꞌoc te aj kꞌoj wiꞌje,
chi tuj Tuꞌjil.
Jesús predice la traición (Juan 13.18-38)
19 Biꞌx cxel nmaꞌne cyeye jaꞌlo naꞌnxtok tbant jlu,
tuꞌntzun t-xi cyocslaꞌne ka Akine oc tbant jlu.
20 Ax toc cxel nmaꞌne cyeye,
alcye ma cꞌmonte aju cxel nsamaꞌne,
ax kine in chin tcꞌmoꞌn;
ex aju ma cꞌmonte weye,
ax icx in cꞌmonjtz Nmane tuꞌn,
aju tzaj samante weye,
chi Jesús cye.
In tmaꞌn Jesús ka ate Judas tuꞌn t-xi cꞌayin te
21 Tej tbaj tmaꞌn Jesús jlu,
tzaj taꞌw tuj tanmi,
ex clarxix tzaj tmaꞌn cyjaꞌ:
—Ax toc cxel nmaꞌne cyeye,
ax jun cyeye cxel kꞌonte weye tuj cykꞌab xjal.
22 Atzun cye t-xnakꞌtzben baj cyqueꞌyin tuj cywitz,
in che ximan tiꞌj alcye o yolin Jesús tiꞌj.
23 At jun t-xnakꞌtzben Jesús,
aju cꞌujlaꞌnxix tuꞌn,
kꞌukltok tiꞌj mes ttxlaj Jesús.
24 Xitzun tyecꞌun Simón Pedro señ te tuꞌn tkꞌab,
tuꞌn t-xi tkanin te Jesús alcye o yolin Jesús tiꞌj.
25 Xitzun txaleꞌ twiꞌ ttzi t-xuꞌc Jesús,
ex xi tkanin te:
—Tat,
¿alcyetzun?
26 Xitzun tmaꞌn Jesús:
—Alcyeju ma txi nkꞌoꞌne pan te,
otok cuꞌx nmuꞌne tuj lak,
atzunju,
chi Jesús.
Cuꞌxtzun tmuꞌn Jesús pan tuj lak,
ex xi tkꞌoꞌn te Judas Iscariote aju tcyꞌajal Simón.
27 Tej t-xi twaꞌn Judas pan,
ocx naj Satanás tuj tanmi.
Xitzun tmaꞌn Jesús te:
—Aju oc tbinchaꞌya,
bincham naja.
28 Pero mi jun cye keju kꞌukltok tiꞌj mes el tnicꞌ tiꞌj tikuꞌn xi kꞌmaꞌn te icju.
29 Tuj cynabl junjun malo txi tmaꞌn Jesús te Judas tuꞌn t-xiꞌ lakꞌolte aju tuꞌn tajben tuj ninkꞌij,
ex ka tuꞌn t-xi kꞌot chꞌin cye meba;
porque ate Judas kꞌil chꞌuꞌẍ tcubil pwak.
30 Tejtzun tbaj twaꞌn Judas ju pan,
jurat etz naj;
ex otok ko oc yupj.
Aju acꞌaj mandamyent
31 Tetzlenxitzun Judas tma Jesús:
—Jaꞌlo chin jawil nimsaꞌne,
akine scꞌoꞌmaj kine tuꞌn Dios tuꞌn ntene cyucꞌil xjal,
ex cjawil nimsaꞌn Dios nok wuꞌne.
32 Ka ma jaw nimsaꞌn Dios nok wuꞌne,
ax icx tuꞌnx Dios chin jawil nimsaꞌne,
ex jurat naj chin jawil nimsaꞌne tuꞌn.
33 Akeye tal ncꞌwaꞌle,
nok chꞌintl chin tele cyucꞌile.
Che jyole wiꞌje;
pero ic tzaꞌn xi nmaꞌne cye xjal judiy,
ax icx cxel nmaꞌne cyeye jaꞌlo:
Mlay cheꞌxe jatum chin xeꞌle.
34 Cxel nkꞌoꞌne jun acꞌaj mandamyent cyeye:
Tuꞌn cycꞌujlante cyibe cyxolxe ic tzaꞌn weye ma che ncꞌujlaye,
icxtzun cyeye tuꞌn cycꞌujlante cyibe cyxolxe.
35 Ka ma cycꞌujla cyibe cyxolxe,
tuꞌntzun jlu cꞌelel cynicꞌ cycyakil xjal cyiꞌje ka nxnakꞌtzben keye,
chi Jesús cye.
Cbel tewana ox maj ka mintiꞌ ojtzkiꞌn kine tuꞌna, chi Jesús te Pedro
36 Xitzun tmaꞌn Simón Pedro.
—Tat,
¿jatum cxeꞌla?
Xitzun ttzakꞌweꞌn Jesús:
—Mlayx tzꞌoc lpeꞌya wiꞌje jaꞌlo jatum chin xeꞌle;
cꞌoquel lpeꞌya wiꞌje pero yajxi.
37 Xitzun tmaꞌn Pedro te:
—Tat,
¿tikuꞌn mlayx chin oc lpeꞌye tiꞌja jaꞌlo?
Jacu txi nkꞌon wibe tuꞌn ncyime tuꞌn tlaja.
38 Xi ttzakꞌweꞌn Jesús:
—¿Maj jacu takꞌ tiba tuꞌn tcyima tuꞌn nlaje?
Ax toc cxel nmaꞌne teya,
naꞌnxtok ttzaj okꞌ tzecꞌ,
cbel tewana ox maj cywitz xjal ka mintiꞌ ojtzkiꞌn kine tuꞌna.