Ate Jesús ju be tuꞌn kpon tucꞌil Dios Mambaj
14
Miꞌn baj cycꞌuꞌje;
keꞌc cycꞌuꞌje tiꞌj Dios,
ax icx keꞌc cycꞌuꞌje wiꞌje.
2 Tuj tja Nmane at nimcu najbil;
nokwit mintiꞌ,
mawtlo txi nmaꞌne cyeye;
chin xeꞌltzune tuꞌn tbaj nbinchaꞌne jun najbil cyeye.
El único camino a Dios (Juan 14.1-14)
3 Oc nxiꞌye ex oc tbaj nbinchaꞌne jun cynajbile,
chin ule juntl maj ex che xel wiꞌne wucꞌile tuꞌntzun cytene wucꞌile jatum chin tele.
4 Ex baꞌn cyuꞌne jatum chin xeꞌle,
ex ojtzkiꞌn be cyuꞌne,
chi Jesús.
5 Xitzun tmaꞌn Tomás te:
—Tat,
mintiꞌ baꞌn kuꞌne jatum cxeꞌla,
¿tzaꞌntzun tten tuꞌn tel knicꞌe tiꞌj ju be?
6 Xi ttzakꞌweꞌn Jesús:
—Akine ju be,
akine ju yol axix toc,
ex akine kꞌol chwinklal;
mi aꞌl jun xjal jacu pon tucꞌil Dios Mambaj,
ka mya wuꞌne.
7 Nokwit ma tzꞌel cynicꞌe wiꞌje,
mawtlo tzꞌel cynicꞌe tiꞌj Nmane;
atzun jaꞌlo ma tzꞌel cynicꞌe tiꞌj ex ma cyile.
8 Xitzun tmaꞌn Pelip te Jesús:
—Tat,
yecꞌuntza Dios Mambaj keye,
ex acuxtzunju.
9 Xi ttzakꞌweꞌn Jesús:
—¿Maj naꞌnx tel tnicꞌa wiꞌje,
Pelip?
Ex ma chin tene nim kꞌij cyucꞌile.
Alcye ma chin ilwaje tuꞌn,
ma ilwaj Dios Mambaj tuꞌn.
¿Tzaꞌntzun tten in tzaj tmaꞌna tuꞌn t-xi nyecꞌune Dios Mambaj cyeye?
10 ¿Maj mintiꞌ in xi tocslaꞌna ka akine tucꞌil Nmane ex a Nmane wucꞌile?
Aju yol in xi nmaꞌne cyeye,
mya wexwe nyol,
nok oꞌcx ate Nmane najl wucꞌile,
axtzunju in binchante takꞌun.
11 Cyocslame nyole,
akine tucꞌil Nmane ex at Nmane wucꞌile;
katzun miꞌn cyaje tuꞌn t-xi cyocslaꞌne nyole,
pero cuchiwt tuꞌn t-xi cyocslaꞌne tuꞌnju nnoꞌc cyqueꞌyine nbinchbene.
12 Ax toc cxel nmaꞌne cyeye,
alcye ma tzꞌocslan wiꞌje,
ax akꞌuntl oc tbinchaꞌ ic tzaꞌn in nbinchaꞌne;
ex mas nim akꞌuntl oc tbinchaꞌ cywitz ke jlu,
porque akine ma chinxe tucꞌil Nmane.
13 Ex tcyakilju cxel cykanine te Nmane tuꞌnju ocslal keye wiꞌje,
oc nbinchaꞌye cyeye tuꞌntzun tjaw nimsaꞌn tbi Nmane tiꞌj ju oc nbinchaꞌye cyeye,
akine Tcꞌwaꞌl.
14 Ka at jun tiꞌxti ma txi cykanine tuꞌnju ocslal keye wiꞌje,
oc nbinchaꞌye cyeye.
In tmaꞌn Jesús tuꞌn tul Xewbaj Xjan
15 Ka in chin cycꞌujlaꞌne,
japunx ke nmandamyente cyuꞌne.
Jesús habla del Espíritu Santo (Juan 14.15-31)
16 Ex akine chin cubsal twitz Nmane,
ctzajeltzun tkꞌoꞌn Nmane juntl onil cyeye ex kꞌukbalte cycꞌuꞌje tuꞌn tten cyucꞌile te jumajx.
17 Aju onil cyeye ex kꞌukbalte cycꞌuꞌje,
atzunju Xewbaj Xjan,
aju chicꞌbalte ju axix toc.
Mlay bant tuꞌn tcꞌmonjtz cyuꞌn xjal,
porque mintiꞌ nnoꞌc cyqueꞌyin,
ex mintiꞌ ojtzkiꞌn cyuꞌn;
atzun cyeye ojtzkiꞌn cyuꞌne,
porque ax najl cyucꞌile ex ax ctel tuj cyanmiye.
18 Mlay che cyaj nkꞌoꞌne meba;
chin ultle cyucꞌile.
19 Nok chꞌintl chin tele jaꞌlo,
ex mlay chin oc queꞌyintle cyuꞌn xjal;
atzun cyeye chin oquel cyqueꞌyine;
ex tuꞌnju cucx chin ankꞌile,
ax icx cyeye che ankꞌile.
20 Tuj tkꞌijlalil tzul cꞌelel cynicꞌe tiꞌj ka atine tucꞌil Nmane,
ex ateꞌye wucꞌile,
ex atine cyucꞌile.
21 Aju xjal at ke nmandamyente tucꞌil ex in che japun tuꞌn,
atzunju in chin cꞌujlanjtze tuꞌn;
ex aju xjal in chin cꞌujlanjtze tuꞌn,
oc ccꞌujlanjtzel tuꞌn Nmane,
ax icx weye oc ncꞌujlaꞌye,
ex cxel nyecꞌun wibe te,
chi Jesús xi tmaꞌn cye.
22 Xitzun tmaꞌn Judas te (mya aju Iscariote):
—Tat,
¿tzaꞌntzun tten nok oꞌcx keye ctzajel tyecꞌun tiba,
ex mya cye cycyakil xjal?
23 Xi ttzakꞌweꞌn Jesús:
—Aju xjal in cꞌujlante weye,
cxel tniman nyole;
ex oc ccꞌujlanjtzel tuꞌn Nmane,
ko ule tucꞌil,
ex ko najale tucꞌil.
24 Pero alcye jun xjal mintiꞌ in chin cꞌujlanjtze tuꞌn,
mintiꞌ in xi tniman nyole;
ex aju yol ma cybiye,
mya weye;
tete Nmane aju tzaj samante weye.
25 A jlu ma txi nmaꞌne cyeye atinxe cyucꞌile.
26 Atzunju onil cyeye ex kꞌukbal cycꞌuꞌje,
aju Xewbaj Xjan,
aju ctzajel t-samaꞌn Nmane te nxele,
atzunju ckꞌolte xnakꞌtzbil cyeye tiꞌj tcyakil,
ex oc tmaꞌ tuꞌn ttzaj cynaꞌne tcyakilju ma txi nmaꞌne cyeye.
27 Che cyjel ncawine tuj cheba tuꞌn tkeꞌ cycꞌuꞌje;
cyjel nkꞌukbaꞌne cycꞌuꞌje,
pero mya ic tten kꞌukbabl cycꞌuꞌje cxel nkꞌoꞌne ic tzaꞌn cye xjal in cykꞌoꞌn.
Cyjaꞌtzun miꞌn baj cycꞌuꞌje ex miꞌn che xobe.
28 Ma cybiye aju ma txi nmaꞌne cyeye:
Chin xeꞌle ex chin ule juntl maj cyucꞌile,
nchitzune.
Nokwit cꞌujlaꞌn kine cyuꞌne,
mawtlo che tzalaje tuꞌnju ma txi nmaꞌne ma chinxe tucꞌil Nmane;
porque ate Nmane mas at toclen nwitze.
29 Ma txi nmaꞌne cyeye jaꞌlo naꞌnxtok tjapun,
tuꞌntzun t-xi cyocslaꞌne oc tjapun.