Aju tkan uva axix toc
15
Akine tkan uva axix toc,
atzun Nmane atzun akꞌnal tiꞌj.
2 Tcyakil tkꞌab uva toc wiꞌje ka mintiꞌ twitz,
cꞌelel ttxꞌemin;
ex tcyakilju tkꞌab uva at twitz,
cꞌelel tiꞌn ttzkijil tiꞌj tuꞌntzun toc mastl twitz.
La vid y las ramas (Juan 15.1-17)
3 Atzun cyeye ma tzꞌel baj ttzkijil cyiꞌje tuꞌnju yol ma txi nmaꞌne cyeye.
4 Che tencje wucꞌile ex akine cyucꞌile.
Ic tzaꞌn jun tkꞌab uva mlay tzꞌoc twitz tuꞌnx tib ka mya toc tiꞌj tkan uva;
icxtzun cyeye mlay tzꞌoc cywitze ka mintiꞌ ẍe cyaj tene wucꞌile.
5 Akine tkan uva,
atzun cyeye tkꞌab uva keye;
alcye ax toc wiꞌje ex toc kine tiꞌj,
atzunju nim twitz cꞌoquel.
Katzun cypaꞌn cyibe wiꞌje,
mintiꞌ cbantel cyuꞌne.
6 Alcye mintiꞌ ma cyaj ten wucꞌile,
cꞌelex xoꞌn ex ctzkijel ic tzaꞌn ke tkꞌab uva in tzaj cyiꞌn xjal ex nnoꞌcx cykꞌoꞌn tuj kꞌakꞌ tuꞌn cybaj tzꞌeꞌy.
7 Ka ma che cyaj tene wucꞌile,
ex ka ma cyaj ten nyole tuj cyanmiye,
cykaninxe tcyakil alcye cyajbile,
ex ctzajel kꞌoꞌn cyeye.
8 Tuꞌntzun jlu cjawil nimsaꞌn Nmane ka ma tzꞌoc nim cywitze,
ex cyjaꞌtzun tten tuꞌn cyoque te nxnakꞌtzbene.
9 Ic tzaꞌn te Nmane ma chin cꞌujlanjtze tuꞌn,
icxtzun cyeye ma che ncꞌujlaye.
Ax che tencje tuj ncꞌujlalile.
10 Ka ma che japun ke nmandamyente cyuꞌne,
cucx ctel ncꞌujlalile cyiꞌje;
ic tzaꞌn weye ma che japun ke tmandamyent Nmane wuꞌne ex cucx ma ten tcꞌujlalil wiꞌje.
11 Tcyakil jlu ma txi nmaꞌne cyeye tuꞌntzun cytzalaje junx wucꞌile ex tuꞌn cytzalaje nimxix.
12 Atzun nmandamyente jlu:
Tuꞌn cycꞌujlante cyibe cyxolxe,
ic tzaꞌn weye ma che ncꞌujlaye.
13 Ka at jun xjal ma txi tkꞌon tib tuꞌn tcyim tuꞌn cyclet ke tamiw,
mas maꞌ tcꞌujlalil,
mlay pon tcꞌujlalil juntl ic tzaꞌn jlu.
14 Akeye che oquele te wamiwoye ka ma cybinchaye aju cxel nmaꞌne cyeye.
15 Mlay tzꞌoc nkꞌoꞌntle cybiye majen,
porque aju majen mintiꞌ baꞌn tuꞌn aju in tbinchaꞌn tpatrón;
atzun cyeye ma tzꞌoc nkꞌoꞌne cybiye te wamiwoye,
porque tcyakilju o nbiye te Nmane,
o txi ntxꞌolbaꞌne cyeye.
16 Mya akeye e jaw scꞌonte weye;
nok oꞌcx akine ẍin jaw scꞌonte cyeye ex ma tzꞌoc nkꞌoꞌne cyoclene tuꞌn cyxiꞌye akꞌnal,
ex tuꞌn toc cywitze ex cucx tuꞌn tten cywitze ic tzaꞌn jun wiꞌ uva at nim twitz,
tuꞌntzun ttzaj tkꞌoꞌn Nmane cyeye tcyakilju cxel cykanine te,
tuꞌnju ocslal keye wiꞌje.
17 Atzun jlu cxel nmaꞌne cyeye:
Tuꞌn cycꞌujlante cyibe cyxolxe.
El icꞌun Jesús cyuꞌn xjal, cyucꞌix ke ocslal
18 Ka ma che el icꞌune cyuꞌn xjal,
tzꞌelx cynicꞌe tiꞌj,
nej ma chin el icꞌune cyuꞌn xjal cywitze.
Jesús advierte sobre la persecución (Juan 15.18–16.4)
19 Nokwit te twitz txꞌotxꞌ keye,
mawtlo che cꞌujlanjtze cyuꞌn xjal ic tzaꞌn in che cꞌujlanjtz ke cyucꞌil cyuꞌn,
pero jaꞌlo ma che jaw nscꞌoꞌne cyxol xjal,
tuꞌntzunju ma che el icꞌune cyuꞌn,
porque mya te twitz txꞌotxꞌ keye.
20 Cynaꞌntze aju yol xi nmaꞌne cyeye:
Aju majen mya mas nim toclen twitz tpatrón nchitzune.
Ka ma chin yajlanjtze cyuꞌn xjal,
ax icx cyeye che yajlanjtzele cyuꞌn;
ex ka ma txi cyniman xjal nyole,
ax icx cyeye cxel niman cyyole cyuꞌn.
21 Tcyakil jlu oc cybinchaꞌ xjal cyiꞌje tuꞌn tlaj ocslal keye wiꞌje,
porque mintiꞌ ojtzkiꞌn cyuꞌn aju tzaj samante weye.
22 Nokwit mintiꞌ ma chin ule ex nokwit mintiꞌ ma chin yoline cyucꞌil,
mintiꞌwtlo cyil;
atzun jaꞌlo mintiꞌ cycolbil cyib tiꞌj cyil.
23 Alcye ma tzꞌel icꞌunte weye,
ax icx nneꞌl icꞌun Nmane tuꞌn.
24 Nokwit mintiꞌ o nbinchaye akꞌuntl cyxol,
aju mintiꞌ o bant tuꞌn juntl xjal,
mintiꞌwtlo cyil;
atzun jaꞌlo ma cyil wakꞌunbene ex ma chin el icꞌune cyuꞌn,
tucꞌix Nmane.
25 In cybinchaꞌn jlu tuꞌntzun tjapun aju yol tzꞌibamaj tuj cyley,
chi in tmaꞌn:
Nokx gan ma chin el icꞌune cyuꞌn,
chi tuj Tuꞌjil.
26 Octzun tul ju Onil cyeye ex Kꞌukbalte cycꞌuꞌje,
aju ctzajel nsamaꞌne,
aju ctzajel tucꞌil Nmane,
ctzajel tmaꞌn ju axix toc wiꞌje.
Atzun jlu aju Xewbaj Xjan,
aju chicꞌbalte ju axix toc,
atzun in tzaj tucꞌil Nmane.
27 Ax icx cyeye cxel cychicꞌbaꞌne ax toc wiꞌje,
porque ma che tene wucꞌile atxix t-xe tnejel.