16
Tcyakil jlu ma txi nmaꞌne cyeye tuꞌntzun miꞌn tcyaj cycolin cyocslable wiꞌje.
2 Che eletz lajoꞌne cyuj ja te cꞌulbil;
ex tzul tkꞌijlalil cbel cyximan xjal ka te Dios in che ajben oc cycub byoꞌne cyuꞌn.
3 Ex cbantel jlu cyuꞌn porque mintiꞌ ojtzkiꞌn Nmane cyuꞌn,
ax icx weye mintiꞌ ojtzkiꞌn kine cyuꞌn.
4 Ma txi nmaꞌne tcyakil jlu cyeye tuꞌntzun ttzaj cynaꞌne ka otok txi nmaꞌne cyeye oc tul canun tkꞌijlalil lu.
Aju takꞌun Xewbaj Xjan
Mintiꞌ xi nmaꞌne jlu cyeye t-xe tnejel,
porque atinxtoke cyucꞌile.
5 Pero jaꞌlo ma chinxe tucꞌilju tzaj samante weye;
ex mi jun cyeye in tzaj tkanin weye:
¿Jatum ma txiꞌya?
Chiwt.
Más enseñanza sobre el Espíritu Santo (Juan 16.5-33)
6 Nok oꞌcx ma tzaj nim cybise tuꞌnju ma txi nmaꞌne jlu cyeye.
7 Pero ax toc in xi nmaꞌne cyeye:
Mas baꞌn te cyeye tuꞌn nxiꞌye,
porque ka mintiꞌ ma chinxe,
mlay tzul cyucꞌile aju Onil cyeye ex Kꞌukbalte cycꞌuꞌje;
pero ka ma chinxe,
ctzajel nsamaꞌne cyucꞌile.
8 Octzun tul,
cbel tiꞌj cynabl xjal tuꞌn,
tuꞌn tel cynicꞌ tiꞌj ka at cyil,
ex tuꞌn tel cynicꞌ tiꞌj ka tzꞌaklxix kine,
ex tuꞌn tel cynicꞌ tiꞌj ka at jwisi tzul tuꞌn Dios.
9 Cꞌelel cynicꞌ tiꞌj ka at cyil porque mintiꞌ in che ocslan wiꞌje.
10 Cꞌelel cynicꞌ tiꞌj ka tzꞌaklxix kine,
porque ma chinxe tucꞌil Nmane,
ex mlay chin oc cyqueꞌyintle.
11 Ex cꞌelel cynicꞌ tiꞌj ka at jwisi tzul tuꞌn Dios porque ya ma cub t-sentens aju nejenel in cawin cyibaj cycyakil xjal twitz txꞌotxꞌ.
12 Nimcu atx taj tuꞌn t-xi nmaꞌne cyeye,
pero mlay tzꞌel cynicꞌe tiꞌj jaꞌlo.
13 Octzun tul Xewbaj Xjan aju chicꞌbalte ju axix toc,
atzunju cẍaklulte cyeye tuꞌn tel baj cynicꞌe tiꞌj ju axix toc;
porque mya texte tyol cxel tmaꞌn,
nok oꞌcx cxel tmaꞌn tcyakilju oc tbiꞌ,
ex cxel tmaꞌn cyeye tcyakilju tzul.
14 Chin jawil nimsaꞌne tuꞌn,
porque aju yol cxel nmaꞌne te,
cxel tchicꞌbaꞌn cyeye.
15 Tcyakilju at te Nmane,
weye;
cyjaꞌtzun ma txi nmaꞌne,
aju yol cxel nmaꞌne te Xewbaj Xjan,
atzunju cxel tchicꞌbaꞌn cyeye.
Aju cybise cꞌoquel te tzalajbil
16 Nok chꞌintl tuꞌn ntene cyucꞌile ex mlay chin oc cyqueꞌyintle;
pero te yajxi chꞌintl chin oquel cyqueꞌyintle;
[porque ma chinxe tucꞌil Nmane,]
chi Jesús xi tmaꞌn cye t-xnakꞌtzben.
17 Cymatzun junjun t-xnakꞌtzben cyxolx:
—¿Ti t-xilen ju yol lu in tmaꞌn ke?
Nok chꞌintl tuꞌn ntene cyucꞌile ex mlay chin oc cyqueꞌyintle,
pero te yajxi chꞌintl chin oquel cyqueꞌyintle,
ex ti t-xilen jlu:
Porque ma chinxe tucꞌil Nmane,
chitzun.
18 Cyjaꞌtzun:
¿Ti t-xilen ju yol lu:
Nok chꞌintl tuꞌn tten kucꞌil?
Mintiꞌ nneꞌl knicꞌ tiꞌj ju in tmaꞌn,
che chi.
19 Eltzun tnicꞌ Jesús tiꞌj ka o cyajbe t-xnakꞌtzben tuꞌn t-xi cykanin ti t-xilen ju yol lu,
xitzun tmaꞌn cye:
—¿Maj in che kanine tiꞌj cyxolxe tiꞌj t-xilen ju yol ma txi nmaꞌne cyeye?
Aju yol ma txi nmaꞌne,
nok chꞌintl chin tele cyucꞌile ex mlay chin oc cyqueꞌyintle,
pero te yajxi chꞌintl chin oquel cyqueꞌyintle,
nchitzune.
20 Ax toc cxel nmaꞌne cyeye,
che jawil okꞌe ex che wuꞌyile,
atzun cye xjal che tzalajel;
masque ctzajel cybise,
pero cꞌelel cybise tuꞌn tzalajbil.
21 Oc nnuꞌl itzꞌj tal jun xuꞌj,
nnoꞌc tuj cꞌixcꞌoj wen,
porque otok pon tkꞌijlalil tuꞌn tul itzꞌj tal;
pero titzꞌjlenxitzun tal,
mintiꞌtl in tzaj tnaꞌn ju cꞌixcꞌoj otok tzicꞌx tuꞌn,
porque in tzalaj tuꞌnju otok tzul itzꞌj jun xjal tzalu twitz txꞌotxꞌ.
22 Icxtzun cyeye jaꞌlo in che bisune;
pero che oquel nqueꞌyine juntl maj,
ex octzun ctzalajel cyanmiye,
ex mi aꞌl jun cꞌelel kꞌinte tzalajbil tuj cyanmiye.
23 Tuj ju kꞌij oc klonte kib juntl maj,
mlay tzaj cykanine jun tiꞌxti weye.
Ax toc cxel nmaꞌne cyeye,
tcyakilju cxel cykanine te Nmane tuꞌnju ocslal keye wiꞌje,
ctzajel tkꞌoꞌn cyeye.
24 Ex cucx jaꞌlo naꞌnx t-xi cykanine jun tiꞌxti ex ocslal keye wiꞌje;
cykaninxe jaꞌlo,
ex oc cycꞌmaꞌye tuꞌntzun cytzalaje nimxix.
Aju mya baꞌn at twitz txꞌotxꞌ ma cub tiꞌj tuꞌn Jesús
25 Tcyakil jlu ma txi nmaꞌne cyeye tuj techal;
pero tzul tkꞌijlalil mlay chin yolintle cyucꞌile tuj techal,
nok oꞌcx clarxix chin yolile cyucꞌile tiꞌj Nmane.
26 Tuj tkꞌijlalil tzul,
cxel cykanine tuꞌnju ocslal keye wiꞌje;
mintiꞌ in xi nmaꞌne cyeye ka chin cubsale twitz Nmane cyiꞌje,
27 porque axte Nmane cꞌujlaꞌn keye tuꞌn.
At tcꞌuꞌj Nmane cyiꞌje porque ma chin cꞌujlanjtze cyuꞌne ex ma txi cyocslaꞌne ka tucꞌil Dios ẍin tzaje.
28 Tucꞌil Nmane ẍin tzaje,
ex ma chin ule twitz txꞌotxꞌ;
pero jaꞌlo cyjel nkꞌoꞌne twitz txꞌotxꞌ,
ex ma chinxe juntl maj tucꞌil Nmane,
chi Jesús xi tmaꞌn cye t-xnakꞌtzben.
29 Xitzun cymaꞌn ke t-xnakꞌtzben te:
—Matzun in yolina clarxix jaꞌlo,
ex mintiꞌ jun techal in tmaꞌna.
30 Matzun tzꞌel knicꞌe tiꞌj jaꞌlo,
tcyakil ojtzkiꞌn tuꞌna,
ex mya il tiꞌj tuꞌn t-xjelin jun xjal teya;
tuꞌntzun jlu ma txi kocslaꞌne ka tucꞌil Dios saja,
che chi.
31 Xitzun tmaꞌn Jesús cye:
—¿Mapetzun cyocslaye jaꞌlo?
32 Tzul tkꞌijlalil,
ex matzun tzul canun,
tuꞌn cyel sputje;
teyle junjun cxel tiꞌn tbe,
ex chin cyjel cykꞌoꞌne njunalxe.
Pero mya njunalxe atine,
porque at Nmane wucꞌile.
33 Tcyakil jlu ma txi nmaꞌne cyeye tuꞌn tkeꞌxix cycꞌuꞌje wiꞌje.
Tzul yajbil cyeye twitz txꞌotxꞌ;
pero keꞌ cycꞌuꞌje porque ma cub tiꞌj tcyakil mya baꞌn at twitz txꞌotxꞌ wuꞌne.