Jesús in naꞌn Dios cyiꞌj ke t-xnakꞌtzben
17
Tbajlenxitzun tmaꞌn Jesús jlu,
jaw tqueꞌyin twitz cyaꞌj ex tma:
—Tat,
ma pon or;
chin tnimsaꞌnctza,
akine Tcꞌwaꞌla,
ax icx teya tuꞌn tjaw nimsaꞌna wuꞌne.
2 Porque ma tzaj tkꞌoꞌna woclene cyibaj cycyakil xjal tuꞌn t-xi nkꞌoꞌne chwinklal te jumajx cye cycyakil keju ma che tzaj tkꞌoꞌna weye.
Jesús ora por sus seguidores (Juan 17.1-26)
3 Ex atzun chwinklal jlu te jumajx,
tuꞌn tojtzkinjtza cyuꞌn,
oꞌcx aya jun Dios axix toc,
ex tuꞌn wojtzkinjtze cyuꞌn,
akine Jesucrist ma chin tzaj t-samaꞌna.
4 Ma jaw nnimsaꞌne tbiya twitz txꞌotxꞌ,
ma japun baj wuꞌne aju akꞌuntl tzaj tkꞌoꞌna weye tuꞌn nbinchanteye.
5 Jaꞌlotzun Tat,
chin tnimsaꞌnctza ttxlaja ic tzaꞌn o chin jaw tnimsaꞌna ttxlaja ojtxi naꞌnxtok tbant twitz txꞌotxꞌ.
6 Ma txi nchicꞌbaꞌne cye xjal tzaꞌn ttena,
akeju ma che etz tiꞌna cyxol xjal ex ma che tzaj tkꞌoꞌna weye.
Etzan ke tuꞌna nej ex ma che tzaj tkꞌoꞌna weye,
ex ma txi cyniman tyola.
7 Jaꞌlo ma tzꞌel cynicꞌ tiꞌj,
tcyakilju ma tzaj tkꞌoꞌna weye,
tucꞌila in tzaj;
8 porque aju yol ma tzaj tmaꞌna weye ma txi nmaꞌne cye;
ex ma txi cyniman,
ex ma tzꞌel cynicꞌ tiꞌj ka axix toc tucꞌila ẍin tzaje,
ex ma txi cyocslaꞌn ka aya tzaj samante weye.
9 Chin cubsale twitza cyiꞌj;
mya cyiꞌj ke mastl xjal chin cubsale twitza,
nok oꞌcx cyiꞌj keju ma che tzaj tkꞌoꞌna weye;
porque etzan ke tuꞌna.
10 Tcyakilju at weye,
teya,
ex aju at teya,
weye;
ex ma chin jaw nimsaꞌne cyuꞌn keju ma tzaj tkꞌoꞌna weye.
11 Mlay chin tentle twitz txꞌotxꞌ;
atzun cye ax ateꞌ twitz txꞌotxꞌ,
ex ma chinxe tucꞌila.
Tat,
aya xjan,
akeju ma che tzaj tkꞌoꞌna weye,
cwentin oca ke tuꞌn tipumala,
tuꞌntzun cyten junx cyximbetz,
ic tzaꞌn ke junx koꞌ.
12 Tej atinxtoke cyucꞌil twitz txꞌotxꞌ cwentin ke wuꞌne tuꞌn tipumala;
akeju ma che tzaj tkꞌoꞌna weye cwentin ke wuꞌne,
ex mintiꞌ jun cye ma naj,
nok oꞌcx jun ma naj,
aju il tiꞌj tuꞌn t-xi tuj najen tuꞌntzun tjapun aju tzꞌibaꞌmaj tuj Tuꞌjil.
13 Jaꞌlotzun chin xeꞌle tucꞌila;
pero in xi nmaꞌne jlu cye acux atinxe twitz txꞌotxꞌ,
tuꞌntzun cytzalajxix wucꞌile ic tzaꞌn weye in chin tzalaje.
14 Ma txi nmaꞌne tyola cye;
pero ma che el icꞌun cyuꞌn xjal,
porque mya te twitz txꞌotxꞌ ke,
ic tzaꞌn weye ax mya te twitz txꞌotxꞌ kine.
15 Mintiꞌ in chin cubsane twitza tuꞌn cyaj tiꞌna tuꞌn miꞌn cytentl twitz txꞌotxꞌ,
nok oꞌcx tuꞌn cyoc tcwentina tuꞌn miꞌn tcub cyiꞌj tuꞌn tajaw il.
16 Mya te twitz txꞌotxꞌ ke,
ic tzaꞌn weye ax mya te twitz txꞌotxꞌ kine.
17 Paꞌn ela ke tuꞌnju tyola axix toc,
tuꞌntzun cyajben oꞌcx teya;
aju tyola axix toc.
18 Ic tzaꞌn ma chin tzaj t-samaꞌna tuꞌn wule cyxol xjal,
icxtzun cye ma cheꞌx nsamaꞌne cyxol xjal.
19 Nok tuꞌn cylaj ma txi nkꞌon wibe tuꞌn wajbene oꞌcx teya,
ax icx cye tuꞌn t-xi cykꞌon cyib teya nok tuꞌnju tyola axix toc,
tuꞌntzun cyajben oꞌcx teya.
20 Mya oꞌcx cyiꞌj jlu chin cubsale twitza,
ax icx chin cubsale cyiꞌj mastl oc che ocslal wiꞌje nok tuꞌn cyyol.
21 Chin cubsale twitza tuꞌn toc junx cyximbetz cycyakil,
ic tzaꞌn teya ata wucꞌile ex atine tucꞌila,
Tat;
icxtzun cyeju tuꞌn cyten junx kucꞌil,
tuꞌntzun t-xi cyocslaꞌn cycyakil xjal ka aya ma tzaj samante weye.
22 Ic tzaꞌn weye ma chin jaw tnimsaꞌna,
ax icx cye ma che jaw nnimsaꞌne tuꞌntzun cyoc junx,
ic tzaꞌn ke junx koꞌ.
23 Akine cyucꞌil,
ex aya wucꞌile,
tuꞌntzun cytenxix junx cyximbetz,
tuꞌntzun tel cynicꞌ cycyakil xjal tiꞌj ka aya tzaj samante weye,
ex ma che tcꞌujlaya ic tzaꞌn weye ma chin tcꞌujlaya.
24 Tat,
akeju ma che tzaj tkꞌoꞌna weye,
wajbile tuꞌn cyten wucꞌile jatum chin tele,
tuꞌntzun toc cyqueꞌyin wajwalile aju tzaj tkꞌoꞌna weye;
porque in cꞌujlanjtze tuꞌna atxix ojtxi naꞌnxtok tbant twitz txꞌotxꞌ.
25 Tat aya tzꞌaklxix,
mintiꞌ ojtzkiꞌna cyuꞌn xjal,
atzun weye ojtzkiꞌna wuꞌne,
ex keju ateꞌ wucꞌile ma tzꞌel cynicꞌ tiꞌj ka aya tzaj samante weye.
26 Ma txi nchicꞌbaꞌne cye tzaꞌn ttena,
ex cucx cxel nchicꞌbaꞌntle cye tuꞌn telxix cynicꞌ tiꞌj,
tuꞌntzun cynaꞌnte ka at tcꞌujlalila cyiꞌj ic tzaꞌn at tcꞌujlalila wiꞌje,
ex tuꞌn ntene cyucꞌil.