Tej tcyim Lázaro
11
At jun xjal Lázaro tbi yabtok,
aj Betania xjal lu,
aju ttanmi Mariy tucꞌix Marta aju terman.
2 Yabtok Lázaro aju t-xiban Mariy;
ate Mariy jlu aju oc suꞌnte perjum tiꞌj tkan Kajaw ex el t-suꞌn tiꞌj tkan tuꞌn ttzmal twiꞌ.
Jesús resucita a Lázaro (Juan 11.1-57)
—Tat,
aju cꞌujlaꞌn tuꞌna,
ma yabt,
chi sanjel.
4 Tej tbinte Jesús tma:
—Aju yabil lu mya tuꞌn tcyim Lázaro tuꞌn,
nok oꞌcx ma tzaj yabil lu tuꞌn tjaw nimsaꞌn tbi Dios ex tuꞌn tjaw nimsaꞌn nbiye,
akine Tcꞌwaꞌl Dios.
5 Ex cꞌujlaꞌnxix Marta tuꞌn Jesús,
tucꞌix titzꞌin tucꞌix Lázaro.
6 Tejtzun tbinte Jesús ka yabtok Lázaro ax cyaj ten cab kꞌijtl.
7 Tbajlenxitzun cab kꞌij,
xi tmaꞌn cye t-xnakꞌtzben:
—Koꞌke juntl maj tuj Judey.
8 Xitzun cymaꞌn ke t-xnakꞌtzben Jesús te:
—Xnakꞌtzal,
cꞌitzke o cyajbe xjal judiy tuꞌn toc xoꞌna tuꞌn abj cyuꞌn.
¿Maj ma txiꞌya juntl maj tuj Judey?
Che chi.
9 Xi ttzakꞌweꞌn Jesús:
—¿Myapetzun cablaj or tuj jun kꞌij?
Ka in bet xjal kꞌijl mlay jaw tolj,
porque in tqueꞌyin ju spicꞌun at twitz txꞌotxꞌ;
10 pero aju xjal in bet konicꞌan in jaw tolj,
porque mintiꞌ spicꞌun tucꞌil.
11 Tej tbaj tmaꞌn Jesús jlu xi tmaꞌntl cye:
—Aju kamiw Lázaro in tan;
pero ma chinxe cꞌasul te,
chi Jesús.
12 Xitzun cymaꞌn ke t-xnakꞌtzben Jesús te:
—Tat,
ka in tan Lázaro,
cbanteltzun.
13 Pero tma Jesús jlu tiꞌj Lázaro ka otok cyim;
atzun cye t-xnakꞌtzben ela tuj cynabl ka in yolin Jesús tiꞌj ojlabl tuꞌn watl.
14 Xitzun tmaꞌn Jesús clarxix cye:
—Ma cyim Lázaro.
15 Ex in chin tzalaje tuꞌnju mya ax atine tej xcyim,
porque mas baꞌn te cyeye tuꞌntzun cyocslane wiꞌje;
ex koꞌtzun jatum taꞌ.
16 Xitzun tmaꞌn Tomás cye mastl xnakꞌtzben:
—Ax icx ke,
koꞌke tuꞌn kcyim tucꞌil,
chi Tomás,
aju yoꞌẍ tbi cyuꞌn xjal.
Ate Jesús kꞌolte ankꞌibl ex kꞌol chwinklal
17 Pontzun Jesús ex o tbi otok bant cyaje kꞌij tcuꞌxlen makuꞌn Lázaro.
18 Nikayin t-xol tnam Betania tucꞌil Jerusalén,
balo ox kilómetro cyxol.
19 Ex nimcu xjal judiy otok che ul tucꞌil Marta ex tucꞌil Mariy,
e ul kꞌukbalte cycꞌuꞌj tuꞌn tlaj otok cyim cyxiban.
20 Tejtzun tbinte Marta cyjaꞌ t-xiꞌ Jesús,
etz canul tiꞌj;
atzunte Mariy cyaj ten tuja.
21 Xitzun tmaꞌn Marta te Jesús:
—Tat,
nokwit ata tzalu,
miwtlo o cyim nxibane.
22 Pero baꞌn wuꞌne jaꞌlo,
tcyakilju cxel tkanina te Dios ctzajel tkꞌoꞌn Dios teya.
23 Xitzun tmaꞌn Jesús te:
—Cjawil ankꞌin t-xibana.
24 Xi tmaꞌn Marta te:
—Baꞌn wuꞌne cjawil ankꞌin oc cyjaw ankꞌin cyimni tuj mancbil tkꞌijlalil.
25 Xitzun tmaꞌn Jesús te:
—Akine kꞌolte ankꞌibl ex akine kꞌol chwinklal;
alcye ma tzꞌocslan wiꞌje,
masque ka ma cyim,
oc cꞌankꞌil.
26 Ex ke xjal itzꞌxke,
ka ma che ocslan wiꞌje mlay che cyim te jumajx.
¿Mape tocslaya jlu?
Chi Jesús.
27 Xi tmaꞌn Marta te:
—Ma txi wocslaꞌne,
Tat;
ma wocslaye aya ju Crist aju at toclen tuꞌn Dios,
ex aya Tcꞌwaꞌl Dios ma tzula twitz txꞌotxꞌ.
Jaw okꞌ Jesús ttzi tpantyón Lázaro
28 Tej tbaj tmaꞌn Marta jlu,
xiꞌ txcolte Mariy aju titzꞌin,
cheba xi tjascꞌuꞌn te:
—Ma tzul Xnakꞌtzal ex in txconjtza tuꞌn,
chi Marta.
29 Tej tbinte Mariy jlu,
jaw weꞌ naj ex ul tucꞌil Jesús.
30 Naꞌnxtok tocx Jesús tuj tnam;
ax taꞌtok jatum ul Marta canul tiꞌj.
31 Atzun cye xjal judiy,
akeju otok che pon tja Mariy kꞌukbalte tcꞌuꞌj,
tej cylonte otok jaw weꞌ naj Mariy ex otok tzꞌetz,
e oc lpeꞌ tiꞌj,
ex cyma:
Ma txiꞌ okꞌel ttzi pantyón,
che chi.
32 Tejtzun tcanun Mariy jatum taꞌtok Jesús ex tej tqueꞌyinte,
cub ẍmejeꞌ t-xe tkan Jesús ex tma:
—Tat,
nokwit ax taꞌya tzalu miwtlo o cyim nxibane.
33 Tej tqueꞌyinte Jesús in okꞌ Mariy ex cyucꞌix ke xjal judiy in che okꞌ,
akeju e tzaj tucꞌil,
tzaj taꞌw tuj tanmi tuꞌn tbis,
34 ex xi tkanin cye:
—¿Jatum ocx cykꞌoꞌne?
Xitzun cymaꞌn te Jesús:
—Tat,
koꞌ queꞌyilte.
—Nimxix tcꞌujlalil Jesús tiꞌj.
37 Pero at junjun cyxol cyma:
—Ate xjal lu jakonte twitz moẍ,
¿tikuꞌntzun mintiꞌ xbant tuꞌn tuꞌn miꞌn tcyim Lázaro?
Jatz ankꞌin Lázaro
38 Tzajxix tbis Jesús juntl maj,
ex pon jatum tocx cyimni.
Tocx tuj jun jul toc jun abj ttziꞌ.
39 Xitzun tmaꞌn Jesús cye:
—Cyiꞌmele aju abj.
Atzunte Marta,
aju tanb ktzan Lázaro,
xi tmaꞌn te Jesús:
—Tat,
ma tzuwix,
porque ma bant-xi cyaje kꞌij tcuꞌxlen makut.
40 Pero xi tmaꞌn Jesús te:
—¿Myapetzun ma txi nmaꞌne teya,
ka ma tocslaya oc tilaꞌya tipumal Dios?
Chi Jesús te.
41 Eltzun cyiꞌn aju abj [jatum otok tzꞌocx kꞌoꞌn cyimni.]
Ex jaw tqueꞌyin Jesús twitz cyaꞌj,
ex tma:
—Tat,
cxel nkꞌoꞌne chjonte teya porque ma chin tzaj tbiꞌna.
42 Baꞌn wuꞌne cucx in chin tzaj tbiꞌna,
pero ma txi nmaꞌne jlu tuꞌn cylaj nimcu xjal ateꞌ ntxlaje,
tuꞌntzun t-xi cyocslaꞌn ka aya ma tzaj samante weye.
43 Tejtzun tbaj tmaꞌn Jesús jlu,
jaw tkꞌajkꞌajel twiꞌ cyuwxix,
tma:
—Tetza,
Lázaro.
44 Etztzun aju otok cyim,
balkꞌiꞌntok tkꞌab tuꞌn xbalun tucꞌix tkan,
ex potzin twitz tuꞌn jun cꞌalbil.
Xitzun tmaꞌn Jesús cye xjal:
—Cypajuꞌmele ex cytzokpinxe.
In che jyon xjal tumel tzaꞌn tten tuꞌn ttzyet Jesús cyuꞌn
45 Nimcu xjal judiy otok che ul tucꞌil Mariy.
Tej cylonte aju tbincha Jesús,
nim e ocslan tiꞌj.
46 Pero at junjun cyxol e jeꞌx cyucꞌil parisey ex xi cymaꞌn aju otok tbincha Jesús.
47 Atzun cye nejenel cye pal ex ke parisey oc cychmoꞌn ke Aj Sanjelal cye xjal judiy ex cyma:
—¿Alcye cbantel kuꞌn?
Porque ate xjal lu nimcu señ in bant tuꞌn.
48 Ka cucx ma cyaj kkꞌoꞌn icju,
cycyakil xjal che ocslal tiꞌj;
che ultzun ke aj sanjelal aj Rom,
ex cbajel cyxitun tja Dios tucꞌix ktanmi,
che chi.
49 Pero at jun xjal cyxol,
Caipás tbi,
toctok nejenel cye pal tuj abkꞌi tej tcub byoꞌn Jesús,
xi tmaꞌn cye:
—Cyeye mintiꞌ cynable;
50 ex mintiꞌ nneꞌl cynicꞌe tiꞌj;
mas baꞌn tuꞌn tcyim jun xjal te cyxel cycyakil xjal ex mya tuꞌn cynaj cycyakil xjal tuj nasyon lu,
chi Caipás.
51 Mya nok tuꞌnx Caipás o tma jlu;
ate Dios o kꞌmante tuj tnabl tuꞌnju toctok te nejenel cye pal tuj abkꞌi lu,
cyjaꞌtzun tzaj tmaꞌn naj ka ate Jesús tuꞌn tcyim te t-xel enter jun tnam xjal,
akeju xjal judiy;
52 ex mya nok oꞌcx tuꞌn tcyim te t-xel enter tnam,
ax icx tuꞌn cytzaj chmoꞌn ke Tcꞌwaꞌl Dios tuꞌn cyten junx,
akeju otok che el sputj.
53 Cyjaꞌtzun,
atxixtzun tuj kꞌij lu bant tiꞌj cyuꞌn aj sanjelal cye xjal judiy tuꞌn tcub cybyoꞌn.
54 Cyjaꞌtzun mintiꞌtl o ten Jesús cyxol xjal judiy,
icꞌ lakꞌeꞌ,
pon tuj jun tnam Efraín tbi,
nikayin ttxlaj lugar mintiꞌ cynajbil xjal tuj;
ex axtzun o ten cyucꞌix ke t-xnakꞌtzben.
55 Chꞌixtok tul canun ninkꞌij cye xjal judiy,
aju Xjan Kꞌij tbi;
ex nimcu xjal e tzaj tuj cojbil e jaꞌwil tuj Jerusalén tuꞌn cytxꞌjonte cyib ic tzaꞌnx in tmaꞌn cyley,
acux naꞌnxtok tul canun Xjan Kꞌij.
56 Ex in che jyon tiꞌj Jesús,
ex in che kanin tiꞌj cyxolx tuj tja Dios,
in cymaꞌn:
—¿Chi toc cyuꞌne?
¿Miꞌnpelo tzul tuj ninkꞌij?
Che chi.
57 Ke nejenel cye pal ex ke parisey otok tzꞌetz jun orden cyuꞌn,
ka at jun xjal ma tbi jatum taꞌ Jesús,
baꞌn tuꞌn tpon naj tkanil tuꞌn,
tuꞌntzun ttzyet Jesús cyuꞌn.