—Ax toc cxel nmaꞌne cyeye,

alcye mintiꞌ nnoꞌcx ttzi cypeꞌn ẍneꞌl,

nok oꞌcx nnoꞌcx tuj juntl plaj,

atzunte elekꞌju mintiꞌ t-xobil.

2 Atzun teju nnoꞌcx ttzi peꞌn,

atzunte pastorju cye ẍneꞌl.

3 Ex in jaket ttzi peꞌn tuꞌn xkꞌukil peꞌn tuꞌn tocx pastor,

ex ke ẍneꞌl in cybiꞌn tkꞌajkꞌajel twiꞌ;

ex in che tzaj ttxcoꞌn t-ẍneꞌl teyle junjun alcye cybi,

ex in che etz tiꞌn.

4 Ex octzun cyetz tiꞌn cycyakil keju tecuxix,

in cub nej cywitz;

ex in che oc lpeꞌ ẍneꞌl tiꞌj,

porque ojtzkiꞌn tkꞌajkꞌajel twiꞌ cyuꞌn.

5 Atzun tiꞌj junxitl xjal mlay che oc lpeꞌ tiꞌj;

nok oꞌcx che elel ok tiꞌj,

porque mintiꞌ ojtzkiꞌn tkꞌajkꞌajel twiꞌ junxitl xjal cyuꞌn,

chi Jesús cye.

6 Xi tmaꞌn Jesús aju techal lu cye;

pero mintiꞌ el cynicꞌ tiꞌj ti t-xilen aju o tma.

7 Xitzun tmaꞌn Jesús juntl maj cye:

—Ax toc cxel nmaꞌne cyeye:

Akine ttzi peꞌn cye ẍneꞌl.

8 Cycyakil keju e ul nej nwitze elekꞌ ke,

ex mintiꞌ cyxobil;

pero mintiꞌ xi cybiꞌn ke ẍneꞌl cyyol.

9 Akine ttzi peꞌn cye ẍneꞌl;

alcye ma tzꞌoctz ttzi peꞌn lu ccletel;

oc cꞌoquetz ex cꞌelex,

ex cnetel twabl.

10 Ate elekꞌ nok elkꞌal nnuꞌl ex byol cye ẍneꞌl ex in che naj tuꞌn;

atzun weye ma chin ule tuꞌn tten cychwinklal ex nimxix cychwinklal tuꞌn tten.

11 Akine baꞌn pastor;

ate baꞌn pastor in xi tkꞌon tib tuꞌn tcyim tuꞌn cyclet ke ẍneꞌl.

12 Atzunju xjal majen,

ex mya axixte pastor,

ex mya te ke ẍneꞌl,

oc tlonte oc ttzaj xoꞌj,

in che cyaj tcolin ke ẍneꞌl ex nneꞌl ok;

atzun cye ẍneꞌl in che tzyet naj tuꞌn xoꞌj ex in che el sputj tuꞌn.

13 Nneꞌl ok xjal porque majen ex mintiꞌ taj cyiꞌj ẍneꞌl.

14 Akine baꞌn pastor,

ex ojtzkiꞌn ke nẍneꞌle wuꞌne,

ex ke nẍneꞌle ojtzkiꞌn kine cyuꞌn,

15 ic tzaꞌn te Nmane ojtzkiꞌn kine tuꞌn,

ex ojtzkiꞌn Nmane wuꞌne;

ex in xi nkꞌon wibe tuꞌn ncyime tuꞌn cyclet ke ẍneꞌl.

16 Ax icx ateꞌ txkantl nẍneꞌle mya a ateꞌ tuj peꞌn lu;

ax icx il tiꞌj tuꞌn cytzaj wiꞌne,

ex oc cybiꞌ tkꞌajkꞌajel nwiꞌye;

ex jun peꞌnx ẍneꞌl ctel ex junx pastor.

17 Tuꞌntzunju in chin cꞌujlanjtze tuꞌn Nmane,

porque in xi nkꞌon wibe tuꞌn ncyime ex chin jawil ankꞌine juntl maj.

18 Mi jun cꞌelel kꞌinte nchwinklale,

wuꞌnx wibe cxel nkꞌon wibe tuꞌn ncyime.

At woclene tuꞌn t-xi nkꞌon wibe tuꞌn ncyime,

ex at woclene tuꞌn njaw ankꞌine.

Atzun mandamyent jlu ma ncꞌame te Nmane,

chi Jesús cye.

19 Tzaj juntl maj cyyol xjal judiy cyxolx tuꞌn tlaj ju yol lu.

20 Ex nimcu cye in cymaꞌntok:

—At juꞌẍ tuj tanmi,

ex ma tzꞌel tzpet tnabl;

¿tikuꞌn in xi cybiꞌne tyol?

Che chi.

21 Atzun juntl cꞌloj in cymaꞌntok:

—Aju yol lu mya tyol jun xjal at juꞌẍ tuj tanmi.

¿Baka jacu bant tuꞌn juꞌẍ tuꞌn tjaket cywitz ke moẍ?

Che chi.

22 In che icꞌsantok xjal ninkꞌij tuj Jerusalén tuꞌn ttzaj cynaꞌn tej tbaj sakset tja Dios tuꞌn toc juntl maj cꞌulbil tuj.

Tuj jbaliltok jlu.

23 Atzunte Jesús in bettok twitz tja Dios,

aju twitz ja toc tbi te Salomón.

24 E octzun txoleꞌ xjal judiy tiꞌjele Jesús ex xi cymaꞌn te:

—¿Jteꞌ kꞌij tuꞌn ktene nok in jawjeꞌ kcꞌuꞌje tuꞌna?

Ka aya ju Crist aju at toclen tuꞌn Dios,

kꞌmantza clarxix keye.

25 Xi ttzakꞌweꞌn Jesús:

—Ma txi nmaꞌne cyeye,

pero mintiꞌ ma txi cyocslaꞌne nyole.

Aju akꞌuntl in tmaꞌn Nmane tuꞌn nbinchanteye,

atzun ke testiw wiꞌje;

26 pero mintiꞌ in xi cyocslaꞌne porque myatzun ateꞌye cyxol ke nẍneꞌle,

[ic tzaꞌn ma txi nmaꞌne cyeye.]

27 Ke nẍneꞌle in cybiꞌn tkꞌajkꞌajel nwiꞌye,

ex ojtzkiꞌn ke wuꞌne,

ex in che oc lpeꞌ wiꞌje.

28 In xi nkꞌoꞌne cychwinklal te jumajx,

ex mlayx che naj,

ex mi jun cꞌelel kꞌinte cye tuj nkꞌabe.

29 A Nmane tzaj kꞌonte cye weye,

ex mas nim toclen Nmane cywitz cycyakil,

ex mi jun jacu tzꞌel kꞌinte cye tuj tkꞌab Nmane.

30 Akine tucꞌix Nmane junx koꞌye,

chi Jesús xi tmaꞌn cye.

31 Jawtzun cytzyuꞌn juntl maj xjal judiy abj tuꞌn toc cyxoꞌn tiꞌj.

32 Xitzun tmaꞌn Jesús cye:

—Nimcu nbinchbene baꞌn ma nbinchaye cywitze tuꞌn tipumal Nmane;

¿alcyetzun jun nbinchbene mya baꞌn cyxol jlu tuꞌn woc cyxoꞌne tuꞌn abj?

33 Xitzun cytzakꞌweꞌn xjal judiy:

—Mlay tzꞌoc kxoꞌne tuꞌn abj tuꞌn tlaj jun tbinchbena baꞌn,

nok oꞌcx tuꞌnju in yolina mya baꞌn tiꞌj Dios.

Porque xjal teya ex nnoꞌc tkꞌon tiba te Dios,

che chi.

34 Xi ttzakꞌweꞌn Jesús:

—¿Myapetzun tzꞌiban tuj cyleye,

o nmaye ka dios keye?

Chi Dios.

35 Baꞌn kuꞌn aju tzꞌiban tuj ley mlay chꞌexpet,

porque in tmaꞌn ka dios keju e cꞌmonte tyol Dios.

36 Akine scꞌoꞌmaj kine tuꞌn Nmane ex ma chin tzaj t-samaꞌn cyxol xjal.

¿Tikuꞌntzun in cymaꞌne weye:

In yolina mya baꞌn tiꞌj Dios,

che chiye,

nok tuꞌnju ma txi nmaꞌne:

Tcꞌwaꞌl Dios kine?

Nchitzune.

37 Ka mya ax akꞌuntl in bant wuꞌne ic tzaꞌn in tbinchaꞌn Nmane,

miꞌn txi cyocslaꞌne nyole.

38 Katzun ax akꞌuntl in bant wuꞌne ic tzaꞌn in bant tuꞌn Nmane,

masque mintiꞌ in xi cyocslaꞌne nyole,

pero cyocslame aju nbinchbene,

tuꞌntzun tel cynicꞌe tiꞌj ex tuꞌn t-xi cyocslaꞌne ka ate Nmane at wucꞌile ex atine tucꞌil Nmane,

chi Jesús cye.

39 Octzun tilil juntl maj cyuꞌn tuꞌn ttzyet Jesús,

pero etz tzokpaj tuj cykꞌab.

40 Ex xiꞌ juntl maj jlajxi nima jordán tuj lugar jatum e byan xjal tuꞌn Juan nej;

ex axtzun cyaj ten.

41 Ex nimcu xjal e pon tucꞌil,

in cymaꞌn:

—Ax toc ate Juan mi jun señ bant tuꞌn;

pero tcyakilju o tma Juan tiꞌj ju xjal lu,

ax toc,

che chi.

42 Ex nimcu xjal e ocslan tiꞌj Jesús tuj lugar lu.