2 Xitzun cykanin t-xnakꞌtzben te:

—Xnakꞌtzal,

¿alcye o binchan il tuꞌnju itzꞌj xjal lu moẍ?

¿Axpelo o binchan il,

ex ka ake tman?

Che chi.

3 Xi ttzakꞌweꞌn Jesús:

—Aju xjal lu moẍ tej titzꞌj pero mya tuꞌnju o binchan il ex mya tuꞌnju ake tman e binchan il;

nok oꞌcx tuꞌn tyecꞌunjtz tipumal Dios tiꞌj.

4 Il tiꞌj tuꞌn nbinchanteye takꞌun ju tzaj samante weye acux atx kꞌij;

tzul konicꞌan mi jun xjal jacu bant tuꞌn takꞌnantl.

5 Acux atine twitz txꞌotxꞌ,

spicꞌun kine cye xjal.

6 Tej tmante Jesús jlu,

cub ttzuban twitz txꞌotxꞌ ex baj tbinchaꞌn chꞌin xokꞌl tuꞌn taꞌl ttziꞌ,

ex oc t-suꞌn ju xokꞌl tiꞌj twitz moẍ,

7 ex xi tmaꞌn te:

—Txiꞌya txꞌjol twitza tuj matij pil Siloé tbi,

chi Jesús,

(atzun in tmaꞌn yol lu,

Samaꞌn).

Xiꞌtzun ju xjal ex el ttxꞌjoꞌn twitz,

ex ajtz meltzꞌaj otok bant tqueꞌyin.

8 Atzun cye vesin ex keju otok cyil nej ka moẍtok,

cyma:

—¿Myapelo a xjal lu aju in cub keꞌ moꞌl?

9 Cymatzun junjun:

—Atzun.

Ex cyma junjuntl:

—Mer ic tzaꞌn ate,

pero mya.

Atzunte xjal tma:

—Akine.

10 Xitzun cykanin te:

—¿Tzaꞌntzun tten ma jaket twitza?

11 Xi ttzakꞌweꞌn ju xjal:

—Aju xjal Jesús tbi xbaj tbinchaꞌn chꞌin xokꞌl ex soc t-suꞌn tiꞌj nwitze ex saj tmaꞌn weye:

Txiꞌya,

ex txꞌjoꞌmel twitza tuj pil Siloé.

Ẍinxtzune ex sel ntxꞌjoꞌne nwitze,

ex ma jaket nwitze.

12 Xitzun cymaꞌn xjal te:

—¿Jatum taꞌ ju xjal lu?

Atzunte xjal tma:

—Mintiꞌ baꞌn wuꞌne,

chi xjal.

13 Aju xjal moẍtok nej,

xi kꞌiꞌn cyuꞌn xjal cywitz parisey.

14 Tuj kꞌij te ojlabltok tej tbaj tbinchaꞌn Jesús ju xokꞌl ex jaket twitz ju xjal tuꞌn.

15 Cyjaꞌtzun ax icx ke parisey xi cykanin te tzaꞌn tten otok jaket twitz.

Xitzun tmaꞌn xjal cye:

—Soc tkꞌoꞌn Jesús chꞌin xokꞌl tiꞌj nwitze,

ex ma tzꞌel ntxꞌjoꞌne ex in queꞌyin nwitze jaꞌlo.

16 Cymatzun junjun parisey:

—Aju xjal xbinchante jlu myatzun tzajni tucꞌil Dios porque mya niman tuꞌn aju kꞌij te ojlabl.

Atzun junjuntl cyma:

—¿Tzaꞌn tten tuꞌn cybant ke señ lu tuꞌn xjal ka aj il?

Che chi.

Cyjaꞌtzun tzaj jun yol cyxolx.

17 Xitzun cymaꞌn juntl maj teju xjal moẍtok nej:

—¿Chi toctzun tuꞌna tiꞌj ju xjal ma jaket twitza tuꞌn?

Atzunte tma:

—T-sanjel Dios te xjal lu.

18 Pero mintiꞌ xi cyocslaꞌn xjal judiy ka moẍtok nej ex otok jaket twitz.

Maxitzun xi cyocslaꞌn tej cytxquet ke tman ju xjal otok jaket twitz.

19 Xitzun cykanin cye tman:

—¿Apetzun cycꞌwaꞌle jlu aju in cymaꞌne ka moẍtok titzꞌjlenx?

¿Tzaꞌntzun tten ma bant tqueꞌyin jaꞌlo?

Che chi.

20 Xitzun cytzakꞌweꞌn ke tman:

—Baꞌn kuꞌne atzun kcꞌwaꞌle jlu,

ex baꞌn kuꞌne moẍ titzꞌjlenx;

21 pero mintiꞌ baꞌn kuꞌne tzaꞌn tten ma bant tqueꞌyin jaꞌlo;

ex mintiꞌ baꞌn kuꞌne alcye ma jakonte twitz.

Cykaninxe te porque ma pon tabkꞌiyil;

axte ckꞌmalte,

che chi.

22 Atzun jlu xi cymaꞌn tman porque in che xobtok cywitz xjal judiy;

porque otok bant tiꞌj cyuꞌn judiy ka at jun xjal ma yolin ka ate Jesús ju Crist aju at toclen tuꞌn Dios,

biꞌx tuꞌn tetz lajet tuj ja te cꞌulbil.

23 Tuꞌntzunju cyma ke tman:

Cykaninxe te porque ma pon tabkꞌiyil,

che chi.

24 Txquettzun juntl maj cyuꞌn parisey aju xjal moẍtok nej,

ex xi cymaꞌn te:

—Twitz Dios kꞌmantza jun yol axix toc;

baꞌn ke kuꞌn ate xjal lu aj il.

25 Xitzun ttzakꞌweꞌn ju xjal:

—Mintiꞌ baꞌn wuꞌne ka aj il ex ka miꞌn;

pero at jun baꞌn wuꞌne,

moẍtok kine nej,

atzun jaꞌlo ma bant nqueꞌyine.

26 Xi cykanin juntl maj te:

—¿Ti xtbincha tiꞌja?

¿Tzaꞌn tten xjaket twitza tuꞌn?

27 Xitzun ttzakꞌweꞌn xjal:

—Ma txi nmaꞌne cyeye ex mintiꞌ in xi cybiꞌne;

¿tikuꞌn cyajbile tuꞌn cybinteye juntl maj?

¿Cyajpeye tuꞌn cyoque te t-xnakꞌtzben?

Chi xjal.

28 E octzun ten yasul tiꞌj:

—Aya t-xnakꞌtzben xjal lu,

atzun keye t-xnakꞌtzben Moisés koꞌye.

29 Baꞌn ke kuꞌn,

ate Dios o yolin tucꞌil Moisés;

atzunte xjal lu,

mintiꞌ baꞌn kuꞌne jatum tzajni,

che chi.

30 Xitzun ttzakꞌweꞌn ju xjal.

—Maꞌxix t-xilen jlu.

Mintiꞌ baꞌn cyuꞌne jatum tzajni,

atzun weye ma jaket nwitze tuꞌn.

31 Baꞌn kuꞌn mintiꞌ in che tzaj tbiꞌn Dios ke xjal aj il;

pero ka at jun xjal at tchi Dios tuj twitz ex in tbinchaꞌn aju tajbil,

atzunju in tzaj tbiꞌn Dios.

32 Atxix t-xe tnejel ojtxi bajx kbi ka at jun xjal moẍ titzꞌjlenx in jaket twitz tuꞌn juntl xjal.

33 Nokwit mya tucꞌil Dios tzajni xjal lu,

miwtlo jun jacu bant tuꞌn,

chi xjal.

34 Xitzun cytzakꞌweꞌn ke parisey:

—Aj ilxixa atxix tej titzꞌja,

¿apetzuna cxnakꞌtzal keye?

Che chi.

Ex biꞌx ex cylajoꞌn.

35 Tbitzun Jesús ka otok tzꞌex lajoꞌn xjal cyuꞌn,

ex tej tcnet xjal tuꞌn,

xi tmaꞌn te:

—¿Ocslaꞌnpe tuꞌna aju xjal ma tzaj samaꞌn tuꞌn Dios tuꞌn tten cyucꞌil xjal?

36 Xi ttzakꞌweꞌn ju xjal:

—Tat,

kꞌmantza weye alcye,

tuꞌntzun wocslane tiꞌj.

37 Xitzun tmaꞌn Jesús te:

—Matzun tila xjal lu;

akine in chin yoline tucꞌila.

38 Xitzun tmaꞌn ju xjal:

—Chin ocslale,

Tat.

Ex cubtzun ẍmejeꞌ oc ten cꞌulul twitz Jesús.

39 Tmatzun Jesús:

—Akine ma chin ule twitz txꞌotxꞌ tuꞌn tel cyil xjal tuj kꞌanchaꞌl,

tuꞌntzun tbant cyqueꞌyin keju miban che queꞌyin,

ex tuꞌn tmoẍix cywitz keju in che queꞌyin.

40 Tejtzun cybinte junjun parisey ateꞌtok tucꞌil,

xi cymaꞌn te:

—¿Maj icx keye moẍ koꞌye?

41 Xi ttzakꞌweꞌn Jesús:

—Nokwit moẍ keye,

mintiꞌwtlo cyile;

pero jaꞌlo cucx atx cyile,

porque in cymaꞌne:

In ko queꞌyine.