Aju techal cyiꞌj laj kꞌapoj
25
Aju cawbil in tzaj tuj cyaꞌj ic tten ic tzaꞌn laj kꞌapoj xi cyiꞌn cycandil e jeꞌx canil tiꞌj ju xinak banin tiꞌj tuꞌn tmojeꞌ.
2 Jweꞌ kꞌapoj at cynabl,
atzun jweꞌtl mintiꞌ cynabl.
3 Akeju kꞌapoj mintiꞌ cynabl,
xi cyiꞌn cycandil,
pero mintiꞌ xi cyiꞌn aseyt tuꞌn tcuꞌx cykꞌoꞌn tuj cycandil oc tcub baj aju tcuꞌxsaꞌn tuj candil.
4 Atzun ke kꞌapoj at cynabl,
xi cyiꞌn aseyt tuj tcubil tucꞌix cycandil.
5 Ex tuꞌnju yaj bant tten xinak,
tzaj watl tuj cywitz kꞌapoj ex e icꞌ tan.
6 Ex te tmij akꞌbil,
jaw tkꞌajkꞌajel cywi xjal in cymaꞌn:
Lu tzul ju chmilbaj,
cyetze canil tiꞌj.
7 Cycyakiltzun kꞌapoj e jaw weꞌ,
ex baj cybinchaꞌn cycandil.
8 Akeju kꞌapoj mintiꞌ cynabl xi cymaꞌn cye keju kꞌapoj at cynabl:
Cykꞌontze chꞌin aseyt keye,
aju at cyucꞌile;
porque chꞌix cycub yupj kcandile.
9 Atzun cye kꞌapoj at cynabl xi cytzakꞌweꞌn:
Mas baꞌn tuꞌn cyxiꞌye cyucꞌil ke cꞌayil ex tuꞌn ttzaj cylakꞌone chꞌin aseyt te cyeye,
tuꞌntzun miꞌn tcub baj naj keye ax icx cyeye,
che chi.
10 Cyjaꞌtzun otok cheꞌx ke jweꞌ kꞌapoj lakꞌol aseyt tej tul ju chmilbaj,
atzun ke kꞌapoj banin cyten,
e ocx tuja tucꞌil chmilbaj tuj mejebleꞌn ex biꞌxtzun lamet ttzi ja.
11 Te yajxitzun e ul keju jweꞌtl kꞌapoj ex cyma:
Tat,
tat,
jakon ocxa ja kwitze.
12 Atzunte xinak etz ttzakꞌweꞌn:
Ax toc cxel nmaꞌne cyeye,
mintiꞌ ojtzkiꞌn keye wuꞌne,
chi xinak.
13 Cyjaꞌtzun che xkꞌukine,
porque mintiꞌ biꞌn cyuꞌne alcye or chin ule,
akine scꞌoꞌmaj kine tuꞌn Dios tuꞌn ntene cyucꞌil xjal.
Aju techal tiꞌj pwak xi tkꞌoꞌn xjal cye tmajen
14 Porque aju tcawbil Dios in tzaj tuj cyaꞌj ic tten ic tzaꞌn jun xjal xiꞌ tuj jun tbe najchak,
e tzaj ttxcoꞌn ke tmajen,
ex cyaj tkꞌoꞌn tpwak cye.
15 Xi tkꞌoꞌn jweꞌ mil sak pwak te jun tmajen,
atzun te juntl xi tkꞌoꞌn cabe mil ex xi tkꞌoꞌn jun mil te juntl,
teylex junjun xi kꞌoꞌn nicꞌpun che akꞌnan.
Ex xiꞌtzun najchak.
16 Aju majen o tcꞌam jweꞌ mil sak pwak,
oc ten negosyaril tiꞌj,
ex o tcamba jweꞌtl mil.
17 Ax icx aju majen o tcꞌam cabe mil sak pwak o tcamba cabetl mil.
18 Atzun juntl majen,
aju o tcꞌam jun mil sak pwak,
xiꞌ ex cuꞌx tlacuꞌn jun jul ex cuꞌx tmakuꞌn tpwak tpatrón.
19 Tbajlenxi nim kꞌij ul cypatrón majen,
ex tzaj cymaꞌn tajlal cyakꞌunben.
20 Tej tpon aju otok tcꞌam jweꞌ mil sak pwak,
pon tiꞌn jweꞌtl mil,
ex xi tmaꞌn cyjaꞌ:
Tat,
jweꞌ mil sak pwak tzaj tkꞌoꞌna weye,
lu jweꞌtl mil ma ncambaye lu,
chi majen.
21 Xi tmaꞌn tpatrón te:
Cu,
aya majen baꞌn ex ma japunxix tuꞌna;
chꞌin xi nkꞌoꞌne teya,
ex ma tzꞌakꞌnanxixa tiꞌj;
jaꞌlo nimxix cxel nkꞌoꞌne teya tuꞌntzun ttzalaja junx wucꞌile,
chi patrón.
22 Ex tej tpon juntl majen aju otok tcꞌam cabe mil sak pwak,
xi tmaꞌn:
Tat,
cabe mil sak pwak tzaj tkꞌoꞌna weye,
lu cabetl mil ma ncambaye lu,
chi majen.
23 Xi tmaꞌn tpatrón te:
Cu,
aya majen baꞌn ex ma japunxix tuꞌna;
chꞌin xi nkꞌoꞌne teya ex ma tzꞌakꞌnanxixa tiꞌj;
jaꞌlo nimxix cxel nkꞌoꞌne teya tuꞌntzun ttzalaja junx wucꞌile,
chi patrón te.
24 Te mancbil pon aju majen o tcꞌam jun mil sak pwak ex tma:
Tat,
baꞌn wuꞌne aya jun xinak cyuwxix,
in jaw tchmoꞌna twitz awal jatum mintiꞌ in cuꞌx tawaꞌna,
ex in jaw tchmoꞌna twitz awal jatum mintiꞌ in xi tchituna iyaj.
25 Tuꞌntzunju,
tzaj nxobile ex inxe ewalte tpwaka tjakꞌ txꞌotxꞌ.
Lu tpwaka lu,
chi majen.
26 Xi ttzakꞌweꞌn tpatrón:
Aya majen mya baꞌna ex cyꞌaja,
baꞌn tuꞌna in jaw nchmoꞌne twitz awal jatum mintiꞌ wawale ex in jaw nchmoꞌne twitz awal jatum mintiꞌ xi nchitune iyaj.
27 Cyjaꞌtzun,
mas baꞌnwtlo nokwit ocx tkꞌoꞌna npwake tuj banc;
tejtzun ma chin ule mawtlo ncꞌame npwake tucꞌil chꞌin taꞌl,
chi patrón te majen.
28 Xitzun tmaꞌn patrón cye mastl:
Cyiꞌmele ju pwak te,
ex cykꞌonxe teju at laj mil sak pwak tucꞌil.
29 Porque aju xjal at chꞌin te,
mas cxel kꞌoꞌn te,
ex cchmetel te;
pero alcyeju mintiꞌ te,
aju chꞌin at te cꞌelel kꞌiꞌn.
30 Ex aju majen mintiꞌ tajben,
cykꞌoꞌmixe tiꞌjxi tuj klolj;
atzun tzul okꞌel ex ckitxꞌitxꞌil t-xeꞌ cyeꞌ xjal,
chi patrón.
Cycyakil nasyon che oquel tuj xjel
31 Octzun wule akine scꞌoꞌmaj kine tuꞌn Dios tuꞌn ntene cyucꞌil xjal,
otok chin oque rey,
ex cyucꞌix cycyakil anjel wucꞌile,
octzun chin bel keꞌye tuj nkꞌukbile in koptzꞌaj tuꞌn ncawine.
32 Ex ke xjal cyuj cycyakil nasyon che oquel chmoꞌn nwitze,
ex cꞌelel npaꞌne jun cꞌloj cyxol txkantl,
ic tzaꞌn jun pastor in che el tpaꞌn ke ẍneꞌl cyxol ke chip.
33 Che bel nkꞌoꞌne ke ẍneꞌl tuj nbankꞌabe,
atzun ke chip che bel nkꞌoꞌne tuj nnayaje.
34 Entons akine Rey cxel nmaꞌne cye keju ateꞌ tuj nbankꞌabe:
Cytzaje akeye cyꞌiwlaꞌn keye tuꞌn Nmane,
cycꞌmonxe aju cawbil banimaj te cyeye atxix tej tbant twitz txꞌotxꞌ.
35 Porque tej ttzaj el ncꞌuꞌje,
tzaj cykꞌoꞌne nwaye;
ex tej ttzaj txketleꞌn wiꞌje,
tzaj cykꞌoꞌne ncꞌaꞌye;
stranjer xjal kine,
ex tzaj cykꞌoꞌne nposadiye,
36 tej mintiꞌtok nxbalune,
tzaj cykꞌoꞌne nxbalune;
tej yabtok kine,
e ule queꞌyil weye;
tej prestok kine e ule visitaril weye.
37 Ctzajeltzun cytzakꞌweꞌn keju tzꞌaklxix:
Tat,
¿jtoje kile mintiꞌ twaya ex xi kkꞌoꞌne twaya?
¿Jtoje kile in txketa ex xi kkꞌoꞌne tcꞌaꞌya?
38 ¿Jtoje kile stranjer xjala ex xi kkꞌoꞌne tposadiya?
¿Ex jtoje kile mintiꞌ t-xbaluna ex xi kkꞌoꞌne t-xbaluna?
39 ¿Jtoje kile yaba ex ka tocxa tuj pres ex o ule queꞌyil teya?
40 Entons akine Rey cxel ntzakꞌwene:
Ax toc cxel nmaꞌne cyeye:
Aju cybinchaye cye wermaniye tal chꞌin,
weye o cybinchaye jlu,
nchiloye cye.
41 Ax icx cxel nmaꞌne cye keju ateꞌ tuj nnayaje:
Cypaꞌmil cyibe wiꞌje akeye tcub cysentense,
cyxiꞌye tuj kꞌakꞌ te jumajx,
banimaj te tajaw il ex cye t-anjel.
42 Porque tzaj el ncꞌuꞌje ex mintiꞌ tzaj cykꞌoꞌne nwaye;
tzaj txketleꞌn wiꞌje ex mintiꞌ tzaj cykꞌoꞌne ncꞌaꞌye,
43 stranjer xjal kine ex mintiꞌ tzaj cykꞌoꞌne nposadiye;
mintiꞌtok nxbalune ex mintiꞌ tzaj cykꞌoꞌne nxbalune;
yabtok kine ex in tene tuj pres ex mintiꞌ e ule queꞌyil weye,
nchiloye cye.
44 Ctzajeltzun cytzakꞌweꞌn:
Tat,
¿jtoje kile nneꞌl tcꞌuꞌja,
ex ka in txketa,
ex ka stranjer xjala,
ex ka mintiꞌ t-xbaluna,
ex ka yaba,
ex ka ata tuj pres,
ex mintiꞌ o ko onine teya?
Che chilo.
45 Octzun cxel ntzakꞌweꞌne:
Ax toc cxel nmaꞌne cyeye;
aju mintiꞌ cybinchaye cye keju tal chꞌin lu,
ax icx mintiꞌ o cybinchaye weye,
nchiloye cye.
46 Che xeꞌltzun jlu tuj castiw te jumajx,
atzun keju tzꞌaklxix che xeꞌl tuj chwinklal te jumajx.