In tkꞌoꞌn Pablo cynabl ocslal tuꞌn miꞌn cycꞌulun cywitz tilbilal
10
Wajbile tuꞌn cybinteye erman,
cycyakil ke kxeꞌchel e ten tjakꞌ muj,
ex cycyakil e jicꞌtz tuj mar Cyak Queꞌyin.
2 Cyjaꞌtzun cycyakil e oc mojbaꞌn tucꞌil Moisés ic tzaꞌn otok che byan tjakꞌ muj ex tuj mar.
3 Ex axju wabj tzaj tkꞌoꞌn Dios xi cywaꞌn cycyakil,
4 ex axju cꞌabj tzaj tkꞌoꞌn Dios,
xi cycꞌaꞌn cycyakil,
porque cucx in che cꞌan tiꞌj aꞌ etz tuj jun abj tzaj tkꞌoꞌn Dios cye.
Aju abj lu atzun Cristju in bettok cyucꞌil.
5 Pero mintiꞌ o tzalaj Dios cyiꞌj mas mijcu xjal,
cyjaꞌtzun e cyaj txꞌayeꞌ cyimni ke tuj lugar mintiꞌ cynajbil xjal tuj.
6 Atzun jlu o baj tuꞌn toc te jun yecꞌbil te ke,
tuꞌn miꞌn tpon kcꞌuꞌj tiꞌj mya baꞌn,
ic tzaꞌn cye pon cycꞌuꞌj tiꞌj.
7 Ex miꞌn che cꞌulune cywitz ke tilbilal ic tzaꞌn cybincha junjun cye,
ic tzaꞌn in tmaꞌn tuj Tuꞌjil:
E cub keꞌ xjal tuꞌn cywaꞌn ex tuꞌn cycꞌan,
ex e jaw weꞌ tuꞌn cybixan,
chi tuj Tuꞌjil.
8 Ex miꞌn ko yaẍin,
ic tzaꞌn junjun cye e yaẍin,
ex tuj junx kꞌij e cyim 23 mil xjal.
9 Ex miꞌn tzꞌoc kkꞌoꞌn Kman Dios tuj joybil tiꞌj,
ic tzaꞌn junjun cye,
oc Kman Dios tuj joybil tiꞌj cyuꞌn,
ex e naj cyuꞌn lobaj.
10 Ex miꞌn txiꞌ cyyole tiꞌj Dios,
ic tzaꞌn junjun cye tzaj cyyol tiꞌj Dios,
ex e cub byoꞌn tuꞌnju anjel kꞌol camic.
11 Tcyakil jlu o baj cyiꞌj kxeꞌchel tuꞌn toc te jun yecꞌbil te ke,
ex o tzꞌibanjtz te kꞌobl knabl,
porque ma ko canun tuj mancbil tkꞌijlalil.
12 Cyjaꞌtzun tten,
ka at jun waꞌlxix taꞌ tuj tnabl,
cwentim tib tuꞌn miꞌn tcub tzꞌak.
13 Aju joybil cyiꞌje in tzaj,
axju in tzaj cyiꞌj cycyakil xjal;
pero ate Dios baꞌn tuꞌn tkeꞌ kcꞌuꞌj tiꞌj,
mlay che cyaj kꞌoꞌne tuꞌn Dios tuꞌn cyoque tuj joybil cyiꞌje nimxix,
aju mlay tzicꞌx cyuꞌne.
Oc cyoque tuj joybil cyiꞌje,
ctzajel tyecꞌun Dios jun tumel tzaꞌn tten tuꞌn cyexe tuj,
tuꞌntzun ticꞌx cyuꞌne.
14 Cyjaꞌtzun erman,
akeye at ncꞌuꞌje cyiꞌje,
cyel oke tuꞌn miꞌn cycꞌulune cywitz ke tilbilal.
15 In chin yoline cyucꞌile tuꞌnju at cynable;
che ximane tiꞌj aju cxel nmaꞌne cyeye.
16 Aju cꞌabj tcuꞌx tuj vas,
aju in xi kkꞌoꞌn chjonte tiꞌj,
¿myapetzun tuꞌn jlu at koclen tiꞌj tchcꞌel Crist?
Ex aju pan in cub ksipan kxol,
¿myapetzun tuꞌn jlu at koclen tiꞌj t-ximlal Crist?
17 Porque junx pan at,
atzun ke masque nimcu kbet pero junx kximlal,
porque kcyakil at koclen tiꞌj junx pan.
18 Che ximane tiꞌj tnam Israel;
akeju in xi cychyoꞌn cychibjal alumaj in cheꞌx kꞌot te chojbil,
¿mintiꞌpelo cyoclen tiꞌj altar?
19 ¿Alcyetzun in xi nmaꞌne?
¿Apetzun in xi nmaꞌne ka at toclen ju tilbilal ex ka at toclen aju in cub kꞌoꞌn te oyaj cywitz tilbilal?
20 Miꞌn,
pero atzun jlu in xi nmaꞌne,
aju oyaj in cub cykꞌoꞌn ke xjal mya nimal Dios,
cywitz ke juꞌẍ in cub cykꞌoꞌn ju oyaj,
ex mya twitz Dios;
ex miꞌn wajbile tuꞌn tten cyoclene cyucꞌil juꞌẍ.
21 Mlay bant tuꞌn cycꞌane tuj tvas Kajaw ex tuj cyvas juꞌẍ;
mlay bant tuꞌn cywaꞌne tiꞌj tmes Kajaw ex tiꞌj cymes juꞌẍ.
22 ¿Baꞌnpelo tuꞌn ttzaj tkꞌoj Kajaw kuꞌn?
¿Maspelo at kipun twitz?
Aju tzokpibl ke ex aju kcꞌujlalil
23 At jun yol in cymaꞌn xjal cyjaꞌ:
Baꞌn tuꞌn tbant kuꞌn nok alcye kajbil,
che chi.
Ax toc jlu,
pero mya tcyakil jacu tzꞌel baꞌn te cye.
Jacu bant kuꞌn nok alcye kajbil,
pero mya tcyakil jacu ko chꞌiy tuꞌn tuj kocslabl.
24 Mya nok oꞌcx tuꞌn cyximane tiꞌj ju baꞌn te cyeye,
ax icx tuꞌn cyximane tiꞌj alcyeju baꞌn cye mastl.
25 Tcyakilju in cꞌayinjtz tuj cꞌaybil chibj baꞌn tuꞌn t-xi cychyoꞌne,
pero miꞌn baj cykanine tiꞌj,
tuꞌn tlaj at junjun chꞌin cyocslabl in jawjeꞌ cycꞌuꞌj tiꞌj ka baꞌn ex ka miꞌn.
26 Porque tete Kman Dios tcyakil twitz txꞌotxꞌ tucꞌix tcyakilju at twitz.
27 Ka ma che txconjtze tuꞌn jun xjal mya ocslal tuꞌn cyxiꞌye waꞌl tucꞌil ex cyajbile tuꞌn cyxiꞌye,
tcyakilju cbel kꞌoꞌn cywitze cychyonxe,
pero miꞌn baj cykanine tiꞌj,
tuꞌn tlaj at junjun in jawjeꞌ cycꞌuꞌj tiꞌj ka baꞌn ex ka miꞌn.
28 Pero ka at jun ma kꞌmante cyeye:
Ate chibj lu ma cub kꞌoꞌn te jun oyaj cywitz ke tilbilal,
miꞌntzun txi cychyoꞌne,
tuꞌn miꞌn tajtz jetpaj tnabl xjal aju ctzajel kꞌmante jlu cyeye,
ex tuꞌn tlaj in jawjeꞌ cycꞌuꞌj junjun tiꞌj;
porque tete Kajaw txꞌotxꞌ tucꞌix tcyakilju at twitz.
29 Mintiꞌ in chin yoline tiꞌja,
alcye in t-ximana tuj tanmiya;
nok oꞌcx in chin yoline tiꞌj juntl,
alcyeju in t-ximan tuj tanmi.
Ka tzokpiꞌn kine,
chilo jun,
¿tikuꞌntzun tuꞌn woque tuj xjel tuꞌn t-ximbetz tanmi juntl?
30 Ex ka ma txi nkꞌoꞌne chjonte tiꞌj ju in xi nchyoꞌne,
¿tikuꞌntzun tuꞌn woc icꞌleꞌne tuꞌn tlaj nchiꞌye in xi nkꞌoꞌne chjonte tiꞌj?
Chilo.
31 Cyjaꞌtzun,
ka ma che chyoꞌne,
ex ka ma che cꞌane,
ex ka ma cybinchaye juntl,
cybinchame tcyakil tuꞌntzun tjaw nimsaꞌn tbi Dios.
32 Miꞌn che oque te jun tolsabl cye xjal judiy,
mi cye txkantl xjal,
mi cye cycyakil ocslal etzan ke tuꞌn Dios.
33 Ic tzaꞌn weye,
tuj tcyakil nnoꞌc tilil wuꞌne tuꞌn wajbene cye cycyakil xjal,
mintiꞌ nnoꞌc tilil wuꞌne aju baꞌn te weye,
nok oꞌcx aju baꞌn cye nimcu,
tuꞌntzun cyclet.