3 Atzun ncolbil wibe jlu cye keju in che yolin wiꞌje:

4 ¿Maj mintiꞌ koclene tuꞌn kwaꞌne ex tuꞌn kcꞌane?

5 ¿Maj mintiꞌ koclene tuꞌn tcnet kxuꞌjile,

ax jun erman xuꞌj,

tuꞌn t-xi kucꞌile tuj kbeye,

ic tzaꞌn in cybinchaꞌn ke mastl apostl,

ex ke titzꞌin Kajaw,

ex tucꞌix Pedro?

6 ¿Oꞌcxpelo akine tucꞌix Bernabé il tiꞌj tuꞌn kakꞌnane tuꞌn tcnet kwaye?

7 ¿Atpe jun xjal ma tzꞌoc te soldad tcwent-x tib?

¿Atpe jun xjal in cuꞌx tawaꞌn tkan awal ex mintiꞌ in xi tloꞌn twitz?

¿Atpe jun xjal pastor wacẍ ex mintiꞌ nneꞌl chꞌin tcꞌa lech tiꞌj wacẍ?

8 ¿Cyyol xjalpe jlu ma txi nmaꞌne cyeye?

¿Myapetzun icx in tmaꞌn tuj tley Moisés?

9 Porque tzꞌibaꞌmaj tuj tley Moisés:

Miꞌn tzꞌoc tcꞌaloꞌna ttzi boys in bet tibaj triw tuꞌn tel ttxcꞌomil,

chi tuj Tuꞌjil.

¿Oꞌcxpe cyiꞌj boys in ximan Dios,

10 ex ka tnejelxix o tma kiꞌj?

Pwes kiꞌj o tzꞌibanjtz jlu;

porque aju xjal in chꞌoquin,

kꞌukl tcꞌuꞌj tiꞌj tuꞌn tcꞌmonte twitz takꞌunben,

ax icx ju xjal in akꞌnan tiꞌj triw tuꞌn tel ttxcꞌomil.

11 Icx keye ma ko akꞌnane cyxole ex ma che ocslane,

¿myapelo baꞌn tuꞌn kcꞌmonteye jun oyaj cyuꞌne te cꞌaꞌchbil keye?

12 Ka in cycꞌmoꞌn mastl jun onbil cye cyuꞌne,

¿yajtzun keye,

myapelo at mas koclene tiꞌj?

Pero mintiꞌ o txi kmaꞌne ka at koclene tiꞌj jun onbil,

nok oꞌcx nnicꞌx tcyakil kuꞌne tuꞌntzun miꞌn tmaket tkanil baꞌn in yolin tiꞌj Crist.

13 ¿Mintiꞌpe baꞌn cyuꞌne,

keju in che ajben tuj tja Dios,

ax in che waꞌn tiꞌj ju at tuj tja Dios,

ex keju in che ajben twitz altar,

at cyoclen tiꞌj tuꞌn t-xi cychyoꞌn tchibjal alumaj in cub tibaj altar?

14 Cyjaꞌtzun biꞌx cyaj tmaꞌn Kajaw:

Akeju in che pacban tiꞌj tkanil colbil,

tiꞌjxtzun ju akꞌuntl lu tuꞌn cyankꞌin.

15 Atzun weye naꞌnx tajben jlu weye,

ex mintiꞌ ma txi ntzꞌibane jlu tuꞌn ttzaj cykꞌoꞌne chꞌin onbil weye,

porque mas baꞌn tuꞌn ncyime ex mya tuꞌn tel kꞌiꞌn aju in chin tzalaje tiꞌj.

16 Ka ma txi npacbaꞌne tkanil colbil,

mya tuꞌn jlu tuꞌn tjaw nniman wibe,

porque il tiꞌj tuꞌn nbinchanteye.

Ex becꞌbil nwitze ka mintiꞌ ma txi npacbaꞌne tkanil colbil.

17 Porque ka ma nbinchaye jlu tuꞌn wexe wajbil,

atlo twi ncꞌuꞌje tiꞌj;

katzun mya tuꞌn wexe wajbil ma nbinchaye,

entons at juntl ma kꞌmante weye tuꞌn wakꞌnane tiꞌj.

18 ¿Alcyetzun twi ncꞌuꞌje?

Atzun jlu oc nxiꞌye pacbalte tkanil colbil,

tuꞌn t-xi nmaꞌne cye xjal nok cucx,

tuꞌn miꞌn tajben wuꞌne aju woclene tuꞌn wankꞌine tiꞌj tkanil baꞌn.

19 Cyjaꞌtzun,

masque tzokpiꞌn kine cye cycyakil,

pero ma tzꞌoc nkꞌon wibe te cymajen cycyakil tuꞌntzun ncambanteye nimcu xjal tuꞌn cyocslan tiꞌj Crist.

20 Nnoꞌc nkꞌon wibe te xjal judiy oc in chin tene cyxol xjal judiy,

tuꞌn ncambanteye ke xjal judiy;

ma tzꞌoc nkꞌon wibe ic tzaꞌn atine tjakꞌ tley Moisés cyxol keju ateꞌ tjakꞌ tley,

masque mya tjakꞌ tley atine,

tuꞌntzun ncambanteye keju ateꞌ tjakꞌ tley.

21 Oc in chin tene cyxol txkantl xjal,

keju mintiꞌ tley Moisés cyucꞌil,

nnoꞌc nkꞌon wibe ic tzaꞌn mintiꞌ ley wucꞌile,

masque at tley Dios wucꞌile ex atine tjakꞌ tley Crist,

tuꞌntzun ncambanteye ke txkantl xjal mintiꞌ tley Moisés cyucꞌil.

22 Ma tzꞌoc nkꞌon wibe ic tzaꞌn mintiꞌ wipune cyxol keju mintiꞌ cyipun,

tuꞌntzun ncambanteye keju mintiꞌ cyipun;

te tcyakil ma tzꞌoc nkꞌon wibe cyxol cycyakil xjal,

tuꞌntzun cyclet junjun wuꞌne tuj nimcu tumel.

23 In nbinchaꞌne jlu tuꞌn tlaj tkanil colbil,

tuꞌntzun ncꞌmonteye xtalbil in tzaj tuꞌn tkanil baꞌn junx cyucꞌil txkantl erman.

24 ¿Mintiꞌpe baꞌn cyuꞌne,

akeju in che kelan tuj ojkelbil,

cycyakil in che kelan,

pero nok junx in cambante ju oyaj?

Icxtzun cyeye,

che kelane tuꞌntzun cycambanteye jun oyaj.

25 Ex cycyakil keju nnoꞌcx cykꞌon cyib tuj jun sakchbil,

in cyjacꞌun cyib tiꞌj tcyakil;

ke xjal lu nnoꞌc tilil cyuꞌn tuꞌn cycambante jun oyaj jurat in baj,

pero atzun ke nnoꞌc tilil kuꞌn tuꞌn kcambante jun oyaj mlay baj.

26 Cyjaꞌtzun weye in chin kelane ic tzaꞌn jlu,

mintiꞌ in chin el tacje tiꞌj;

icxtzun in chin sweltyine,

mintiꞌ in chin bujine tuj cykꞌikꞌ.

27 Pero nnoꞌc ncꞌixbisaꞌne nximlale ex nnoꞌc nkꞌoꞌne te nmajene,

mya yajcu ax kine miꞌn chin cꞌmete ex otok txi npacbaꞌne cye txkantl.