Aju chibj in cub kꞌoꞌn cywitz ke tilbilal
8
Atzun jaꞌlo tuꞌn kyolin tiꞌj chibj in xi kꞌoꞌn te oyaj cye tilbilal.
Baꞌn kuꞌn ex ojtzkiꞌn jlu kuꞌn kcyakil,
aju ojtzkibl in jaw kniman kib tuꞌn,
atzunju cꞌujlalil in ko chꞌiy tuꞌn.
2 Ka at jun xjal in tmaꞌn ka baꞌn tcyakil tuꞌn,
mintiꞌ chꞌin baꞌn tuꞌn,
atx taj tuꞌn tbant tuꞌn.
3 Pero ka at jun xjal cꞌujlaꞌn Dios tuꞌn,
atzunju ojtzkiꞌn tuꞌn Dios.
4 Ex atzunju chibj in xi kchyoꞌn ex otok cub kꞌoꞌn te jun oyaj cywitz tilbilal,
baꞌn kuꞌn,
ke tilbilal mintiꞌ cyajben twitz txꞌotxꞌ,
oꞌcx jun Dios at,
mintiꞌ juntl,
5 masque at junjun toc cybi dios ka tuj cyaꞌj ex ka twitz txꞌotxꞌ,
porque at nimcu cydios xjal ex nimcu cypatrón.
6 Atzun ke,
nok junx Kdios at,
aju Mambaj,
atzunju binchalte tcyakil,
ex atzun tuꞌn kajben te.
Ex junx Kajaw at,
aju Jesucrist,
nok tuꞌn o bant tcyakil,
ex tuꞌn in ko ankꞌin.
7 Pero mya cycyakil nneꞌl cynicꞌ tiꞌj jlu,
porque at junjun nakꞌl ke cyiꞌj ke tilbilal ojtxi,
oc t-xi cychyoꞌn chibj cucx in che ximan tiꞌj ka otok cub kꞌoꞌn te oyaj cywitz tilbilal;
tuꞌn jlu in tzꞌilix tuj cyanmi,
porque in jawjeꞌ cycꞌuꞌj tiꞌj,
ex naꞌnx tcyuwix cynabl.
8 Porque mya tuꞌn chibj tuꞌn kcꞌmet tuꞌn Dios;
porque ka ma txi kchyoꞌn,
mya tuꞌnju ko oquel mas baꞌn,
ex ka mintiꞌ ma txi kchyoꞌn,
mya tuꞌnju ko oquel mintiꞌ kajben.
9 Pero ten cycwente tiꞌj tuꞌn miꞌn cycub tzꞌak tuj il keju chꞌin cyocslabl tuꞌnju tzokpiꞌn keye tiꞌj tuꞌn t-xi cychyoꞌne.
10 Porque ka at jun erman chꞌin tocslabl ma queꞌyinte teya,
aya at tnabla,
kꞌukla tiꞌj mes tuj cyja tilbilal in chyona chibj,
¿mlaypelo pon tcꞌuꞌj tiꞌj tuꞌn t-xi tchyoꞌn aju chibj in cub kꞌoꞌn te oyaj cywitz tilbilal?
11 Ex tuꞌnju at tnabla tiꞌj jlu,
cꞌelel tzpet termaniya chꞌin tocslabl,
aju o cyim Crist tuꞌn tlaj.
12 Cyjaꞌtzun,
ka ma tzꞌajtz jetpaj cynabl erman chꞌin cyocslabl tuꞌn tlaj cychiꞌye,
tiꞌj Crist in cybinchaꞌne il.
13 Cyjaꞌtzun,
ka tuꞌn tlaj nchiꞌye cbel tzꞌak wermaniye tuj il,
mlayx txi nchyoꞌne chibj,
tuꞌntzun miꞌn tcub tzꞌak wermaniye tuj il.