Jun xnakꞌtzbil tiꞌj mejebleꞌn
7
Tiꞌj ju tzaj cytzꞌibane weye tuj uꞌj,
ax toc balo baꞌn tuꞌn miꞌn tcnet t-xuꞌjil xinak;
2 pero tuꞌn tlaj nimcu in cybinchaꞌn aj pajil,
mas baꞌn teyle junjun xinak tuꞌn tten t-xuꞌjil ex teyle junjun xuꞌj tuꞌn tten tchmil.
3 Ate xinak miꞌn cub t-xcꞌayin tib te t-xuꞌjil;
icxte xuꞌj miꞌn cub t-xcꞌayin tib te tchmil.
4 Ate xuꞌj mintiꞌ toclen tiꞌjx t-ximlal,
ate chmilbaj at toclen tiꞌj;
ax icx te chmilbaj mintiꞌ toclen tiꞌjx t-ximlal,
ate xuꞌj at toclen tiꞌj.
5 Miꞌn cub cyxcꞌayin cyibe jun te juntl.
Jacu bant icju,
pero otok bant tiꞌj cyuꞌne ex nok te cabe kꞌij,
tuꞌntzun cycub tene tuj naꞌj Dios,
ex tuꞌn toc cymojban cyibe juntl maj,
tuꞌntzun miꞌn cyoque tuj joybil cyiꞌje tuꞌn Satanás tuꞌn tlaj mintiꞌ in cyjacꞌun cyibe.
6 Nok jun tumel ma txi nmaꞌne cyeye,
mya jun mandamyent.
7 Nokwit ic cycyakil xjal ic tzaꞌn kine,
pero teyle junjun at tex toclen tzaj kꞌoꞌn tuꞌn Dios,
junxitl toclen jun ex junxitl toclen juntl.
8 Pero cxel nmaꞌne cye keju mintiꞌ cymoj ex cye meba xuꞌj,
mas baꞌn tuꞌn cyten cyjunalx ic tzaꞌn weye.
9 Pero ka mintiꞌ tumel tuꞌn cyjacꞌunte cyib,
cyjyom cymoj,
porque mas baꞌn tuꞌn tcnet cymoj ex mya tuꞌn cyten nok in pon cycꞌuꞌj tiꞌj jun cymoj.
10 Pero cxel nmaꞌne cye keju mejebni,
tuꞌn miꞌn tel tpaꞌn tib xuꞌj tiꞌj tchmil.
Mya akine in chin kꞌmante jlu,
ate Kajaw in kꞌmante.
11 Katzun ma tzꞌel tpaꞌn tib,
cucx tuꞌn tcyaj ten,
mintiꞌ tuꞌn tmojeꞌ tucꞌil juntl,
ex ka tuꞌn tbant tten tucꞌil tchmil tuꞌn tmojeꞌ juntl maj tucꞌil.
Icx te chmilbaj,
miꞌn cyaj tcolin t-xuꞌjil.
12 Ex cye txkantl in xi nmaꞌne,
mya ate Kajaw in kꞌmante,
ka at jun erman mya ocslal t-xuꞌjil ex taj xuꞌj tuꞌn tten tucꞌil,
miꞌn cyaj tcolin xjal t-xuꞌjil.
13 Ex ka at jun xuꞌj mya ocslal tchmil ex taj xinak tuꞌn tten tucꞌil,
miꞌn cyaj tcolin xuꞌj tchmil.
14 Aju chmilbaj mya ocslal in tcꞌmoꞌn t-xtalbil Dios tuꞌnju ocslal t-xuꞌjil;
ex aju xuꞌj mya ocslal in tcꞌmoꞌn t-xtalbil Dios tuꞌnju ocslal tchmil.
Nokwit mya icju,
icwitlo cyten cycꞌwaꞌle ic tzaꞌn cycꞌwaꞌl mya ocslal,
pero jaꞌlo ateꞌ tjakꞌ t-xtalbil Dios.
15 Pero ka taj tuꞌn tel tpaꞌn tib aju mya ocslal,
paꞌmil tib;
ka ma tzꞌel tpaꞌn tib,
entons tzokpiꞌntl erman xinak ex ka erman xuꞌj,
porque ma ko txconjtz tuꞌn Dios tuꞌn kten mintiꞌ kꞌoj kxol.
16 ¿Biꞌnpe tuꞌna xuꞌj ka jacu clet tchmila tuꞌna?
Ex ¿biꞌnpe tuꞌna xinak ka jacu clet t-xuꞌjila tuꞌna?
17 Pero teyle junjun tuꞌn tten ic tzaꞌnx toclen tzaj tkꞌoꞌn Kajaw,
ex ic tzaꞌnx ma txconjtz teyle junjun tuꞌn Dios.
Atzun jlu in xi nmaꞌne cye cycyakil ocslal tuj junjun tnam.
18 Ka otok sircunsidarinjtz jun xjal tej ttxconjtz tuꞌn Dios,
cucx tuꞌn tten icju;
ex ka naꞌnxtok t-sircunsidarinjtz jun xjal tej ttxconjtz tuꞌn Dios,
cucx tuꞌn tten icju.
19 Aju sircunsisyón mintiꞌ toclen,
ex ka mintiꞌ ma bant sircunsisyón,
ax mintiꞌ toclen;
aju mas at toclen,
tuꞌn tjapun tmandamyent Dios kuꞌn.
20 Teyle junjun xjal tzaꞌnx tten tej ttxconjtz tuꞌn Dios cucx tuꞌn tten icju.
21 Ka jumajx tzyuꞌna te majen tej ttxconjtza tuꞌn Dios,
miꞌn bisuna tiꞌj.
Pero ka at tumel tuj twitza tuꞌn ttzokpeta,
baꞌn,
tzꞌoc tililx tuꞌna.
22 Porque aju majentok tej ttxconjtz tuꞌn Kajaw,
tzokpiꞌntl jaꞌlo ex ma tzꞌoc tuj tcwent Kajaw;
ex aju tzokpiꞌntok tej ttxconjtz tuꞌn Kajaw,
majen te Crist jaꞌlo.
23 Porque ma che lakꞌete ex nimxix lokꞌben cyeye;
cyjaꞌtzun miꞌn txi cycꞌayin cyibe cye xjal.
24 Erman,
teyle junjun tuꞌn tcyaj ten twitz Dios ic tzaꞌnx tten tej ttxconjtz.
25 Atzun cyiꞌj keju naꞌnx cymojeꞌ,
mintiꞌ jun yol tzaj tmaꞌn Kajaw weye cyiꞌj;
pero cxel nmaꞌne cyeye aju ma cub nximane,
porque ma tzaj kꞌakꞌan tcꞌuꞌj Kajaw wiꞌje baꞌn tuꞌn tkeꞌ cycꞌuꞌje wiꞌje.
26 Baꞌn te jlu tuj nnable,
tuꞌn tcyaj ten xjal ic tzaꞌnx tten,
tuꞌn tlaj nim yajbil ke at jaꞌlo.
27 Ka at t-xuꞌjila,
miꞌn ximana tiꞌj tuꞌn tel tpaꞌn tiba tiꞌj.
Ex ka mintiꞌ t-xuꞌjila,
miꞌn ximana tiꞌj tuꞌn tmojeꞌya.
28 Pero ka ma mojeꞌya,
mintiꞌ in tbinchaꞌna il;
ax icx te kꞌapoj ka ma mojeꞌ,
mintiꞌ in binchan il;
pero akeju in che mojeꞌ,
tzul yajbil cye tuj cychwinklal tzalu twitz txꞌotxꞌ,
ex atzun waje tuꞌn miꞌn cycꞌulbaꞌye jlu.
29 Atzun jlu in xi nmaꞌne erman:
Nok nicꞌxi kꞌij taj tuꞌn tul Kajaw.
Jaꞌlotzun,
keju at cyxuꞌjil,
tuꞌn cyten ic tzaꞌn mintiꞌ cyxuꞌjil;
30 ex keju in che okꞌ,
tuꞌn cyten ic tzaꞌn mintiꞌ in che okꞌ;
ex keju in che tzalaj,
tuꞌn cyten ic tzaꞌn mintiꞌ in che tzalaj;
ex keju in che lokꞌon,
tuꞌn cyten ic tzaꞌn mintiꞌ at cye;
31 ex keju in ajben cyuꞌn aju at twitz txꞌotxꞌ,
tuꞌn cyten ic tzaꞌn mintiꞌ in ajbenxix cyuꞌn;
porque tcyakilju in baj twitz txꞌotxꞌ cyjaꞌ tnaj.
32 Atzun wajbile tuꞌn miꞌn tbaj cycꞌuꞌje;
aju xjal mintiꞌ t-xuꞌjil,
toc tcꞌuꞌj tiꞌj tuꞌn tajben te Kajaw tuꞌntzun ttzalaj Kajaw tiꞌj;
33 pero aju xjal at t-xuꞌjil,
toc tcꞌuꞌj tiꞌj ju te twitz txꞌotxꞌ,
tuꞌntzun ttzalaj t-xuꞌjil tiꞌj.
34 Ax icx mya junx taꞌ jun xuꞌj at tchmil ex jun xuꞌj mintiꞌ tchmil.
Aju xuꞌj mintiꞌ tchmil,
toc tcꞌuꞌj tiꞌj tuꞌn tajben te Kajaw,
in xi tkꞌoꞌn t-ximlal te Dios tucꞌix tanmi tuꞌn tajben oꞌcx te;
atzunju xuꞌj at tchmil,
toc tcꞌuꞌj tiꞌj ju te twitz txꞌotxꞌ tuꞌntzun ttzalaj tchmil tiꞌj.
35 Ma txi nmaꞌne jlu cyeye tuꞌn tajben cyeye,
pero mya tuꞌn cycub ntzyuꞌne,
nok oꞌcx waje tuꞌn cytene tuj tumelxix ex tuꞌn cyajbene te Kajaw mintiꞌ jun makol cyeye.
36 Pero ka at jun ma cub t-ximan ka mya baꞌn tuꞌn tcub ttzyuꞌn tmeꞌjel ex otok pon tabkꞌiyil,
ex ka il tiꞌj tuꞌn tmojeꞌ,
bincham alcyeju tajbil;
baꞌn tuꞌn tmojeꞌ,
mya il jlu.
37 Atzunju xjal junx t-ximbetz,
ex mya il tiꞌj tuj twitz tuꞌn tmojeꞌ tmeꞌjel,
axte xjal tajwil tnabl,
ka ma cub t-ximan tuj tanmi tuꞌn miꞌn t-xi tkꞌoꞌn tmeꞌjel,
baꞌn in tbinchaꞌn.
38 Cyjaꞌtzun,
alcye jun xjal in xi tkꞌoꞌn tmeꞌjel tuꞌn tmojeꞌ,
baꞌn in tbinchaꞌn;
ex alcye jun xjal mintiꞌ in xi tkꞌoꞌn tmeꞌjel tuꞌn tmojeꞌ,
mas baꞌn in tbinchaꞌn.
39 Aju xuꞌj at tchmil,
toc tuj tcwent tchmil tuꞌn ley itzꞌxcu tchmil;
katzun ma cyim tchmil,
tzokpiꞌntl te xuꞌj tuꞌn tmojeꞌ tucꞌil juntl nok al ucꞌil tajbil,
pero tucꞌil jun ocslal tiꞌj Kajaw.
40 Pero weye tuj nnabl,
mas at tzalajbil te xuꞌj ka cucx ma cyaj ten;
ax icx ma cub nximane ka ax T-xew Dios at wucꞌile.