Mya baꞌn tuꞌn cyxiꞌ ocslal xtisil cywitz ke jwes mya ocslal
6
Ka at jun cyxole at tkꞌoj tiꞌj juntl,
¿tzaꞌn tten in xiꞌ xtisil cywitz ke aj sanjelal mya ocslal ex mya cywitz ke ocslal?
2 ¿Mintiꞌpe baꞌn cyuꞌne,
ke xjal tuj tcyakil twitz txꞌotxꞌ che oquel tuj xjel cyuꞌn ocslal?
Katzun cyuꞌne che oquel xjal tuj xjel,
¿maj mlaytzun bant tiꞌj cyuꞌne aju nok chꞌin t-xilen?
3 ¿Mintiꞌpe baꞌn cyuꞌne oc che oquel ke anjel tuj xjel kuꞌn?
¿Yajtzunju in baj kxol jaꞌlo,
mlaypelo bant tiꞌj kuꞌn?
4 Katzun in che xtisine tiꞌj ju in baj cyxole jaꞌlo,
¿maj in che oc cykꞌoꞌne te jwes keju nok chꞌin cyoclen cyxol ocslal?
5 In xi nmaꞌne jlu tuꞌn ttzaj cychꞌixwiye.
¿Maj mintiꞌ jun cyxole at tnabl tuꞌn toc te jwes cyxol terman?
6 Atzun jlu in cybinchaꞌne:
In kꞌojin jun erman tiꞌj juntl erman,
in che xtisin cywitz ke aj sanjelal mya ocslal.
7 Ax toc at cypaltile tiꞌj jlu tuꞌnju at cykꞌoje cyxolxe.
¿Myapelo mas baꞌn tuꞌn ticꞌx cyuꞌne aju mya baꞌn in binchanjtz cyiꞌje?
¿Myapelo mas baꞌn tuꞌn t-xi elkꞌaꞌn aju at cyeye?
8 Pero jlu ax keye in cybinchaꞌne mya baꞌn tiꞌj juntl ex in che elkꞌane,
ex cyiꞌjx erman in cybinchaꞌne jlu.
9 ¿Mintiꞌpe baꞌn cyuꞌne,
ke xjal mya tzꞌaklxix mintiꞌ cyoclen tiꞌj tcawbil Dios?
Miꞌn che tzpete tiꞌj;
keju in che yaẍin,
ke cꞌulul cywitz ke tilbilal,
ke aj pajil,
keju nnoꞌc cykꞌon cyib te xuꞌj,
ke xinak in pon cycꞌuꞌj tiꞌj xinak,
10 ke elekꞌ,
keju in pon cycꞌuꞌj tiꞌj nimcu,
ke cꞌal kꞌeꞌn,
keju in che yasun ex keju in che elkꞌan tuꞌn sbubl,
cycyakil jlu mintiꞌ cyoclen tiꞌj tcawbil Dios.
11 Ex ictzun cyten junjun cyeye ojtxi;
pero ma che txꞌjete jaꞌlo,
ex ma che el paꞌne tuꞌn Dios tuꞌn cyajbene oꞌcx te,
ex ma che oc kꞌoꞌne te tzꞌaklxix tuꞌn Dios nok tuꞌn Kajaw Jesús ex tuꞌn T-xew Kdios.
Aju kximlal tuꞌn tajben te Dios
12 At jun yol in cymaꞌn xjal cyjaꞌ:
Baꞌn tuꞌn tbant kuꞌn nok alcye kajbil,
che chi.
Ax toc jlu,
pero mya tcyakil jacu tzꞌel baꞌn te cye.
Ax toc jacu bant wuꞌne nok alcye wajbile,
pero mlay txi nkꞌon wibe tuꞌn ntene tjakꞌ tcawbil.
13 Aju chibj in ajben te kcꞌuꞌj,
ex atzun kcꞌuꞌj in ajben te tcubix chibj;
pero tzaꞌnx jun ax icx juntl che najel cycabil tuꞌn Dios.
Pero aju kximlal myatzun tajben tuꞌn tbinchet aj pajil,
nok oꞌcx tuꞌn tajben te Kajaw,
atzunte Kajaw tuꞌn tajben te kximlal.
14 Ate Dios jaw ankꞌin Kajaw tuꞌn;
ax icx ke ko jawil ankꞌin tuꞌn,
tuꞌn tipumal.
15 ¿Mintiꞌpe baꞌn cyuꞌne ka aju cyximlale te Crist?
¿Maj cꞌelel wiꞌne aju te Crist tuꞌn t-xi nkꞌoꞌne te jun xuꞌj aj pajil?
Mlayx.
16 ¿Mintiꞌpe baꞌn cyuꞌne ka at jun ma tzꞌoc tmojban tib tucꞌil jun xuꞌj aj pajil,
junx ma tzꞌoc t-ximlal tucꞌil?
Porque in tmaꞌn tuj Tuꞌjil:
Cycabil che oquel te junx.
17 Pero alcye jun ma tzꞌoc tmojban tib tucꞌil Kajaw,
junx cyanmi tucꞌil.
18 Cyel oke tiꞌj ju yaẍbil.
Alcyechakx juntl il ma tbincha xjal,
mya tiꞌj t-ximlal in binchan il;
pero alcyeju in binchan aj pajil,
in binchan il tiꞌjx t-ximlal.
19 ¿Mintiꞌpe baꞌn cyuꞌne,
aju cyximlale tja Xewbaj Xjan aju at tuj cyanmiye,
aju ma tzaj kꞌoꞌn cyeye tuꞌn Dios,
ex mya cycwent-x cyibe?
20 Porque o che lakꞌete ex nim lokꞌben cyeye;
cyjaꞌtzun cynimsaꞌnctze Dios tuj cyximlale [ex tuj cyanmiye,
porque te Dios ke cycabil].