Tej tpon Pablo ttzi txꞌotxꞌ Malta
28
Tejtzun kbaj clete,
o kbiye Malta tbi txꞌotxꞌ lu tcub tmijil mar.
2 Atzun ke xjal ax najl ke,
nimxix xtalbil cybincha keye;
porque cub cykꞌoꞌn jun kꞌakꞌ tuꞌn tlaj jbal ex tuꞌn tlaj cheꞌw,
ex kcyakile o cꞌmonjtze cyuꞌn.
3 Atzunte Pablo otok tzaj tiꞌn junjun tkꞌab tzeꞌ tzkij,
ocx tkꞌoꞌn tuj kꞌakꞌ,
ex at jun kꞌantiꞌ tocx tuj tkꞌab tzeꞌ,
tej tnaꞌnte kꞌantiꞌ tcyakil kꞌakꞌ etz ok,
oc txꞌaꞌn tkꞌab Pablo tuꞌn,
ex ax cyaj ten tiꞌj tkꞌab.
4 Atzun cye xjal ax najl ke,
tej cyqueꞌyinte toc kꞌantiꞌ tiꞌj tkꞌab Pablo,
cyma cyxolx:
—Aju xjal lu balo byol xjal te,
masque ma clet tuj mar,
pero jaꞌlo mlay cyaj tkꞌoꞌn Dios tuꞌn tankꞌintl,
che chi xjal.
5 Atzunte Pablo el tchtoꞌn ju kꞌantiꞌ tiꞌj tkꞌab,
cub tzꞌak kꞌantiꞌ tuj kꞌakꞌ,
ex mintiꞌ jun tiꞌxti o baj tiꞌj Pablo.
6 Atzun cye xjal in che ayontok tiꞌj ka tuꞌn t-xi mal tchibjal Pablo ex ka minaben tuꞌn tcub tzꞌak ex tuꞌn tcyim;
cub cyyoꞌn nim tuj.
Tejtzun cylonte mintiꞌ o baj tiꞌj,
chꞌexpettzun cyximbetz ex o cyma ka jun dios te Pablo.
7 Nikayintok taꞌ ttxꞌotxꞌ jun xjal Publio tbi,
nejenel cyxol xjal tuj Malta,
o cꞌmonjtze tuꞌn,
ex tuꞌn tcyakil tcꞌuꞌj tzaj tkꞌoꞌn kposadiye ex kwaye tuj ox kꞌij.
8 Ex aju tman Publio coẍltok otok yabt tuꞌn cyak ex tuꞌn chicꞌoj;
ocxtzun Pablo queꞌyil te,
ex tbajlenxi naꞌn Dios,
cub tkꞌoꞌn tkꞌab tibaj,
ex o banix.
9 Tejtzun tbanix ju xjal lu,
ax icx e ul mastl xjal yab,
ax najl ke,
ex e banix.
10 Ax icx tzaj cykꞌoꞌn xjal nimcu oyaj keye;
ex tej kxiꞌye tuꞌn kocxe tuj barc,
ocx cykꞌoꞌn tuj barc aju at tajben keye.
Tej tpon Pablo tuj tnam Rom
11 Tbajlenxitzun ox xjaw tej ktene cyucꞌil,
oꞌxtzune tuj jun barc cye aj Alejandriy aju cyaj ten tuj jbalil ttzi txꞌotxꞌ Malta,
toc tilbilal Castor tiꞌj tucꞌix tilbilal Pólux,
cydios xjal ke jlu.
12 Tejtzun kpone tuj tnam Siracusa,
axtzun o cyaj tene ox kꞌij.
13 Tejtzun kicꞌe,
oꞌxtzune ttziꞌyile mar,
o pone tuj tnam Regio;
ex tuj juntl kꞌij tzaj chꞌin cykꞌikꞌ tibaj mar te cubni,
tujtzun tcabin kꞌij o canune tuj tnam Puteoli.
14 Atzun e cnet junjun erman kuꞌne,
e cubsan kwitze tuꞌn kcyaj tene wuk kꞌij cyucꞌil;
ex cyjaꞌtzun o pone tuj tnam Rom.
15 Tejtzun cybinte erman tuj Rom cyjaꞌ kxiꞌye,
e tzaj canul kiꞌje max tuj plas Apio ex tuj jun lugar Ox Posad tbi;
tej tlonte Pablo cywitz erman,
xi tkꞌoꞌn chjonte te Dios ex o keꞌxix tcꞌuꞌj.
16 Tejtzun kpone tuj tnam Rom,
[e jeꞌx tkꞌoꞌn capitán ke pres tuj tcwent nejenel cye polisiy;]
atzunte Pablo xi kꞌoꞌn permis te tuꞌn tten junx te tuj juntl ja ex tuꞌn t-xkꞌukinjtz tuꞌn jun soldad.
Tej tpacban Pablo tuj tnam Rom
17 Tbajlenxitzun ox kꞌij,
e tzaj ttxcoꞌn Pablo ke nejenel cye xjal judiy tuj tnam Rom;
tejtzun cypon chmet,
xi tmaꞌn cye:
—Akeye erman,
mintiꞌ jun tiꞌxti o nbinchaye cyiꞌj kxjalil ex mi tiꞌj cyley kxeꞌchel,
pero ma chin tzaj kꞌoꞌne tuj cykꞌab aj Rom,
presin kine tzajnix bant tuj Jerusalén.
18 Tejtzun woque tuj xjel cyuꞌn aj Rom,
o cyajbe tuꞌn wetz tzokpiꞌne porque mintiꞌ jun wile o cnet cyuꞌn tuꞌn ncyime.
19 Pero nok tuꞌnju e jaw tzokpaj ke xjal judiy wiꞌje,
cyjaꞌtzun xi nkanine tuꞌn woque tuj xjel twitz tat gobierni;
mya tuꞌnju atwit nkꞌoje cyiꞌj nxjalile ma chin ule kꞌmalte te gobierni.
20 Cyjaꞌtzun,
tuꞌn tlaj jlu ma che tzaj ntxcoꞌne tuꞌn toc nqueꞌyine cywitze ex tuꞌn nyoline cyucꞌile,
porque cꞌaloꞌn kine tuꞌnju caden lu,
nok tuꞌn tlaj in xi nmaꞌne tkanil jun Colol aju in ko ayon tiꞌj akoꞌ aj Israel koꞌ,
chi Pablo cye.
21 Atzun cye nejenel cye xjal judiy xi cymaꞌn:
—Mintiꞌ ma kcꞌame uꞌj tzajni tuj Judey in yolin tiꞌja,
ex mintiꞌ ul jun kerman txꞌolbalte tiꞌja ex ka yolil mya baꞌn tiꞌja.
22 Pero kajbile tuꞌn kbinteye teya alcye t-ximbetza,
porque baꞌn kuꞌne,
aju ocslabl lu,
tuj tcyakil lugar in che yolin xjal mya baꞌn tiꞌj,
che chi nejenel.
23 Entons xi cymaꞌn te Pablo alcye kꞌij tuꞌn cyul,
e ultzun nimcu xjal tucꞌil tuj tposad.
Xitzun tchicꞌbaꞌn Pablo cye tiꞌj tcawbil Dios,
oc tilil tuꞌn tuꞌn tcub tiꞌj cynabl,
tuꞌn cyocslan tiꞌj Jesús,
tzaj tnaꞌn tiꞌj tley Moisés ax icx tiꞌj cyyol t-sanjel Dios,
xeꞌt-x tyolin te prim,
japun baj twiꞌ tyol te kale.
24 At junjun cub tiꞌj cynabl tuꞌn tyol Pablo;
atzun junjuntl mintiꞌ xi cyocslaꞌn.
25 Cyjaꞌtzun e el lakꞌeꞌ tuꞌnju mya junx cyyol cyxolx;
naꞌnxtok cyel lakꞌeꞌ,
xi tmaꞌn Pablo ju yol lu cye:
—Ax toc ju yol o tma Xewbaj Xjan tej tyolin Isaías aju t-sanjel Dios cye kxeꞌchel ojtxi,
porque chi Kman:
26 Txiꞌya ex kꞌmanxa cye xjal lu:
Cucx in cybiꞌne,
pero mintiꞌ nneꞌl cynicꞌe tiꞌj;
cucx nnoꞌc cyqueꞌyine,
pero mintiꞌ in cyile,
chicuya cye;
27 porque aju cyanmi xjal lu ma cyuwix,
mintiꞌ in xi cybiꞌn tuꞌn cyẍcyin,
ex ma cub cymaltzꞌuꞌn cywitz tuꞌntzun miꞌn cylonte tuꞌn cywitz,
ex tuꞌn miꞌn cybinte tuꞌn cyẍcyin,
ex tuꞌn miꞌn tel cynicꞌ tiꞌj tuj cyanmi,
ex tuꞌn miꞌn cyajtz meltzꞌaj tuꞌn cybanix wuꞌne,
chi Kman te Isaías.
28 Cybinxtzune,
aju colbil lu ma tzaj tkꞌoꞌn Dios cxel kꞌmet cye xjal mya judiy ke;
ex atzun cye cxel cybiꞌn.
29 [Tej tbaj tmaꞌn Pablo jlu,
e icꞌtzun ke xjal judiy in che yolin nimxix tiꞌj cyxolx.]