Tej cyyajlanjtz ke ocslal tuꞌn Saulo
8
Atzunte Saulo mojl tyol cyucꞌil tuꞌn tcyim Esteban.
Ax kꞌij e oc ten xjal yajlal cye cycyakil ocslal ateꞌ tuj Jerusalén;
ex cycyakil e jeꞌl sputj,
e pon tuj txꞌotxꞌ Judey ex tuj txꞌotxꞌ Samaria,
oꞌcx ke apostl e cyaj ten.
2 Cuꞌxtzun makuꞌn Esteban cyuꞌn junjun xinak nimal Dios,
ex e okꞌxix tiꞌj.
3 Atzunte Saulo cucx cyyajlanjtz ke ocslal tuꞌn,
nnoꞌcx cyuj cycyakil ja,
ex in che etz tjawoꞌn ke xinak ex ke xuꞌj,
in che ocx tkꞌoꞌn tuj pres.
Tej tpacban Pelip tuj tnam Samaria tiꞌj tkanil colbil
4 Atzun cye keju otok che el sputj,
in che bet tuj tcyakil lugar in che pacban tiꞌj tkanil colbil.
5 Atzunte Pelip xiꞌ tuj tnam Samaria,
ex xi tpacbaꞌn cye xjal tiꞌj Crist aju at toclen tuꞌn Dios.
6 Atzun cye xjal tej cybinte tyol Pelip ex tej cyqueꞌyinte in che bant ke señ nim cyipumal tuꞌn,
xi cybiꞌnxix,
junx toc cynabl tiꞌj aju xi tmaꞌn Pelip cye.
7 Porque nimcu xjal at juꞌẍ tuj cyanmi in che banix,
in che schꞌin ke juꞌẍ oc cyetz tuj cyanmi xjal;
ex nimcu xjal tzkijleꞌn cyyabil in che banix cyucꞌix nimcu cox.
8 Cyjaꞌtzun nimxix e tzalaj ke xjal tuj tnam Samaria.
9 Pero attok jun chman tuj tnam,
Simón tbi,
baꞌn mañ tuꞌn ex otok che baj t-sbuꞌn ke aj Samaria,
in tmaꞌn ka nim toclen.
10 Xitzun cybiꞌnxix cycyakil xjal aju tyol chman,
tzaꞌnx keju chꞌin cyoclen ax icx keju maꞌ cyoclen in cymaꞌn:
—Ate xjal lu ma tzꞌoc te tipumal Dios maꞌxix.
11 Ex xi cybiꞌnxix aju tyol chman,
porque otok tzꞌel kꞌij in che sbunjtz tuꞌn nok tuꞌnju mañ baꞌn tuꞌn.
12 Pero tej t-xi cyocslaꞌn aju tpacbabl Pelip tiꞌj tcawbil Dios ex tiꞌj Jesucrist,
e byantzun ke xinak ex ke xuꞌj.
13 Ax icxte Simón xi tocslaꞌn,
ex tej tbyan ax o ten tucꞌil Pelip;
ex tej toc tqueꞌyin ke señ ex ke binchben nim cyipumal in che bant tuꞌn Pelip,
jawtzun labin tiꞌj.
14 Atzun cye apostl ateꞌtok tuj Jerusalén,
tej cybinte ka otok cycꞌam aj Samaria aju tyol Dios,
xitzun samaꞌn Pedro cyuꞌn tucꞌix Juan tuꞌn cypon cyucꞌil.
15 Tejtzun tpon Pedro tucꞌix Juan tuj Samaria,
e octzun ten naꞌl Dios cyiꞌj ocslal tuꞌn ttzaj kꞌoꞌn Xewbaj Xjan cye.
16 Porque naꞌnxtok ttzaj kꞌoꞌn Xewbaj Xjan cye;
nok oꞌcx otok che byan tuj tbi Kajaw Jesús.
17 Atzunte Pedro tucꞌix Juan cub cykꞌoꞌn cykꞌab tibaj cywiꞌ ocslal,
ex cycꞌamtzun ocslal aju Xewbaj Xjan.
18 Tejtzun tqueꞌyinte Simón in kꞌonjtztok Xewbaj Xjan nok tuꞌnju in cub cykꞌoꞌn cykꞌab apostl tibaj cywiꞌ xjal,
xitzun tmaꞌn cye tuꞌn t-xi cyiꞌn chꞌin pwak,
19 ex tma:
—Ax icx cykꞌontze weye aju ipumalj lu,
tuꞌntzun cycꞌmonte xjal Xewbaj Xjan oc tcub nkꞌoꞌne nkꞌabe tibaj cywiꞌ.
20 Atzunte Pedro xi tmaꞌn te:
—Cnajel tpwaka,
ax icx teya,
porque ma cub t-ximana ka nok tuꞌn tpwaka tuꞌn tcꞌmonteya aju oyaj in tzaj tkꞌoꞌn Dios.
21 Mintiꞌ toclena tiꞌj jlu porque aju tanmiya mya tzꞌaklxix twitz Dios.
22 Tajtz tiꞌj tanmiya tuꞌnju mya baꞌn ma tbinchaya,
ex cubsana twitz Dios,
kapelo jacu cub najsaꞌn aju ma cub t-ximana tuj tanmiya;
23 porque nnoꞌc nqueꞌyine puro nojni tuj tanmiya tuꞌn mya baꞌn,
ex tzyuꞌnxa tuꞌnju mya baꞌn.
24 Xitzun ttzakꞌweꞌn Simón:
—Che cubsane twitz Kajaw wiꞌje,
tuꞌn miꞌn ttzaj jlu wibaje aju ma cymaye,
chi Simón.
25 Atzun cye apostl t-xilenxi cychicꞌbaꞌn aju axix toc ex tbajlenxi cymaꞌn tyol Dios cye xjal,
e ajtz meltzꞌaj tuꞌn cyul tuj Jerusalén,
ex tuj be in che pacban tiꞌj tkanil colbil cyuj nimcu tal tnam cye aj Samaria.
O yolin Pelip tucꞌil jun xjal aj Etiopía
26 Tbajlenxi jlu o yolin jun t-anjel Kajaw tucꞌil Pelip ex tma:
—Weꞌctza ex txiꞌya tuj tnayaj kꞌij tuj be in xiꞌ tuj Jerusalén tuꞌn tcuꞌpun tuj Gaza,
chi anjel.
Aju be lu in cuꞌx tuj lugar mintiꞌ cynajbil xjal tuj.
27 Jawtzun weꞌ Pelip,
ex xiꞌtzun.
Ex oc tcꞌulban tib tucꞌil jun xjal aj Etiopía.
Nim toclen ju xjal lu,
ex onil te jun xuꞌj rey Candase tbi,
aju cyrey aj Etiopía.
Tuj tcwent taꞌ aju tkꞌinumabl xuꞌj rey,
ex otok tzul aj tuj Jerusalén cꞌulul te Dios.
28 Cyjaꞌtok taj xjal tuj ttanmi kꞌukltok tuj tcarwaj,
ex in schꞌintok tuj Tuꞌjil Isaías aju t-sanjel Dios.
29 Atzunte Xewbaj Xjan tzaj tmaꞌn te Pelip:
—Lakꞌeꞌxa ttxlaj carwaj.
30 Xitzun kelan Pelip ttxlaj,
ex o tbi in schꞌintok tuj Tuꞌjil Isaías aju t-sanjel Dios.
Xitzun tkanin Pelip te:
—¿Tzinpe nneꞌl tnicꞌa tiꞌj aju in jaw t-schꞌiꞌna?
31 Atzunte xjal tma:
—¿Tzaꞌn tten tuꞌn tel nnicꞌe tiꞌj ka mi aꞌl jun chicꞌbalte weye?
Ex o cubsan xjal tuꞌn tjax Pelip tucꞌil ex tuꞌn tcub keꞌ ttxlaj.
32 In schꞌintok tuj Tuꞌjil jatum in tmaꞌn cyjaꞌ:
Xi kꞌiꞌn ic tzaꞌn jun ẍneꞌl in xi kꞌiꞌn tuj biybil te;
ex ic tzaꞌn jun ẍneꞌl mintiꞌ in kꞌajt twitz ju matzol tiꞌj,
cyjaꞌxtzun te mintiꞌ o kꞌajt.
33 Tej tyajlanjtz mintiꞌ xi binchet tiꞌj;
atzunju tiyjil,
¿alcye jun jacu bant ttxꞌolbante te?
Porque cub byoꞌn tuꞌn miꞌn ttentl twitz txꞌotxꞌ,
chi tuj tuꞌjil.
34 Xitzun tkanin aj Etiopía te Pelip:
—Chin cubsale teya tuꞌn ttzaj tmaꞌna weye,
¿al iꞌj o yolin t-sanjel Dios;
tiꞌjxpe o yolin ex ka tiꞌj juntl?
35 Tzyettzun tyolin Pelip,
tzaj xeꞌt tyol tiꞌj ju in tmaꞌn tuj tuꞌjil Isaías aju t-sanjel Dios,
ex xi tpacbaꞌn aju tkanil baꞌn tiꞌj Jesús.
36 Ex cyjaꞌ cyxiꞌ tuj be,
e canun ttzi jun aꞌ,
tmatzun ju xjal:
—Lu jun aꞌ lu;
¿myapelo baꞌn tuꞌn nbyane?
37 [Xitzun tmaꞌn Pelip te:
—Ka ma txi tocslaꞌna tuꞌn tcyakil tanmiya,
jacu bant.
Xi ttzakꞌweꞌn xjal:
—Cxel wocslaꞌne ate Jesucrist Tcꞌwaꞌl Dios.]
38 Xitzun tmaꞌn xjal tuꞌn tweꞌ carwaj;
e cuꞌxtzun cycabil tuj aꞌ,
ex o byan ju xjal tuꞌn Pelip.
39 Tejtzun cyjatz tuj aꞌ,
jaw kꞌiꞌn naj Pelip tuꞌn T-xew Kajaw,
ex mintiꞌ o ilwaj juntl maj Pelip tuꞌn xjal;
icꞌtzun xjal in tzalaj tuj tbe.
40 Atzunte Pelip pon kꞌiꞌn tuj tnam Azoto;
ex icꞌtzun in pacban tiꞌj tkanil colbil cyuj cycyakil tnam,
ex pon max tuj Cesarey.