Tej tajtz tiꞌj tanmi Saulo ex ocslan
9
Atzunte Saulo cucx t-xobtzan cyiꞌj ocslal tiꞌj Kajaw ex in tmaꞌn tuꞌn cycyim tuꞌn,
pontzun tucꞌil nejenel cye pal cye xjal judiy,
2 ex xi tkanin tuꞌn ttzaj kꞌoꞌn uꞌj te tuꞌntzun tcꞌmet oc tpon cyuj ke ja te cꞌulbil tuj tnam Damasco,
ex tuꞌn cytzaj cꞌalet keju che cnetel tuꞌn,
tzaꞌnx ke xinak ax icx ke xuꞌj,
akeju otok txi cyocslaꞌn tkanil baꞌn,
tuꞌntzun cyul tiꞌn pres tuj Jerusalén.
Conversión de Saulo (Cybinchiben 9.1-19)
3 Cyjaꞌtok t-xiꞌ tuj be,
chꞌixtok tcanun tuj tnam Damasco,
minaben cub koptzꞌaj jun spicꞌun tiꞌjele tzajni tuj cyaꞌj.
4 Cubtzun tzꞌak twitz txꞌotxꞌ,
ex o tbi jun tkꞌajkꞌajel in tmaꞌn:
—Saulo,
Saulo,
¿tikuꞌn in chin cub tyajlaꞌna?
5 Atzunte Saulo xi tmaꞌn:
—¿Alcyetzuna,
Tat?
Ex tzaj tmaꞌn te:
—Akine Jesús aju in baj tyajlaꞌna;
[nok in baj tcꞌixbisan tiba ic tzaꞌn jun wacẍ nneꞌtz t-xajoꞌn puy.
6 Jawtzun luꞌlun Saulo,
tzaj t-xobil ex tma:
—Tat,
¿titzun tajbila tuꞌn nbinchanteye?
Atzunte Kajaw tma te:]
—Weꞌctza ex txiꞌya tuj tnam,
ex ctzajel kꞌmaꞌn teya alcye tuꞌn tbinchanteya.
7 Atzun ke xinak in che bettok tucꞌil Saulo,
e cyaj weꞌ,
biꞌx naj cynabl porque o cybi tkꞌajkꞌajel tyol jun xjal,
pero mintiꞌ o cyil.
8 Jawtzun weꞌ Saulo twitz txꞌotxꞌ ex jaw tqueꞌyin twitz,
pero mintiꞌ bant tqueꞌyin;
cyjaꞌtzun lachꞌoꞌn xiꞌ cyuꞌn tucꞌil,
xi cyiꞌn tuj tnam Damasco.
9 Atzun o ten ox kꞌij,
miban queꞌyin ex mintiꞌ o waꞌn ex mintiꞌ o cꞌan.
10 Attok jun ocslal tuj tnam Damasco Ananías tbi,
ex tma Kajaw te ic tzaꞌn tuj witzicꞌ:
—Ananías,
chi Kajaw.
Atzunte xi ttzakꞌweꞌn:
—Lu kine lu,
Tat.
11 Xitzun tmaꞌn Kajaw te:
—Weꞌctza ex txiꞌya tuj cay toc tbi Jikun tiꞌj,
ex jyoma jun xjal Saulo tbi,
aju aj Tarso,
atzun taꞌ tuj tja Judas;
porque lu in naꞌn Dios,
12 ex ma til ic tzaꞌn tuj witzicꞌ jun xinak Ananías tbi ma tzꞌocx tucꞌil,
ex ma cub tkꞌoꞌn tkꞌab tibaj tuꞌn tbant tqueꞌyin,
chi Kajaw te.
13 Atzunte Ananías xi ttzakꞌweꞌn:
—Tat,
ma nbiye cye nimcu xjal tiꞌj ju xjal lu,
nimcu mya baꞌn in tbinchaꞌn cyiꞌj keju ma che ocslan tiꞌja tuj Jerusalén,
14 ax icx ma tzul tzalu ex at toclen cyuꞌn ke nejenel cye pal cye xjal judiy tuꞌn cyxi tpresin cycyakil keju in naꞌnjtz tbiya cyuꞌn,
chi Ananías.
15 Xitzun tmaꞌn Kajaw te Ananías:
—Txiꞌya,
porque nmajene jlu scꞌoꞌmaj wuꞌne tuꞌn t-xi tkꞌoꞌn tkanil wiꞌje cye txkantl xjal mya judiy ke,
ex cye cyrey,
ex cye aj Israel.
16 Porque cxel nyecꞌune te nicꞌpun ju ilxix tiꞌj tuꞌn ticꞌx tuꞌn tuꞌn nlaje,
chi Kajaw.
17 Xiꞌtzun Ananías,
ex ocx tuja,
cubtzun tkꞌoꞌn tkꞌab tibaj twiꞌ Saulo,
ex tma:
—Erman Saulo,
ma chin tzaj samaꞌne tuꞌn Kajaw Jesús aju cub tyecꞌun tib twitza tuj be tej cyjaꞌtok ttzaja;
ma chin tzaj samaꞌne tuꞌn tjaket twitza ex tuꞌn tnoj tuj tanmiya tuꞌn Xewbaj Xjan,
chi Ananías.
18 Ex jurat el tzꞌak tmuꞌpil tbakꞌ twitz Saulo,
ex jaket twitz;
jawtzun weꞌ ex o byan.
19 Ex tej t-xiꞌ twa oc juntl maj tipun.
Ex ax cyaj ten Saulo cabe kꞌij cyucꞌil ocslal ax ateꞌtok tuj tnam Damasco.
Tej tpacban Saulo tuj tnam Damasco
20 Ex biꞌx oc ten Saulo pacbal cyuj ke ja te cꞌulbil,
in tmaꞌn ka a Crist Tcꞌwaꞌl Dios.
21 Ex cycyakil keju e binte tyol,
biꞌx jaw naj cynabl,
in cymaꞌn:
—¿Myapetzun a xjal lu in yajlan cye keju in naꞌnjtz tbi Jesús cyuꞌn tuj Jerusalén,
ex cyjaꞌtzun ma tzul tzalu tuꞌn cyxi tpresin ke ocslal ex tuꞌn cypon tiꞌn cywitz ke nejenel cye pal cyxol xjal judiy?
Che chi xjal.
22 Atzunte Saulo tcyuwsaxix tib,
in tchicꞌbaꞌnxix ka ate Jesús ju Crist aju at toclen tuꞌn Dios;
cyjaꞌtzun el tzpet cynabl xjal judiy tuꞌn,
akeju najl ke tuj Damasco.
Tej tcolpaj Saulo cywitz ke xjal judiy
23 Tbajlenxitzun nimcu kꞌij,
bant tiꞌj cyuꞌn xjal judiy tuꞌn tcub Saulo cyuꞌn;
24 pero at jun xjal pon kꞌmalte te Saulo tiꞌj ju otok bant tiꞌj cyuꞌn.
Ex e cub ten xjal xkꞌukil ttzi tpwertil tnam kꞌijl ex konicꞌan tuꞌn tcub cybyoꞌn.
25 Atzun cye ocslal,
te konicꞌan cuꞌtz cykꞌoꞌn twi muro tuj jun chiꞌl tuꞌn tcubil twitz txꞌotxꞌ.
Cyjaꞌtzun tten tzokpaj Saulo.
Tej tpon Saulo tuj Jerusalén
26 Tej tpon Saulo tuj Jerusalén,
o tajbe tuꞌn tten cyxol ocslal;
pero cycyakil in che xobtok tiꞌj,
mintiꞌ xi cyniman ka otok tzꞌocslan Saulo.
27 Xiꞌtzun Bernabé ucꞌil te,
ul tiꞌn cywitz apostl,
ex xi ttxꞌolbaꞌn cye tzaꞌn tten o til Saulo Kajaw tuj be,
ex tzaꞌn tten o yolin Kajaw tucꞌil,
ex tzaꞌn tten o pacban Saulo tiꞌj Jesús tuj tnam Damasco mintiꞌ t-xobil.
28 Tentzun Saulo cyucꞌil tuj Jerusalén;
ex o bet junx cyucꞌil,
29 ex in pacban tiꞌj Kajaw mintiꞌ t-xobil,
ex nim o yolin tiꞌj cyucꞌil xjal judiy baꞌn che yolin tuj grieg;
atzun cye oc tilil cyuꞌn tuꞌn tcub cybyoꞌn.
30 Tejtzun cybinte ke erman jlu,
xi kꞌiꞌn Saulo cyuꞌn tuj tnam Cesarey,
ex atzun xi cysamaꞌn tuꞌn tpon tuj tnam Tarso.
31 Atzun cye ocslal tuj junjun tnam tuj tcyakil Judey ex tuj Galiley ex tuj Samaria e cyaj ten tuj txubtxaj.
In che chꞌiytok tuj cyocslabl,
ex in che ankꞌin niman Kajaw cyuꞌn,
ex in kꞌukbanjtz cycꞌuꞌj tuꞌn Xewbaj Xjan;
cyjaꞌtzun in che chmet-xi junjun kꞌij.
Banix jun xjal Eneas tbi
32 Extzun Pedro visitaril cye ocslal tuj tcyakil tnam,
ax icx pon cyucꞌil ke ocslal najl tuj tnam Lida.
33 Atzun oc noj tiꞌj jun xjal Eneas tbi otok bant wajxak abkꞌi coẍl twitz tcoẍbil,
porque tzkijleꞌn tyabil.
34 Xitzun tmaꞌn Pedro te:
—Eneas,
cbanixela tuꞌn Jesucrist;
weꞌctza ex balkꞌiꞌnctz tcoẍbila,
chi Pedro.
Jurattzun jaw weꞌ Eneas.
35 Ex o cyil cycyakil xjal najl tuj tnam Lida ex tuj tnam Sarón aju binchben lu,
cyajtzun cykꞌoꞌn ju ojtxi cyten ex e ocslan tiꞌj Kajaw.
Jaw ankꞌin Dorcas
36 Ex attok jun xuꞌj tuj tnam Jope ocslal tiꞌj Kajaw,
Tabita tbi,
atzun tuj yol grieg Dorcas tbi.
Aju xuꞌj lu nimcu tbinchben baꞌn,
ex nimcu cycotz xjal in xi tkꞌoꞌn.
37 Atxtok Pedro tuj tnam Lida tej tyabt Dorcas ex cyim.
Ex tbajlenxi txꞌjet tiꞌj t-ximlal,
cub cykꞌoꞌn tuj tcab colin ja.
38 Tejtzun cybinte ke ocslal ka attok Pedro tuj tnam Lida,
xi cysamaꞌn cabe xjal txcol te,
porque nikayintok taꞌ tnam lu.
Tej cypon e cubsan twitz Pedro ex cyma:
—Tzaj naja kucꞌile,
che chi.
39 Jawtzun weꞌ Pedro ex xiꞌ cyucꞌil;
ex tej tpon,
xi cyiꞌn tuj tcab colin ja;
octzun cychmon cyib cycyakil meba xuꞌj tiꞌjele Pedro,
in che okꞌ ex tzaj cyyecꞌun ke xbalun ex ke cloꞌj e bant tuꞌn Dorcas ex otok txi tkꞌoꞌn te cycotz tej itzꞌxtok.
40 E etztzun tlajoꞌn Pedro cycyakil xjal tuja,
cub ẍmejeꞌ ex oc ten naꞌl Dios;
ajtzun tqueꞌyin jatum taꞌ cyimni,
ex tma:
—Weꞌctza,
Tabita.
Atzunte Tabita jaw tqueꞌyin twitz;
tejtzun tqueꞌyinte ka attok Pedro,
jawtzun keꞌ.
41 Tzaj ttzyuꞌn Pedro tkꞌab Tabita,
ex jaw twaban;
e ocxtzun ttxcoꞌn ke ocslal ex ke meba xuꞌj,
ex cub tkꞌoꞌn cywitz otok tzul tnabl.