22
—Akeye erman ex akeye tat,
cybintze aju ncolbil wibe cxel nmaꞌne cyeye jaꞌlo.
2 Tejtzun cybinte xjal in yolintok Pablo tuj yol ebrey,
e cub numeꞌxix.
Xitzun tmaꞌn Pablo cye:
3 —Ax toc,
weye judiy xjal kine,
ax in itzꞌjye tuj tnam Tarso tuj txꞌotxꞌ Cilicia,
pero atzun ma chin chiꞌye tzalu tuj Jerusalén,
ex tuꞌn Gamaliel in xnakꞌtzanjtze tuj tumelxix ic tzaꞌn ju ley tzaj kꞌoꞌn cye kxeꞌchel,
ex at-xix nganiye tuꞌn wajbene te Dios,
ic tzaꞌn cyeye cycyakile jaꞌlo.
4 Nej e baj nyajlaꞌne ke xjal kꞌiꞌn Ocslabl Evangelio cyuꞌn,
xi nmaꞌne tuꞌn cycyim,
ex e tzaj ntzyuꞌne ke xinak ex ke xuꞌj ex e ocx nkꞌoꞌne tuj pres.
5 Axju nejenel cye pal testiw wiꞌje ax icx cycyakil cytijil xjal,
ax ke e tzaj kꞌonte uꞌj weye tuꞌn t-xi wiꞌne cye kxjalil tuj tnam Damasco.
Inxtzune tuj Damasco tuꞌn cytzaj ncꞌaloꞌne ke ocslal ex tuꞌn cyul wiꞌne tuj Jerusalén tuꞌntzun tcub cycastiw.
Xi tchicꞌbaꞌn Pablo tzaꞌn tten ajtz tiꞌj tanmi ex tzaꞌn tten ocslan
6 Pero cyjaꞌtok nxiꞌye,
chꞌixtok ncanune tuj tnam Damasco,
balo te chilcukꞌij,
minaben cub koptzꞌaj jun nintz spicꞌun wiꞌjeleye cuꞌtz tuj cyaꞌj.
7 Biꞌx in cub tzꞌake twitz txꞌotxꞌ,
ex o nbiye jun tkꞌajkꞌajel in tmaꞌn weye:
Saulo,
Saulo,
¿tikuꞌn in chin baj tyajlaꞌna?
8 Xitzun ntzakꞌweꞌne:
¿Alcyeya,
Tat?
Ex tzaj tmaꞌn weye:
Akine Jesús aj Nazaret,
akine in chin baj tyajlaꞌna,
chi weye.
9 Entons akeju ateꞌtok wucꞌile o cyil ju spicꞌun,
[ex biꞌx tzaj cyxobil;]
pero mintiꞌ el cynicꞌ tiꞌj ju yol tzaj kꞌmaꞌn weye.
10 Xitzun nmaꞌne te:
¿Ti oc nbinchaꞌye,
Tat?
Atzunte Kajaw tma weye:
Weꞌctza ex txiꞌya tuj tnam Damasco,
atzun ctzajel kꞌmaꞌn teya tcyakilju tuꞌn tbinchanteya.
11 Ex tuꞌnju tkoptzꞌajel spicꞌun lu,
mintiꞌtl bant nqueꞌyine,
lachꞌoꞌntzun inxe cyuꞌn wucꞌile,
in pone tuj tnam Damasco.
12 At jun xinak Ananías tbi,
nimal Dios ic tzaꞌnxju in tmaꞌn tley Moisés,
ex cycyakil xjal judiy ax najl ke tuj Damasco in che yolintok baꞌn tiꞌj.
13 Pontzun Ananías wucꞌile,
pon lakꞌeꞌ ntxlaje ex tma weye:
Erman Saulo,
cjaketel twitza.
Ex te jurat naj bant nqueꞌyine,
ex o wile Ananías.
14 Ax icx tmatl Ananías:
Aju Cydios kxeꞌchel ma jaw scꞌonte teya tuꞌn tojtzkinteya aju tajbil,
ex tuꞌn tlonteya aju Xjal Tzꞌaklxix,
ex tuꞌn tbinteya tyol ma tzaj tmaꞌn teya.
15 Porque cꞌoquela testiw tiꞌj tuꞌn tyolina tiꞌj cywitz cycyakil xjal ex tuꞌn t-xi ttxꞌolbaꞌna aju ma tila ex ma tbiya.
16 Jaꞌlotzun,
¿tikuꞌn in cub tyoꞌna?
Weꞌctza ex byana tuj aꞌ,
ex cubsana twitz Kajaw tuꞌn ttxꞌjet tila.
Xi tchicꞌbaꞌn Pablo tzaꞌn tten xiꞌ pacbal cyxol xjal mya judiy
17 Tejtzun wul meltzꞌaje tuj tnam Jerusalén,
matok in chin naꞌne Dios tuj tja Dios,
o wile ic tzaꞌn tuj witzicꞌ.
18 Ex o wile Kajaw in tmaꞌn weye:
Chuxa,
ex juratx tex naja tuj Jerusalén;
porque mlay txi cyniman xjal aju yol cxel tchicꞌbana wiꞌje.
19 Xitzun nmaꞌne te:
Tat,
baꞌn cyuꞌn xjal inx aje cyuj cycyakil ja te cꞌulbil,
ex e ocx nkꞌoꞌne tuj pres akeju ocslal tiꞌja ex e baj ncꞌixbisaꞌne;
20 ex tej tcub byoꞌn Esteban aju testiw tiꞌja,
tucꞌix kine atintoke,
icx weye xi nmaꞌne tuꞌn tcyim,
ex oc ncwentine cyxbalun keju in che byontok tiꞌj.
21 Pero tzaj tmaꞌntl Kajaw weye:
Txiꞌya,
porque cxel nsamaꞌne najchak cyxol xjal mya judiy ke,
chi Kajaw weye chi Pablo.
Tej tpon kꞌiꞌn Pablo tuj cwartel tuꞌn coronel
22 Oꞌcxtzun ke yol lu cub cybiꞌn xjal;
ex e jawtzun schꞌin cyjaꞌ:
—Baꞌn tuꞌn tcyim xjal lu,
porque mya baꞌn tuꞌn tankꞌintl twitz txꞌotxꞌ,
che chi.
23 Ex tuꞌnju in che schꞌintok ex in cub cyjubin cyxbalun,
ex in jaw cychitun kuk tuj cykꞌikꞌ,
24 cyjaꞌtzun xi tmaꞌn coronel tuꞌn tocx kꞌiꞌn Pablo tuj cwartel,
ex xi tkꞌoꞌn orden tuꞌn tbaj asyalin tuꞌntzun toc tuj xjel,
ex tuꞌn tel nicꞌbaj tiꞌj tikuꞌn in che schꞌintok xjal tiꞌj.
25 Pero tej tbaj cꞌaloꞌn tuꞌn tbaj asyalin,
xi tmaꞌn Pablo te capitán ax waꞌltok:
—¿Kꞌoꞌnpelo tuꞌn ley tuꞌn tbaj asyalin jun xjal aj Rom,
ex naꞌnxtok tcub t-sentens?
26 Tejtzun tbinte capitán ju yol lu,
xiꞌ kꞌmalte te coronel,
ex tma:
—¿Ti oc tbinchaꞌya?
Porque ate xinak lu aj Rom.
27 Ultzun coronel tucꞌil Pablo,
ex xi tkanin te:
—Kꞌmantza weye,
¿axpe toc aj Roma?
Xitzun tmaꞌn Pablo te:
—Ax toc.
28 Tzajtzun ttzakꞌweꞌn coronel:
—Weye nim pwak baj nnajsaꞌne tuꞌn woque te aj Rom.
Atzunte Pablo xi tmaꞌn:
—Pero weye aj Rom kine witzꞌjlenxe.
29 Cyjaꞌtzun el cypaꞌn naj cyib keju banin cyten tuꞌn tbaj asyalin Pablo cyuꞌn;
ax icx te coronel tzaj nim t-xobil tej tbinte ka aj Rom te Pablo,
tuꞌnju otok baj tcꞌaloꞌn.
Tej tpon kꞌiꞌn Pablo cywitz Aj Sanjelal cye xjal judiy
30 Te juntl kꞌij,
o tajbe coronel tuꞌn tbinte alcye til Pablo tuj cywitz xjal judiy,
eltzun tpajuꞌn ju caden tiꞌj Pablo,
xi tmaꞌn tuꞌn toc cychmon cyib ke nejenel cye pal cyucꞌix cycyakil Aj Sanjelal cye xjal judiy,
etztzun kꞌiꞌn Pablo tuꞌn,
cub tkꞌoꞌn cywitz.