Pedro tucꞌix Cornelio
10
Attok jun xjal tuj Cesarey Cornelio tbi,
toctok te cycapitán jun cꞌloj soldad Italiano cybi.
2 Ate xjal lu nimal Dios ex at tchi Dios tuj twitz,
ax icx cycyakil keju ateꞌ tuj tja.
Ex nimcu cycotz xjal judiy in xi tkꞌoꞌn,
ex cucx in naꞌn Dios.
3 At jun kꞌij balo las tres te kale,
o til Cornelio ic tzaꞌn tuj witzicꞌ kꞌanchaꞌlxix,
ocx jun t-anjel Dios tucꞌil ex tma:
—Cornelio,
chi anjel.
4 Octzun tqueꞌyinxix Cornelio tiꞌj anjel,
ex tzaj t-xobil:
—¿Ti taja,
Tat?
Chi Cornelio.
Atzunte anjel tma te:
—Ma tbi Dios ke tnaꞌj Diosa ex ma til ke cotzbaj in cheꞌx tkꞌoꞌna cye meba.
5 Jaꞌlotzun samanxa cabe xjal tuj tnam Jope txcol te Simón,
aju Pedro tcabin tbi.
6 Atzun taꞌ tposad jlu tuj tja jun xjal Simón tbi,
aju tzkꞌajsal tzꞌuꞌm,
aju tcub tja ttzi mar.
[Ate Pedro ctzajel kꞌmante teya alcye ilxix tiꞌj tuꞌn tbinchanteya,
chi anjel.]
7 Tajlenxitzun anjel aju otok yolin tucꞌil Cornelio,
e tzaj ttxcoꞌn Cornelio cabe tmajen tucꞌix jun soldad nimal Dios cyxol keju in che ajben te.
8 Tbajlenxi ttxꞌolbaꞌn tcyakil jlu cye,
e jeꞌxtzun t-samaꞌn tuj tnam Jope.
9 Ex te juntl kꞌij,
cyjaꞌtok cyxiꞌ ke xjal lu tuj be,
chꞌixtok cycanun tuj tnam Jope,
jax Pedro naꞌl Dios twiꞌ ja,
te chilcukꞌij.
10 Ex tzaj elxix tcꞌuꞌj,
ex o tajbe tuꞌn twaꞌn;
pero matok in bant chꞌin twa,
o til ic tzaꞌn tuj witzicꞌ,
11 ex o til catl ttzi cyaꞌj,
ex cuꞌtz jun ic queꞌyin ic tzaꞌn jun nintz xbalun,
ex cubil twitz txꞌotxꞌ,
cꞌaloꞌn cycyajil ttxaꞌn.
12 Tujtzunju nintz xbalun lu attok elaꞌ txcaj jil cyaje cykan,
cyucꞌix ke lobaj,
ex ke chyuꞌj.
13 Ex tzaj jun tkꞌajkꞌajel in tmaꞌn:
—Mlay,
Tat,
porque bajx txi nchyoꞌne jun tiꞌxti mya baꞌn ex ka tzꞌil.
15 Tbitzun Pedro tcabmajiꞌn tkꞌajkꞌajel in tmaꞌn:
—Aju txꞌjoꞌmaj tuꞌn Dios,
miꞌn tzꞌoc tkꞌoꞌna te mya baꞌn.
16 Ox maj o kꞌmanjtz jlu;
atzunju nintz xbalun jax kꞌiꞌntl tuj cyaꞌj.
17 Ex matok in ximan Pedro tiꞌj jlu,
ti t-xilen aju otok til ic tzaꞌn tuj witzicꞌ,
e pon ke xinak ttzi pwert,
aju otok che tzaj samaꞌn tuꞌn Cornelio,
in che kanin tiꞌj jatum taꞌtok tja Simón.
18 E ocxtzun kꞌajt,
xi cykanin ka axtok in posadiyin Simón aju Pedro tcabin tbi.
19 Matok in ximan Pedro tiꞌj aju otok til ic tzaꞌn tuj witzicꞌ,
tzaj tmaꞌn Xewbaj Xjan te:
—Ateꞌ ox xinak in jyonjtza cyuꞌn.
20 Weꞌctztzuna,
ex tcuꞌxa,
txiꞌya cyucꞌil,
ex miꞌn jawjeꞌ tcꞌuꞌja,
porque akine ma chin tzaj saman cye,
chi Xewbaj Xjan.
21 Cubiltzun Pedro jatum ateꞌtok keju xinak otok che tzaj samaꞌn tuꞌn Cornelio,
ex tma cye:
—Lu kine lu aju in cyjyoꞌne;
¿tikuꞌn ma che tzaje wucꞌile?
22 Atzun cye xi cytzakꞌweꞌn:
—Ma ko tzaj samaꞌne tuꞌn Cornelio aju capitán,
jun xinak tzꞌaklxix ex nimal Dios,
ex cycyakil xjal judiy in che yolin baꞌn tiꞌj.
Ma tzaj kꞌmaꞌn te tuꞌn jun t-anjel Dios tuꞌn tpona tja ex tuꞌn tbinte aju tyola.
23 Xitzun tmaꞌn Pedro tuꞌn cyocx tuja,
ex xi tkꞌoꞌn cyposad.
Ex te juntl kꞌij cub be tuꞌn Pedro,
xiꞌ cyucꞌil;
ex at junjun erman e jeꞌx tucꞌil,
akeju najl ke tuj tnam Jope.
24 Tujtzun juntl kꞌij e canun tuj Cesarey.
Atzunte Cornelio in ayontok cyiꞌj,
otok che tzaj ttxcoꞌn keju at cyxilen tucꞌil ex ke tamiw akeju cꞌujlaꞌnxix tuꞌn.
25 Tejtzun tpon Pedro tja Cornelio,
etz naj Cornelio kꞌolbel te,
ex cub ẍmejeꞌ cꞌulul twitz.
26 Atzunte Pedro jaw twaban,
ex tma:
—Weꞌctza,
porque ax xjal kine.
27 Octzun ten Pedro yolil tucꞌil ex ocx tuja,
ex o til nimcu xjal otok tzꞌoc cychmon cyib.
28 Xitzun tmaꞌn Pedro cye:
—Akeye baꞌn cyuꞌne ka mya kꞌoꞌn tuꞌn cyley xjal judiy tuꞌn toc tmojban tib jun xjal judiy tucꞌil jun xjal te junxitl tnam ex mya kꞌoꞌn tuꞌn tocx tuj tja.
Pero ma tzaj tyecꞌun Dios weye tuꞌn miꞌn t-xi nmaꞌne ka mya baꞌn ex ka tzꞌil juntl xjal.
29 Cyjaꞌtzun,
tej nbinteye txocbil weye,
mintiꞌ cub nxcꞌayin wibe.
Wajbile tuꞌn nbinteye:
¿Titzun cyajbile weye tuꞌnju ma chin tzaj cytxcoꞌne tuꞌn wule tzalu?
30 Atzunte Cornelio xi ttzakꞌweꞌn:
—Ma bant-xi cyaje kꞌij ax or ic tzaꞌn jaꞌlo [ayoꞌnx weꞌyaj wuꞌne;]
ex las tres te kale matok in chin naꞌne Dios tuj njaye,
o wile jun xinak cub weꞌ nwitze toc t-xbalun in koptzꞌaj wen,
31 ex tma weye:
Cornelio,
ma tzaj tbiꞌn Dios aju tnaꞌj Diosa,
ex ma tzaj tqueꞌyin ke cotzbaj in xi tkꞌoꞌna cye meba.
32 Samanxtzuna cabe xjal tuj tnam Jope txcol te Simón,
aju Pedro tcabin tbi.
Atzun in posadiyin Pedro tuj tja jun xjal Simón tbi aju tzkꞌajsal tzꞌuꞌm,
aju tcub tja ttzi mar.
[Octzun tul Pedro oc c-yolil tucꞌila,
chi xinak.]
33 Cyjaꞌtzun e jeꞌx nsamaꞌn naje cabe xjal txcol teya;
ex baꞌn ma tbinchaya ma tzula.
Jaꞌlotzun kcyakile atoꞌye tzalu twitz Dios kaje tuꞌn kbinteye tcyakil aju ma tzaj tmaꞌn Dios teya,
chi Cornelio.
Aju tpacbabl Pedro tuj tja Cornelio
34 Octzun ten Pedro yolil ex tma:
—Axix toc ma tzꞌel nnicꞌe tiꞌj,
mintiꞌ in tqueꞌyin Dios aju cyxilen xjal,
35 nok oꞌcx in tzalaj cyiꞌj xjal at tchi Dios cye tuj tcyakil nasyon,
ex in cybinchaꞌn aju tzꞌaklxix.
36 Tzaj tmaꞌn Dios tyol cye aj Israel ex tzaj tmaꞌn tkanil baꞌn tuꞌn tbant cyten xjal tucꞌil Dios nok tuꞌn Jesucrist,
aju Tajaw Tcyakil.
37 Baꞌn cyuꞌne aju yol lu el tkanil tuj tcyakil Judey,
atzun tzaj xeꞌt tuj Galiley tbajlenxi tpacbaꞌn Juan ka ilxix tiꞌj tuꞌn cybyan xjal.
38 Ex baꞌn cyuꞌne tzaꞌn tten tzaj tkꞌoꞌn Dios tipumal Jesús aj Nazaret,
ex o noj tuꞌn Xewbaj Xjan tuꞌn tcꞌmonte toclen,
ex baꞌn cyuꞌne tzaꞌn tten o bet Jesús in tbinchaꞌn baꞌn,
ex cycyakil keju in che yajlanjtz tuꞌn tajaw il e banix tuꞌn Jesús,
porque attok Dios tucꞌil.
39 Ex a koꞌye testiw tiꞌj tcyakilju o tbincha Jesús tuj txꞌotxꞌ Judey ex tuj tnam Jerusalén;
jaw kꞌoꞌn twitz crus cyuꞌn xjal ex cub cybyoꞌn.
40 Pero tuj toxin kꞌij jatz ankꞌin tuꞌn Dios,
ex tma Dios tuꞌn tcub tyecꞌun tib Jesús kwitze.
41 Mya cywitz cycyakil xjal cub tyecꞌun tib,
nok oꞌcx kwitze,
akoꞌye scꞌoꞌmaj tuꞌn Dios tuꞌn koque te testiw tiꞌj,
porque o ko waꞌne ex o ko cꞌane tucꞌil tjatzlenxi ankꞌin cyxol cyimni.
42 Ex tzaj tmaꞌn Jesús keye tuꞌn t-xi kpacbaꞌne cye xjal ex tuꞌn t-xi kchicꞌbaꞌne cye ax toc tuꞌn Dios ma tzꞌoc kꞌoꞌn Jesús te Jwes cyibaj xjal itzꞌ ex cyibaj ke xjal cyimni.
43 Atxix ojtxi cycyakil t-sanjel Dios in tzaj cychicꞌbaꞌn tiꞌj Jesús,
in cymaꞌn ka cycyakil keju ma che ocslan tiꞌj Jesús,
cnajsetel cyil tuꞌn,
chi Pedro cye.
Tzaj kꞌoꞌn Xewbaj Xjan cye xjal mya judiy
44 Matok in yolin Pedro tiꞌj jlu,
cubiltzun Xewbaj Xjan cyibaj cycyakil keju in che bin tyol Pedro.
45 Atzun cye ocslal judiy,
akeju otok che tzaj tucꞌil Pedro,
biꞌx naj cynabl,
tuꞌnju tzaj tkꞌoꞌn Dios Xewbaj Xjan cye xjal mya judiy ke.
46 Porque in cybiꞌntok in che yolin tuj cyyol txkantl tnam ex in cynimsaꞌn tbi Dios.
47 Atzunte Pedro xi tmaꞌn:
—¿Jacupelo tma jun xjal tuꞌn miꞌn cybyan ke jlu tuj aꞌ?
Mlaylo tma,
porque ma cycꞌam Xewbaj Xjan ic tzaꞌn ke.
48 Xitzun tmaꞌn Pedro tuꞌn cybyan tuj tbi Jesucrist.
Entons e cubsan twitz Pedro tuꞌn tcyaj ten nok jteꞌ kꞌijtl cyucꞌil.