3 Ex xi cykanin te:

—¿Tikuꞌn ma tzꞌocxa tuj cyja xjal mya judiy,

ex ma waꞌna cyucꞌil?

Che chi.

4 Octzun ten Pedro txꞌolbalte cye tuj tumelxix aju otok baj,

chi tma:

5 —Atintoke tuj tnam Jope,

in chin naꞌne Dios,

ex at jun o wile ic tzaꞌn tuj witzicꞌ,

ic queꞌyin ic tzaꞌn jun nintz xbalun,

cuꞌtz tuj cyaꞌj cꞌaloꞌn cycyajil ttxaꞌn,

ex cubil nwitze.

6 Tej toc nqueꞌyinxixe tiꞌj,

e wile ke txcup cyaje cykan,

ke lobaj,

ke chyuꞌj ex ke mastl jil.

7 Ex o nbiye jun tkꞌajkꞌajel tzaj tmaꞌn weye:

Weꞌctza Pedro,

byoncuya ke jlu te tchiꞌya,

chi weye.

8 Pero xi nmaꞌne cyjaꞌ:

Mlay Tat,

porque bajx txi nchyoꞌne jun tiꞌxti mya baꞌn ex ka tzꞌil.

9 Tzajtzun kꞌajt tcabmajiꞌn tuj cyaꞌj,

tma weye:

Aju txꞌjoꞌmaj tuꞌn Dios miꞌn tzꞌoc tkꞌoꞌna te mya baꞌn.

10 Ox maj o kꞌmanjtz jlu,

ex jaxtzun kꞌiꞌntl tcyakil tuj cyaꞌj.

11 Ex jurat e pon ox xinak jatum in chin posadiyine,

otok che tzaj samaꞌn tuj tnam Cesarey te txcol weye.

12 Tzajtzun tmaꞌn Xewbaj Xjan weye tuꞌn nxiꞌye cyucꞌil ex tuꞌn miꞌn tjawjeꞌ ncꞌuꞌje.

Ax icx ke kak erman lu e jeꞌx wucꞌile,

ex o ocxe tuj tja jun xinak.

13 Tzajtzun ttxꞌolbaꞌn keye ka otok cub tyecꞌun tib jun anjel twitz tuj tja;

cub weꞌ anjel twitz,

ex tma te:

Samanxa cabe xjal tuj tnam Jope txcol te Simón,

aju Pedro tcabin tbi;

14 ate jlu ctzajel tmaꞌn jun yol teya,

tzaꞌn tten tuꞌn tcleta,

aya,

ex cycyakil keju ateꞌ tuj tjaya,

chi anjel xi tmaꞌn te.

15 Tejtzun tkeꞌ nyoline,

cubil Xewbaj Xjan cyibaj,

ic tzaꞌn cubil kibaj nej.

16 Ultzun tuj wanmiye aju o tma Kajaw:

Ax toc o che byan xjal tuj aꞌ tuꞌn Juan,

atzun cyeye oc che byale tuj junxitl tumel oc cycꞌmonteye Xewbaj Xjan,

chi Kajaw.

17 Katzun ax oyaj tzaj tkꞌoꞌn Dios cye,

aju tzaj tkꞌoꞌn ke tej kocslan tiꞌj Kajaw Jesucrist,

¿titzun woclene tuꞌn tmaket Dios wuꞌne?

Chi Pedro xi tmaꞌn cye.

18 Tejtzun cybinte erman tcyakil jlu,

akeju ateꞌ tuj Jerusalén,

mintiꞌ e kꞌajt,

nok oꞌcx jaw cynimsaꞌn tbi Dios,

ex cyma:

—Entons ma tzaj tkꞌoꞌn Dios t-xtalbil cye txkantl xjal mya judiy ke tuꞌn tajtz tiꞌj cyanmi tuꞌn tten cychwinklal.

19 Atzun cye mastl ocslal otok che el sputj tuꞌn tlaj yajbil cye tzaj xeꞌt tej tcub byoꞌn Esteban,

max e pon tuj txꞌotxꞌ Fenicia,

ex tuj Chipre,

ex tuj Antioquiy,

mintiꞌ xi cymaꞌn tyol Dios cye mastl xjal,

oꞌcx cye xjal judiy.

20 Pero at junjun ocslal aj Chipre ex aj Cirene cyxol,

tejtzun cypon tuj tnam Antioquiy,

ax icx xi cymaꞌn tyol Dios cye txkantl xjal mya judiy,

ex xi cymaꞌn tkanil baꞌn cye tiꞌj Kajaw Jesús.

21 Aju tipumal Kajaw attok cyucꞌil,

ex nimcu xjal cyaj cycolin ojtxi cyocslabl ex e ocslan tiꞌj Kajaw.

22 Pontzun tkanil jlu cyucꞌil ke ocslal ateꞌtok tuj tnam Jerusalén,

ex xi cysamaꞌn Bernabé tuꞌn tpon tuj tnam Antioquiy.

23 Tejtzun tpon Bernabé,

ex tej tqueꞌyinte nim t-xtalbil Dios tzaj tkꞌoꞌn cye,

jaw tzalajxix,

ex xi tkꞌoꞌn cynabl cycyakil tuꞌn cycyaj ten waꞌlxix tuj cyocslabl,

ex tuꞌn cyxi lpeꞌ tiꞌj Kajaw tuꞌn tcyakil cyanmi.

24 Porque ate Bernabé jun xinak baꞌnxix,

ex nojni tuj tanmi tuꞌn Xewbaj Xjan,

ex at-xix tocslabl.

Cyjaꞌtzun nim xjal e ocslan tiꞌj Kajaw.

25 Tbajlenxi jlu xiꞌ Bernabé tuj tnam Tarso jyolte Saulo;

tejtzun tcnet tuꞌn,

ul tiꞌn tuj Antioquiy.

26 Ex axtzun e cyaj ten jun abkꞌi cyucꞌil ocslal,

ex xiꞌ cykꞌoꞌn xnakꞌtzbil cye nimcu xjal.

Tnejelxix tuj Antioquiy oc cykꞌoꞌn xjal cybi ocslal,

ocslal tiꞌj Crist.

27 Axtoktzun taꞌ Bernabé tucꞌix Saulo tuj Antioquiy tej cypon junjun t-sanjel Dios tzajni ke tuj Jerusalén.

28 Ex at jun cyxol jlu Agabo tbi,

jaw weꞌ yolil cyxol ocslal ex tzaj tchicꞌbaꞌn tuꞌn Xewbaj Xjan,

ex tma:

—Tzul nimxix weꞌyaj tuj tcyakil twitz txꞌotxꞌ.

O japun tyol Agabo,

porque tzaj nimxix weꞌyaj tuj tkꞌijlalil tej tcawin president Claudio.

29 Atzun cye ocslal tuj Antioquiy cub cyximan tuꞌn t-xi cysamaꞌn chꞌin onbil cye erman najl ke tuj Judey,

teyle junjun tuꞌn t-xi t-samaꞌn ic tzaꞌnx ju at te.

30 Cybinchatzun icju,

xitzun cysamaꞌn jun oyaj cye erman;

ate Bernabé tucꞌix Saulo xi kꞌinte,

ex xi cykꞌoꞌn cye ansyan ateꞌ tuj Judey.