Cub byoꞌn Jacobo, atzunte Pedro ocx kꞌoꞌn tuj pres
12
Tujx tkꞌijlalil lu e tzyettzun junjun ocslal tuꞌn rey Herodes tuꞌn cycꞌixbisanjtz.
2 Ex xi tmaꞌn Herodes tuꞌn tcub byoꞌn Jacobo tuꞌn spad,
aju ttzic Juan.
3 Ex tej tbinte ka baꞌn eꞌla jlu tuj cywitz xjal judiy,
ax icx xi tmaꞌn tuꞌn ttzyet Pedro.
Atzun ninkꞌij tuꞌn t-xi cywaꞌn xjal pan mintiꞌ t-samel tuj tuꞌn tjaw mal tcꞌuꞌj.
4 Tejtzun ttzyet Pedro tuꞌn Herodes,
ocx tkꞌoꞌn tuj pres,
ex xi tkꞌoꞌn tuj cycwent cyaje cꞌloj soldad tuꞌn toc cyxkꞌukin,
te cyajcyaj soldad junjun cꞌloj.
Cub t-ximan Herodes tuꞌn tetz tiꞌn tuj pres tbajlenxi Xjan Kꞌij,
tuꞌntzun tcub tkꞌoꞌn cywitz xjal.
5 Cyjaꞌtzun o xkꞌukinjtz Pedro tuj pres,
atzun cye ocslal mintiꞌ e kꞌajen tuꞌn cynaꞌn Dios tiꞌj.
Tej tetz kꞌiꞌn Pedro tuj pres tuꞌn anjel
6 Nchiꞌjtok tuꞌn tetz kꞌiꞌn Pedro tuꞌn Herodes tuꞌn tcub tkꞌoꞌn cywitz xjal,
lu te Pedro in tan cyxol cabe soldad te konicꞌan,
cꞌaloꞌn tuꞌn cabe caden,
ax icx ateꞌ soldad in che xkꞌukin twitz tpwertil ja jatum ateꞌ ke pres.
7 Entons ul naj jun t-anjel Kajaw,
cub weꞌ ttxlaj Pedro,
ex at jun spicꞌun cub koptzꞌaj tuj pres;
octzun tmacoꞌn anjel ttxlaj t-xuꞌc Pedro,
jaw tcꞌasun,
ex xi tmaꞌn te:
—Juratx weꞌctza.
—Cꞌaloꞌnc tcꞌuꞌja ex kꞌoꞌnc t-xajbiya.
Ex tbinchatzun Pedro icju.
Xitzun tmaꞌntl anjel te:
—Balkꞌiꞌnc ttxoꞌwa tiꞌja,
ex lpeꞌtza wiꞌje.
9 Etztzun Pedro,
oc lpeꞌ tiꞌj anjel;
ex mintiꞌ el tnicꞌ tiꞌj ka axix toc aju tbincha anjel,
tuj tnabl Pedro ka in witzcyꞌan.
10 E jeꞌtztzun cywitz tnejel xkꞌukil ex cywitz tcabin;
tejtzun cyeꞌlel twitz ju pwert cꞌuxbil tetz ttzi cay,
jakettzun pwert tuꞌnx tib;
ex tej cyetz,
e jeꞌx bet chꞌin tuj jun cay,
ex eltzun tpaꞌn naj tib anjel tiꞌj.
11 Eltzun spicꞌeꞌxix tuj twitz Pedro,
ex tma:
—Matzun tzꞌel nnicꞌe tiꞌj jaꞌlo ax toc ma tzaj t-samaꞌn Kajaw t-anjel ex ma chin etz tzokpiꞌne tuꞌn tjakꞌ tcawbil Herodes,
tuꞌntzun miꞌn tbinchanjtz wiꞌje aju in che ximan xjal judiy tiꞌj tuꞌn cybinchante,
chi Pedro.
12 Tejtzun tel tnicꞌ Pedro tiꞌj jlu,
xiꞌtzun tja Mariy aju ttxuꞌ Juan aju Marcos tcabin tbi,
jatum cybuyintok cyib nimcu xjal in che naꞌn Dios.
13 Tejtzun toc tkꞌajtzaꞌn Pedro tpwertil sawan,
etztzun jun txin Rode tbi,
queꞌyil te alcye in kꞌajtzan.
14 Eltzun tnicꞌ txin tiꞌj tkꞌajkꞌajel twiꞌ Pedro,
pero mintiꞌ ocx tjakoꞌn pwert tuꞌn tzalajbil,
nok oꞌcx aj kelan tuja kꞌmalte tkanil ka waꞌltok Pedro ttzi ja.
15 Atzun cye ocslal xi cymaꞌn te txin:
—Balo tuj twitza ma tzaj.
Pero ate txin o tcyuwsaxix ka ax toc.
Atzun cye cyma:
—Mya ate Pedro ma tzul;
balo nok t-anjel,
che chi.
16 Atzunte Pedro cucxtok toc tkꞌajtzaꞌn pwert;
tejtzun tjaket pwert cyuꞌn ex tej cyqueꞌyinte,
biꞌx naj cynabl.
17 Atzunte Pedro xi tyucun tkꞌab tuꞌn cykꞌajen,
ex xi ttxꞌolbaꞌn cye tzaꞌn tten otok tzꞌetz kꞌiꞌn tuꞌn Kajaw tuj pres.
Ex xi tmaꞌn cye:
—Cykꞌonxe tkanil jlu te Jacobo ex cye erman,
chi Pedro.
Etztzun,
ex xiꞌ tuj juntl lugar.
18 Tejtzun kskix,
e jaw tilj ke soldad in che yolin tiꞌj tzaꞌn otok txiꞌ Pedro.
19 Atzunte Herodes xi tmaꞌn tuꞌn cyoc ten jyolte Pedro,
pero mintiꞌ cnet cyuꞌn,
e octzun ke soldad tuj xjel tuꞌn,
ex xi tkꞌoꞌn orden tuꞌn cycub byet.
Etztzun Herodes tuj Judey cuꞌpun tuj Cesarey,
ex axtzun cyaj ten.
Tej tcyim Herodes
20 Tzajtzun tkꞌoj Herodes cyiꞌj xjal aj Tiro ex aj Sidón;
atzun cye mojeꞌ cyyol ex e ultzun tucꞌil;
ex cub tiꞌj tnabl Blasto cyuꞌn,
aju tnejel cwentil tuj tja rey Herodes,
xi cykanin tuꞌn miꞌn tkꞌojintl rey cyiꞌj,
porque atzun in tzaj cywa tuj txꞌotxꞌ jatum in cawin rey.
21 Tejtzun tpon kꞌij aju kꞌmaꞌmaj tuꞌn Herodes tuꞌn cypon xjal,
octzun tkꞌoꞌn t-xbalun tbanilxix,
cub keꞌ tuj tkꞌukbil jatum in cawin,
ex oc ten yolil cyucꞌil xjal.
22 Atzun cye xjal jaw tkꞌajkꞌajel cywiꞌ cyuwxix ex cyma:
—Tkꞌajkꞌajel twiꞌ jun dios te jlu,
mya te jun xjal,
che chi.
23 Ex jurat cꞌixbisanjtz Herodes tuꞌn jun t-anjel Kajaw,
tuꞌnju mintiꞌ jaw tnimsaꞌn tbi Dios;
in che waꞌntok ẍukꞌ tiꞌj tchibjal,
ex cyimtzun.
24 Atzunju tyol Dios mas in xi cyocslaꞌn xjal ex in pacbanjtz tuj tcyakil lugar.
25 Atzunte Bernabé tucꞌix Saulo e ajtz meltzꞌaj t-xilenxi cykꞌoꞌn ju oyaj tuj Jerusalén,
ex tzaj cyiꞌn Juan cyucꞌil,
aju Marcos tcabin tbi.