In tkꞌoꞌn Jesús xnakꞌtzbil tuꞌn miꞌn tcub tpaꞌn tib xjal tucꞌil t-xuꞌjil
19
Tejtzun tbaj tmaꞌn Jesús ju yol lu,
etz tuj Galiley,
xiꞌ tuj txꞌotxꞌ Judey jlajxi nima Jordán.
2 Ex nim xjal e oc lpeꞌ tiꞌj,
ex atzun e banix yab tuꞌn.
3 E pontzun lakꞌeꞌ ke parisey tucꞌil Jesús tuꞌn toc tuj joybil tiꞌj cyuꞌn,
ex xi cymaꞌn te:
—¿Kꞌoꞌnpelo tuꞌn ley tuꞌn tex tlajoꞌn xinak t-xuꞌjil nok tuꞌn tlaj jun tiꞌxti?
Che chi.
4 Xi ttzakꞌweꞌn Jesús:
—¿Bajxpe jaw cyschꞌiꞌne tuj Tuꞌjil tej tbant xjal tuꞌn Dios t-xe tnejel,
xinak ex xuꞌj e cub tbinchaꞌn?
5 Ex tma Dios:
Cyjaꞌtzun cyjel tkꞌoꞌn xinak tman tucꞌix ttxuꞌ,
ex cmojebel tucꞌil t-xuꞌjil,
ex cycabil che oquel te junx.
6 Cyjaꞌtzun mya cabe cyten,
nok junx cyten;
cyjaꞌtzun,
aju oc tmojbaꞌn Dios,
miꞌn tzꞌel tpaꞌn xjal,
chi Jesús cye.
7 Xitzun cymaꞌn parisey:
—¿Tikuꞌntzun cyaj tmaꞌn Moisés tuꞌn tex tlajoꞌn xjal t-xuꞌjil ex tuꞌn t-xi kꞌot jun uꞌj te xuꞌj jatum in tmaꞌn ka otok cub cypaꞌn cyib?
Che chi.
8 Xi tmaꞌn Jesús cye:
—Tuꞌnju puro cyuw cyanmiye,
cyjaꞌtzun cyaj tmaꞌn Moisés tuꞌn tex cylajoꞌne cyxuꞌjile.
Pero t-xe tnejel mya ic ttenju.
9 Atzun weye cxel nmaꞌne cyeye,
ka at jun xjal ma cub tpaꞌn tib tucꞌil t-xuꞌjil ex ka mintiꞌ in tbinchaꞌn xuꞌj aj pajil,
katzun ma mojeꞌ xinak tucꞌil juntl xuꞌj,
in tbinchaꞌn xinak aj pajil;
[ex ka ma mojeꞌ juntl xinak tucꞌil ju xuꞌj otok tzꞌel lajoꞌn,
in tbinchaꞌn xinak aj pajil],
chi Jesús cye.
10 Xitzun cymaꞌn t-xnakꞌtzben Jesús te:
—Ka ic tten tchwinklal xinak tucꞌil t-xuꞌjil,
maslo baꞌn tuꞌn miꞌn tcnet t-xuꞌjil xjal,
che chi.
11 Xitzun tmaꞌn Jesús cye:
—Mya cycyakil xjal jacu txi cyniman ju yol lu,
nok oꞌcx keju ma tzaj tkꞌoꞌn Dios cyoclen tuꞌn tjapun cyuꞌn.
12 Porque at junjun xjal mintiꞌ tumel tuꞌn cymojeꞌ porque cyitzꞌjlenx icju;
ex at junjun in che oc cyuꞌn xjal icju tuꞌn miꞌn cymojeꞌ;
ex at junjun in che oc icju cyuꞌnx cyib,
mintiꞌ in che mojeꞌ nok tuꞌn cyajben tuj tcawbil Dios in tzaj tuj cyaꞌj.
Alcye jacu bant jlu tuꞌn,
bincham,
chi Jesús cye.
E cub tcyꞌiwlaꞌn Jesús ke cꞌwaꞌl
13 E tzajtzun kꞌiꞌn junjun tal cꞌwaꞌl twitz Jesús tuꞌn tcub tkꞌoꞌn tkꞌab tibaj cywiꞌ ex tuꞌn tnaꞌn Dios cyiꞌj;
atzun cye t-xnakꞌtzben e mayet ke xjal cyuꞌn,
akeju e tzaj kꞌinte cye tal cꞌwaꞌl.
14 Pero xi tmaꞌn Jesús cye t-xnakꞌtzben:
—Cykꞌonxe ambil cye tal cꞌwaꞌl tuꞌn cytzaj wucꞌile ex miꞌn cheꞌx cymayoꞌne;
porque aju cawbil in tzaj tuj cyaꞌj cyecye xjal ic cyten ic tzaꞌn ke tal cꞌwaꞌl lu,
chi Jesús.
15 Cubtzun tkꞌoꞌn tkꞌab tibaj cywiꞌ,
ex xiꞌ tuj juntl lugar.
Jun cuꞌxun kꞌinun in yolin tucꞌil Jesús
16 Ultzun jun cuꞌxun tucꞌil Jesús ex xi tmaꞌn te:
—Xnakꞌtzal baꞌn,
¿alcye baꞌn tuꞌn nbinchanteye tuꞌn ncambanteye chwinklal te jumajx?
17 Xi tmaꞌn Jesús te:
—¿Tikuꞌn in chin oc tkꞌoꞌna te baꞌn?
Mi aꞌl jun xjal baꞌn,
oꞌcx te Dios baꞌn.
Ka taja tuꞌn tten tchwinklala te jumajx,
che japunx ke mandamyent tuꞌna.
18 Xitzun tmaꞌn cuꞌxun:
—¿Alcyetzun ke mandamyent?
Xi tmaꞌn Jesús te:
—Atzun ke jlu:
Miꞌn che biyune;
miꞌn cybinchaye aj pajil;
miꞌn che elkꞌane;
miꞌn che nicꞌane yol tiꞌj juntl;
19 cynimanxe cymane ex cytxuye;
ex cycꞌujlame cyucꞌile ic tzaꞌnx cyeye in cycꞌujlan cyibe.
20 Xitzun tmaꞌn ju cuꞌxun te Jesús:
—Tcyakil jlu o japun wuꞌne tej matok cꞌwaꞌlx kine.
¿Alcyetzun juntl atx taj tuꞌn tjapun wuꞌne?
21 Xitzun tmaꞌn Jesús te:
—Ka taja tuꞌn toca tzꞌaklxix,
txiꞌya,
cꞌayinxa tcyakilju at teya ex kꞌonxa cye meba,
ex cteltzun tkꞌinumabla tuj cyaꞌj;
tzaja,
ex lpeꞌca wiꞌje.
22 Tejtzun tbinte cuꞌxun ju yol lu,
ajtzun in bisunxix,
porque nimtok tkꞌinumabl at.
23 Xitzun tmaꞌn Jesús cye t-xnakꞌtzben:
—Ax toc cxel nmaꞌne cyeye,
cyuw tuꞌn tocx jun xjal kꞌinun tuj cawbil in tzaj tuj cyaꞌj.
24 Cxel nmaꞌne juntl maj cyeye,
mas jurat jacu tzꞌex jun chej camey tuj toyꞌ jun bak,
twitzju tuꞌn tocx jun kꞌinun tuj tcawbil Dios.
25 Tej cybinte ke t-xnakꞌtzben Jesús ju yol lu,
biꞌx jaw naj cynabl,
ex cyma:
—Ka icju ¿alcyetzun jacu clet?
26 Xi tqueꞌyin Jesús cywitz ex xi tmaꞌn cye:
—Mlay bant jlu cyuꞌn xjal,
pero te Dios tcyakil jacu bant tuꞌn.
27 Xitzun ttzakꞌweꞌn Pedro:
—Tat,
quina koꞌye,
ma cyaj kkꞌoꞌne tcyakilju at keye ex ma ko oc lpeꞌye tiꞌja.
¿Alcyetzun ctzajel kꞌoꞌn keye?
28 Xi tmaꞌn Jesús cye:
—Ax toc cxel nmaꞌne cyeye,
tuj tkꞌijlalil oc toc tcyakil te acꞌaj,
chin bel keꞌye tuj nkꞌukbile in koptzꞌaj tuꞌn ncawine,
akine scꞌoꞌmaj kine tuꞌn Dios tuꞌn ntene cyucꞌil xjal;
ax icx cyeye che bel keꞌye tibaj cablaj kꞌukbil tuꞌn cycawine cyibaj cablaj cꞌloj tiyjil Israel,
porque ma che oc lpeꞌye wiꞌje.
29 Ex alcye jun ma cyaj tkꞌoꞌn tja,
ex ka ttzic,
ex ka titzꞌin,
ex ka tman,
ex ka ttxuꞌ,
ex ka t-xuꞌjil,
ex ka tcꞌwaꞌl,
ex ka ttxꞌotxꞌ,
nok tuꞌn nlaje,
jun syent maj oc tcꞌmaꞌ t-xel,
ex oc tcambaꞌ tchwinklal te jumajx.
30 Pero keju ateꞌ te tnejel jaꞌlo,
nimcu che oquel te mancbil;
ex keju ateꞌ te mancbil jaꞌlo,
nimcu che oquel te tnejel.