Alcye mas at toclen tuj cawbil in tzaj tuj cyaꞌj
18
Tuj tkꞌijlalil lu e pon lakꞌeꞌ ke t-xnakꞌtzben Jesús tucꞌil ex xi cymaꞌn te:
—¿Alcye jun mas nim toclen tuj ju cawbil in tzaj tuj cyaꞌj?
Che chi.
—Ax toc cxel nmaꞌne cyeye,
ka mintiꞌ ma che chꞌexpaje ex ka mintiꞌ ma che oque ic tzaꞌn ke tal cꞌwaꞌl,
mlayx che ocxe tuj ju cawbil in tzaj tuj cyaꞌj.
4 Cyjaꞌtzun,
alcyeju ma cub tmansin tib ic tzaꞌn jun tal cꞌwaꞌl lu,
atzunju mas nim toclen tuj cawbil in tzaj tuj cyaꞌj.
5 Ex alcye jun xjal in cꞌmonte jun tal cꞌwaꞌl ic tzaꞌn jlu tuꞌnju at tcꞌujlalil xjal wiꞌje,
akine in chin tcꞌmoꞌn.
Aju tolsabl tuꞌn kcub tzꞌak tuj il
6 Pero ka at jun xjal ma cub tzꞌak jun tal chꞌin tuꞌn tuj il cyxol keju in che ocslan wiꞌje,
mas baꞌn tuꞌn toc cꞌalet jun cyaꞌ maꞌxix tiꞌj tkul,
ex tuꞌn tcuꞌx xoꞌt max t-xeꞌpun mar.
7 Ay becꞌbil cywitz xjal tuꞌnju at tolsabl tcub cywitz tuꞌn cycub tzꞌak tuj il.
Porque il tiꞌj tuꞌn tcub kꞌoꞌn tolsabl cywitz,
pero ay becꞌbil twitz ju xjal aju cbel kꞌonte tolsabl.
8 Cyjaꞌtzun,
ka tuꞌn tkꞌaba ex ka tuꞌn tkana cbel tzꞌaka tuj il,
txꞌemin ela ex xoꞌmixa;
porque mas baꞌn tuꞌn tocxa tuj chwinklal te jumajx coxa ex ẍtunca,
twitzju tuꞌn tten cabe tkꞌaba ex cabe tkana ex tuꞌn t-xi xoꞌna tuj kꞌakꞌ te jumajx.
9 Ex ka tuꞌn tbakꞌ twitza cbel tzꞌaka tuj il,
kꞌiꞌmetza ex xoꞌmixa;
porque mas baꞌn tuꞌn tocxa tuj chwinklal te jumajx junx tbakꞌ twitza,
twitzju tuꞌn tten cabe tbakꞌ twitza ex tuꞌn tcuꞌx xoꞌna tuj infierni in cꞌant tuꞌn kꞌakꞌ.
Aju techal tiꞌj ju ẍneꞌl cyaj tzpet
10 Ten cycwente tiꞌj tuꞌn miꞌn tel cyicꞌune jun cye keju tal chꞌin lu;
porque cxel nmaꞌne cyeye,
ke anjel ateꞌ tuj cyaꞌj,
cwentin ke tal cꞌwaꞌl lu cyuꞌn.
11 Porque akine scꞌoꞌmaj kine tuꞌn Dios tuꞌn ntene cyucꞌil xjal,
ma chin ule clol cye keju tzpetni ke.
12 ¿Chi toc cyuꞌne?
Ka at jun xjal at jun syent t-ẍneꞌl,
ex ka ma cyaj tzpet jun,
¿mlaypelo che cyaj tkꞌoꞌn keju 99 twi witz,
ex cxeꞌl jyolte aju otok cyaj tzpet?
13 Ex katzun ma cnet tuꞌn,
ax toc cxel nmaꞌne cyeye,
mas ctzalajel tiꞌj ju tal ẍneꞌl lu cywitz keju 99,
akeju mintiꞌ e cyaj tzpet.
14 Cyjaꞌtzun,
aju Cymane at tuj cyaꞌj myatzun tajbil tuꞌn tnaj jun cye keju tal chꞌin lu.
Tzaꞌn tten tuꞌn tcub knajsaꞌn til kerman
15 Cyjaꞌtzun,
ka ma tbincha termaniya jun mya baꞌn tiꞌja,
txiꞌya tucꞌil tuꞌn cyyoline cyjunalxe ex caꞌwinxa.
Ka ma txi tbiꞌn tyola,
ma cub tcꞌuꞌj termaniya tuꞌna.
16 Pero ka mintiꞌ ma txi tbiꞌn tyola,
kꞌinx juntl tucꞌila ex ka cabe,
tuꞌntzun tel chicꞌeꞌxix tcyakil yol tuꞌn cabe ex ka ox testiw.
17 Katzun mintiꞌ ma txi tbiꞌn cyyol,
kꞌmanxa cye cycyakil ocslal;
ex ka mintiꞌ ma txi tbiꞌn cyyol cycyakil ocslal,
cykꞌoꞌnque ic tzaꞌn ke txkantl xjal mintiꞌ nneꞌl cynicꞌ tiꞌj Dios,
ex ka ic tzaꞌn jun peyil pwak.
18 Ax toc cxel nmaꞌne cyeye,
aju cxel cymayoꞌne tzalu twitz txꞌotxꞌ,
ax icx tuj cyaꞌj cmayetel;
ex aju cxel cymaꞌne tuꞌn tbant tzalu twitz txꞌotxꞌ,
ax icx tuj cyaꞌj ctzajel kꞌmaꞌn tuꞌn tbant.
19 Cxel nmaꞌne juntl maj cyeye,
ka at cabe cyeye ma mojeꞌ cyyol twitz txꞌotxꞌ tuꞌn t-xi cykanin jun tiꞌxti tuj cynaꞌj Dios,
ctzajel kꞌoꞌn cye tuꞌn Nmane aju at tuj cyaꞌj.
20 Porque jatum ateꞌ cabe ex ka ox cybuyin cyib cꞌulul weye,
atzun atine cyxol.
21 Entons pon lakꞌeꞌ Pedro ttxlaj Jesús ex xi tmaꞌn te:
—Tat,
¿jteꞌ maj tuꞌn tcub nnajsaꞌne til wermaniye ka ma tbincha mya baꞌn wiꞌje?
¿Wuk majpe cbel nnajsaꞌne?
Chi Pedro.
22 Xi tmaꞌn Jesús te:
—Mintiꞌ in xi nmaꞌne teya ka oꞌcx wuk maj,
atzun in xi nmaꞌne teya tuꞌn tcub tnajsaꞌna tcyakil maj.
Aju techal tiꞌj ju majen miꞌn taj tuꞌn tcub tnajsaꞌn til juntl
23 Cyjaꞌtzun,
aju cawbil in tzaj tuj cyaꞌj ic tten ic tzaꞌn jun rey cub t-ximan tuꞌn tjaw tiꞌn tajlal cycꞌas tmajen.
24 Ex tej toc ten kꞌil tajlal cycꞌas,
pon kꞌiꞌn jun majen laj mil talent pwak tcꞌas.
25 Ex tuꞌnju mintiꞌ tumel tuꞌn tchjet tcꞌas majen lu,
tzaj tmaꞌn tpatrón tuꞌn t-xi cꞌaꞌyit tucꞌix t-xuꞌjil ex cyucꞌix tcꞌwaꞌl ex tucꞌix tcyakilju at te,
tuꞌntzun tchjet tcꞌas.
26 Cubtzun ẍmejeꞌ majen lu,
in cubsan twitz tpatrón ex in tmaꞌn:
Tat,
ten tpasensa wiꞌje,
cchjetel tcyakil wuꞌne teya,
chi xjal.
27 Atzunte patrón tzaj kꞌakꞌan tcꞌuꞌj tiꞌj majen lu,
xi ttzokpiꞌn ex cub tnajsaꞌn tcꞌas.
28 Pero tej tetz majen lu,
oc noj juntl majen twitz junx cyakꞌun tucꞌil,
attok jun syent denari pwak tcꞌas tucꞌil ju otok tzꞌetz tzokpiꞌn.
Tzajtzun ttzyuꞌn tiꞌj tkul,
oc tjatzꞌoꞌn ex xi tmaꞌn:
Chjontza tcꞌasa at wucꞌile,
chi xjal.
29 Cubtzun ẍmejeꞌ ju tucꞌil t-xe tkan in cubsan twitz ex in tmaꞌn:
Ten tpasensa wiꞌje,
tcyakil cchjetel wuꞌne teya.
30 Atzunte xjal mintiꞌ xi tbiꞌn tyol juntl,
nok oꞌcx xi tiꞌn ex ocx tkꞌoꞌn tuj pres,
maxi tuꞌn tetz ocxi tchjet tcꞌas.
31 Tejtzun cyqueꞌyinte mastl majen aju o baj,
tzaj nimxix cybis,
e jeꞌxtzun ex xi cymaꞌn te cypatrón tcyakilju otok baj.
32 Txquettzun ju majen tuꞌn tpatrón ex xi tmaꞌn te:
Aya majen mya baꞌna.
Tcyakil tcꞌasa ma cub nnajsaꞌne porque ma cubsana nwitze.
33 ¿Myapetzun icx teya tuꞌn ttzaj kꞌakꞌan tcꞌuꞌja tiꞌj tucꞌila ic tzaꞌn weye ma tzaj kꞌakꞌan ncꞌuꞌje tiꞌja?
Chi patrón.
34 Tzajtzun tkꞌoj tpatrón,
xi tmaꞌn tuꞌn tbaj cꞌixbisaꞌn ex tuꞌn tocx kꞌoꞌn tuj pres,
maxi tuꞌn tetz tzokpet ocxi tchjet tcyakil tcꞌas.
35 Ax icxtzun oc tbinchaꞌ Nmane cyiꞌje,
aju at tuj cyaꞌj,
ka mintiꞌ xcub cynajsaꞌne tuꞌn tcyakil cyanmiye aju cyil cyermaniye,
chi Jesús cye.