3 Ex minaben cub tyecꞌun tib Moisés tucꞌix Elías,

in che yolin tucꞌil Jesús.

4 Xitzun tmaꞌn Pedro te Jesús:

—Tat,

baꞌn ax tuꞌn kten tzalu;

ka taja e tjaw kbinchaꞌne ox tal ja t-xak tzeꞌyin cywiꞌ:

Jun teya,

jun te Moisés ex jun te Elías,

chi Pedro.

5 Matok in yolin Pedro,

cub ten jun muj cyibaj in koptzꞌaj;

ex at jun tkꞌajkꞌajel tzaj tuj muj,

in tmaꞌn:

—Atzun Ncꞌwaꞌle jlu cꞌujlaꞌnxix wuꞌne,

in chin tzalaje tiꞌj.

Cybinxe tyol.

6 Tej cybinte t-xnakꞌtzben ju yol lu,

e cub mutzeꞌ twitz txꞌotxꞌ,

ex tzaj nim cyxobil.

7 Tzajtzun lakꞌeꞌ Jesús cytxlaj,

e oc tmacoꞌn ex xi tmaꞌn:

—Che weꞌctze,

miꞌn che xobe.

8 Tejtzun tjaw cyqueꞌyin cywitz,

mintiꞌ juntl xjal o cyil,

oꞌcx te Jesús.

9 Tejtzun cycuꞌtz twi witz,

xi tcyuwsaꞌn Jesús cye:

—Miꞌn txi cymaꞌne te jun xjal aju ma cyile;

maxitzun cxel cymaꞌne ocxi njatz ankꞌine cyxol cyimni,

akine scꞌoꞌmaj kine tuꞌn Dios tuꞌn ntene cyucꞌil xjal,

chi Jesús.

10 Xitzun cykanin ke t-xnakꞌtzben:

—¿Tikuꞌntzun in cymaꞌn ke xnakꞌtzal tiꞌj ley ka ilxix tiꞌj tuꞌn tul nej Elías?

Che chi.

11 Xi ttzakꞌweꞌn Jesús:

—Ax toc nej tzul Elías,

ex cbajel tbinchaꞌn juntl maj tcyakil.

12 Pero cxel nmaꞌne cyeye,

o tzul aj Elías ex mintiꞌ ma tzꞌel cynicꞌ xjal tiꞌj,

oꞌcx o cybincha tiꞌj alcye ju cyajbil.

Ax icx weye chin bajel yajlaꞌne cyuꞌn,

akine scꞌoꞌmaj kine tuꞌn Dios tuꞌn ntene cyucꞌil xjal,

chi Jesús cye.

13 Maxitzun el cynicꞌ ke t-xnakꞌtzben tiꞌj ka tiꞌj Juan o yolin Jesús,

aju e byan xjal tuꞌn.

14 Tej cypon jatum tenl ke xjal,

ul jun xjal tucꞌil Jesús,

cub ẍmejeꞌ twitz ex tma:

15 —Tat,

kꞌakꞌantz tcꞌuꞌja tiꞌj ncꞌwaꞌle,

porque in tzaj tuj twitz ex nim in cꞌixbisanjtz;

porque nimcu maj in xi tzꞌak tuj kꞌakꞌ,

ex nimcu maj in xi tzꞌak tuj aꞌ.

16 Ex ma tzul wiꞌne cyucꞌil ke t-xnakꞌtzbena,

pero mintiꞌ ma bant cyuꞌn tuꞌn tbanix.

17 Xi ttzakꞌweꞌn Jesús:

—Akeye xjal tuj tkꞌijlalil jaꞌlo mintiꞌ cyocslable ex miban che bine.

¿Jteꞌ kꞌij tuꞌn ntene cyucꞌile?

¿Ex jteꞌ kꞌij tuꞌn cyicꞌxe wuꞌne?

Cyiꞌntze cꞌwaꞌl tzalu.

18 Xitzun tmayoꞌn Jesús juꞌẍ,

etztzun juꞌẍ tuj tanmi cꞌwaꞌl,

biꞌxtzun cyaj banix cꞌwaꞌl.

19 E ultzun ke t-xnakꞌtzben Jesús tucꞌil,

xi cykanin te cyjunalx:

—¿Tikuꞌn mintiꞌ xko xcyeꞌye tiꞌj tuꞌn tetz juꞌẍ kuꞌne?

Che chi.

20 Xi tmaꞌn Jesús cye:

—Tuꞌnju mintiꞌ in keꞌ cycꞌuꞌje tiꞌj Dios,

porque ax toc cxel nmaꞌne cyeye,

nokwit at cyocslable,

masque nok chꞌin ic tzaꞌn jun tal twitz mostaza,

jaculo txi cymaꞌne teju witz lu:

Ticꞌa tzalu,

txiꞌya ma chixin.

Cꞌicꞌeltzun.

Ex mintiꞌ jun mlaywit bant cyuꞌne ka at cyocslable.

21 Pero aju jun txcaj juꞌẍ lu mlayx tzꞌetz,

nok oꞌcx jacu tzꞌetz tuꞌn naꞌj Dios ex ka ma cub kyoꞌn weꞌyaj.

22 Tejtzun cyten tuj txꞌotxꞌ Galiley,

xi tmaꞌn Jesús cye t-xnakꞌtzben:

—Akine scꞌoꞌmaj kine tuꞌn Dios tuꞌn ntene cyucꞌil xjal,

chin xel kꞌoꞌne tuj cykꞌab xjal,

23 ex chin bel byoꞌne cyuꞌn;

pero tuj toxin kꞌij chin jawil ankꞌine,

chi Jesús cye.

Atzun cye t-xnakꞌtzben tzaj nimxix cybis tej cybinte jlu.

24 Tejtzun cypon tuj tnam Capernaum,

e ultzun ke peyil pwak tucꞌil Pedro,

keju in che peyin pwak tuꞌn tajben tuj tja Dios,

ex xi cymaꞌn te Pedro:

—¿Yajtzun ju Xnakꞌtzal cyeye,

miꞌnpelo tzaj tkꞌoꞌn ju chojbil tuꞌn tajben tuj tja Dios?

Che chi.

25 —Oclo,

chi Pedro.

Tejtzun tocx Pedro tuja,

tzaj yolin naj Jesús te,

ex tma:

—¿Chi toc tuꞌna,

Simón?

Ke rey ateꞌ twitz txꞌotxꞌ,

¿al e in xi cykanin ju chojbil?

¿Cyepe cyxjalil,

ex ka cye stranjer xjal?

Chi Jesús te.

26 Xitzun ttzakꞌweꞌn Pedro:

—Cye stranjer xjal nneꞌl cykanin,

chi Pedro.

Xi tmaꞌn Jesús:

—Entons mintiꞌ in che chojin ke cyxjalil.

27 Pero tuꞌn miꞌn ttzaj cyyol,

txiꞌya ttzi laguna,

xon cuꞌxa tuj aꞌ jun ganch te tzuybil cyiẍ,

ex aju tnejel cyiẍ ctzyetel tuꞌna,

tzyuma,

octzun tjaket ttziꞌ tuꞌna,

cnetel jun sak pwak tuꞌna;

kꞌintza,

ex kꞌonxa nchoje cye peyil pwak,

tucꞌix teya,

chi Jesús te.