Ke parisey cyucꞌix ke sadusey xi cykanin tuꞌn tbant jun señ
16
E pontzun ke parisey tucꞌil Jesús,
cyucꞌix ke sadusey,
ex xi cykanin tuꞌn t-xi tyecꞌun Jesús jun señ in tzaj tuj cyaꞌj;
xi cymaꞌn jlu nok tuꞌn toc tuj joybil tiꞌj cyuꞌn.
2 Atzunte Jesús xi ttzakꞌweꞌn:
—Oc nneꞌx kꞌij in cymaꞌne:
Mejor kꞌij nchiꞌj,
porque cyak t-xe cyaꞌj.
3 Atzunte prim in cymaꞌne:
Tzul kꞌekab jaꞌlo,
porque cyak t-xe cyaꞌj ex kꞌek muj.
Xmletzꞌ keye.
Nneꞌl cynicꞌe tiꞌj alcye ctzajel tuꞌnju techal in cyqueꞌyine twitz cyaꞌj,
pero atzunju señ tiꞌj alcye ctzajel tuj tkꞌijlalil jaꞌlo,
mintiꞌ nneꞌl cynicꞌe tiꞌj.
4 Ke xjal tuj tkꞌijlalil jaꞌlo mya baꞌn ke ex ma tzꞌel cypaꞌn cyib tiꞌj Dios,
ex in che kanin tiꞌj jun señ,
pero mlay txi yecꞌun jun señ cye,
oꞌcx ju señ tiꞌj Jonás aju t-sanjel Dios cxel yecꞌun cye.
E cyajtzun tcolin Jesús ke xjal lu ex icꞌtzun.
Aju t-samel pan cye parisey
5 Tejtzun cypon ke xnakꞌtzben jlajxi laguna,
icꞌ tnaꞌl cyuꞌn tuꞌn t-xi cyiꞌn cywa.
6 Xi tmaꞌn Jesús cye:
—Ten cycwente cyiꞌje tiꞌj t-samel pan cye parisey ex cye sadusey,
aju in jaw mal tcꞌuꞌj pan tuꞌn.
7 Atzun cye t-xnakꞌtzben in che yolin tiꞌj cyxolx:
—Kape tuꞌnju mintiꞌ saj kiꞌn kwa in tmaꞌn jlu,
che chi.
8 Eltzun tnicꞌ Jesús tiꞌj ju in che yolin tiꞌj ex xi tmaꞌn cye:
—Akeye xinak chꞌin cyocslable,
¿tikuꞌn in che yoline tiꞌj cyxolxe ka mintiꞌ cywaye?
9 ¿Naꞌnxpe tel cynicꞌe tiꞌj,
ex mintiꞌpe in tzaj cynaꞌne cyiꞌj jweꞌ pan xi sipet cyxol jweꞌ mil xinak ex jteꞌ chiꞌl ttxꞌakan jaw cychmoꞌne?
10 ¿Ex mintiꞌpe in tzaj cynaꞌne cyiꞌj wuk pan xi sipet cyxol cyaje mil xinak,
ex jteꞌ chiꞌl ttxꞌakan jaw cychmoꞌne?
11 ¿Tikuꞌn mintiꞌ nneꞌl cynicꞌe tiꞌj,
mya tiꞌj cywaye xi nmaꞌne cyeye,
oꞌcx xi nmaꞌne tuꞌn tten cycwente tiꞌj t-samel pan cye parisey ex cye sadusey,
aju in jaw mal tcꞌuꞌj pan tuꞌn,
chi Jesús cye.
12 Eltzun cynicꞌ ke t-xnakꞌtzben tiꞌj ju yol o tma Jesús cye,
mya tiꞌj t-samel pan tuꞌn toc cycwentin cyib,
oꞌcx tuꞌn toc cycwentin cyib tiꞌj cyxnakꞌtzbil parisey ex cyxnakꞌtzbil sadusey.
In tchicꞌbaꞌn Pedro ka a Jesús ju Crist aju at toclen tuꞌn Dios
13 Tejtzun tpon Jesús tuj tnam Cesarea Filipo,
xi tkanin cye t-xnakꞌtzben ex tma:
—¿Chi toc cyuꞌn xjal wiꞌje,
akine scꞌoꞌmaj kine tuꞌn Dios tuꞌn ntene cyucꞌil xjal,
alcye kine che chi xjal?
14 Xitzun cymaꞌn ke t-xnakꞌtzben:
—At junjun xjal in cymaꞌn ka aya Juan aju e byan xjal tuꞌn;
ex junjuntl in cymaꞌn ka aya Elías;
ex junjuntl in cymaꞌn ka aya Jeremías ex ka jun t-sanjel Dios,
che chi.
15 Xitzun tmaꞌn Jesús cye:
—Yajtzun cyeye,
¿alcye kine tuj cywitze?
16 Xi ttzakꞌweꞌn Simón Pedro:
—Aya ju Crist aju at toclen tuꞌn Dios;
aya Tcꞌwaꞌl Dios itzꞌ,
chi Pedro.
17 Xitzun tmaꞌn Jesús te:
—At tzalajbil teya Simón,
aya tcyꞌajal Jonás,
porque mya tuꞌn xjal ma tzaj yecꞌun jlu teya,
nok oꞌcx tuꞌn Nmane aju at tuj cyaꞌj ma tzaj tyecꞌun jlu teya.
18 Ax icx weye cxel nmaꞌne teya:
Aya Pedro,
ex tibaj pic lu cjawil nbinchaꞌne ju iglesi etzan wuꞌne;
ex mlay cub tiꞌj tuꞌn tipumal camic.
19 Ex teya che xel nkꞌoꞌne ke tal ja tuꞌn tjaket aju cawbil in tzaj tuj cyaꞌj;
aju cxel tmayoꞌna tzalu twitz txꞌotxꞌ,
ax icx tuj cyaꞌj cmayetel,
ex aju cxel tmaꞌna tuꞌn tbant tzalu twitz txꞌotxꞌ,
ax icx tuj cyaꞌj ctzajel kꞌmaꞌn tuꞌn tbant,
chi Jesús.
20 Xitzun tcyuwsaꞌnxix Jesús cye t-xnakꞌtzben tuꞌn miꞌn t-xi cymaꞌn cye xjal ka a Jesús ju Crist aju at toclen tuꞌn Dios.
In yolin Jesús tiꞌj tcamic
21 Maxitzun oc ten Jesús chicꞌbalte cye t-xnakꞌtzben ka ilxix tiꞌj tuꞌn t-xiꞌ tuj Jerusalén,
ex tuꞌn ticꞌx nimcu tuꞌn cyuꞌn ke cytijil xjal,
ex cyuꞌn ke nejenel cye pal ex cyuꞌn xnakꞌtzal tiꞌj ley;
ex tma ka ilxix tiꞌj tuꞌn tcub byoꞌn ex tuꞌn tjaw ankꞌin tuj toxin kꞌij.
22 Xitzun ucꞌin Jesús tuꞌn Pedro tjunalx,
oc ten Pedro mayolte Jesús.
—Tat,
Miwt tzaj tkꞌoꞌn Dios ambil tuꞌn tbant jlu.
Cu chiwt tuꞌn miꞌn ttzaj jlu tiꞌja,
chi Pedro xi tmaꞌn.
23 Atzunte Jesús ajtz meltzꞌaj twitz,
xi tmaꞌn te Pedro:
—Tela nwitze Satanás.
Ma cub tena nwitze te jun tolsabl,
porque myatzun toc t-ximbetza tiꞌj tajbil Dios,
nok oꞌcx toc t-ximbetza tiꞌj cyajbil xjal.
24 Xitzun tmaꞌn Jesús cye t-xnakꞌtzben:
—Ka at jun xjal taj tuꞌn toc lpeꞌ wiꞌje,
xcꞌayinc tib teju tex tajbil,
kꞌinx tcrus,
ex lpeꞌc wiꞌje.
25 Porque alcye jun xjal oꞌcx toc tcꞌuꞌj tiꞌj tuꞌn tten tchwinklal twitz txꞌotxꞌ,
mlay tcamba aju chwinklal in tzaj tkꞌoꞌn Dios;
ex alcye jun xjal tkꞌon tib tuꞌn tnaj tchwinklal twitz txꞌotxꞌ nok tuꞌn nlaje,
oc tcambaꞌ ju chwinklal in tzaj tkꞌoꞌn Dios.
26 Porque ¿ti tajben te xjal ka ma tcamba tcyakilju at twitz txꞌotxꞌ ex atzunju tanmi cnajel?
¿Ex alcye baꞌn t-xi tkꞌoꞌn xjal te chojbil tuꞌn tclet tanmi?
27 Porque akine scꞌoꞌmaj kine tuꞌn Dios tuꞌn ntene cyucꞌil xjal,
chin ule tuj t-spicꞌumal Nmane cyucꞌix ke n-anjele;
maxitzun cxel nkꞌoꞌne chojbil te teyle junjun ic tzaꞌnx takꞌunben.
28 Ax toc cxel nmaꞌne cyeye,
at junjun ateꞌ tzalu mlay che cyim ka naꞌnxtok cylonte oc ntzaje tuꞌn ncawine,
akine scꞌoꞌmaj kine tuꞌn Dios tuꞌn ntene cyucꞌil xjal.