Xi tkꞌoꞌn Jesús cywa cyaje mil xjal
8
Tej atxtok Jesús ttzi laguna,
nim xjal otok pon cychmon cyib,
ex mintiꞌ cywa kꞌiꞌn.
E tzajtzun ttxcoꞌn Jesús ke t-xnakꞌtzben ex xi tmaꞌn cye:
2 —In kꞌakꞌan ncꞌuꞌje cyiꞌj xjal lu,
porque ma bant ox kꞌij jaꞌlo ateꞌ wucꞌile,
ex mintiꞌ cywa.
3 Ka ma txi nmaꞌne cye tuꞌn cyaj cyja naꞌnxtok cywaꞌn,
che bel numj tuj be,
porque at junjun cyxol ma che tzaj najchak,
chi Jesús cye.
4 Tzajtzun cytzakꞌweꞌn ke t-xnakꞌtzben:
—¿Jatum baꞌn ttzaj kiꞌn cywa xjal lu,
atoꞌ tuj jun lugar mintiꞌ cynajbil xjal tuj?
Che chi.
5 Xi tkanin Jesús cye:
—¿Jteꞌ wabj at cyucꞌile?
—At wuk,
che chi.
6 Xitzun tmaꞌn Jesús cye xjal tuꞌn cycub keꞌ twitz txꞌotxꞌ;
jaw ttzyuꞌn keju wuk wabj,
xi tkꞌoꞌn chjonte te Dios,
cub tpiẍcꞌuꞌn,
xi tkꞌoꞌn cye t-xnakꞌtzben tuꞌntzun t-xi cysipan cye xjal,
ex cubtzun cykꞌoꞌn cywitz xjal.
7 Ax icx attok cab ox tal cyiẍ cyucꞌil;
cub tcyꞌiwlaꞌn Jesús,
ex xi tmaꞌn cye t-xnakꞌtzben tuꞌn t-xi cysipan cye xjal.
8 E waꞌntzun cycyakil xjal ex e noj;
ex jaw cychmoꞌn wuk chiꞌl ttxꞌakan wabj cyaj sobryin.
9 Aju cyajlal xjal e waꞌn,
balo cyaje mil xjal;
xitzun tmaꞌn Jesús cye tuꞌn cyaj cyja.
10 Atzunte Jesús ocx naj tuj barc cyucꞌix ke t-xnakꞌtzben,
pon tuj txꞌotxꞌ Dalmanuta tbi.
Xi cykanin parisey tuꞌn tbant jun señ
11 E ultzun ke parisey e oc ten yolil tucꞌil Jesús in che xjelin te:
—Yecꞌuntza jun señ keye tuꞌn tel knicꞌe tiꞌj ka tuj cyaꞌj tzajni tipumala,
che chi,
nok tuꞌn toc tuj joybil tiꞌj cyuꞌn.
12 O xjikꞌban tcꞌuꞌj Jesús:
—¿Tikuꞌn in tzaj cykanin xjal lu jun señ?
Ax toc cxel nmaꞌne cyeye,
mlay txi yecꞌun jun señ cye xjal lu,
chi Jesús xi tmaꞌn cye.
13 E cyajtzun tcolin,
ocx juntl maj tuj barc,
xiꞌ jlajxi laguna.
Aju t-samel pan cye parisey
14 Ke t-xnakꞌtzben Jesús icꞌ tnaꞌl cyuꞌn,
mintiꞌ tzaj cyiꞌn wabj,
nok oꞌcx jun wabj kꞌiꞌn cyuꞌn tuj barc.
15 Xitzun tcyuwsaꞌn Jesús cye:
—Ten cycwente cyiꞌje tiꞌj t-samel pan cyuꞌn parisey,
aju in jaw mal tcꞌuꞌj pan tuꞌn,
ex ten cycwente cyiꞌje teju t-samel pan tuꞌn Herodes,
chi Jesús cye.
16 E octzun ten xnakꞌtzben yolil tiꞌj cyxolx,
in cymaꞌn:
—In tmaꞌn jlu tuꞌnju mintiꞌ saj kiꞌn wabj,
che chi.
17 Tejtzun tel tnicꞌ Jesús tiꞌj,
xi tmaꞌn cye:
—¿Tikuꞌn in che yoline tiꞌj ka mintiꞌ wabj kꞌiꞌn cyuꞌne?
¿Mintiꞌpe in canun tuj cynable,
ex mintiꞌpe nneꞌl cynicꞌe tiꞌj?
¿Maj ma cyuwix cyanmiye?
18 ¿Myapetzun at tbakꞌ cywitze ex mintiꞌ in cyile?
¿Myapetzun at cyẍcyine ex mintiꞌ in cybiꞌne?
¿Mintiꞌpetzun naꞌn cyuꞌne?
19 Tej tcub npiẍcꞌuꞌne jweꞌ wabj tuꞌn t-xi sipet cye jweꞌ mil xjal,
¿jteꞌtzun chiꞌl o noj tuꞌn ttxꞌakan wabj tej tjaw cychmoꞌne?
Chi Jesús.
—Cablaj chiꞌl che chi.
20 —Ex tej tcub npiẍcꞌuꞌne wuk wabj tuꞌn t-xi sipet cye cyaje mil xjal,
¿jteꞌtzun chiꞌl o noj tuꞌn ttxꞌakan wabj tej tjaw cychmoꞌne?
Chi Jesús.
—Wuk chiꞌl che chi.
21 Xitzun tmaꞌn Jesús cye:
—¿Tzaꞌntzun tten naꞌnx tel cynicꞌe tiꞌj?
Jaket twitz jun xjal moẍ tuꞌn Jesús tuj Bet-saida
22 E pontzun tuj tnam Bet-saida.
Ex ul cyiꞌn xjal jun moẍ tucꞌil Jesús,
e cubsan twitz tuꞌn toc tmacoꞌn Jesús ju moẍ.
23 Tzajtzun ttzyuꞌn Jesús tkꞌab moẍ,
ex tiꞌn tiꞌjxi tnam;
oc ttzuban tiꞌj tbakꞌ twitz,
ex oc tkꞌoꞌn tkꞌab tiꞌj tbakꞌ twitz,
ex xi tkanin te:
—¿Atpe chꞌin ma tila?
24 Jawtzun tqueꞌyin twitz xjal.
—Ma wile ke xjal in che bet ic che queꞌyin ic tzaꞌn ke tzeꞌ,
chi xjal.
25 Ex oc tkꞌoꞌn juntl maj tkꞌab Jesús tiꞌj tbakꞌ twitz moẍ,
ex bant tqueꞌyin,
ex biꞌx cyaj banix twitz,
ex clarxix o til tcyakil.
26 Xitzun tmaꞌn Jesús te tuꞌn taj tja.
—Miꞌn tzꞌocxa tuj tnam ex miꞌn txi tmaꞌna cye xjal tuj tnam,
chi Jesús xi tmaꞌn te.
In tchicꞌbaꞌn Pedro ka a Jesús ju Crist, aju at toclen tuꞌn Dios
27 Xiꞌtzun Jesús cyucꞌix ke t-xnakꞌtzben cyuj ke aldey ateꞌ tiꞌjele tnam Cesarea Filipo.
Xi tkanin Jesús cye t-xnakꞌtzben tej cyjaꞌ cyxiꞌ tuj be ex xi tmaꞌn cye:
—¿Chi toc cyuꞌn xjal wiꞌje?
¿Alcye kine,
che chi xjal?
28 Xitzun cytzakꞌweꞌn:
—At junjun in cymaꞌn ka aya Juan aju e byan xjal tuꞌn tuj aꞌ;
ex junjuntl in cymaꞌn ka aya Elías;
ex junjuntl in cymaꞌn ka aya jun cye t-sanjel Dios e ten ojtxi,
che chi.
29 Xitzun tkanin Jesús cye:
—¿Yajtzun cyeye,
alcye kine tuj cywitze?
Xi ttzakꞌweꞌn Pedro:
—Aya ju Crist aju at toclen tuꞌn Dios.
30 Pero xi tmaꞌn Jesús cye tuꞌn miꞌn t-xi cymaꞌn jlu cye xjal.
In yolin Jesús tiꞌj tcamic
31 Octzun ten Jesús kꞌolte xnakꞌtzbil cye ex tma:
—Ilxix tiꞌj tuꞌn ticꞌx nimcu wuꞌne,
akine scꞌoꞌmaj kine tuꞌn Dios tuꞌn ntene cyucꞌil xjal,
ex il tiꞌj tuꞌn wel icꞌune cyuꞌn cytijil xjal ex cyuꞌn ke nejenel cye pal ex cyuꞌn xnakꞌtzal tiꞌj ley,
ex tuꞌn ncub byoꞌne,
ex tuꞌn njatz ankꞌine tuj toxin kꞌij,
chi Jesús cye.
32 Clarxix xi tmaꞌn jlu cye.
Entons xi ucꞌin tuꞌn Pedro,
e jeꞌl lakꞌeꞌ ex oc ten Pedro mayolte tiꞌj t-ximbetz.
33 Atzunte Jesús ajtz meltzꞌaj ex tzaj tqueꞌyin cywitz ke t-xnakꞌtzben,
oc icꞌleꞌn Pedro tuꞌn,
ex xi tmaꞌn te:
—Lakꞌebila wiꞌje Satanás porque myatzun toc tnabla tiꞌj tajbil Dios,
nok oꞌcx toc tnabla tiꞌj cyajbil xjal.
34 E tzajtzun ttxcoꞌn Jesús ke xjal cyucꞌix ke t-xnakꞌtzben,
ex xi tmaꞌn cye:
—Ka at jun xjal taj tuꞌn toc lpeꞌ wiꞌje,
xcꞌayinc tib teju tex tajbil,
kꞌinx tcrus,
ex lpeꞌc wiꞌje.
35 Porque alcye jun xjal oꞌcx toc tcꞌuꞌj tiꞌj tuꞌn tten tchwinklal twitz txꞌotxꞌ,
mlay tcamba aju chwinklal in tzaj tkꞌoꞌn Dios;
ex alcye jun xjal tkꞌon tib tuꞌn tnaj tchwinklal twitz txꞌotxꞌ nok tuꞌn nlaje ex tuꞌn tlaj tkanil colbil,
oc tcambaꞌ aju chwinklal in tzaj tkꞌoꞌn Dios.
36 Porque ¿ti tajben te xjal ka ma tcamba tcyakilju at twitz txꞌotxꞌ ex ka ma naj tanmi?
37 Ex ¿alcye baꞌn t-xi tkꞌoꞌn xjal te chojbil tuꞌn tclet tanmi?
38 Porque alcye ma chꞌixwi wiꞌje ex tiꞌj nyole cyxol ke xjal ateꞌ tuj tkꞌijlalil jaꞌlo ma tzꞌel cypaꞌn cyib tiꞌj Dios ex aj il ke,
ax icx weye,
chin jawil chꞌixwiye tiꞌj oc wule in chin koptzꞌaje tuꞌn t-spicꞌumal Nmane ex cyucꞌix ke anjel xjan wucꞌile,
akine scꞌoꞌmaj kine tuꞌn Dios tuꞌn ntene cyucꞌil xjal.