Aju in tzꞌilix xjal tuꞌn
15
E pontzun junjun xnakꞌtzal tiꞌj ley tucꞌil Jesús,
cyucꞌix junjun parisey e tzaj tuj tnam Jerusalén,
ex xi cykanin te:
2 —¿Tikuꞌn in che icꞌ t-xnakꞌtzbena tibaj ju yol cyaj bant tiꞌj cyuꞌn cytijil xjal ojtxi?
¿Tikuꞌn mintiꞌ nneꞌl cytxꞌjoꞌn cykꞌab oc in che oc ten waꞌl?
Che chi.
3 Xitzun ttzakꞌweꞌn Jesús:
—Ax icx cyeye,
¿tikuꞌn in che icꞌe tibaj tmandamyent Dios nok tuꞌnju in che oc lpeꞌye tiꞌj ju yol cyaj bant tiꞌj cyuꞌn cytijil xjal ojtxi?
4 Porque cyaj tkꞌoꞌn Dios jun mandamyent chi cyjaꞌ:
Cynimanxe cymane ex cytxuye;
ax icx in tmaꞌn:
Alcye ma yasun tiꞌj tman ex ka tiꞌj ttxuꞌ,
il tiꞌj tuꞌn tcub byet,
chi tuj ley.
5 Atzun cyeye in cymaꞌne:
Baꞌn ka at jun xjal ma txi tmaꞌn te tman ex ka te ttxuꞌ:
Mlay bant txi nkꞌoꞌne chꞌin onbil teya,
porque tcyakilju at weye jun oyaj te Dios.
6 Ka ma txi tmaꞌn xjal icju,
entons mya il tiꞌj tuꞌn t-xi tkꞌoꞌn onbil te tman ex ka te ttxuꞌ,
che chiye.
Cyjaꞌtzun ma tzꞌel cyiꞌne tipun tmandamyent Dios tuꞌn tlaj in che oc lpeꞌye tiꞌj ju yol cyaj bant tiꞌj cyuꞌn cytijil xjal ojtxi.
7 Xmletzꞌ keye.
Ax toc tyol Isaías aju t-sanjel Dios cyaj ttzꞌiban cyiꞌje,
chi cyjaꞌ:
8 Ke xjal lu nok tuꞌn cytziꞌ in chin nimanjtze cyuꞌn,
atzun ju cyanmi najchak taꞌ wiꞌje.
9 Nokx gan in che cꞌulun nwitze,
porque aju xnakꞌtzbil in cykꞌoꞌn,
cye xjal cymandamyent,
chi Isaías.
10 E tzajtzun ttxcoꞌn Jesús ke xjal ex xi tmaꞌn cye:
—Cybintze nyole,
ex tzꞌelx cynicꞌe tiꞌj:
11 Aju in xiꞌ tuꞌn xjal,
mintiꞌ in tzꞌilix xjal tuꞌn,
nok oꞌcx in tzꞌilix xjal tuꞌnju tyol nneꞌtz tuj ttziꞌ.
12 E pontzun lakꞌeꞌ t-xnakꞌtzben Jesús ttxlaj ex xi cymaꞌn te:
—¿Mape tbiya,
aju tyola ma txi tmaꞌna mya baꞌn ma tzꞌela tuj cywi parisey?
Che chi.
13 Xi ttzakꞌweꞌn Jesús:
—Tcyakil awal aju mya tuꞌn Nmane at tuj cyaꞌj cuꞌx tawaꞌn,
cjawitz baket.
14 E cyten xjal lu;
porque moẍ ke,
ex ẍaklul moẍ ke;
ka ma tzꞌoc ten jun moẍ ẍaklulte juntl moẍ,
cycabil che xel tzꞌak tuj jul,
chi Jesús.
15 Xi ttzakꞌweꞌn Pedro:
—Chicꞌbantza ju techal lu keye,
chi Pedro.
16 Xi tmaꞌn Jesús:
—¿Maj icx cyeye mintiꞌ nneꞌl cynicꞌe tiꞌj?
17 ¿Maj mintiꞌ nneꞌl cynicꞌe tiꞌj jlu?
Tcyakilju in xiꞌ tuꞌn xjal,
in cuꞌpun tuj tcꞌuꞌj ex nneꞌx tcꞌuꞌjin.
18 Pero aju tyol xjal nneꞌtz tuj ttziꞌ,
tuj tanmi xjal in jatz;
atzunju in tzꞌilix xjal tuꞌn.
19 Porque tuj cyanmi xjal in tzaj cyximbetz mya baꞌn,
ex tuꞌn tcub jun xjal cyuꞌn,
ex tuꞌn cybinchante aj pajil,
ex tuꞌn cyyaẍin,
ex tuꞌn cyelkꞌan,
ex tuꞌn cynicꞌan yol cyiꞌj cyucꞌil,
ex tuꞌn cysiꞌmin yol.
20 Tcyakil jlu in tzꞌilix xjal tuꞌn;
pero oc toc jun xjal waꞌl ex ka mintiꞌ ma tzꞌel ttxꞌjoꞌn tkꞌab,
mlay tzꞌilix xjal tuꞌn.
Jun xuꞌj stranjer xjal xi tocslaꞌn tyol Jesús
21 Tejtzun tetz Jesús tuj lugar lu,
xiꞌ tuj txꞌotxꞌ jatum taꞌ tnam Tiro tucꞌix tnam Sidón.
22 At jun xuꞌj aj Canaán ax najl tuj lugar lu,
ul tucꞌil Jesús in schꞌin ex in tmaꞌn:
—Tat,
aya Tcꞌwaꞌl David,
kꞌakꞌantz tcꞌuꞌja wiꞌje.
Aju wale txin nimxix in yajlanjtz tuꞌn juꞌẍ,
chi xuꞌj.
23 Atzunte Jesús mintiꞌ xi ttzakꞌweꞌn.
E pontzun lakꞌeꞌ ke t-xnakꞌtzben ttxlaj e cubsan twitz ex cymaꞌ:
—Kꞌmanxa te xuꞌj tuꞌn taj,
porque lepchix kiꞌj in schꞌin,
che chi.
24 Xi ttzakꞌweꞌn Jesús:
—Mintiꞌ ma chin tzaj samaꞌne tuꞌn Dios cyucꞌil txkantl xjal,
nok oꞌcx cyucꞌil aj Israel,
akeju ic cyten ic tzaꞌn ẍneꞌl tzpetni ke,
chi Jesús.
25 Ultzun te xuꞌj,
cub ẍmejeꞌ twitz Jesús ex tma:
—Tat,
chin tonintza,
chi xuꞌj.
26 Xi ttzakꞌweꞌn Jesús:
—Mya baꞌn tuꞌn tel kꞌit cywa cꞌwaꞌl ex tuꞌn t-xi kꞌot cye tal txꞌyan,
chi Jesús.
27 Xitzun tmaꞌn xuꞌj:
—Ax toc,
Tat;
pero ke tal txꞌyan in xi cywaꞌn tbuchil wabj nneꞌl tzꞌak ttxaꞌn cymes cyajaw.
28 Xitzun ttzakꞌweꞌn Jesús:
—Aya xuꞌj,
nimxix tocslabla at.
Cbinchetel teya aju tajbila,
chi Jesús.
Ax or lu biꞌx banix ju tal.
Nim yab e banix tuꞌn Jesús
29 Icꞌtzun Jesús tuj lugar lu,
pon ttzi laguna te Galiley;
jax twi witz ex axtzun cub keꞌ.
30 E pontzun nim xjal tucꞌil,
kꞌiꞌn ke cox cyuꞌn,
ex ke moẍ,
ex ke men,
ex ke xjal tzcaj cyten,
cyucꞌix nimcu yab;
ex e cub cykꞌoꞌn t-xe tkan Jesús,
ex e banix tuꞌn.
31 Tuꞌntzun jlu nim e labin xjal tej cylonte bant cyyolin ke men,
ex ke xjal tzcaj cyten e bant,
ex ke cox bant cybet,
ex ke moẍ bant cyqueꞌyin.
Ex xi cykꞌoꞌn xjal chjonte te Dios,
aju Cydios aj Israel.
Xi tkꞌoꞌn Jesús cywa cyaje mil xinak
32 E tzajtzun ttxcoꞌn Jesús ke t-xnakꞌtzben ex xi tmaꞌn cye:
—In tzꞌeꞌy ncꞌuꞌje cyiꞌj xjal,
porque ma bant ox kꞌij ateꞌ wucꞌile ex mintiꞌ chꞌin cywa.
Miꞌn waje tuꞌn t-xi nmaꞌne cye tuꞌn cyaj ex naꞌnxtok t-xiꞌ chꞌin cywa,
mya yajcu che cub numj tuj be,
chi Jesús cye.
33 Xitzun cymaꞌn ke t-xnakꞌtzben:
—¿Jatum ban ttzaj nim wabj kuꞌne tuꞌn cynoj cycyakil xjal lu,
porque atoꞌ tuj jun lugar mintiꞌ cynajbil xjal tuj?
Che chi.
34 Xi tkanin Jesús cye:
—¿Jteꞌ wabj at cyucꞌile?
—At wuk wabj,
tucꞌix junjun tal cyiẍ,
che chi.
35 Xi tmaꞌn Jesús cye xjal tuꞌn cycub keꞌ twitz txꞌotxꞌ.
36 Tzajtzun ttzyuꞌn Jesús aju wuk wabj cyucꞌix ke cyiẍ,
xi tkꞌoꞌn chjonte te Dios,
cubtzun tpiẍcꞌuꞌn ex xi tkꞌoꞌn cye t-xnakꞌtzben,
atzun cye t-xnakꞌtzben xi cysipan cye xjal.
37 Ex e baj waꞌn cycyakil ex e noj.
Ex jaw cychmoꞌn wuk chiꞌl ttxꞌakan wabj aju cyaj sobryin.
38 Aju cyajlal xjal e waꞌn,
cyaje mil xinak,
ex part ke xuꞌj ex ke cꞌwaꞌl.
39 Xitzun tmaꞌn Jesús cye xjal tuꞌn cyaj,
atzunte Jesús jax tuj barc,
pon tuj txꞌotxꞌ Magdala.