—Ate Juan jlu aju e byan xjal tuꞌn;

ma jaw ankꞌin cyxol cyimni,

cyjaꞌtzun at tipumal tuꞌn tbant tcyakil jlu tuꞌn,

chi Herodes.

3 Porque o tzyet Juan tuꞌn Herodes,

ex oc tcꞌaloꞌn tuꞌn caden,

ex ocx tkꞌoꞌn tuj pres tuꞌn tlaj Herodías;

ate Herodías t-xuꞌjil Pelip nej,

aju titzꞌin Herodes.

4 Porque xi tmaꞌn Juan te Herodes:

—Mya kꞌoꞌn tuꞌn ley tuꞌn tten Herodías te t-xuꞌjila.

5 O tajbe Herodes tuꞌn tcub tbyoꞌn,

pero tzaj t-xobil cywitz xjal;

porque cycyakil xjal in cymaꞌn ate Juan t-sanjel Dios.

6 Pero tej tcub icꞌsaꞌn tkꞌijlalil titzꞌjlen Herodes,

oc ten tal Herodías bixal cywitz xjal,

ex tzaj jun ttzalajbil Herodes tiꞌj.

7 Cyjaꞌtzun xi ttziyan Herodes te txin:

Nok alcyex ctzajel tkanina weye jacu txi nkꞌoꞌne teya,

chi Herodes;

xi tmaꞌn tzkan Dios tiꞌj ka tuꞌn t-xi tkꞌoꞌn.

8 Atzunte txin,

nej xi aj kanilte te ttxuꞌ,

xitzun tmaꞌn te Herodes:

—Kꞌontza twiꞌ Juan weye,

aju e byan xjal tuꞌn,

kꞌontza tuj jun plat,

chi txin.

9 Atzunte rey Herodes tzaj tbis;

pero tuꞌn tlaj tzkan Dios otok txi tmaꞌn ex tuꞌn cylaj keju ateꞌtok tucꞌil tiꞌj mes,

cyjaꞌtzun xi tmaꞌn tuꞌn t-xi kꞌoꞌn twiꞌ Juan te txin.

10 Xi tkꞌoꞌn orden tuꞌn tel tamtzꞌuꞌn twiꞌ Juan tuj pres.

11 Tzajtzun kꞌiꞌn twiꞌ tuj jun plat,

ex xi kꞌoꞌn te txin;

atzunte txin pon tiꞌn twitz ttxuꞌ.

12 E pontzun ke t-xnakꞌtzben Juan,

etz cyiꞌn t-ximlal ex cuꞌx cymakuꞌn;

e jeꞌxtzun ex xi cykꞌoꞌn tkanil te Jesús.

13 Tej tbinte Jesús jlu,

icꞌ tuj lugar lu,

xiꞌ tuj jun barc tuꞌn tpon tuj jun lugar mintiꞌ cynajbil xjal tuj.

Tejtzun cybinte xjal,

e jeꞌtz tuj junjun tnam ex e jeꞌx tuꞌn cykan tuꞌn cypon jatum attok tponil Jesús.

14 Tejtzun tetz Jesús tuj barc o til nim xjal otok che pon,

tzaj kꞌakꞌan tcꞌuꞌj cyiꞌj,

ex e banix yab tuꞌn,

akeju ateꞌ cyxol xjal.

15 Tej chꞌixtok tex kꞌij,

e pon lakꞌeꞌ ke t-xnakꞌtzben Jesús ttxlaj ex xi cymaꞌn te:

—Aju lugar lu mintiꞌ cynajbil xjal tuj,

ex ma ko kax;

kꞌmanxa cye xjal tuꞌn cyxiꞌ cyuj aldey tuꞌn tlakꞌet chꞌin cywa,

che chi.

16 Xi tmaꞌn Jesús cye:

—Mya il tiꞌj tuꞌn cyxiꞌ xjal lakꞌol cywa;

cykꞌonxe chꞌin cywa.

17 Atzun cye xnakꞌtzben xi cymaꞌn:

—Mintiꞌ at kucꞌile,

nok oꞌcx jweꞌ pan at ex cabe cyiẍ.

18 Xi tmaꞌn Jesús cye:

—Cyiꞌntze tzalu.

19 Xitzun tmaꞌn cye xjal tuꞌn cycub keꞌ tibaj chꞌim.

Ex e tzaj ttzyuꞌn jweꞌ wabj cyucꞌix cabe cyiẍ,

jaw tqueꞌyin twitz cyaꞌj ex xi tkꞌoꞌn chjonte te Dios tiꞌj,

ex e cub tpiẍcꞌuꞌn ke wabj,

xi tkꞌoꞌn cye t-xnakꞌtzben,

atzun cye t-xnakꞌtzben xi cysipan cye xjal.

20 Cycyakil xjal e waꞌn ex e noj;

ex jaw cychmoꞌn cablaj chiꞌl ttxꞌakan wabj cyaj sobryin.

21 Aju cyajlal xjal e waꞌn,

balo jweꞌ mil xinak,

mya cyucꞌix ke xuꞌj ex mya cyucꞌix ke cꞌwaꞌl e oc te tajlal.

22 Tejtzun tbaj jlu,

xi tmaꞌn Jesús cye t-xnakꞌtzben tuꞌn cyocx tuj barc ex tuꞌn cyxiꞌ nej twitz tuꞌn cypon jlajxi laguna,

atzunte Jesús cyaj ten kꞌmalte cye xjal tuꞌn cyaj cyja.

23 Tejtzun cyaj baj xjal,

jax Jesús twi witz naꞌl Dios tjunalx.

Tejtzun koc yupj,

tjunalx Jesús attok.

24 Atzunte barc otok mijin tibaj aꞌ,

ex in pon tilj aꞌ tiꞌj,

porque maket barc tuꞌn cykꞌikꞌ.

25 Chꞌixtok ttzaj t-xe cyaꞌj pon Jesús cyucꞌil in bettok tibaj aꞌ.

26 Tejtzun cylonte t-xnakꞌtzben in bettok Jesús tibaj aꞌ,

biꞌx naj cynabl,

—Klab te jlu,

che chi.

Ex e jaw schꞌin tuꞌn cyxobil.

27 Pero jurat naj xi yolin Jesús cyucꞌil:

—Keꞌ cycꞌuꞌje;

akine,

miꞌn che xobe,

chi Jesús cye.

28 Tzajtzun ttzakꞌweꞌn Pedro:

—Tat,

ka aya,

kꞌmantza tuꞌn nxiꞌye tucꞌila tibaj aꞌ.

29 Xitzun tmaꞌn Jesús:

—Tzaja.

Cuꞌtztzun Pedro tuj barc,

xi bet tibaj aꞌ tuꞌn tpon tucꞌil Jesús.

30 Pero tej tlonte Pedro nim cykꞌikꞌ,

tzaj t-xobil;

cyjaꞌtok t-xi mulkꞌaj tuj aꞌ,

jaw schꞌin ex tma:

—Tat,

chin tcloma.

31 Jurat naj xi tnukpiꞌn Jesús tkꞌab,

tzyettzun Pedro tuꞌn,

ex xi tmaꞌn te:

—Aya xinak chꞌin tocslabla,

¿tikuꞌn xjawjeꞌ tcꞌuꞌja?

Chi Jesús te.

32 Tejtzun cyjax tuj barc,

biꞌx weꞌ cykꞌikꞌ.

33 Atzun keju ateꞌtok tuj barc e ul lakꞌeꞌ twitz Jesús,

ex e cꞌulun twitz in cymaꞌn:

—Ax toc aya Tcꞌwaꞌl Dios,

che chi.

34 Tej cyicꞌx jlajxi aꞌ,

e pon tuj txꞌotxꞌ Genesaret.

35 Tejtzun tel cynicꞌ xjal tiꞌj Jesús,

akeju ax najl ke,

ex tkanil cyuꞌn tuj tcyakil lugar nikayin;

cycyakiltzun ke yab e ul kꞌiꞌn tucꞌil Jesús.

36 E cubsan xjal twitz Jesús ichak nok ttxaꞌn t-xbalun tzꞌoc cymacoꞌn yab;

ex cycyakil keju oc cymacoꞌn,

e banix.