Ju techal tiꞌj ju xjal awal
13
Tujx kꞌij lu etz Jesús tuja ex cub keꞌ ttzi laguna.
2 Ex pon cychmon cyib nim xjal tucꞌil;
jaxtzun Jesús tuj barc ex cub keꞌ,
atzun cycyakil xjal ateꞌ ttzi aꞌ.
3 Ex xi tmaꞌn Jesús nimcu yol cye xjal tuj techal ex tma:
—At jun xjal xiꞌ awal triw.
4 Ex tej t-xi tchitun iyaj,
cub tzꞌak chꞌin iyaj tuj be;
e ul ke chyuꞌj ex jaw cywaꞌn.
5 Chꞌintl iyaj cub tzꞌak cyxol abj jatum mya nim tpimil txꞌotxꞌ,
ex jurat naj tzaj pokꞌl,
porque mya nim tpimil txꞌotxꞌ,
6 pero tej tmekꞌt kꞌij o tzꞌeꞌy,
ex biꞌx tzkij tuꞌnju mya nim tlocꞌ.
7 Chꞌintl iyaj cub tzꞌak cyxol chꞌiꞌx cꞌul;
tejtzun tchꞌiy chꞌiꞌx cꞌul,
o xcꞌost triw tuꞌn.
8 Pero chꞌintl iyaj cub tzꞌak tuj tbanil txꞌotxꞌ,
ex oc twitz,
at oc jun syent twitz,
ex at oc 60 twitz,
ex at oc 30 twitz tiꞌj jun tkan.
9 Alcye at t-ẍcyin,
binx ju yol lu,
chi Jesús cye.
Aju tnabl techal
10 E ultzun lakꞌeꞌ ke t-xnakꞌtzben Jesús ttxlaj,
ex xi cykanin te:
—¿Tikuꞌn in yolina cyucꞌil xjal tuj techal?
11 Xi ttzakꞌweꞌn Jesús:
—Te cyeye ma tzaj tkꞌoꞌn Dios tuꞌn tel cynicꞌe tiꞌj ju yol ewantok nej tiꞌj cawbil in tzaj tuj cyaꞌj;
atzun cye xjal mya kꞌoꞌn tuꞌn tel cynicꞌ tiꞌj.
12 Porque aju xjal at chꞌin te,
cxel kꞌoꞌn mastl te tuꞌntzun tten mas nim te;
pero aju xjal mintiꞌ te,
aju chꞌin at te cꞌelel kꞌiꞌn.
13 Cyjaꞌtzun in chin yoline cye tuj techal;
porque nnoꞌc cyqueꞌyin pero mintiꞌ in cyil;
in che bin tiꞌj pero mintiꞌ in cybiꞌn ex mintiꞌ nneꞌl cynicꞌ tiꞌj.
14 Cyjaꞌtzun tten ma japun cyiꞌj aju yol cyaj tmaꞌn Isaías aju t-sanjel Dios.
Chi Isaías:
Cucx in cybiꞌne,
pero mintiꞌ nneꞌl cynicꞌe tiꞌj;
ex cucx nnoꞌc cyqueꞌyine,
pero mintiꞌ in cyile.
15 Porque aju cyanmi xjal lu ma cyuwix,
mintiꞌ in xi cybiꞌn tuꞌn cyẍcyin ex ma cub cymaltzꞌuꞌn cywitz;
tuꞌntzun miꞌn cylonte tuꞌn cywitz,
ex tuꞌn miꞌn cybinte tuꞌn cyẍcyin,
ex tuꞌn miꞌn tel cynicꞌ tiꞌj tuj cyanmi,
ex tuꞌn miꞌn cyajtz meltzꞌaj tuꞌn cybanix wuꞌne,
chi Isaías.
16 Atzun cyeye at tzalajbil cyeye,
porque in cyile tuꞌn cywitze,
ex in cybiꞌne tuꞌn cyẍcyine.
17 Porque ax toc cxel nmaꞌne cyeye,
nimcu t-sanjel Dios cyucꞌix ke xjal tzꞌaklxix o cyajbe tuꞌn cylonte aju in cyile,
pero mintiꞌ o cyil;
ex o cyajbe tuꞌn cybinte aju in cybiꞌne,
pero mintiꞌ o cybi.
In tchicꞌbaꞌn Jesús ju techal tiꞌj ju xjal xiꞌ awal
18 Cybintztzune ti in tmaꞌn ju techal tiꞌj xjal xiꞌ awal.
19 Jun xjal in tbiꞌn aju yol tiꞌj tcawbil Dios ex mintiꞌ nneꞌl tnicꞌ tiꞌj,
nnuꞌltzun tajaw il,
in jatz tiꞌn ju yol otok cuꞌx awaꞌn tuj tanmi xjal.
Aju xjal lu ic tten ic tzaꞌn be jatum cub tzꞌak iyaj.
20 Ex aju xjal in xi tbiꞌn ju yol,
ex jurat naj in xi tocslaꞌn tucꞌil tzalajbil,
aju xjal lu ic tten tzaꞌn ke abj jatum cub tzꞌak iyaj;
21 pero tuꞌnju mintiꞌ tlocꞌ iyaj,
nok cabe kꞌij in cyaj ten.
Icxtzun tten xjal ju.
Oc in tzaj jun yajbil te ex oc tel icꞌun cyuꞌn xjal tuꞌn tlaj tyol Dios,
jurat in cub tzꞌak.
22 Ex juntl xjal ic tten ic tzaꞌn ju txꞌotxꞌ at chꞌiꞌx cꞌul tuj,
porque in xi tbiꞌn tyol Dios,
pero in baj tcꞌuꞌj tiꞌj nimcu tuj tkꞌijlalil jaꞌlo ex in sbunjtz tuꞌn kꞌinumabl;
cyjaꞌtzun nneꞌl tipun tyol Dios tuj tanmi xjal ex mintiꞌ in witzan.
23 Atzun juntl xjal ic tten ic tzaꞌn tbanil txꞌotxꞌ jatum cub tzꞌak iyaj,
porque in xi tbiꞌn ju yol ex nneꞌl tnicꞌ tiꞌj,
ex nnoꞌc twitz iyaj tuj.
At junjun nnoꞌc jun syent twitz,
ex at junjun nnoꞌc 60 twitz,
ex at junjun nnoꞌc 30 twitz tiꞌj jun tkan,
chi Jesús.
Aju techal tiꞌj chꞌim cꞌul t-xol triw
24 Xi tmaꞌn Jesús juntl techal cye,
chi cyjaꞌ:
—Aju cawbil in tzaj tuj cyaꞌj ic tten ic tzaꞌn jun xjal cuꞌx tawaꞌn tbanil iyaj tuj tcojbil.
25 Pero te konicꞌan in che tantok xjal,
ul jun xjal at tkꞌoj tiꞌj,
cuꞌx tawaꞌn tiyjil chꞌim cꞌul t-xol triw,
ex ajtzun.
26 Tej tjawil pokꞌl triw ex tej toc twitz,
ax icx te chꞌim cꞌul tzaj pokꞌl.
27 E ultzun ke tmajen xjal,
xi cymaꞌn te:
Tat,
¿myapetzun tbanil iyaj cuꞌx tawaꞌna tuj tcojbila?
¿Tzaꞌntzun tten ma tzaj pokꞌl chꞌim cꞌul t-xol triw?
Che chi.
28 Xi tmaꞌn ju tajaw awal cye:
Tuꞌn jun xjal at tkꞌoj wiꞌje ma tbincha jlu.
Xitzun cymaꞌn ke majen te:
¿Tajpeya tuꞌn kxiꞌye ex tuꞌn tjaw kbakoꞌne chꞌim cꞌul?
29 Miꞌn,
chi te xjal xi tmaꞌn cye,
porque oc tjatz cybakoꞌne chꞌim cꞌul,
mya yajcu tucꞌix triw cjawitz cybakoꞌne.
30 E tten,
junx e ttzaj chꞌiy tucꞌil triw,
maxi cjawil baket oc tjaw triw.
Octzun tpon tkꞌijlalil tuꞌn tjaw triw,
maxitzun cxel nmaꞌne cye majen:
Nej cychmoꞌnctze chꞌim cꞌul,
ex cycꞌalome junjun cheꞌl tten tuꞌn tocx tuj kꞌakꞌ;
atzunte triw cychmoꞌnctze tuꞌn tocx tuj ntxꞌutxꞌe,
chi tajaw awal.
Aju techal tiꞌj twitz mostaza
31 Xi tmaꞌn Jesús juntl techal cye.
Chi cyjaꞌ:
—Aju cawbil in tzaj tuj cyaꞌj ic tten ic tzaꞌn jun twitz mostaza tzaj tiꞌn jun xjal ex cuꞌx tawaꞌn tuj tcojbil.
32 Aju twitz mostaza mas tal chꞌinxix twitz tcyakil iyaj;
octzun tchꞌiy,
mas in chꞌiy twaꞌl cywitz mastl tal awal tuj peꞌn,
ex nnoꞌc ic tzaꞌn jun tzeꞌ,
cyjaꞌtzun in che ul ke chyuꞌj ex in bant cykꞌuꞌ t-xol tkꞌab.
Aju techal tiꞌj t-samel pan
33 At juntl techal xi tmaꞌn Jesús cye.
Chi cyjaꞌ:
—Aju cawbil in tzaj tuj cyaꞌj ic tten ic tzaꞌn chꞌin t-samel pan tzaj tiꞌn jun xuꞌj tuꞌn tjaw mal tcꞌuꞌj pan,
xi t-smoꞌn tuj ox malbil arin,
ex jawtzun mal tcyakil tkꞌotjil pan tuꞌn.
Alcye cyajben ke techal in tmaꞌn Jesús
34 Tcyakil jlu xi tmaꞌn Jesús cye xjal tuj techal,
ex mintiꞌ o yolin cyucꞌil myawt tuj techal,
35 tuꞌntzun tjapun aju o kꞌmanjtz tuꞌn t-sanjel Dios,
chi cyjaꞌ:
Oc chin yolile tuj techal;
cxel nchicꞌbaꞌne aju ewan atxix tbantlen twitz txꞌotxꞌ,
chi t-sanjel Dios.
In tchicꞌbaꞌn Jesús techal tiꞌj chꞌim cꞌul t-xol triw
36 Bajtzun tkꞌolben tib Jesús cyucꞌil xjal,
ocx tuja,
e pontzun lakꞌeꞌ ke t-xnakꞌtzben ttxlaj ex xi cymaꞌn te:
—Chicꞌbantza keye aju techal tiꞌj chꞌim cꞌul tuj cojbil,
che chi.
37 Xi ttzakꞌweꞌn Jesús:
—Aju in cuꞌx awante tbanil iyaj,
atzun kine scꞌoꞌmaj kine tuꞌn Dios tuꞌn ntene cyucꞌil xjal.
38 Aju cojbil,
atzun tcyakil twitz txꞌotxꞌ.
Aju tbanil iyaj,
atzun keju at cyoclen tuj tcawbil Dios,
atzunju chꞌim cꞌul,
atzun keju tcꞌwaꞌl tajaw il.
39 Aju aj kꞌoj cuꞌx awante chꞌim cꞌul,
atzun tajaw il.
Aju tuꞌn tjaw chmet twitz triw,
atzun in yolin tiꞌj mancbil tkꞌijlalil,
ex ke majen in jaw cychmoꞌn twitz triw,
atzun ke anjel.
40 Cyjaꞌtzun,
ic tzaꞌn in jaw baket chꞌim cꞌul ex nnoꞌcx kꞌot tuj kꞌakꞌ,
icxtzun cbajel tuj mancbil tkꞌijlalil.
41 Akine scꞌoꞌmaj kine tuꞌn Dios tuꞌn ntene cyucꞌil xjal,
che tzajel nsamaꞌne ke n-anjele,
ex cꞌelex cyiꞌn tuj ncawbile cycyakil keju in che cub tzꞌak xjal tuj il cyuꞌn,
cyucꞌix keju in cybinchaꞌn mya baꞌn.
42 Ex che oquex kꞌoꞌn tuj jorni in cꞌant tuꞌn kꞌakꞌ;
atzun ctzajel okꞌel ex ckitxꞌitxꞌil t-xe cyeꞌ xjal.
43 Atzun ke tzꞌaklxix che koptzꞌajel ic tzaꞌn tkan kꞌij tuj tcawbil Cyman.
Alcye at t-ẍcyin,
binx ju yol lu.
Aju techal tiꞌj jun kꞌinumabl ewantok
44 Aju cawbil in tzaj tuj cyaꞌj ic tten ic tzaꞌn jun kꞌinumabl ewan tuj jun cojbil o cnet tuꞌn jun xjal ex cuꞌx tewan juntl maj,
ex o tzalajxix tiꞌj;
xiꞌtzun ex xi tcꞌayin tcyakilju at te,
ex lakꞌet ju cojbil tuꞌn,
jatum ewan ju kꞌinumabl.
Aju techal tiꞌj jun perla wiꞌyilxix
45 Ax icx aju cawbil in tzaj tuj cyaꞌj ic tten ic tzaꞌn jun comersyant in jyon tiꞌj tbanil perla;
46 tejtzun tcnet jun perla wiꞌyilxix tuꞌn,
xiꞌtzun ex xi tcꞌayin tcyakilju at te,
ex lakꞌet ju perla tuꞌn.
Aju techal tiꞌj xyub te tzuybil cyiẍ
47 Ax icx aju cawbil in tzaj tuj cyaꞌj ic tten ic tzaꞌn jun xyub te tzuybil cyiẍ;
oc in cuꞌx kꞌot tuj mar in che tzyet cycyakil txcaj cyiẍ tuꞌn.
48 Octzun tnoj xyub,
in jatz kꞌiꞌn cyuꞌn xjal ttzi aꞌ;
in che cub keꞌ xjal tiꞌj,
in jatz cyscꞌoꞌn keju baꞌn ex in cuꞌx cykꞌoꞌn tuj chiꞌl,
atzunju mya baꞌn nneꞌx cyxoꞌn.
49 Ictzun cbajel tuj mancbil tkꞌijlalil;
che tzajel ke anjel ex cꞌelel cypaꞌn keju mya baꞌn cyxol keju tzꞌaklxix,
50 ex che oquex kꞌoꞌn ke mya baꞌn tuj jorni in cꞌant tuꞌn kꞌakꞌ;
atzun ctzajel okꞌel ex ckitxꞌitxꞌil t-xe cyeꞌ xjal,
chi Jesús cye.
Aju kꞌinumabl acꞌaj ex aju te ojtxi
51 Xitzun tkanin Jesús cye t-xnakꞌtzben:
—¿Mape tzꞌel cynicꞌe tiꞌj tcyakil jlu?
Xi cytzakꞌweꞌn t-xnakꞌtzben:
—Ma tzꞌel knicꞌe tiꞌj,
Tat.
52 Xitzun tmaꞌn Jesús cye:
—Cyjaꞌtzun tten jun xnakꞌtzal tiꞌj ley ka ma tzꞌoc te xnakꞌtzben tiꞌj cawbil in tzaj tuj cyaꞌj,
ic tten ic tzaꞌn jun tajaw ja in jaw t-scꞌoꞌn tiꞌxti acꞌaj ex ka te ojtxi jatum chmoꞌn tkꞌinumabl.
Tej tpon Jesús tuj tnam Nazaret
53 Tejtzun tbaj tmaꞌn Jesús ke techal lu,
icꞌtzun tuj lugar lu,
54 ex pon tuj ttanmi,
xi tkꞌoꞌn xnakꞌtzbil cye xjal tuj ja te cycꞌulbil;
cyjaꞌtzun e labin xjal tiꞌj,
ex in cymaꞌn:
—¿Jatum in tzaj tnabl xjal lu?
¿Ex tzaꞌn tten in che bant ke binchben nim cyipumal tuꞌn?
55 ¿Myapetzun tcyꞌajal calpinter jlu?
¿Myapetzun Mariy tbi ttxuꞌ?
¿Ex myapetzun Jacobo tbi jun titzꞌin,
ex juntl José tbi,
ex juntl Simón tbi,
ex juntl Judas tbi?
56 ¿Ex myapetzun cycyakil tanb ateꞌ kucꞌil?
¿Tzaꞌntzun tten in bant tcyakil jlu tuꞌn?
Che chi xjal.
57 Cyjaꞌtzun mya baꞌn ela tyol Jesús tuj cywitz.
Pero xi tmaꞌn Jesús cye:
—Ke t-sanjel Dios at nimbil cye tuj tcyakil lugar.
Oꞌcx tuj cytanmi ex tuj cyja mintiꞌ nimbil cye.
58 Cyjaꞌtzun mya nim binchben nim tipumal bant tuꞌn Jesús tuj ttanmi,
tuꞌn tlaj mintiꞌ xi cyocslaꞌn xjal.