Aju techal tiꞌj ju xjal xiꞌ awal
4
Oc ten juntl maj Jesús kꞌolte xnakꞌtzbil cye xjal ttzi laguna,
ex nim xjal pon cychmon cyib tiꞌj;
cyjaꞌtzun jax Jesús tuj jun barc at ttzi aꞌ,
cubtzun keꞌ,
atzun cycyakil xjal kꞌukl ke twitz txꞌotxꞌ ttzi laguna.
2 Ex nimcu xnakꞌtzbil xi tmaꞌn Jesús cye tuj techal;
atzunju xnakꞌtzbil lu xi tmaꞌn cye:
3 —Cybintze nyole.
At jun xjal xiꞌ awal triw.
4 Tej t-xi tchitun xjal iyaj,
at chꞌin cub tzꞌak tuj be;
e ultzun ke chyuꞌj ex jaw cywaꞌn.
5 Chꞌintl iyaj cub tzꞌak cyxol abj jatum mya nim tpimil txꞌotxꞌ;
jurat tzaj pokꞌl iyaj porque mya nim tpimil txꞌotxꞌ.
6 Pero tej tmekꞌt kꞌij o tzꞌeꞌy ex biꞌx tzkij tuꞌn tlaj mya nim tlocꞌ.
7 Chꞌintl iyaj cub tzꞌak t-xol chꞌiꞌx cꞌul;
chꞌiytzun chꞌiꞌx cꞌul,
biꞌx xcꞌost triw tuꞌn,
ex mintiꞌ oc twitz.
8 Pero chꞌintl iyaj cub tzꞌak tuj tbanil txꞌotxꞌ;
tzaj pokꞌl,
ex o chꞌiy ex oc twitz;
ex tiꞌj junjun tkan at oc 30 twitz,
ex at oc 60 twitz,
ex at oc jun syent twitz,
chi Jesús cye.
9 Xi tmaꞌntl Jesús cye:
—Alcye at t-ẍcyin,
binx ju yol lu.
Aju tnabl ju techal
10 Tejtzun cyaj baj xjal,
atzun keju e cyaj ten tucꞌil Jesús cyucꞌix ke cablaj t-xnakꞌtzben xi cykanin te Jesús alcye tnabl ju techal.
11 Xitzun tmaꞌn Jesús cye:
—Te cyeye ma tzaj kꞌoꞌn tuꞌn tel cynicꞌe tiꞌj ju yol tiꞌj tcawbil Dios aju ewantok nej;
atzun cye mastl xjal,
tcyakil tuꞌn t-xi kꞌmet cye tuj techal,
12 tuꞌn miꞌn tcyil aju in cyqueꞌyin,
ex tuꞌn miꞌn tel cynicꞌ tiꞌj aju in cybiꞌn,
tuꞌntzun miꞌn cyajtz meltzꞌaj tucꞌil Dios ex tuꞌn miꞌn tcub najset cyil,
chi Jesús cye.
In tchicꞌbaꞌn Jesús ju techal tiꞌj ju xjal xiꞌ awal
13 Ex xi tmaꞌntl Jesús cye:
—¿Maj mintiꞌ nneꞌl cynicꞌe tiꞌj ju techal lu?
¿Tzaꞌntzun tten cꞌelel cynicꞌe cyiꞌj mastl techal?
14 Aju iyaj in cuꞌx tawaꞌn xjal,
atzunju tyol Dios.
15 Aju be jatum cub tzꞌak iyaj,
atzun in yolin cyiꞌj xjal in cuꞌx awet tyol Dios tuj cyanmi:
nej in xi cybiꞌn,
pero nnuꞌl naj Satanás ex nneꞌl tiꞌn tyol Dios aju otok cuꞌx awet tuj cyanmi.
16 Ke abj jatum cub tzꞌak iyaj,
atzun in yolin cyiꞌj xjal oc cybinte tyol Dios jurat naj in xi cyocslaꞌn in che tzalaj tiꞌj,
17 pero mintiꞌ in xiꞌ tlocꞌ Tyol Dios cyuj,
nok te cabe kꞌij in che ten;
oc ttzaj yajbil cyiꞌj ex oc cyel icꞌun cyuꞌn xjal tuꞌn tlaj tyol Dios,
jurat naj in che cub tzꞌak.
18 Aju txꞌotxꞌ at chꞌiꞌx cꞌul tuj jatum cub tzꞌak ju iyaj,
atzun in yolin cyiꞌj xjal in xi cybiꞌn tyol Dios,
19 pero oꞌcx in che bisun tiꞌj tzaꞌn tten tuꞌn cyankꞌin twitz txꞌotxꞌ,
in che sbunjtz tuꞌnju cyaj tuꞌn cyoc kꞌinun,
ex nimcu in pon cycꞌuꞌj tiꞌj.
Tcyakil jlu toc cycꞌuꞌj tiꞌj;
tuꞌntzunju nneꞌl tipun tyol Dios tuj cyanmi,
ex mintiꞌ in witzan.
20 Atzunju tbanil txꞌotxꞌ jatum cub tzꞌak ju iyaj,
atzun in yolin cyiꞌj xjal in xi cybiꞌn tyol Dios ex in xi cyocslaꞌn,
ex nnoꞌc twitz iyaj cyuj;
tiꞌj junjun tkan at nnoꞌc 30 twitz,
ex at nnoꞌc 60 twitz,
ex at nnoꞌc jun syent twitz.
Aju techal tiꞌj candil
21 Ax icx xi tmaꞌn Jesús cye:
—¿Baka in tzaj cyiꞌn xjal jun candil tuꞌn tocx cykꞌoꞌn tjakꞌ almi ex ka tjakꞌ watbil?
¿Myapetzun tibaj jun tcubil tuꞌn tcub kꞌot tuꞌn tkꞌonte spicꞌun?
22 Porque tcyakilju at tuj ewaj ctzajel yecꞌun,
ex tcyakilju ewan cꞌelel tuj kꞌanchaꞌl.
23 Alcye at t-ẍcyin,
binx ju yol lu.
24 Ax icx xi tmaꞌn cye:
—Cykꞌoꞌnque cwent tiꞌj ju in cybiꞌne,
porque ax ju malbil cꞌajbel tuꞌn Dios cyeye jatum in xi cymaloꞌne te juntl,
ex ctzajel tkꞌoꞌn Dios chꞌintl tibaj cyeye.
25 Porque alcye jun xjal at chꞌin te,
ctzajel kꞌoꞌn mastl te;
pero alcye jun xjal mintiꞌ te,
aju chꞌin at te,
cꞌelel kꞌiꞌn.
Aju techal tiꞌj ju iyaj in chꞌiy
26 Ax icx xi tmaꞌn Jesús:
—Aju tcawbil Dios ic tten ic tzaꞌn jun xjal in cuꞌx tawaꞌn iyaj tuj txꞌotxꞌ;
27 in xiꞌtzun xjal tal konicꞌan ex in jaw weꞌ kꞌijl,
atzunju iyaj in pokꞌl ex in chꞌiy,
pero te xjal mintiꞌ biꞌn tuꞌn tzaꞌn tten in pokꞌl iyaj.
28 Porque ax txꞌotxꞌ in tzaj kꞌonte twitz;
tnejel in chꞌiy tkan,
te tibajxi in yecꞌun twiꞌ,
ex te tibajxi nnoꞌc twitz tiꞌj twiꞌ.
29 Octzun tkꞌanax twitz,
in cheꞌx t-samaꞌn xjal tuꞌn tjaw chmet twitz,
porque otok pon kꞌij tuꞌn tjaw.
Aju techal tiꞌj twitz mostaza
30 Ax icx o tma Jesús:
—¿Chi toc cyuꞌne tiꞌj tcawbil Dios?
¿Tzaꞌn tten?
Ex ¿alcye jun techal ctzajel kiꞌn tiꞌj?
31 Ic tten tcawbil Dios ic tzaꞌn twitz mostaza oc in cuꞌx awet tuj txꞌotxꞌ,
mas tal chꞌinxix twitz mastl iyaj at twitz txꞌotxꞌ;
32 pero oc in cuꞌx awet,
in tzajtzun chꞌiy,
ex maꞌ nnoꞌca cywitz mastl itzaj,
ex maꞌ in che oc ke tkꞌab,
cyjaꞌtzun in che ocx ten ke chyuꞌj t-xol tkꞌab tjakꞌ t-xlecumal.
Alcye tajben ke techal in tmaꞌn Jesús
33 Tej tyolin Jesús cyucꞌil xjal,
nimcu techal xi tmaꞌn cye,
ic tzaꞌn ke techal lu,
alcyeju tuꞌn tel cynicꞌ tiꞌj.
34 Puro tuj techal o yolin Jesús cyucꞌil xjal,
pero xi tchicꞌbaꞌn tcyakil cye t-xnakꞌtzben tej cyten cyjunalx.
Weꞌ jun nintz cykꞌikꞌ tuꞌn Jesús
35 Ax kꞌij tej toc kax,
xi tmaꞌn Jesús cye t-xnakꞌtzben:
—Ko icꞌx jlajxi laguna.
Jesús calma la tormenta (Marcos 4.35-41)
36 E cyajtzun ten cycyakil xjal cyuꞌn xnakꞌtzben,
xiꞌtzun kꞌiꞌn Jesús cyuꞌn t-xnakꞌtzben tujx barc jatum kꞌukl;
ex at mastl barc e jeꞌx lpeꞌ tiꞌj.
37 Pero tzaj jun cykꞌikꞌ nimxix,
ex jaw pulin aꞌ tuꞌn cykꞌikꞌ,
ocx tuj barc,
cyjaꞌtzun chꞌixtok t-xi mulkꞌaj barc tuj aꞌ.
38 Atzunte Jesús otok tzicꞌ tan ttxaꞌn tjeꞌ barc,
txꞌayl tibaj jun xkꞌanwiꞌ;
jawtzun cycꞌasun,
ex xi cymaꞌn te:
—Xnakꞌtzal,
¿mintiꞌpe taja kiꞌje,
ko najele?
Che chi.
39 Jawtzun weꞌ Jesús,
xi tmayoꞌn cykꞌikꞌ ex xi tmaꞌn te aꞌ:
—Miꞌn kꞌajta.
Numecuya.
—¿Tikuꞌn in che xobe?
¿Tzaꞌn tten mintiꞌ cyocslable?
Chi Jesús.
41 Tzajtzun nim cyxobil,
ex cyma cyxolx:
—¿Alcyetzunju xjal lu?
Porque tucꞌix cykꞌikꞌ ex aꞌ in xi cyniman tyol,
che chi xnakꞌtzben.