Tej toc Jesús tuj joybil tiꞌj
4
Ajtz meltzꞌaj Jesús ttzi nima Jordán,
nojni tuꞌn Xewbaj Xjan,
ex xi kꞌiꞌn tuꞌn Xewbaj Xjan tuj jun lugar mintiꞌ cynajbil xjal tuj.
Lucas 4.1-30
2 Axtzun cyaj ten 40 kꞌij,
ex oc tuj joybil tiꞌj tuꞌn tajaw il.
Ex mintiꞌ o waꞌn tuj 40 kꞌij,
ex tbajlenxi jlu,
tzaj el tcꞌuꞌj.
3 Xitzun tmaꞌn tajaw il te:
—Ka Tcꞌwaꞌl Diosa,
kꞌmanxa te abj lu tuꞌn toc te wabj.
4 Xi ttzakꞌweꞌn Jesús:
—At jun yol in tmaꞌn tuj Tuꞌjil:
Mya nok oꞌcx tuꞌn wabj cꞌankꞌil xjal,
[ax icx jacu tzꞌankꞌin xjal tuꞌn tcyakil yol in tmaꞌn Dios.]
5 Xitzun kꞌiꞌn Jesús tuꞌn tajaw il twiꞌ jun witz maꞌ twaꞌl,
ex jurat naj xi tyecꞌun tcyakil tnam twitz txꞌotxꞌ te.
6 Ex xi tmaꞌn tajaw il te:
—Teya cxel nkꞌoꞌne tcyakil cyipumal tnam lu tucꞌix cyoclen;
porque weye o tzaj kꞌoꞌn,
ex cxel nkꞌoꞌne nok al e wajbile.
7 Ka ma cub ẍmejeꞌya cꞌulul nwitze,
tcyakil jlu cxel nkꞌoꞌne teya,
chi tajaw il.
8 Pero xi ttzakꞌweꞌn Jesús:
—[Paꞌmil tiba wiꞌje Satanás,
porque] at jun yol in tmaꞌn tuj Tuꞌjil:
Twitz Kman tuꞌn cycꞌulune,
aju Cydiose,
ex oꞌcx te tuꞌn cyajbene,
chi tuj Tuꞌjil.
9 Xitzun kꞌiꞌn Jesús tuꞌn Satanás tuj tnam Jerusalén ex jax tkꞌoꞌn max twiꞌ tja Dios,
ex xi tmaꞌn te:
Cxel tmaꞌn Dios cye t-anjel tuꞌn toc cwentina cyuꞌn.
11 Ctzyetela cyuꞌn tuꞌn cykꞌab tuꞌn miꞌn toc tocpaj tkana tiꞌj abj,
chi tuj Tuꞌjil.
12 Xi ttzakꞌweꞌn Jesús:
—Ax icx at jun yol in tmaꞌn tuj Tuꞌjil:
Miꞌn tzꞌoc cykꞌoꞌne Kman Dios tuj malbil.
13 Ex toclenxitzun Jesús tuj joybil tiꞌj tuꞌn tajaw il,
el tiꞌn tgan tiꞌj nok te cab kꞌij.
Tej ttzyet takꞌun Jesús tuj Galiley
14 Aj meltzꞌaj Jesús,
pon tuj txꞌotxꞌ Galiley,
nojni tuꞌn tipumal Xewbaj Xjan,
ex el tkanil tiꞌj tuj tcyakil txꞌotxꞌ Galiley.
15 Ex in tkꞌoꞌn xnakꞌtzbil cye xjal cyuj ja te cꞌulbil tuj junjun tnam ateꞌ tuj txꞌotxꞌ Galiley,
ex cycyakil xjal in che yolin baꞌn tiꞌj.
Tej tpon Jesús tuj tnam Nazaret
16 Pontzun Jesús tuj tnam Nazaret jatum o chꞌiy:
ex ocx tuj ja te cꞌulbil tuj kꞌij te ojlabl ic tzaꞌnx tmod,
jaw weꞌ ex jaw t-schꞌiꞌn Tuꞌjil Tyol Dios.
17 Xi cykꞌoꞌn xjal tuꞌjil Isaías te,
aju t-sanjel Dios;
ex tej tjaket ju libro,
cnet tuꞌn jatum tzꞌiban keju yol lu:
18 T-xew Kman at wucꞌile,
porque ma tzaj tkꞌoꞌn woclene tuꞌn t-xi nkꞌoꞌne tkanil baꞌn cye meba:
[ma chin tzaj samaꞌne tuꞌn cybanix keju in bisun cyanmi,]
ex tuꞌn t-xi npacbaꞌne cye pres tuꞌn cytzokpet,
ex tuꞌn tjaket cywitz moẍ;
ex tuꞌn cytzokpet keju in che yajlanjtz;
19 ex tuꞌn t-xi nkꞌoꞌne tkanil tiꞌj tkꞌijlalil tuꞌn tul canun t-xtalbil Kman,
chi tuj Tuꞌjil.
20 Cubtzun tbalkꞌiꞌn Jesús aju uꞌj,
aj tkꞌoꞌn teju xjal cwentil tuj ja te cꞌulbil,
ex cub keꞌ;
cycyakil keju ateꞌ tuj ja te cꞌulbil oc ten cywitz tiꞌj.
21 Octzun ten Jesús kꞌmalte cye:
—Jaꞌlo ma japun ju yol lu cywitze,
aju tzꞌibamaj.
22 Ex cycyakil in che yolintok baꞌn tiꞌj Jesús,
ex in che labin tiꞌj ju yol in tzaj tmaꞌn tbanilxix,
ex in cymaꞌn:
—¿Myapetzun tcꞌwaꞌl José jlu?
23 Xitzun tmaꞌn Jesús cye:
—Oclo ctzajel cymaꞌne ju yol lu weye:
Kꞌanan oc tiba aya kꞌanal;
ex tcyakil biꞌn kuꞌne aju tbinchaya tuj tnam Capernaum,
ax icx binchama tzalu tuj ttanmiya,
che chiloye.
24 Pero ax toc cxel nmaꞌne cyeye mintiꞌ jun t-sanjel Dios in cꞌmonjtz tuj tex ttanmi.
25 Ex ax toc cxel nmaꞌne cyeye,
ateꞌtok nimcu meba xuꞌj tuj txꞌotxꞌ Israel tuj tkꞌijlalil tej tten Elías aju t-sanjel Dios,
tej mintiꞌ tzaj jbal ox abkꞌi tucꞌil kak xjaw,
ex tzaj nim weꞌyaj tuj tcyakil txꞌotxꞌ Israel;
26 pero mintiꞌ xi samaꞌn Elías tuꞌn Dios tuꞌn tpon cyucꞌil meba xuꞌj tuj txꞌotxꞌ Israel,
oꞌcx xi samaꞌn Elías tuꞌn tpon tucꞌil jun meba xuꞌj tuj tnam Sarepta nikayin ttxlaj tnam Sidón.
27 Ax icx nimcu xjal txꞌaꞌc cyiꞌj ateꞌtok tuj txꞌotxꞌ Israel tuj tkꞌijlalil tej tten Eliseo aju t-sanjel Dios;
pero mi jun o banix cyxol,
nok oꞌcx Naamán banix,
aju aj Siria,
chi Jesús cye.
28 Ex cycyakil keju ateꞌtok tuj ja te cꞌulbil tzaj nim cykꞌoj tej cybinte jlu.
29 Ex e jaw tzokpaj xjal,
ex cylamoꞌn Jesús ttxaꞌn tnam,
xi cyiꞌn ttxaꞌn xak tuꞌn tex cyxoꞌn,
porque atzun tcub cytanmi twiꞌ jun tal witz.
30 Atzunte Jesús etz cyxol,
ex icꞌtzun.
Jun xjal attok juꞌẍ tuj tanmi
31 Ex cuꞌpun Jesús tuj tnam Capernaum tuj txꞌotxꞌ Galiley;
ex xi tkꞌoꞌn xnakꞌtzbil cye xjal tuj kꞌij te ojlabl.
Lucas 4.31-44
33 Ex attok jun xinak tuj ja te cꞌulbil at jun juꞌẍ tuj tanmi,
jaw tkꞌajkꞌajel twiꞌ cyuw ex tma:
34 —Ko tkꞌoncja,
¿ti toclena kiꞌje,
Jesús aj Nazaret?
¿Maj ma tzula tuꞌn knaje tuꞌna?
Baꞌn wuꞌne alcyeya,
aya xjan Tcꞌwaꞌl Dios,
chi juꞌẍ.
35 Xi tmayoꞌn Jesús aju juꞌẍ,
ex tma:
—Cꞌol ttziꞌya,
tetza tuj tanmi xjal,
chi Jesús.
Ex cub xoꞌn xjal twitz txꞌotxꞌ tuꞌn juꞌẍ cywitz mastl xjal,
etz juꞌẍ tuj tanmi xjal ex mintiꞌ cꞌixbi xjal tuꞌn.
36 Biꞌx e jaw secꞌpaj cycyakil xjal,
in che yolintok cyxolx ex in cymaꞌn:
—¿Ti t-xilen ju yol lu?
Ate xjal lu at toclen ex at tipumal tuꞌn t-xi tmaꞌn cye juꞌẍ tuꞌn cyetz,
ex in che etz tuꞌn,
che chi xjal.
37 Ex el tkanil tiꞌj Jesús cyuj mastl tnam ateꞌ tuj txꞌotxꞌ Galiley.
Banix ju xuꞌj tjiꞌ Pedro tuꞌn Jesús
38 Etztzun Jesús tuj ja te cꞌulbil,
ocx tuj tja Simón.
Atzunju xuꞌj tjiꞌ Simón yabtok tuꞌn nim cyak;
ex e cubsan twitz Jesús tiꞌj ju yab.
39 Cub mocꞌeꞌ Jesús twitz yab,
xi tmayoꞌn cyak;
biꞌx icꞌ cyak tiꞌj xuꞌj,
ex jurat jaw weꞌ ex oc ten xuꞌj ajbel cye.
Nimcu yab e banix tuꞌn Jesús
40 Tej tex kꞌij,
cycyakil ke xjal attok yab tuj cyja,
nok alcyex txcaj cyyabil,
e tzaj cyiꞌn twitz Jesús.
Atzunte Jesús cub tkꞌoꞌn tkꞌab cyibaj cycyakil,
ex e banix tuꞌn.
41 Ax icx in che etztok juꞌẍ tuj cyanmi nimcu xjal,
in che schꞌin juꞌẍ oc cyetz ex in cymaꞌn:
—Aya Tcꞌwaꞌl Dios.
Pero e jeꞌx tmayoꞌn Jesús ke juꞌẍ ex mintiꞌ xi tkꞌoꞌn ambil tuꞌn cyyolin,
porque baꞌntok cyuꞌn ka ate Jesús ju Crist aju at toclen tuꞌn Dios.
In bet Jesús cyuj tnam te Galiley in pacban
42 Tej kskix,
ex Jesús,
xiꞌ tuj jun lugar mintiꞌ cynajbil xjal tuj;
pero ke xjal in che jyontok tiꞌj,
ex e pon tucꞌil,
o cyajbe tuꞌn miꞌn tel tpaꞌn tib cyiꞌj.
43 Atzunte Jesús xi tmaꞌn cye:
—Ax icx cyuj txkantl tnam ilxix tiꞌj tuꞌn t-xi npacbane tkanil baꞌn tiꞌj tcawbil Dios;
porque atzun wakꞌune ma chin tzaj samaꞌne,
chi Jesús.
44 Cyjaꞌtzun tten cucx in pacban Jesús cyuj ja te cꞌulbil tuj txꞌotxꞌ Galiley.