2 Ex o til Jesús cabe barc ateꞌtok nikayin ttzi laguna;

atzun cye tzyul cyiẍ otok che cuꞌtz tuj barc ex in che txꞌjontok cyxuyb te tzuybil cyiẍ.

3 Ocxtzun Jesús tuj jun barc aju te Simón,

ex cubsan twitz Simón tuꞌn tex tlakꞌbaꞌn chꞌin barc ttzi txꞌotxꞌ.

Jurat cub keꞌ Jesús tuj barc ex octzun ten kꞌol xnakꞌtzbil cye xjal.

4 Tejtzun tjapun baj tyol Jesús xi tmaꞌn te Simón:

—Tocx lakꞌeꞌya tuj laguna ex cykꞌoncuxe cyxuybe tuꞌn tjatz cyiẍ.

5 Xi ttzakꞌweꞌn Simón:

—Xnakꞌtzal,

ma tzꞌex akꞌbil kuꞌne in ko akꞌnane,

ex mintiꞌ cyiẍ ma tzyet kuꞌne;

pero nok tuꞌnju ma tzaj tmaꞌna,

cbelex nkꞌoꞌne xyub,

chi Pedro.

6 Tejtzun tcuꞌx cykꞌoꞌn,

tzyet nim cyiẍ cyuꞌn,

chꞌixtok tlakj cyxuyb.

7 Xitzun cyyecꞌun cykꞌab cye cyucꞌil,

akeju ateꞌtok tuj juntl barc,

tuꞌn cytzaj onil cye.

E ultzun ex e baj noj cycabil barc cyuꞌn cyiẍ,

cyjaꞌtok cyaj mulkꞌaj tjakꞌ aꞌ tuꞌn cyalil cyiẍ.

8 Tejtzun tlonte Simón Pedro jlu,

cub ẍmejeꞌ twitz Jesús ex xi tmaꞌn:

—Paꞌmil tiba wiꞌje Tat,

porque akine jun xinak aj il.

9 Porque otok tzaj nim t-xobil Simón,

tuꞌnju nim cyiẍ otok tzyet cyuꞌn,

ax icx cycyakil keju ateꞌtok tucꞌil tzaj cyxobil.

10 Ax icx tzaj t-xobil Jacobo tucꞌix Juan,

akeju tcyꞌajal Zebedey,

akeju tucꞌil Simón.

Atzunte Jesús xi tmaꞌn te Simón:

—Miꞌn xoba;

texju jaꞌlo cꞌoquela te tzyul xjal ic tzaꞌn in che tzyet cyiẍ.

11 Tej tetz cyiꞌn barc ttzi txꞌotxꞌ,

cyaj cykꞌoꞌn tcyakil,

ex e oc lpeꞌ tiꞌj Jesús.

12 Tej attok Jesús tuj jun tnam,

lu jun xinak nim txꞌaꞌc tiꞌj mintiꞌ kꞌanbil tiꞌj,

tej tlonte xjal Jesús cub ẍmejeꞌ twitz ex pon tacl tibaj twitz max twitz txꞌotxꞌ ex o cubsan twitz:

—Tat,

ka tajbila jacu chin banixe tuꞌna,

chi xjal.

13 Xitzun tnukpiꞌn Jesús tkꞌab,

oc tmacoꞌn,

ex xi tmaꞌn:

—Wajbile.

Biꞌx cbantela,

chi Jesús.

Ex jurattzun el txꞌaꞌc tiꞌj xjal.

14 Ex xi tmaꞌn Jesús te tuꞌn miꞌn t-xi tmaꞌn cye xjal.

Oꞌcx xi tmaꞌn:

—Txiꞌya ex yecꞌunx tiba twitz pal cye judiy,

ex kꞌonxa ju oyaj te txꞌajbil teya ic tzaꞌn o tma Moisés,

tuꞌntzun tel cynicꞌ xjal tiꞌj ka ma banixa.

15 Pero el lakꞌeꞌ tkanil tiꞌj Jesús;

ex nim xjal e chmet tuꞌn cybinte tyol ex tuꞌn cybanix ke yab tuꞌn.

16 Atzunte Jesús el tpaꞌn tib cyiꞌj ex xiꞌ tuj jun lugar mintiꞌ cynajbil xjal tuj tuꞌn tnaꞌn Dios.

17 At jun kꞌij in tkꞌoꞌn Jesús xnakꞌtzbil cye xjal,

ex kꞌukl keꞌtok ke parisey cyucꞌix ke xnakꞌtzal tiꞌj ley,

tzajni ke tuj junjun tnam tuj txꞌotxꞌ Galiley ex tuj txꞌotxꞌ Judey ex tuj Jerusalén;

ex attok tipumal Dios tucꞌil Jesús tuꞌn cybanix ke yab tuꞌn.

18 E pontzun junjun xinak kꞌintok jun xinak cyuꞌn twitz tcoẍbil,

tzkijleꞌn tyabil,

ex o cyajbe tuꞌn cyocx tuja tuꞌn tcub cykꞌoꞌn ju yab twitz Jesús.

19 Pero mintiꞌ cnet cyuꞌn jatum baꞌn tuꞌn tocx yab tuꞌn tlaj nim xjal.

E jaxtzun twi ja ex el cyiꞌn cabe xcꞌoꞌn tuꞌntzun tcuꞌx ju yab twitz tcoẍbil tuꞌn tcuꞌpun cyxol xjal twitz Jesús.

20 Ex tej tlonte Jesús ka at cyocslabl xi tmaꞌn te yab:

—Aya wucꞌil,

ke tila ma che najset.

21 Atzun ke xnakꞌtzal tiꞌj ley ex ke parisey e cub ten ximal tiꞌj ex cyma:

¿Titzun toclen ju xjal lu?

In yolin mya baꞌn tiꞌj Dios.

¿Alcye jun xjal jacu najset il tuꞌn,

myapelo oꞌcx Dios?

22 Eltzun tnicꞌ Jesús tiꞌj cyximbetz,

ex xi tmaꞌn cye:

—¿Tikuꞌn in cub cyximane jlu tuj cyanmiye?

23 ¿Alcye mas chꞌin toca tuꞌn t-xi nmaꞌne te xjal lu?

¿Apetzun tuꞌn t-xi nmaꞌne:

Ke tila ma che najset,

ex ka tuꞌn t-xi nmaꞌne:

Weꞌctza ex beta?

24 Cxeltzun nyecꞌune cyeye tuꞌn tel cynicꞌe tiꞌj,

at woclene twitz txꞌotxꞌ tuꞌn tnajset cyil xjal,

akine scꞌoꞌmaj kine tuꞌn Dios tuꞌn ntene cyucꞌil xjal.

Xitzun tmaꞌn teju xjal tzkijleꞌn tyabil:

—Teya cxel nmaꞌne:

Weꞌctza,

kꞌiꞌnctz tcoẍbila,

ex txiꞌya tjaya,

chi Jesús.

25 Jurattzun jaw weꞌ ju yab cywitz cycyakil,

jaw tiꞌn tcoẍbil jatum coẍltok,

ex xiꞌtzun tja in tkꞌoꞌn chjonte te Dios.

26 Ex cycyakiltzun in che labin nim tiꞌj,

in jaw cynimsaꞌn tbi Dios;

ex tzaj nimxix cyxobil,

in cymaꞌn:

—Jaꞌlo ma kil tbinchben nimxix cyipumal,

bajx kil icju.

27 Tbajlenxitzun jlu,

etz Jesús ex o til Jesús jun peyil pwak Leví tbi kꞌukltok tiꞌj mes tuj ja jatum nneꞌl peyin pwak te gobierni,

ex xi tmaꞌn Jesús te:

—Lpetza wiꞌje.

28 Cyajtzun tkꞌoꞌn Leví tcyakil,

jaw weꞌ ex oc lpeꞌ tiꞌj Jesús.

29 Ex o tbincha Leví jun nintz waꞌn tuj tja te Jesús;

ex ateꞌtok nim peyil pwak ex txkantl xjal kꞌukl keꞌtok tiꞌj mes cyucꞌil.

30 Atzun ke parisey cyucꞌix ke cyucꞌil,

akeju xnakꞌtzal tiꞌj ley,

tzaj jun cyyol cyiꞌj t-xnakꞌtzben Jesús,

ex xi cymaꞌn cye:

—¿Tikuꞌn in che waꞌne cyucꞌil peyil pwak ex cyucꞌil aj il ex in che cꞌane cyucꞌil?

31 Xi ttzakꞌweꞌn Jesús:

—Akeju xjal baꞌn ke mya il tiꞌj jun kꞌanal cye,

oꞌcx keju xjal yab ke.

32 Mintiꞌ ma chin ule txcol cye xjal tzꞌaklxix,

nok oꞌcx ma chin ule txcol cye xjal aj il tuꞌn tajtz tiꞌj cyanmi.

33 Xitzun cymaꞌn te Jesús:

—¿Tikuꞌn in cub cyyoꞌn nimcu maj weꞌyaj ke t-xnakꞌtzben Juan,

ex in che naꞌn Dios,

ax icx in cybinchaꞌn ke cyxnakꞌtzben parisey,

atzun cye t-xnakꞌtzbena cucx in che waꞌn ex in che cꞌan?

34 Xi tmaꞌn Jesús cye:

—¿Jacupe cub cyyoꞌn weꞌyaj keju otok che txconjtz tuj mejebleꞌn atxtok chmilbaj cyucꞌil?

35 Pero tzul tkꞌijlalil cꞌelel kꞌiꞌn chmilbaj cyxol;

maxitzun cbel cyyoꞌn weꞌyaj.

36 Ax icx xi tmaꞌn Jesús jun techal cye:

—Mintiꞌ jun xjal nnoꞌc tkꞌoꞌn jun piẍ xbalun acꞌaj te xbukbil teju xbalun ma baj.

Ka ma tzꞌoc tkꞌoꞌn,

cꞌelel sbitꞌj ju xbalun ma baj tuꞌnju xbukbil acꞌaj;

ax icx aju xbalun ma baj mlay tmojba tib tucꞌil xbukbil acꞌaj.

37 Ex mintiꞌ jun xjal in cuꞌx tkꞌoꞌn acꞌaj vin tuj jun bols tzꞌuꞌm ttxꞌakan;

ka ma cuꞌx tkꞌoꞌn,

cbajel sbitꞌj bols tzꞌuꞌm tuꞌn acꞌaj vin,

ex cbel kojl vin,

ex che najel ke bols tzꞌuꞌm.

38 Cyjaꞌtzun il tiꞌj tuꞌn tcuꞌx kꞌot acꞌaj vin tuj bols tzꞌuꞌm acꞌaj.

39 Ex mintiꞌ jun xjal in cꞌan tiꞌj ojtxi vin ex tajtl ju acꞌaj,

porque in tmaꞌn:

Aju te ojtxi mas baꞌn,

chi Jesús cye.