Jun xjal tzkijleꞌn tyabil banix tuꞌn Jesús
9
Ocxtzun Jesús tuj barc,
icꞌtz jlajtzi laguna,
ul tuj ttanmi.
2 Ex ul kꞌiꞌn jun xjal twitz Jesús tzkijleꞌn tyabil,
coẍl twitz tcoẍbil.
Tejtzun tlonte Jesús at cyocslabl xjal e ul kꞌinte yab,
xi tmaꞌn te xjal tzkijleꞌn tyabil:
—Keꞌ tcꞌuꞌja ncꞌwaꞌl;
ke tila ma che najset.
3 At junjun xnakꞌtzal tiꞌj ley cub cyximan tuj cyanmi:
Ate xjal lu in yolin mya baꞌn tiꞌj Dios,
che chi.
4 Eltzun tnicꞌ Jesús tiꞌj cyximbetz ex xi tmaꞌn cye:
—¿Tikuꞌn in cub cyximane mya baꞌn tuj cyanniye?
5 ¿Alcye mas jurat jacu bant,
apeju tuꞌn t-xi kꞌmet te xjal lu:
Ke tila ma che najset,
ex ka aju tuꞌn t-xi kꞌmet:
Weꞌctza ex beta?
6 Cxeltzun nyecꞌune cyeye tuꞌntzun tel cynicꞌe tiꞌj,
akine scꞌoꞌmaj kine tuꞌn Dios tuꞌn ntene cyucꞌil xjal,
cyjaꞌtzun at woclene twitz txꞌotxꞌ tuꞌn tnajset cyil xjal,
chi Jesús.
Xitzun tmaꞌn teju xjal tzkijleꞌn tyabil:
—Weꞌctza,
kꞌiꞌnctz tcoẍbila,
ex txiꞌya tjaya.
7 Jawtzun weꞌ xjal ex xiꞌ tja.
8 Tejtzun cylonte xjal jlu,
e labin tiꞌj,
ex xi cykꞌoꞌn chjonte te Dios tuꞌnju tzaj tkꞌoꞌn cyoclen xjal tuꞌn tbant jlu.
Txocbil te Matey tuꞌn Jesús
9 Tej ticꞌ Jesús tuj lugar lu,
o til Jesús jun xjal Matey tbi kꞌukltok tiꞌj mes tuj ja jatum nneꞌl peyin pwak te gobierni,
ex xitzun tmaꞌn Jesús te:
—Lpeꞌca wiꞌje.
Jawtzun weꞌ Matey ex oc lpeꞌ tiꞌj.
10 Ocxtzun Jesús tuja ex cub keꞌ tiꞌj mes cyucꞌix t-xnakꞌtzben.
Ex nimcu peyil pwak ex aj il otok che ul e cub keꞌ tiꞌj mes ttxlaj Jesús.
11 Tejtzun cylonte ke parisey jlu,
xi cymaꞌn cye t-xnakꞌtzben Jesús:
—Aju Xnakꞌtzal cyeye ¿tikuꞌn in waꞌn cyucꞌil peyil pwak ex cyucꞌil aj il?
12 Tej tbinte Jesús ju yol lu,
xi tmaꞌn cye:
—Ke xjal mya yab,
mya il tiꞌj jun kꞌanal cye,
nok oꞌcx ke xjal yab.
13 Cyxiꞌye ex tzꞌelx cynicꞌe tiꞌj ti t-xilen ju yol lu tzꞌiban tuj Tuꞌjil,
chi cyjaꞌ:
Aju wajbile cyeye atzun,
tuꞌn tten cycꞌujlalile,
ex mya tuꞌn ttzaj cykꞌoꞌne jun chojbil weye,
chi tuj Tuꞌjil.
Porque mintiꞌ ma chin ule txcol cye xjal tzꞌaklxix,
nok oꞌcx ma chin ule txcol cye aj il tuꞌn tajtz tiꞌj cyanmi.
Tikuꞌn mintiꞌ in cub cyyoꞌn weꞌyaj ke t-xnakꞌtzben Jesús
14 E ultzun ke t-xnakꞌtzben Juan tucꞌil Jesús ex cyma:
—¿Tikuꞌn in cub kyoꞌne weꞌyaj,
ax icx ke parisey,
atzun ke t-xnakꞌtzbena mintiꞌ in cub cyyoꞌn weꞌyaj?
Che chi.
15 Xi ttzakꞌweꞌn Jesús cye:
—¿Jacupe che bisun keju otok che txconjtz tuj mejebleꞌn atxtok chmilbaj cyucꞌil?
Pero tzul tkꞌijlalil tuꞌn tel kꞌiꞌn chmilbaj cyxol;
maxitzun cbel cyyoꞌn weꞌyaj.
16 Mi aꞌl jun nnoꞌc kꞌonte jun xbukbil acꞌaj tiꞌj jun xbalun ma baj;
porque ka ma tzꞌoc tkꞌoꞌn,
cꞌelel sbitꞌj ju xbalun bajni tuꞌnju xbukbil acꞌaj,
ex mas cxel sbitꞌj ju xbalun bajni.
17 Ex mi aꞌl jun in cuꞌx kꞌonte acꞌaj vin tuj jun bols tzꞌuꞌm ma baj;
porque ka ma cuꞌx tkꞌoꞌn,
che elel sbitꞌj ke bols tzꞌuꞌm,
cbel kojl vin,
ex che najel ke bols tzꞌuꞌm.
Il tiꞌj tuꞌn tcuꞌx kꞌot acꞌaj vin tuj bols tzꞌuꞌm acꞌaj;
entons mlay che naj cycabil.
Aju tmeꞌjel Jairo ex aju xuꞌj oc tmacoꞌn t-xbalun Jesús
18 Matok in yolin Jesús tiꞌj jlu cyucꞌil,
ul jun xjal nejenel cyxol judiy,
cub ẍmejeꞌ twitz Jesús ex tma:
—Ma xcyim nmeꞌjele jaꞌlo,
pero tzaja ex kꞌoncu tkꞌaba tibaj tuꞌntzun tjaw ankꞌin.
19 Jawtzun weꞌ Jesús,
oc lpeꞌ tiꞌj cyucꞌix ke t-xnakꞌtzben.
20 At jun xuꞌj yab tuꞌn ẍwoꞌj,
otok bant-xi cablaj abkꞌi tyabtlen,
pon lakꞌeꞌ tiꞌjxi Jesús,
ex oc tmacoꞌn xuꞌj ttxaꞌn t-xbalun Jesús.
21 Porque chi xuꞌj tuj tanmi:
Ichak nok t-xbalun tzꞌoc nmacoꞌne,
oc chin bantele.
22 Pero ajtz meltzꞌaj Jesús,
oc tqueꞌyin tiꞌj xuꞌj ex xi tmaꞌn te:
—Keꞌ tcꞌuꞌja nmeꞌjel;
tuꞌn tocslabla ma cleta,
chi Jesús te.
Ex biꞌx banix xuꞌj.
23 Tejtzun tocx Jesús tuj tja nejenel,
o til nnoꞌc xux cyuꞌn xjal ex in che okꞌ wen tiꞌj cyimni.
24 Xitzun tmaꞌn Jesús cye:
—Cyexe,
porque te txin mya cyimni,
nok in tan,
chi Jesús.
Atzun cye xjal nok xi cytzeꞌn.
25 Tejtzun cyetz lajoꞌn xjal ttxaꞌn peꞌn,
ocx Jesús tuja,
tzaj ttzyuꞌn Jesús tkꞌab txin ex jawtzun weꞌ txin.
26 Eltzun lakꞌeꞌ tkanil jlu tuj tcyakil lugar.
Cabe xjal moẍ jaket cywitz tuꞌn Jesús
27 Tejtzun ticꞌ Jesús tuj lugar lu,
e oc lpeꞌ cabe xjal moẍ tiꞌj,
in che schꞌin ex in cymaꞌn:
—Aya Tcꞌwaꞌl David,
kꞌakꞌantz tcꞌuꞌja kiꞌje,
che chi.
28 Tejtzun tpon Jesús tuj jun ja,
e pon ke moẍ tucꞌil;
ex xi tmaꞌn Jesús cye:
—¿Mape keꞌ cycꞌuꞌje wiꞌje ka jacu bant jlu wuꞌne?
Xitzun cymaꞌn:
—Ma keꞌ kcꞌuꞌje tiꞌja,
Tat.
29 Octzun tmacoꞌn Jesús tbakꞌ cywitz ex tma:
—Tuꞌnju at cyocslable cbinchetel cyeye aju ma tzaj cykanine,
chi Jesús cye.
30 Jakettzun cywitz moẍ ex xi tcyuwsaꞌnxix Jesús cye:
—Ten cycwente tiꞌj tuꞌn miꞌn cybinte xjal jlu.
31 Tejtzun cyaj ke xjal lu,
el tkanil cyuꞌn tiꞌj Jesús tuj tcyakil lugar.
Bant tyolin jun xjal men tuꞌn Jesús
32 Matokx cyaj ke xjal lu,
pon kꞌiꞌn jun xjal men twitz Jesús,
at juꞌẍ tuj tanmi.
33 Tejtzun tetz lajoꞌn juꞌẍ tuj tanmi men tuꞌn Jesús,
banttzun tyolin men.
E labin xjal tiꞌj ex cyma:
—Bajx kilaꞌ jun binchben ic tzaꞌn jlu cyxol aj Israel.
34 Atzun cye parisey in cymaꞌn:
—Tuꞌnju nejenel cye juꞌẍ in che etz ke juꞌẍ tuj cyanmi xjal tuꞌn Jesús.
Tzaj kꞌakꞌan tcꞌuꞌj Jesús cyiꞌj xjal
35 Baj tbetin Jesús cyuj cycyakil tnam ex cyuj cycyakil aldey,
in tkꞌoꞌn xnakꞌtzbil cye xjal cyuj ja te cꞌulbil cye judiy,
in pacban tiꞌj tkanil baꞌn tiꞌj tcawbil Dios,
ex in che banix xjal tuꞌn,
nok alcyex cyyabil ex nok alcyex cꞌixcꞌoj toc cyiꞌj.
36 Tejtzun tqueꞌyinte Jesús nim xjal,
tzaj kꞌakꞌan tcꞌuꞌj cyiꞌj;
porque otok che sict ex in che bisun,
ic cyten ic tzaꞌn ke ẍneꞌl mintiꞌ pastoril cye.
37 Xitzun tmaꞌn Jesús cye t-xnakꞌtzben: