E jaw t-scꞌoꞌn Jesús cablaj apostl
10
E tzajtzun ttxcoꞌn Jesús ke cablaj t-xnakꞌtzben,
xi tkꞌoꞌn cyoclen tuꞌn cyetz ke juꞌẍ cyuꞌn tuj cyanmi xjal,
ex tuꞌn cybanix cycyakil yab,
nok alcyechakx cyyabil,
ex tuꞌn tel tcyakil cꞌicxꞌoj.
2 Atzun cybi ke cablaj apostl jlu:
Tnejel Simón aju Pedro tbi,
tucꞌix Andrés aju titzꞌin Pedro;
tucꞌix Jacobo aju tcyꞌajal Zebedey,
tucꞌix Juan aju titzꞌin Jacobo;
3 tucꞌix Pelip,
tucꞌix Bartolomé,
tucꞌix Tomás,
tucꞌix Matey aju peyil pwak,
tucꞌix Jacobo aju tcyꞌajal Alfeo,
tucꞌix Tadeo,
4 tucꞌix Simón aju toctok te tajlal cyxol jun partid xjal Cananist cybi,
tucꞌix Judas Iscariote aju xi kꞌonte Jesús tuj cykꞌab xjal.
E jeꞌx t-samaꞌn Jesús ke cablaj t-xnakꞌtzben pacbal
5 E jeꞌxtzun t-samaꞌn Jesús ke cablaj apostl,
xi tmaꞌn cye alcye tuꞌn cybinchante:
—Miꞌn cheꞌxe cyxol txkantl xjal mya judiy ke ex miꞌn che ocxe tuj cytanmi aj Samaria;
6 oꞌcx che xeꞌle cyucꞌil ke ẍneꞌl tzpetni ke,
akeju tiyjil Israel.
7 Octzun cyxiꞌye,
cypacbanxe ex cymanxe cye xjal cyjaꞌ:
Aju cawbil in tzaj tuj cyaꞌj ma tzul lakꞌeꞌ,
che chicuye.
8 Che banix ke xjal cyuꞌne akeju at txꞌaꞌc cyiꞌj mintiꞌ kꞌanbil tiꞌj,
ex che banix ke mastl yab cyuꞌne;
ex che jaw ankꞌin ke cyimni cyuꞌne;
ex cylajoꞌmitze ke juꞌẍ tuj cyanmi xjal.
Nok cucx ma cycꞌame cyoclene lu,
ax icx aju ma txi nmaꞌne cyeye,
nok cucx cybinchame.
9 Miꞌn txi cyiꞌne kꞌan pwak tuj cybolse,
mi sak pwak ex mi pwak kꞌan cꞌuxbil.
10 Ex miꞌn txi cyiꞌne pa tuj cybeye,
ex miꞌn txi cyiꞌne cabe cycamiẍe,
ex miꞌn txi cyiꞌne cyxajbiye,
ex miꞌn txi cyiꞌne cycyꞌakoꞌche;
porque aju akꞌnal il tiꞌj tuꞌn t-xi kꞌot twa.
11 Pero oc cyocxe tuj jun tnam ex ka tuj jun aldey,
cykaninxe ka at jun xjal baꞌn tmod;
axtzun che posadiyile tucꞌil ex maxitzun che icꞌele tuj tja xjal lu oc cyicꞌe tuj tnam.
12 Octzun cyocxe tuj tja xjal lu,
nej cykꞌonxe jun kꞌolbebl:
Che tenwt xjal tuj tzalajbil tuj ja lu,
che chicuye.
13 Katzun baꞌn ma che cꞌmete cyuꞌn,
che teltzun ke xjal lu tuj tzalajbil ic tzaꞌn otok txi cymaꞌne.
Katzun mya baꞌn ma che cꞌmete cyuꞌn,
entons mlay che ten xjal tuj tzalajbil.
14 Ex ka at jun xjal mintiꞌ ma che cꞌmete tuꞌn,
ex ka mintiꞌ xi tbiꞌn cyyole,
cyetze tuj tja xjal ex ka tuj ttanmi,
ex cychtoꞌmile puj tiꞌj cykane.
15 Ax toc cxel nmaꞌne cyeye,
mas nim tcastiw tnam lu cbel,
twitz tcastiw tnam Sodoma tucꞌix tnam Gomorra,
tuj tkꞌijlalil oc tul jwisi.
Tzul yajbil cye ocslal
16 Che xel nsamaꞌne ex ic che oquele ic tzaꞌn ke ẍneꞌl cyxol xoꞌj;
cyjaꞌtzun tenx cynable ic tzaꞌn lobaj,
ex yalnix tiꞌj cynable ic tzaꞌn paloma.
17 Ten cycwente cyiꞌje,
porque che xel kꞌiꞌne cywitz aj sanjelal cyuꞌn xjal,
ex che bajel asyaline cyuꞌn cyuj ja te cꞌulbil.
18 Ax icx che xel kꞌiꞌne cywitz ke gobernador ex cywitz ke rey tuꞌn nlaje;
cyjaꞌtzun che oquele te testiw wiꞌje cywitz,
ex cywitz xjal mya judiy ke.
19 Pero oc cypon kꞌiꞌne cywitz,
miꞌn baj cycꞌuꞌje tiꞌj alcye yol tuꞌn t-xi cymaꞌne ex tzaꞌn tten cyuꞌne,
porque jurat naj ctzajel tkꞌoꞌn Dios yol cyeye alcye tuꞌn t-xi cymaꞌne.
20 Porque mya akeye che yolil,
nok oꞌcx aju T-xew Dios aju Cymane,
atzunte ctzajel kꞌonte yol alcye tuꞌn t-xi cymaꞌne.
21 Cxel tkꞌoꞌn xjal terman tuꞌn tcyim,
ex cxel tkꞌoꞌn mambaj tcꞌwaꞌl tuꞌn tcyim;
ex ke cꞌwaꞌlbaj che kꞌojlel cyiꞌj cyman,
ex che xel cykꞌoꞌn tuꞌn cycyim.
22 Ex che elel icꞌune cyuꞌn cycyakil xjal tuꞌn tlaj ocslal keye wiꞌje;
pero alcye cucx ma tzicꞌx tuꞌn ex mintiꞌ ma cub numj,
atzunju oc cletel.
23 Ka ma che yajlanjtze tuj jun tnam,
cyxi oke tuj juntl tnam;
porque ax toc cxel nmaꞌne cyeye naꞌnxtok tbaj cybetine cycyakil tnam cye aj Israel oc wule,
akine scꞌoꞌmaj kine tuꞌn Dios tuꞌn ntene cyucꞌil xjal.
24 Aju xnakꞌtzben mya mas toclen twitz ju xnakꞌtzal te,
ex aju majen mya mas toclen twitz tpatrón.
25 Aju yajbil cꞌicꞌex tuꞌn xnakꞌtzal,
axju cꞌicꞌex tuꞌn xnakꞌtzben,
ex aju yajbil cꞌicꞌex tuꞌn patrón,
axju cꞌicꞌex tuꞌn majen.
Ka ma tzꞌoc yasoꞌn tajaw ja,
ex ka ma tzꞌoc kꞌoꞌn tbi Beelzebú,
¿yajtzun keju ateꞌ tuj tja,
myapelo icx tuꞌn cyoc yasoꞌn?
Alcye tuꞌn kxob twitz
26 Cyjaꞌtzun miꞌn che xobe cywitz xjal;
porque tcyakilju ewan,
cꞌelel tuj kꞌanchaꞌl,
ex tcyakilju at tuj ewaj,
oc cybiꞌ xjal.
27 Aju ma txi nmaꞌne cyeye tuj klolj,
cymanxe tuj tkan kꞌij;
ex aju ma txi njascꞌuꞌne cyeye,
cyjaxe twi ja tuꞌn t-xi cymaꞌne,
tuꞌntzun cybinte cycyakil xjal.
28 Ex miꞌn che xobe cywitz keju in cub cybyoꞌn t-ximlal xjal,
atzun tanmi xjal mlay bant tuꞌn tbyet cyuꞌn;
atzun che xobe twitzju at tipumal tuꞌn tnaj tanmi xjal tuꞌn tuj infierni,
tucꞌix t-ximlal.
29 ¿Mintiꞌpe in che cꞌayinjtz cabe tal chyuꞌj tuꞌn jun sentav?
Masque icju,
pero mintiꞌ jun tal chyuꞌj in cub tzꞌak twitz txꞌotxꞌ mintiꞌwt biꞌn tuꞌn Cymane.
30 Ax icx cyeye,
tcyakil ttzmal cywiꞌye ajlaꞌmaj.
31 Cyjaꞌtzun miꞌn che xobe,
porque mas maꞌ cyxilene cywitz nimcu tal chyuꞌj.
Cxel kmaꞌn cye xjal ka ax toc ocslal koꞌ tiꞌj Jesucrist
32 Aju xjal mintiꞌ in cub tewan,
ex ka in xi tmaꞌn cye xjal ka ax toc ocslal wiꞌje,
ax icx weye mlay cub wewane,
cxel nmaꞌne te Nmane aju at tuj cyaꞌj ka ax toc ocslal wiꞌje.
33 Pero ka at jun xjal in cub tewan cywitz xjal ka mintiꞌ ojtzkiꞌn kine tuꞌn,
ax icx weye cbel wewane twitz Nmane aju at tuj cyaꞌj ka mintiꞌ ojtzkiꞌn xjal lu wuꞌne.
Tuꞌn tlaj Jesús in tzaj pabl tib cyxol xjal
34 Miꞌn cub cyximane ka ma chin ule tuꞌn cyten xjal tuj tzalajbil;
mintiꞌ ma chin ule tuꞌn cyten xjal tuj tzalajbil,
nok oꞌcx ma chin ule kꞌol kꞌoj cyxol xjal.
35 Porque ma chin ule kꞌol pabl tib cyxol xjal,
tuꞌn tel tpaꞌn tib kꞌa tiꞌj tman,
ex tuꞌn tel tpaꞌn tib txin tiꞌj ttxuꞌ,
ex tuꞌn tel tpaꞌn tib txin alibaj tiꞌj tlib;
36 cyjaꞌtzun ke aj kꞌoj tiꞌj xjal,
ax keju ateꞌ tuj tja.
37 Ka at jun xjal mas in tcꞌujlaꞌn tman ex ka ttxuꞌ,
atzun weye mintiꞌ in chin tcꞌujlaꞌn,
mya baꞌn tuꞌn tajben te weye;
ex ka at jun xjal mas in tcꞌujlaꞌn tcyꞌajal ex ka tmeꞌjel,
atzun weye mintiꞌ in chin tcꞌujlaꞌn,
mya baꞌn tuꞌn tajben te weye.
38 Ex alcye mintiꞌ in xi tiꞌn tcrus tuꞌn toc lpeꞌ wiꞌje,
mya baꞌn tuꞌn tajben te weye.
39 Alcye jun xjal oꞌcx toc tcꞌuꞌj tiꞌj tuꞌn tten tchwinklal twitz txꞌotxꞌ,
mlay tcambaꞌ aju chwinklal in tzaj tkꞌoꞌn Dios;
ex alcye jun xjal tkꞌon tib tuꞌn tnaj tchwinklal twitz txꞌotxꞌ nok tuꞌn nlaje,
oc tcambaꞌ aju chwinklal in tzaj tkꞌoꞌn Dios.
Aju oyaj ctzajel kꞌon ke
40 Aju xjal in che cꞌmonjtze tuꞌn,
akine in chin tcꞌmoꞌn;
ex alcye in chin cꞌmonjtze tuꞌn,
in cꞌmonjtz Dios tuꞌn,
aju tzaj samante weye.
41 Alcye ma cꞌmonte jun t-sanjel Dios tuꞌnju samaꞌn xjal lu tuꞌn Dios,
ctzajel kꞌoꞌn jun oyaj te ic tzaꞌn oyaj in tzaj kꞌoꞌn te t-sanjel Dios;
ex alcye ma cꞌmonte jun xjal tzꞌaklxix tuꞌnju tzꞌaklxix te xjal,
ctzajel kꞌoꞌn jun oyaj te ic tzaꞌn oyaj in tzaj kꞌoꞌn te jun xjal tzꞌaklxix.
42 Ex alcye jun xjal in tzaj kꞌonte jun vas cheꞌw aꞌ te jun ocslal chꞌin toclen tuꞌnju ma tzꞌoc te nxnakꞌtzbene,
ax toc cxel nmaꞌne cyeye,
il tiꞌj cxel kꞌot jun oyaj te.