Ke xjal e tzaj samaꞌn tuꞌn Juan, aju in che byan xjal tuꞌn
11
Tejtzun tbaj tmaꞌn Jesús xnakꞌtzbil cye cablaj t-xnakꞌtzben,
icꞌtzun tuj lugar lu,
xiꞌ kꞌol xnakꞌtzbil ex pacbal cye xjal cyuj mastl tnam cye aj Galiley.
2 Tocx Juan tuj pres ex tej tbinte aju in tbinchaꞌn Crist,
e tzaj t-samaꞌn cabe t-xnakꞌtzben tucꞌil
3 tuꞌn t-xi cykanin te cyjaꞌ:
—¿Apeya ju Crist aju at tulel,
ex ka ko ayole tiꞌj juntl?
Che chi.
4 Xi ttzakꞌweꞌn Jesús:
—Cyxiꞌye ex cymanxe te Juan aju ma cybiye ex ma cyile.
5 Ke moẍ in bant cyqueꞌyin,
ke cox in bant cybet,
ke xjal at txꞌaꞌc cyiꞌj mintiꞌ kꞌanbil tiꞌj in che banix,
ke chcyin cywiꞌ in bant cybin,
ke cyimni in che jatz ankꞌin,
ex in pacbanjtz tkanil jun colbil cye meba.
6 Ex at tzalajbil teju xjal mintiꞌ in jawjeꞌ tcꞌuꞌj wiꞌje,
chi Jesús cye t-xnakꞌtzben Juan.
7 Tej cyaj meltzꞌaj ke t-xnakꞌtzben Juan,
oc ten Jesús yolil cye xjal tiꞌj Juan:
—¿Titzun xi cylaꞌcje tuj lugar mintiꞌ cynajbil xjal tuj?
¿Icpe tten xjal o cyile ic tzaꞌn jun ajlaj in yucch tuꞌn cykꞌikꞌ?
Miꞌn.
8 ¿Titzun xi cylaꞌcje?
¿Tbanilpe t-xbalun xjal xi cylaꞌcje?
Miꞌn.
Porque baꞌn cyuꞌne,
ke xjal toc cyxbalun tbanilxix,
atzun ateꞌ tuj cyja rey.
9 Pero ¿titzun xi cylaꞌcje?
¿Jun t-sanjel Diospe xi cylaꞌcje?
Cxel nmaꞌne cyeye,
ax toc jun t-sanjel Dios xi cylaꞌcje,
ex mas maꞌ t-xilen twitz jun t-sanjel Dios.
10 Porque at jun yol tzꞌiban tuj Tuꞌjil in yolin tiꞌj Juan,
chi cyjaꞌ:
Lu cxel nsamaꞌne nsanjele tuꞌn tcub nej twitza binchalte tbeya,
chi tuj Tuꞌjil.
11 Ax toc cxel nmaꞌne cyeye:
Cyxol cycyakil xjal mintiꞌ jun mas maꞌ toclen ic tzaꞌn te Juan aju in che byan xjal tuꞌn;
pero aju mas tal chꞌin tuj cawbil in tzaj tuj cyaꞌj,
mas maꞌ toclen twitz Juan.
12 Atxix tuj tkꞌijlalil tej tten Juan aju in che byan xjal tuꞌn,
in cyipuman cyib xjal tuꞌn cyocx tuj tcawbil Dios,
ex cucx tbaj jaꞌlo,
ex keju in cyipuman cyib in che ocx naj tuj.
13 Porque cycyakil ke t-sanjel Dios tucꞌix tley Moisés,
oꞌcxtzun weba cyyol tej tul Juan.
14 Ka cyajbile tuꞌn t-xi cyocslaꞌne,
ate Juan Elías aju o kꞌmanjtz tiꞌj ka attok tulel.
15 Alcye at t-ẍcyin,
binx ju yol lu.
16 At jun techal cxel nmaꞌne tzaꞌn tten cymod xjal ateꞌ tuj tkꞌijlalil jaꞌlo.
Ic cyten xjal ic tzaꞌn ke cꞌwaꞌl kꞌukl ke tuj plas in che schan ex in che schꞌin in cymaꞌn cye cyucꞌil:
17 Nnoꞌc kkꞌajtzaꞌne xux cywitze,
pero mintiꞌ ma che bixane;
in ko bitzane jun bitz bisbajil cywitze,
pero mintiꞌ ma che oc tene okꞌel,
che chi cꞌwaꞌl.
18 Porque ul Juan mintiꞌ o waꞌn ex mintiꞌ o cꞌan tiꞌj nintz waꞌn nnoꞌc cyuꞌne,
ex in cymaꞌne:
At juꞌẍ tuj tanmi.
19 Atzun weye ma chin ule,
akine scꞌoꞌmaj kine tuꞌn Dios tuꞌn ntene cyucꞌil xjal,
in chin waꞌne ex in chin cꞌane,
ex in cymaꞌne:
Lu jun xjal cye waꞌn ex cye cꞌan vin,
mer tamiw tib cyucꞌil ke peyil pwak ex cyucꞌil ke aj il,
che chiye.
Pero cꞌelel knicꞌ tiꞌj jun xjal ka at tnabl,
tuꞌn tbinchben.
Ke tnam mintiꞌ xi cyniman tyol Jesús
20 Octzun ten Jesús kawil cyiꞌj tnam jatum otok tbincha nimcu binchben nim cyipumal,
porque mintiꞌ ajtz tiꞌj cyanmi ex xi tmaꞌn cye:
21 —Ay becꞌbil cywitze aj Corazín.
Ay becꞌbil cywitze aj Betsaida.
Porque nokwit tuj tnam Tiro ex tuj tnam Sidón o che binchanjtz ke binchben nim cyipumal ic tzaꞌn ma nbinchaye cyxole,
biꞌxwitlo ajtz tiꞌj cyanmi ojtxi,
owtlo tzꞌoc cykꞌoꞌn cyxbalun chꞌiꞌx twitz,
ex owtlo che cub keꞌ tuj tzaꞌj.
22 Cyjaꞌtzun cxel nmaꞌne cyeye,
tuj tkꞌijlalil jwisi mas nim cyeye cycastiw cbel ic tzaꞌn te tnam Tiro ex tnam Sidón.
23 Ex aya tnam Capernaum,
¿maj cjapunela tuj cyaꞌj?
Mlay,
max cbel ponela tuj cynajbil cyimni.
Porque nokwit tuj tnam Sodoma o che binchanjtz ke binchben nim cyipumal ic tzaꞌn ma nbinchaye cyxole,
atxwitlo tnam jaꞌlo.
24 Cyjaꞌtzun cxel nmaꞌne cyeye,
tuj tkꞌijlalil jwisi,
mas nim cyeye cycastiw cbel ic tzaꞌn te tnam Sodoma.
Cytzaje wucꞌile tuꞌntzun cyojlane
25 Tuj tkꞌijlalil lu oc ten Jesús yolil ex tma:
—Cxel nkꞌoꞌne chjonte teya,
Tat,
aya Tajaw cyaꞌj ex Tajaw txꞌotxꞌ,
porque ma cub tewana tcyakil jlu cywitz aj nabl ex cywitz keju nneꞌlxix cynicꞌ tiꞌj,
ex ma tzaj tyecꞌuna cye tal cꞌwaꞌl.
26 Ma tbinchaya icju Tat,
porque baꞌn ela tuj twitza.
27 Ax icx tma Jesús:
Tcyakil ma tzaj kꞌoꞌn weye tuꞌn Nmane;
ex mi jun ojtzkilte alcye kine,
oꞌcxte Nmane ojtzkilte,
porque akine Tcꞌwaꞌl;
ex mi jun ojtzkilte Nmane,
oꞌcx akine ojtzkilte,
porque akine Tcꞌwaꞌl,
ex alcye jun xjal waje tuꞌn t-xi nyecꞌune Nmane te cꞌeleltzun tnicꞌ xjal tiꞌj Nmane.
28 Cytzaje wucꞌile cycyakile akeye ma che sicte tuꞌn akꞌuntl ex ma che sicte tjakꞌ iktz,
octzun che ojlale wuꞌne.
29 Cyikanxe nyuwiye,
ex cyxnakꞌtzam cyibe wiꞌje,
porque mans kine ex mans wanmiye;
octzun cnetel jun ojlabl cyuꞌne te cyanmiye.
30 Porque aju nyuwiye mya yajcux tikanjtz,
ex sasj wikatze cxel cyikane.