El cyiꞌn xnakꞌtzben triw twi tkan tuj kꞌij te ojlabl
12
Tuj tkꞌijlalil lu in bettok Jesús cyxol awal tuj jun kꞌij te ojlabl;
atzun ke t-xnakꞌtzben tzaj el cycꞌuꞌj ex e oc ten kꞌilte triw twi tkan te cywa.
2 Tej cylonte ke parisey jlu,
xi cymaꞌn te Jesús:
—Lu ke t-xnakꞌtzbena in cybinchaꞌn aju mya kꞌoꞌn tuꞌn ley tuꞌn tbinchanjtz tuj kꞌij te ojlabl,
che chi.
3 Pero xi tmaꞌn Jesús cye:
—¿Bajxpe jaw cyschꞌiꞌne tuj Tuꞌjil ti o tbincha David tej ttzaj el tcꞌuꞌj cyucꞌix keju ateꞌ tucꞌil?
4 Ocx tuj tja Dios,
xi twaꞌn ke pan cyꞌiwlaꞌmaj,
aju pan lu mya kꞌoꞌn tuꞌn t-xi twaꞌn David cyucꞌix keju ateꞌ tucꞌil,
nok oꞌcx cye pal kꞌoꞌn tuꞌn t-xi cywaꞌn.
5 ¿Ex bajxpe jaw cyschꞌiꞌne tuj tley Moisés,
ke pal tuj tja Dios in che akꞌnan tuj kꞌij te ojlabl ex mintiꞌ cyil tuꞌn tlaj?
6 Cxeltzun nmaꞌne cyeye,
at jun tzalu mas maꞌ toclen twitz tja Dios.
7 Nokwit nneꞌl cynicꞌe tiꞌj ti in tmaꞌn ju yol tzꞌiban tuj Tuꞌjil chi cyjaꞌ:
Aju wajbile cyeye atzun,
tuꞌn tten cycꞌujlalile ex mya tuꞌn ttzaj cykꞌoꞌne jun chojbil weye,
chi tuj Tuꞌjil.
Nokwit nneꞌl cynicꞌe tiꞌj,
miwtlo cub cykꞌoꞌne cysentens keju mintiꞌ cyil.
8 Porque akine Tajaw ju kꞌij te ojlabl,
akine scꞌoꞌmaj kine tuꞌn Dios tuꞌn ntene cyucꞌil xjal.
Banix jun xjal tzkijtok jun tkꞌab
9 Icꞌtzun Jesús tuj lugar lu,
pon tuj ja te cycꞌulbil xjal judiy.
10 Ex attok jun xjal tzkijtok jun tkꞌab;
ex at junjun xjal xi cykanin te Jesús nok tuꞌn tcub tzꞌak tuj jun til cyuꞌn:
—¿Kꞌoꞌnpe tuꞌn ley tuꞌn tbanix jun xjal tuj kꞌij te ojlabl,
ex ka miꞌn?
Che chi.
11 Xitzun tmaꞌn Jesús cye:
—¿Alcye jun cyeye ka at jun tal t-ẍneꞌl ma cuꞌx tzꞌak tuj jun jul tuj kꞌij te ojlabl,
mlaypelo tzaj ttzyuꞌn tuꞌn tjatz tiꞌn?
12 ¿Yajtzunlo jun xjal,
myapelo mas maꞌ t-xilen twitz jun ẍneꞌl?
Cyjaꞌtzun,
kꞌoꞌn tuꞌn ley tuꞌn tbinchanjtz baꞌn tuj kꞌij te ojlabl.
13 Xitzun tmaꞌn Jesús teju xjal tzkijtok tkꞌab:
—Nukpinx tkꞌaba.
Eltzun tnukpiꞌn xjal tkꞌab,
ex cyaj banix ju tkꞌab ic tzaꞌn juntl tkꞌab.
14 E etztzun ke parisey,
ex e oc ten yolil tiꞌj cyxolx tuꞌn tcub Jesús cyuꞌn.
In yolin Isaías, aju t-sanjel Dios, tiꞌj Jesús
15 Tej tbinte Jesús jlu,
xiꞌ tuj juntl lugar;
ex nim xjal oc lpeꞌ tiꞌj.
E banix cycyakil yab tuꞌn Jesús,
16 ex xi tcyuwsaꞌnxix cye tuꞌn miꞌn tel tkanil cyuꞌn;
17 tuꞌntzun tjapun ju yol kꞌmaꞌmaj tuꞌn Isaías aju t-sanjel Dios,
chi cyjaꞌ:
18 Lu nmajene lu aju ma jaw nscꞌoꞌne;
cꞌujlaꞌnxix wuꞌne,
ex in tzalaj wanmiye tiꞌj.
Cbel nkꞌoꞌne Nxewe tibaj,
cxeltzun tkꞌoꞌn tkanil cye mastl nasyon,
oc cbinchetel cyiꞌj tuj tumelxix.
19 Mlay kꞌojin,
ex mlay jaw tkꞌajkꞌajel twiꞌ cyuw,
ex mlay binjtz tkꞌajkꞌajel twiꞌ tuꞌn jun xjal tuj cay.
20 Jun ajlaj potzꞌjni,
mlay cub ttokin,
ex aju mech in kusin,
mlay cub tyuptzꞌaꞌn.
Il tiꞌj tuꞌn tcawin tuj tumelxix.
21 Ex ke xjal cyuj cycyakil nasyon ckebel cycꞌuꞌj tiꞌj.
In tzaj tkꞌoꞌn juꞌẍ tipumal Jesús, che chi parisey
22 Ultzun kꞌiꞌn jun xjal twitz Jesús at juꞌẍ tuj tanmi,
moẍ twitz ex men;
ex o banix tuꞌn Jesús;
cyjaꞌtzun bant tqueꞌyin ex bant tyolin ju xjal moẍtok ex mentok.
23 Ex cycyakil xjal biꞌx naj cynabl,
ex in cymaꞌn:
—¿Apetzunlo Tcꞌwaꞌl David jlu?
Che chi.
24 Atzun cye parisey,
tej cybinte ju yol lu cyma:
—Ate xjal lu in che etz ke juꞌẍ tuj cyanmi xjal tuꞌn nok tuꞌn Beelzebú aju nejenel cye juꞌẍ,
che chi.
25 Eltzun tnicꞌ Jesús tiꞌj cyximbetz,
ex xi tmaꞌn cye:
—Ka at jun cawbil at pabl tib tuj ex in che kꞌojin xjal cyxolx,
cbel xitj cawbil;
ex ka at jun tnam ex ka jun ja xjal at pabl tib cyxol ex in che kꞌojin xjal cyxolx,
mlay cyaj ten,
cnajel.
26 Ka tuꞌnx tib Satanás nneꞌtz tlajon tib,
entons tpaꞌn tib ex in kꞌojin tiꞌjx;
¿tzaꞌntzun tten cucx tuꞌn tcyaj ten tcawbil?
27 Nok tuꞌn tipumal Beelzebú in che etz ke juꞌẍ tuj cyanmi xjal wuꞌne,
che chiye;
katzun ax toc jlu,
¿yajtzun cye cyxnakꞌtzbene,
alcye in kꞌonte cyipumal tuꞌn cyetz juꞌẍ tuj cyanmi xjal?
Cyjaꞌtzun ax ke cyucꞌile oc cymaꞌ ka mya tuj tumel cyyole.
28 Pero weye nok tuꞌn T-xew Dios in che etz ke juꞌẍ tuj cyanmi xjal wuꞌne,
cyjaꞌtzun tzꞌelx cynicꞌe tiꞌj ax toc ma tzul tcawbil Dios cyxole.
29 Porque ¿tzaꞌn tten tuꞌn tocx jun xjal tuj tja juntl xjal at tipun,
ex tuꞌn tetz telkꞌaꞌn aju at tuj tja ka mintiꞌ xcub tcꞌaloꞌn nej?
Maxitzun cꞌeletz telkꞌaꞌn tuj tja xjal ka ma cub tcꞌaloꞌn.
30 Alcye jun xjal mya tkꞌon tib wucꞌile,
in kꞌojl wiꞌje;
ex alcye jun xjal mintiꞌ in onin wucꞌile tuꞌn tjaw chmet twitz awal,
nok in baj tchitun.
31 Cyjaꞌtzun cxel nmaꞌne cyeye:
Tcyakil cyil xjal jacu najset,
tucꞌix tcyakil mya baꞌn in cymaꞌn;
pero ka ma che yolin mya baꞌn tiꞌj Xewbaj Xjan,
mlay najset cyil.
32 Ka at jun xjal ma tma jun yol mya baꞌn wiꞌje,
akine scꞌoꞌmaj kine tuꞌn Dios tuꞌn ntene cyucꞌil xjal,
jacu najset til;
pero aju xjal in yolin mya baꞌn tiꞌj Xewbaj Xjan,
mlay cub najset til,
mi tuj tkꞌijlalil jaꞌlo mi tuj tkꞌijlalil tzul.
Tiꞌj twitz tzeꞌ nneꞌl knicꞌ tiꞌj
33 Tzꞌelx cynicꞌe tiꞌj,
ka baꞌn jun tzeꞌ,
ax icx twitz baꞌn,
ex ka mya baꞌn jun tzeꞌ,
ax icx twitz mya baꞌn;
porque tiꞌj twitz tzeꞌ nneꞌl knicꞌ tiꞌj ka baꞌn ex ka mya baꞌn.
34 Akeye tiyjil kꞌantiꞌ.
¿Tzaꞌn tten tuꞌn cyyoline yol baꞌn,
ex mya baꞌn keye?
Porque tcyakilju at tuj tanmi xjal,
axtzunju in yolin tiꞌj.
35 Aju xjal baꞌn,
in tbinchaꞌn baꞌn,
porque atzun taꞌ baꞌn tuj tanmi;
atzunte xjal mya baꞌn,
in tbinchaꞌn mya baꞌn,
porque atzun taꞌ mya baꞌn tuj tanmi.
36 Pero cxel nmaꞌne cyeye,
tcyakil yol nokx gan ex mintiꞌ tajben aju in cymaꞌn xjal,
che oquel tuj xjel tiꞌj tuj tkꞌijlalil jwisi.
37 Porque tuꞌnx tyola ctzajel kꞌmaꞌn teya tuꞌn tetza libre,
ex tuꞌnx tyola ctzajel kꞌmaꞌn teya tuꞌn tcub t-sentensa.
Ke xjal mya baꞌn in cykanin tuꞌn tbant jun señ
38 Xitzun cymaꞌn junjun xnakꞌtzal tiꞌj ley ex junjun parisey:
—Xnakꞌtzal,
kajbile tuꞌn klonteye jun señ tuꞌn tbant tuꞌna,
che chi.
39 Xi ttzakꞌweꞌn Jesús:
—Ke xjal tuj tkꞌijlalil jaꞌlo mya baꞌn ke ex ma tzꞌel cypaꞌn cyib tiꞌj Dios in cykanin tuꞌn tbant jun señ;
pero mlay txi yecꞌun jun señ cye,
oꞌcx cxel yecꞌun ju señ tiꞌj Jonás aju t-sanjel Dios.
40 Porque ic tzaꞌn te Jonás o ten ox kꞌij ex ox konicꞌan tuj tcꞌuꞌj jun cyiẍ maꞌxix,
ax icx weye akine scꞌoꞌmaj kine tuꞌn Dios tuꞌn ntene cyucꞌil xjal,
chin tele ox kꞌij ex ox konicꞌan tuj mukbil.
41 Tuj tkꞌijlalil jwisi,
oc cyoc xjal tuj xjel akeju ateꞌ tuj tkꞌijlalil jaꞌlo,
che jawil weꞌ ke xjal aj Nínive,
ex che bel tzꞌak ke xjal lu tuj cyil cyuꞌn;
porque ke xjal aj Nínive ajtz tiꞌj cyanmi tej cybinte tpacbabl Jonás;
ex at jun tzalu mas maꞌ toclen twitz Jonás.
42 Tuj tkꞌijlalil jwisi oc cyoc xjal tuj xjel akeju ateꞌ tuj tkꞌijlalil jaꞌlo,
cjawil weꞌ ju xuꞌj rey aju o cawin tuj txꞌotxꞌ t-xe cyaꞌj tuj tnayaj kꞌij;
ex che bel tzꞌak ke xjal lu tuj cyil tuꞌn;
porque ate xuꞌj rey tzaj max ttxaꞌnpun txꞌotxꞌ tuꞌn tul bilte tyol Salomón,
porque nimxix tnabl Salomón;
ex at jun tzalu mas maꞌ toclen twitz Salomón.
Aju juꞌẍ nnaꞌjtz meltzꞌaj
43 Oc nneꞌtz juꞌẍ tuj tanmi xjal,
in xi betel tuj jun lugar tzkij txꞌotxꞌ,
in jyon tiꞌj jatum tuꞌn tojlan ex mintiꞌ in cnet tuꞌn.
44 Entons in tmaꞌn:
Chin ajel meltzꞌaje tuj njaye jatum ẍin etze,
chi juꞌẍ.
Ex octzun tpon,
in cnet tanmi xjal tuꞌn ic tten ic tzaꞌn jun ja mintiꞌ xjal tuj,
tzꞌisoꞌmaj tuj,
ex binchaꞌmaj wen.
45 In xiꞌtzun ex in tzaj tiꞌn wuktl juꞌẍ mas mya baꞌn ke twitz,
in che ocxtzun tuj tanmi xjal,
ex ax in che najan;
te yajxitl mas pyor taꞌ xjal ic tzaꞌn nej.
Icxtzun cbajel cyiꞌj xjal mya baꞌn ateꞌ tuj tkꞌijlalil jaꞌlo,
chi Jesús.
Aju ttxuꞌ Jesús ex ke titzꞌin
46 Matok in yolin Jesús cye xjal,
pon ttxuꞌ Jesús cyucꞌix ke titzꞌin,
ateꞌtok ttxaꞌn peꞌn ex cyajbiltok tuꞌn cyyolin tucꞌil.
47 Xi tmaꞌn jun xjal te Jesús:
—Lu ttxuꞌya cyucꞌix ke titzꞌina ateꞌ ttxaꞌn peꞌn,
cyajbil tuꞌn cyyolin tucꞌila,
chi xjal.
48 Xi tmaꞌn Jesús teju xjal aju o kꞌmante jlu:
—¿Alcyewe ntxuꞌ,
ex alcye kewe witzꞌin?
49 Xi tyecꞌun tkꞌab cyiꞌj t-xnakꞌtzben ex tma: