E jeꞌx t-samaꞌn Jesús 70 t-xnakꞌtzben
10
Tbajlenxitzun jlu,
e jaw t-scꞌoꞌn Kajaw 70 t-xnakꞌtzbentl,
e jeꞌx t-samaꞌn tuꞌn cyxiꞌ nej twitz,
te cabchak cybet,
e jeꞌx t-samaꞌn cyuj cycyakil tnam ex lugar jatum attok tponel.
Lucas 10.1-24
—Ax toc,
nimxix twitz awal at,
atzun ke akꞌnal mya nim;
cyjaꞌtzun,
che cubsane twitz Tajaw awal tuꞌn cyxi t-samaꞌn akꞌnal tuꞌn tjaw chmet twitz awal.
3 Cyxiꞌye;
che xel nsamaꞌne ex ic che oquele ic tzaꞌn ke tal ẍneꞌl cyxol xoꞌj.
4 Miꞌn txi cyiꞌne chꞌuꞌẍ,
mi pa,
mi xjab;
ex miꞌn che weꞌye tuj be tuꞌn cykꞌolbene cye xjal.
5 Oc cyocxe tuj jun ja,
tnejel cykꞌonxe jun kꞌolbebl:
Che tenwt xjal tuj tzalajbil tuj ja lu,
che chicuye.
6 Katzun baꞌn cyten xjal tuj ja lu,
che teltzun tuj tzalajbil ic tzaꞌn cxel cymaꞌne;
katzun mya baꞌn cyten xjal,
mlay tzꞌajben aju kꞌolbebl otok txi cykꞌoꞌne.
7 Ax che tencje jatum ctzajel kꞌoꞌn cyposadiye;
cywaꞌnxe ex cycꞌanxe aju ctzajel kꞌoꞌn cyeye;
porque baꞌn tuꞌn tchjet twi tcꞌuꞌj akꞌnal.
Miꞌn che icꞌe jyol cyposadiye tuj juntl ja.
8 Oc cypone tuj jun tnam,
ka ma che cꞌmonjtze cyuꞌn xjal,
cywaꞌnxe aju cbel kꞌoꞌn cywitze;
9 ex keju yab ateꞌ tuj tnam lu che banix cyuꞌne,
ex cymanxe cye xjal:
Ma tzul lakꞌeꞌ tcawbil Dios cyucꞌile,
che chicuye.
10 Pero ka at jun tnam ma che pone tuj ex mintiꞌ ma che cꞌmonjtze cyuꞌn xjal,
cyexe tuj cay ex cymanxe:
11 Axju tpujil cytanmiye,
aju ma tzꞌoc lacꞌeꞌ tiꞌj kkane,
cꞌelel kchtoꞌne te jun yecꞌbil cyiꞌje ka mya baꞌn keye.
Pero tzꞌelx cynicꞌe tiꞌj,
aju tcawbil Dios ma tzul lakꞌeꞌ cyucꞌile,
che chicuye.
12 Cxel nmaꞌne cyeye:
Mas nim tcastiw tnam lu cbel twitz tcastiw tnam Sodoma tuj tkꞌijlalil oc tul jwisi.
Ke tnam mintiꞌ xi cyniman tyol Jesús
13 Becꞌbil cywitze aj Corazín.
Becꞌbil cywitze aj Betsaida.
Porque nokwit tuj tnam Tiro ex tuj tnam Sidón o che binchanjtz ke binchben nim cyipumal ic tzaꞌn ma nbinchaye cyxole,
biꞌxwitlo ajtz tiꞌj cyanmi ojtxi,
owtlo tzꞌoc cykꞌoꞌn cyxbalun chꞌiꞌx twitz ex owtlo che cub keꞌ tuj tzaꞌj,
te jun techal ka otok tzꞌajtz tiꞌj cyanmi.
14 Cyjaꞌtzun,
tuj tkꞌijlalil jwisi mas nim cyeye cycastiw cbel ic tzaꞌn te tnam Tiro ex tnam Sidón.
15 Ex akeye aj Capernaum,
¿maj che japunele tuj cyaꞌj?
Mlay,
max che bel ponele tuj cynajbil cyimni.
16 Alcye ma cub binte cyyole,
weye nyole in cub tbiꞌn:
ex alcye ma tzꞌel icꞌun te cyeye,
akine in chin el ticꞌun;
ex alcye ma tzꞌel icꞌun te weye,
nneꞌl icꞌun Dios tuꞌn,
aju tzaj samante weye,
chi Jesús cye.
Tej cyul meltzꞌaj keju 70 t-xnakꞌtzben Jesús
17 E ultzun meltzꞌaj keju 70 t-xnakꞌtzben Jesús in che tzalaj,
ex xi cymaꞌn te:
—Tat,
icx ke juꞌẍ in koꞌx nimane cyuꞌn nok tuꞌn tipumal tbiya.
18 Xi tmaꞌn Jesús cye:
—Ax toc ma wile Satanás ma cuꞌtz tzꞌak twitz cyaꞌj ic tzaꞌn tkan kꞌancyok.
19 Xi nkꞌoꞌne cyoclene tuꞌn tcub cywabane ke lobaj ex ke siꞌnin ex tuꞌn tcub tiꞌj tcyakil tipumal aj kꞌoj cyuꞌne.
Ex mintiꞌ jun tuꞌn tbaj cyiꞌje.
20 Pero miꞌn che jaw tzalaje tuꞌnju in che nimanjtze cyuꞌn juꞌẍ,
oꞌcx che tzalajxe tuꞌnju tzꞌiban cybiye tuj cyaꞌj.
O tzalaj Jesús
21 Ax or jaw tzalaj Jesús tuꞌn Xewbaj Xjan ex tma:
—Cxel nkꞌone chjonte teya,
Tat,
aya Tajaw cyaꞌj ex txꞌotxꞌ,
tuꞌnju ma cub tewana tcyakil jlu cywitz ke xjal at cynabl ex cywitz ke xjal baꞌnxix cyuꞌn,
ex ma tzaj tyecꞌuna cye ke xjal chꞌin cyoclen.
Ma tbinchaya icju,
Tat,
porque baꞌn eꞌla tuj twitza,
chi Jesús tuj tnaꞌj Dios.
22 Ax icx tma Jesús cye xjal:
Tcyakil ma tzaj kꞌoꞌn weye tuꞌn Nmane.
Ex mintiꞌ jun xjal ojtzkilte alcye kine,
oꞌcx Nmane ojtzkilte,
porque akine Tcꞌwaꞌl;
ex mintiꞌ jun xjal ojtzkilte alcye Nmane,
oꞌcx akine ojtzkilte,
porque akine Tcꞌwaꞌl;
ex alcye jun xjal waje tuꞌn t-xi nyecꞌune Nmane te cꞌeleltzun tnicꞌ xjal tiꞌj Nmane,
porque akine Tcꞌwaꞌl,
chi Jesús cye.
23 Ajtz meltzꞌaj twitz Jesús cyucꞌil t-xnakꞌtzben,
ex xi tmaꞌn oꞌcxcu cye:
—At tzalajbil cye xjal in cyqueꞌyin tcyakilju in cyile;
24 porque cxel nmaꞌne cyeye,
nimcu t-sanjel Dios ex nimcu rey o cyajbe tuꞌn cylonte aju in cyile,
pero mintiꞌ o cyil;
ex o cyajbe tuꞌn cybinte aju in cybiꞌne,
pero mintiꞌ o cybi,
chi Jesús cye t-xnakꞌtzben.
Jun xjal aj Samaria baꞌn tmod
25 Ex at jun chicꞌbal tiꞌj ley ul lakꞌeꞌ tuꞌn toc Jesús tuj joybil tiꞌj tuꞌn,
ex xi tmaꞌn te:
—Xnakꞌtzal,
¿ti oc nbinchaꞌye tuꞌn tten nchwinklale te jumajx?
Lucas 10.25-42
26 Xi tmaꞌn Jesús te:
—¿Alcye tzꞌiban tuj ley?
¿Chi toc tuꞌn oc in jaw t-schꞌina?
27 Xi ttzakꞌweꞌn xnakꞌtzal tiꞌj ley:
—Aju tzꞌiban tuj ley in tmaꞌn cyjaꞌ:
Cycꞌujlame Kman Dios tuꞌn tcyakil cyanmiye,
tuꞌn tcyakil cycꞌuꞌje,
tuꞌn tcyakil cyipumale ex tuꞌn tcyakil cynable;
ex cycꞌujlame ke cyucꞌile ic tzaꞌn cyeye in cycꞌujlan cyibe,
chi tuj Tuꞌjil.
28 Xitzun tmaꞌn Jesús te:
—Baꞌn ma tmaya;
ka ma tbinchaya jlu cteltzun tchwinklala.
29 Atzunte xjal o tajbe tuꞌn miꞌn tcub tzꞌak tyol Jesús tibaj,
xi tmaꞌn te:
—¿Alcyetzun ju wucꞌile?
30 Xi ttzakꞌweꞌn Jesús:
—At jun xinak tzaj tuj tnam Jerusalén,
cyjaꞌ tcuꞌx tuj be tuꞌn tpon tuj tnam Jericó,
ex tzyet cyuꞌn elekꞌ tuj be,
el cyiꞌn tcyakilju at te tucꞌix t-xbalun ex baj cybjuꞌn,
ex e icꞌtzun,
cyaj cykꞌoꞌn chꞌixtok tcyim.
31 Ex tcꞌulbacu,
cuꞌx jun pal cye judiy tuj be,
ex tej tlonte pal ju xjal aju otok baj cꞌixbisaꞌn,
icꞌx ttxlaj be mintiꞌ o weꞌ.
32 Ax icx jun aj Leví,
tej tcanun tuj lugar jatum taꞌ xjal aju otok baj cꞌixbisaꞌn,
nok xiꞌcu tqueꞌyin,
ax icx icꞌx ttxlaj be mintiꞌ o weꞌ.
33 Pero at jun xjal aj Samaria cyjaꞌ t-xiꞌ tuj be,
pon lakꞌeꞌ jatum taꞌ xjal aju otok baj cꞌixbisaꞌn,
ex tej tlonte,
tzaj kꞌakꞌan tcꞌuꞌj tiꞌj.
34 Pontzun lakꞌeꞌ ttxlaj,
baj tkꞌanan tcꞌixblen tuꞌn aseyt ex vin ex oc tpotzin;
ex jax tkꞌoꞌn tibaj tchej,
xi tiꞌn tuj mesón,
ex oc tcwentin.
35 Ex te juntl kꞌij tej ticꞌ ju xjal aj Samaria,
jatz tiꞌn cabe denari pwak,
xi tkꞌoꞌn te tajwil mesón ex cyaj tmaꞌn:
Cwentin oca ju xjal lu;
nok jteꞌx cbajel tnajsaꞌna tiꞌj jacu chjet wuꞌne oc wule juntl maj,
chi aj Samaria.
36 ¿Chi toc tuꞌna?
¿Alcyetzun jun cyxol keju ox xjal lu oc te tucꞌil ju xjal aju tzyet cyuꞌn elekꞌ tuj be?
37 Xitzun tmaꞌn xnakꞌtzal tiꞌj ley:
—Aju tzaj kꞌakꞌan tcꞌuꞌj tiꞌj.
Xitzun tmaꞌn Jesús te:
—Txiꞌya ex binchama ic tzaꞌn jlu.
Pon Jesús tja Marta ex Mariy
38 Cyjaꞌ t-xiꞌ Jesús tuj be,
pon tuj jun tal tnam;
ex at jun xuꞌj Marta tbi o cꞌmet Jesús tuꞌn tuj tja.
39 Ex attok jun terman Marta,
Mariy tbi,
cub keꞌ t-xe tkan Jesús ex oc ten bilte tyol.
40 Atzunte Marta in bisun cyiꞌj ke tichak in bant tuꞌn,
pon lakꞌeꞌ ttxlaj Jesús,
ex xi tmaꞌn te:
—Tat,
¿mintiꞌpe nnoꞌc tkꞌoꞌna cwent tiꞌj wermaniye,
ma chin cyaj tkꞌoꞌn njunalxe tiꞌj akꞌuntl?
Kꞌmanxa te tuꞌn tonin wucꞌile.
41 Pero xi ttzakꞌweꞌn Jesús: