Aju in tzꞌilix xjal tuꞌn
7
Ul cychmon cyib parisey tucꞌil Jesús,
cyucꞌix junjun xnakꞌtzal tiꞌj ley e tzaj tuj tnam Jerusalén.
2 Tej cylonte at junjun t-xnakꞌtzben Jesús in che waꞌn ex mintiꞌ nneꞌl cytxꞌjoꞌn cykꞌab ic tzaꞌn in tmaꞌn cyley:
—Mya baꞌn jlu,
che chi parisey.
3 (Porque ke parisey cyucꞌix cycyakil xjal judiy,
nimanxix cyuꞌn aju ley cyaj bant tiꞌj cyuꞌn cytijil xjal,
cyjaꞌtzun ka mintiꞌ ma baj cytxꞌjoꞌn cykꞌab ic tzaꞌn in tmaꞌn ley,
ax mlay che waꞌn.
4 Ex oc cyajtz meltzꞌaj tuj plas,
mlay che waꞌn ka mintiꞌ ma baj cytxꞌjoꞌn cykꞌab.
Ex nimcu txkantl in cybinchaꞌn aju in tmaꞌn cyley,
ic tzaꞌn tuꞌn cytxꞌjet ke vas cyuꞌn,
ex ke xar,
ex ke cꞌil cꞌuxbil ex ke watbil.)
5 Xitzun cykanin parisey ex ke xnakꞌtzal tiꞌj ley te Jesús:
—¿Tikuꞌn mintiꞌ in cybinchaꞌn t-xnakꞌtzbena ic tzaꞌnxju cyaj bant tiꞌj cyuꞌn cytijil xjal?
In che waꞌn ex mintiꞌ nneꞌl cytxꞌjoꞌn cykꞌab?
Che chi.
6 Xi ttzakꞌweꞌn Jesús:
—Xmletzꞌ keye,
ax toc aju o tma Isaías cyiꞌje,
aju t-sanjel Dios,
ic tzaꞌn tzꞌiban tuj Tuꞌjil,
porque chi Isaías tuj Tuꞌjil:
Ke xjal lu nok tuꞌn cytziꞌ in chin nimanjtze cyuꞌn,
atzunju cyanmi najchak taꞌ wiꞌje.
7 Nokx gan in che cꞌulun nwitze,
porque aju xnakꞌtzbil in cykꞌoꞌn,
cymandamyent xjal,
chi Isaías.
8 Porque in cyaj cykꞌoꞌne aju tmandamyent Dios,
atzunju cyaj bant tiꞌj cyuꞌn xjal atzunju in bant cyuꞌne,
tuꞌn cytxꞌjet ke xar cyuꞌne ex ke vas;
ex nimcu txkantl in cybinchaꞌne ic tzaꞌn ke jlu.
9 Ax icx xi tmaꞌn Jesús cye:
—Ax toc aju tmandamyent Dios nnoꞌc cykꞌoꞌne mintiꞌ tajben tuꞌn tjapun cyuꞌne aju cyaj kꞌmaꞌn cyeye cyuꞌn cytijil xjal.
10 Porque o tma Moisés:
Cynimanxe cymane ex cytxuꞌye;
ax icx in tmaꞌn:
Alcye ma yasun tiꞌj tman ex ka tiꞌj ttxuꞌ,
il tiꞌj tuꞌn tcub byet.
11 Atzun cyeye in cymaꞌne ka baꞌn tuꞌn t-xi tmaꞌn jun xjal te tman ex ka te ttxuꞌ cyjaꞌ:
Mlay chin onine tiꞌja,
porque tcyakilju at weye Corbán.
(Aju yol Corbán atzun in tmaꞌn,
ma txi nkꞌoꞌne te Dios te jun oyaj.)
12 Tuꞌn jlu in xi cymayoꞌne tuꞌn miꞌn tonin xjal te tman ex ka te ttxuꞌ.
13 Cyjaꞌtzun nnoꞌc cykꞌoꞌne tyol Dios te mintiꞌ tajben,
tuꞌnju yol cyaj kꞌmaꞌn cyeye,
ex wikinwik tcyaj cymane cye cycꞌwaꞌle.
Ex nimcu in cybinchaꞌne ic tzaꞌn jlu.
14 E tzaj ttxcoꞌn Jesús ke xjal ex xi tmaꞌn cye:
—Cybintze nyole cycyakile,
ex tzꞌelx cynicꞌe tiꞌj:
15 Aju in xiꞌ tuꞌn xjal,
mlay tzꞌilix tuj tanmi tuꞌn,
atzunju in jatz tuj tanmi xjal,
atzunju in tzꞌilsante tuj tanmi xjal.
16 [Alcye at t-ẍcyin,
binx ju yol lu.]
17 Tejtzun tel tpaꞌn tib Jesús cyiꞌj xjal,
ocx tuj ja.
Xitzun cykanin ke t-xnakꞌtzben ti t-xilen ju techal lu.
18 Xi tmaꞌn Jesús cye:
—¿Maj icx cyeye mintiꞌ nneꞌl cynicꞌe tiꞌj?
¿Mintiꞌpe nneꞌl cynicꞌe tiꞌj,
aju in xiꞌ tuꞌn xjal mlay tzꞌilix tuj tanmi tuꞌn?
19 Porque mintiꞌ nnoꞌcx tuj tanmi,
nok oꞌcx in cuꞌx tuj tcꞌuꞌj,
ex nneꞌx tcꞌuꞌjin.
—Aju in jatz tuj tanmi xjal,
atzunju in tzꞌilsante tuj tanmi.
21 Porque tuj cyanmi xjal in jatz cyximbetz mya baꞌn,
tuꞌn cybinchante aj pajil,
tuꞌn cyyaẍin,
tuꞌn tcub cybyoꞌn jun xjal,
22 tuꞌn cyelkꞌan,
tuꞌn tpon cycꞌuꞌj tiꞌj nimcu,
tuꞌn cybinchante mya baꞌn,
tuꞌn cysbun,
tuꞌn miꞌn cyjacꞌunte cyib,
tuꞌn ttzaj tloꞌch cycꞌuꞌj,
tuꞌn tbant jun simj yol,
tuꞌn cyoc puro jawni ke,
ex tuꞌn cyoc mintiꞌ cynabl.
23 Tcyakil jlu mya baꞌn tuj tanmi xjal in jatz,
ex in tzꞌilix tuj tanmi xjal tuꞌn,
chi Jesús cye.
Jun xuꞌj stranjer xjal xi tocslaꞌn tyol Jesús
24 Icꞌtzun Jesús tuj lugar lu,
xiꞌ tuj txꞌotxꞌ jatum ateꞌ ke tnam Tiro tucꞌix Sidón.
Ocxtzun tuj jun ja posadiyil,
o tajbe tuꞌn miꞌn cybinte xjal,
pero mintiꞌ tumel tuꞌn tten tuj ewaj.
25 Porque at jun xuꞌj at jun tal txin at juꞌẍ tuj tanmi;
tej tbinte xuꞌj tkanil tiꞌj Jesús,
pon naj tucꞌil ex cub ẍmejeꞌ t-xe tkan.
26 Ate xuꞌj lu aj Sirofenisia,
mya judiy xjal,
ex cubsan twitz Jesús tuꞌn tetz tlajoꞌn Jesús juꞌẍ tuj tanmi txin aju tal.
27 Atzunte Jesús xi tmaꞌn te:
—E tnoj cycꞌuꞌj cꞌwaꞌlbaj nej,
porque mya baꞌn tuꞌn tel kꞌiꞌn cywa cꞌwaꞌlbaj ex tuꞌn t-xi kꞌot cye txꞌyan,
chi Jesús te.
28 Xi ttzakꞌweꞌn xuꞌj:
—Ax toc Tat;
pero ke txꞌyan in che waꞌn tjakꞌ mes tiꞌj tbuchil cywa cꞌwaꞌlbaj,
chi xuꞌj.
29 Xi tmaꞌn Jesús te xuꞌj:
—Tuꞌnju yol lu ma tzaj tmaꞌna baꞌn tuꞌn taja,
ma tzꞌetz juꞌẍ tuj tanmi tala,
chi Jesús te.
30 Tejtzun tpon xuꞌj tja,
lu tal coẍl twitz watbil,
otok tzꞌetz juꞌẍ tuj tanmi.
Jun xjal chcyin twiꞌ ex men, banix tuꞌn Jesús
31 Ajtztzun meltzꞌaj Jesús tuj txꞌotxꞌ jatum taꞌ tnam Tiro,
icꞌ aj tuj tnam Sidón,
ex icꞌ aj tuj txꞌotxꞌ Decápolis tbi,
pon ttzi laguna tuj Galiley.
32 Ul cyiꞌn xjal jun xjal twitz Jesús,
chcyin twiꞌ ex men,
ex e cubsan twitz Jesús tuꞌn tcub tkꞌoꞌn tkꞌab tibaj.
33 El tlakꞌban tib Jesús cyiꞌj xjal,
xi tiꞌn ju xjal men,
ocx tkꞌoꞌn tal tkꞌab tuj t-ẍcyin,
ex oc ttzuban twi tkꞌab,
oc tmacoꞌn takꞌ xjal.
34 Jawtzun tqueꞌyin Jesús twitz cyaꞌj,
in xjikꞌban tcꞌuꞌj ex tma:
—Efata.
(Atzun in tmaꞌn ju yol lu,
cjaketel t-ẍcyina.)
35 Te jurat naj e jaket ke t-ẍcyin xjal,
ex bant naj tyolin clarxix wen.
36 Xi tcyuwsaꞌn Jesús cye tuꞌn miꞌn tel tkanil cyuꞌn;
masque nimcu maj xi tmaꞌn Jesús cye,
atzun cye mas el tkanil cyuꞌn.
37 Nimxix e labin xjal tiꞌj,
in cymaꞌn:
—Baꞌn tcyakilju in tbinchaꞌn:
ke chcyin in bant cybin tuꞌn,
ex ke men in bant cyyolin tuꞌn.