2 atzun cye parisey ex ke xnakꞌtzal tiꞌj ley in che wululun tiꞌj Jesús,

ex cyma:

—Ate xjal lu in che tcꞌmoꞌn ke aj il ex in waꞌn cyucꞌil.

3 Atzunte Jesús xi tmaꞌn ju techal lu cye:

4 —¿Alcye jun xinak cyxole ka at jun syent t-ẍneꞌl,

ex ka ma cyaj naj jun cyxol,

¿mlaypelo che cyaj tkꞌoꞌn keju 99 tuj cojbil,

ex cxeꞌl jyolte aju otok cyaj tzpet ocxi tcnet tuꞌn?

5 Octzun tcnet tuꞌn,

cjawix tkꞌoꞌn twi t-semil in tzalaj tiꞌj;

6 octzun tul tja,

che tzajel tchmoꞌn ke tamiw ex ke tvesin,

ex cxel tmaꞌn cye:

Che tzalajxe wucꞌile porque ma cnet ju tal nẍneꞌle aju otok cyaj tzpet,

chilo xjal.

7 Cyjaꞌtzun,

cxel nmaꞌne cyeye:

Mas che tzalajel keju ateꞌ tuj cyaꞌj tiꞌj jun aj il ka ma tzꞌajtz tiꞌj tanmi,

cywitz keju 99 xjal tuj cywitz ka tzꞌaklxix ke ex mya il tiꞌj tuꞌn tajtz tiꞌj cyanmi.

8 Ex alcye jun xuꞌj ka at laj sak pwak tucꞌil,

ex ka ma txi naj jun sak pwak,

¿mlaypelo tzꞌoc ttxakoꞌn jun candil,

ex cbajel ttzꞌisoꞌn tuj ja,

ex cheba cbajel tjyoꞌn tuꞌn tcnet tuꞌn?

9 Octzun tcnet pwak tuꞌn,

che oquel tchmoꞌn ke tucꞌil ex ke tvesin,

ex cxel tmaꞌn cye:

Che tzalajxe wucꞌile porque ma cnet aju sak pwak otok txi naj wuꞌne,

chilo xuꞌj.

10 Cyjaꞌtzun in xi nmaꞌne cyeye:

Ax icx at tzalajbil cyxol ke t-anjel Dios tiꞌj jun aj il ka ma tzꞌajtz tiꞌj tanmi.

11 Ax icx xi tmaꞌntl Jesús:

—At jun xjal attok cabe tcyꞌajal;

12 atzunte tzꞌinbaj xi tmaꞌn te tman:

Tat,

kꞌontza wetzbile aju at woclene tiꞌj.

Xitzun tkꞌoꞌn mambaj cyetzbil.

13 Ex yajxi chꞌintl,

oc tchmoꞌn tzꞌinbaj tcyakilju tetzbil ex xiꞌ tuj juntl tnam najchak;

ex atzun baj tnajsaꞌn tcyakilju tpwak tiꞌj achbil te twitz txꞌotxꞌ.

14 Tej tbaj tnajsaꞌn tcyakilju tpwak,

tzaj jun weꞌyaj nimxix tuj tnam lu,

ex ya mintiꞌ canun aju in ajben te.

15 Xiꞌtzun jyol takꞌun ex pon tucꞌil jun xjal aj tnam,

ex xi lajoꞌn tuj cojbil tuꞌn cyoc tcwentin ke boch.

16 Ex o tajbexix tuꞌn tnoj tcꞌuꞌj tuꞌn cyloꞌ boch,

pero mi jun xjal tzaj kꞌonte te.

17 Ex ultzun tiꞌj tcꞌuꞌj ex tma:

Nimcu majen ateꞌ tja nmane at nimxix cywa,

atzun weye tzalu chꞌix ncyime tuꞌn weꞌyaj.

18 Chin ajel meltzꞌaje tucꞌil nmane,

ex cxel nmaꞌne te:

Tat,

ma chin binchane il twitz Dios ax icx twitza.

19 Mya baꞌn kintle tuꞌn toc nbiye tcꞌwaꞌla,

chin tkꞌoꞌnca ic tzaꞌn jun tmajena,

nchiye cxel nmaꞌne.

20 Cubtzun be tuꞌn,

ajtz meltzꞌaj tuꞌn tul tucꞌil tman.

Naꞌnxtok tcanun,

o ilwaj tuꞌn tman,

tzaj kꞌakꞌan tcꞌuꞌj tman tiꞌj,

ex xiꞌ kelan canul tiꞌj,

tzaj tchleꞌn,

ex el ttzꞌuban twitz.

21 Xitzun tmaꞌn cꞌwaꞌl te tman:

Tat,

ma chin binchane il twitz Dios,

ax icx twitza;

mya baꞌn kintle tuꞌn toc nbiye tcꞌwaꞌla.

22 Atzunte mambaj xi tmaꞌn cye tmajen:

Juratx cyiꞌntze aju tbanil xbalun ex cykꞌoꞌnque tiꞌj;

ex cykꞌoꞌnque jun xmulkꞌab tiꞌj tal tkꞌab,

ex cykꞌoꞌnque t-xajab.

23 Cyiꞌntze jun tbanil tal wacẍ ex cybyoncuye tuꞌn kicꞌsan ninkꞌij ex tuꞌn kwaꞌn.

24 Porque aju ncꞌwaꞌle lu cyimnitok,

ex ma jaw ankꞌin,

tzpetnitok ex ma cnet,

chi mambaj.

E octzun ten icꞌsal ninkꞌij.

25 Atzunte tzicbaj attok tuj cojbil,

tej tul lakꞌeꞌ nikayin ttxlaj ja o tbi tkꞌajkꞌajel twi chnab ex bixbil.

26 Tzajtzun ttxcoꞌn jun majen ex xi tkanin te ti in baj.

27 Atzunte majen tma:

Ma tzul titzꞌina ex ma tzaj tmaꞌn tmana tuꞌn tcub byet jun tal wacẍ tbanilxix tuꞌnju baꞌn ma tzul.

28 Atzunte tzicbaj tzaj nimxix tkꞌoj,

ex mintiꞌ tajbe tuꞌn tocx tuja.

Etztzun tman ex o cubsan twitz tuꞌn tocx.

29 Atzunte tzicbaj xi tmaꞌn te tman:

Elaꞌxi abkꞌi in chin ajbene teya ex mintiꞌ in chin icꞌe tibaj tleya,

ex bajx tzaj tkꞌoꞌna jun tal chip weye tuꞌn tcub wicꞌsane jun ninkꞌij cyucꞌil wamiwoye.

30 Tejtzun sul tcꞌwaꞌla lu,

aju ma baj najsaꞌn tpwaka tuꞌn cyucꞌil ke xuꞌj jawni cywitz cyucꞌil xinak,

ma cub tbyoꞌna jun tal wacẍ tbanilxix,

chi tzicbaj.

31 Atzunte mambaj xi tmaꞌn te:

Ncꞌwaꞌl,

bay teya ax taꞌya wucꞌile,

ex tcyakilju at weye,

teya.

32 Pero tuj tumelxix jlu tuꞌn kicꞌsan ninkꞌij ex tuꞌn ktzalaj;

porque aju titzꞌina lu cyimnitok,

ex ma jaw ankꞌin;

tzpetnitok,

ex ma cnet,

chi mambaj.