Aju oyaj tuꞌn jun meba xuꞌj tal yajxix
21
Ex o til Jesús ke kꞌinun in cuꞌx cykꞌoꞌn cyoyaj tuj cꞌubl pwak tuj tja Dios.
Lucas 21.1-28
—Ax toc cxel nmaꞌne cyeye,
ate meba xuꞌj lu tal yajxix,
mas ma cuꞌx tkꞌoꞌn cywitz cycyakil.
4 Porque cycyakil ke jlu,
aju in cyaj sobryin cye,
atzunju ma cuꞌx cykꞌoꞌn te cyoyaj twitz Dios;
atzunte xuꞌj lu,
masque tal yajxix,
pero ma cuꞌx tkꞌoꞌn tcyakilju at tajbenil twi twa.
O tma Jesús ka tuꞌn tcub xitj tja Dios
5 In che yolintok junjun xjal tiꞌj tja Dios binchaꞌnxix wen tuꞌn abj tbanilxix ex tuꞌn oyaj otok pon cyiꞌn xjal.
Xitzun tmaꞌn Jesús cye:
6 —Tcyakil jlu aju nnoꞌc cyqueꞌyine,
tzul kꞌij mlay cyaj ten abj tibaj juntl abj,
tcyakil cbel tilj.
Ke señ naꞌnxtok tjapun mancbil tkꞌijlalil
7 Xitzun cykanin te:
—Xnakꞌtzal,
¿jtojtzun ban tjapun jlu?
ex ¿alcye señ tzul chꞌixtok tjapun jlu?
Che chi.
8 Tmatzun Jesús:
—Ten cycwente cyiꞌje tuꞌn miꞌn cycub sbuꞌne;
porque che ul nimcu xjal ex cꞌoquel cykꞌon cyib ic tzaꞌn weye,
ex oc cymaꞌ:
Akine ju Crist at woclene tuꞌn Dios,
ex chꞌix tul lakꞌeꞌ tkꞌijlalil,
che chilo;
pero miꞌn che oc lpeꞌye cyiꞌj.
9 Ex oc cybinteye oc toc kꞌoj ex oc cyjaw tilj xjal kꞌojlel,
miꞌn che jaw secꞌpaje;
porque tnejel ilxix tiꞌj tuꞌn tjapun tcyakil jlu;
pero myatzun mancbil tkꞌijlalil jlu tuꞌn tjapun baj tcyakil.
10 Che kꞌojlel ke nasyon cyiꞌj mastl nasyon,
ex che kꞌojlel ke tnam cyiꞌj mastl tnam.
11 Ex ctzajel cyaknajnab cyuwxix ex weꞌyaj ex txꞌuꞌj yabil nok jachak;
ex tzul secꞌpubl ex che tzajel señ maꞌxix twitz cyaꞌj.
12 Pero naꞌnxtok tjapun tcyakil jlu,
che tzyetele cyuꞌn xjal,
ex che yajlanjtzele cyuꞌn.
Che xel kꞌiꞌne tuj ja te cꞌulbil tuꞌn cyoque tuj xjel ex che oquex kꞌoꞌne tuj pres,
ex che xel kꞌiꞌne cyuꞌn cywitz rey ex cywitz gobernador,
nok tuꞌn tlaj ocslal keye wiꞌje.
13 Cꞌajbel jlu cyeye tuꞌn cyoque te testiw wiꞌje.
14 Miꞌn che ximan naje tiꞌj alcye yol cxel cymaꞌne te colbil cyeye;
15 porque akine chin kꞌolte yol tuj cytziꞌye tucꞌix cynable,
tuꞌntzunju mlay cub tiꞌj cyyole cyuꞌn cycyakil aj kꞌoj cyiꞌje,
ex mlay maket cyyole cyuꞌn.
16 Che xel kꞌiꞌne twitz cawil cyuꞌnx cymane ex cyuꞌn cyermaniye ex cyuꞌn keju at cyxilen cyucꞌile ex cyuꞌn cyamiwoye;
ex at junjun cyxole che bel byoꞌn cyuꞌn;
17 ex che elel icꞌune cyuꞌn cycyakil xjal tuꞌn tlaj ocslal keye wiꞌje.
18 Pero mi jun ttzmal cywiꞌye mlay naj.
19 Ka ma tzicꞌx cyuꞌne,
oc cycambaꞌye cychwinklale axix toc.
20 Oc cylonteye oc t-xi cytxolban cyib soldad tiꞌjele tnam Jerusalén,
tzꞌelxtzun cynicꞌe tiꞌj ya ma pon kꞌij tuꞌn tcub xitj tnam.
21 Atzun keju ateꞌ tuj txꞌotxꞌ Judey,
baꞌn tuꞌn cyel ok tuꞌn cyxiꞌ twi witz;
ex keju ateꞌ tuj tnam Jerusalén,
baꞌn tuꞌn cyetz ok;
ex keju ateꞌ tuj cojbil,
miꞌn che ocx tuj tnam.
22 Porque oc tul canun ju kꞌij lu,
atzun kꞌij tuꞌn ttzaj castiw cyibaj xjal,
tuꞌntzun tjapun tcyakilju in tmaꞌn tuj Tuꞌjil.
23 Pero becꞌbil cywitz ke xuꞌj chꞌixtok tul itzꞌj cyal oc tul canun ju kꞌij lu,
ex becꞌbil cywitz ke xuꞌj cucx tchꞌuꞌn cyal.
Porque tzul nim yajbil twitz txꞌotxꞌ,
ex tzul jun castiw maꞌxix cyiꞌj ke xjal lu.
24 At junjun che bel byoꞌn tuꞌn spad,
ex at junjun che xel kꞌiꞌn pres,
ex che bajel sputj cyuj cycyakil nasyon;
ex cbajel waban tnam Jerusalén cyuꞌn ke nasyon mya judiy ke,
maxitzun cwebel ocxi tjapun baj tkꞌijlalil tuꞌn cycawin ke nasyon mya judiy ke.
Tzaꞌn tten tzul Jesucrist juntl maj
25 Tzultzun señ tiꞌj kꞌij ex tiꞌj xjaw ex cyiꞌj cheꞌw;
ax icx twitz txꞌotxꞌ biꞌx cnajel cynabl xjal cyuj cycyakil nasyon,
che jawil secꞌpaj tuꞌn tkꞌajkꞌajel twiꞌ mar in xtulkꞌin.
26 Ke xjal ctzajel yumin tuj cywitz tuꞌn xobajil ex tuꞌnju in che ximan tiꞌj ti cbajel twitz txꞌotxꞌ;
porque che tzajel luꞌlun tipumal cyaꞌj.
27 Ex octzun cyilaꞌ xjal oc ntzaje tuj muj,
akine scꞌoꞌmaj kine tuꞌn Dios tuꞌn ntene cyucꞌil xjal,
ex oc cyilaꞌ nim wipumale ex in chin koptzꞌaje wen.
28 Octzun t-xeꞌt tcyakil jlu,
keꞌ cycꞌuꞌje,
ex cyqueꞌyinctze jawni,
porque aju colpibl cyeye in lakꞌex ttzaj.
29 Ex xi tmaꞌn Jesús jun techal cye:
—Cyqueꞌyinxe tkan higo ex ka juntl tzeꞌ.
Lucas 21.29-38
30 Octzun cylonteye oc ttzaj t-xul,
ax keye nneꞌl cynicꞌe tiꞌj in lakꞌex ttzaj ttzi jbalil.
31 Icxtzun tten oc cylonteye oc tjapun tcyakil jlu,
tzꞌelx cynicꞌe tiꞌj in lakꞌex ttzaj tcawbil Dios.
32 Ax toc cxel nmaꞌne cyeye,
tcyakil jlu cjapunel naꞌnxtok cycyim ke xjal ateꞌ tuj tkꞌijlalil jaꞌlo.
33 Ate cyaꞌj cnajel tucꞌix txꞌotxꞌ,
atzun we nyol mlay naj.
34 Ten cycwente cyiꞌje tuꞌn miꞌn tel tzpet cynable tuꞌn achbil te twitz txꞌotxꞌ ex tuꞌn cꞌaj kꞌeꞌn ex tuꞌnju tichak in baj cycꞌuꞌje tiꞌj,
mya yajcu in canuncu tkꞌijlalil jlu cyibaje.
35 Porque ic tten jlu ic tzaꞌn jun cꞌobil;
cycyakil xjal najl tuj tcyakil twitz txꞌotxꞌ che tzyetel tuꞌn.
36 Cyjaꞌtzun che xkꞌukine ex che naꞌne Dios tcyakil kꞌij,
tuꞌntzun cycolpaje te tcyakilju tzul,
ex tuꞌn cycub weꞌye nwitze,
akine scꞌoꞌmaj kine tuꞌn Dios tuꞌn ntene cyucꞌil xjal.