In ko t-xnakꞌtzaꞌn Jesús tuꞌn konin cyiꞌj meba
6
Ten cycwente tiꞌj tzaꞌn tten tuꞌn cybinchanteye aju in tmaꞌn cyocslable,
mya nok oꞌcx tuꞌn cyoc queꞌyine cyuꞌn xjal;
katzun ma cybinchaye nok tuꞌn cyoc queꞌyine cyuꞌn xjal,
mlaylo tzaj kꞌoꞌn jun oyaj cyeye tuꞌn Cymane aju at tuj cyaꞌj.
2 Cyjaꞌtzun oc t-xi cykꞌoꞌne cotzbaj,
miꞌn baj cyyoline cye xjal ic tzaꞌn in cybinchaꞌn ke xmletzꞌ cyuj ke ja te cꞌulbil ex tuj cay,
tuꞌntzun cyjaw nimsaꞌn cyuꞌn xjal.
Ax toc cxel nmaꞌne cyeye,
oꞌcxtzun chꞌin chojbil cyeju.
3 Atzun cyeye oc t-xi cykꞌoꞌne cotzbaj,
mintiꞌ tuꞌn cybinte mastl oc t-xi cykꞌoꞌne.
4 Cyjaꞌtzun tuj ewaj cxel cykꞌoꞌne cotzbaj;
porque in queꞌyin Cymane tiꞌj aju in xi cykꞌoꞌne tuj ewaj,
ex ctzajel tkꞌoꞌn t-xel cyeye.
In ko t-xnakꞌtzaꞌn Jesús tzaꞌn tten tuꞌn knaꞌn Dios
5 Ex oc cynaꞌne Dios,
miꞌn cybinchaye ic tzaꞌn ke xmletzꞌ,
porque at-xix cygan tuꞌn cynaꞌn Dios waꞌl ke cyuj ja te cꞌulbil ex jatum in che mojeꞌ cay,
tuꞌntzun cyoc queꞌyin cyuꞌn xjal.
Ax toc cxel nmaꞌne cyeye,
oꞌcxtzun chꞌin chojbil cyeju.
6 Atzun cyeye,
oc cynaꞌne Dios cyocxe tuj cyjaye,
ex cylmoꞌmetze tpwertil ja,
ex che yoline tucꞌil Cymane aju at tuj ewaj,
ex aju Cymane in queꞌyin tuj ewaj,
ctzajel tkꞌoꞌn t-xel cyeye.
7 Atzun cyeye oc cynaꞌne Dios,
miꞌn txi cymaꞌne elaꞌ maj axju yol ic tzaꞌn in cybinchaꞌn ke txkantl xjal mintiꞌ nneꞌl cynicꞌ tiꞌj Dios;
porque tuj cynabl ka tuꞌnju nimcu cyyol che tzajel biꞌn.
8 Miꞌntzun cybinchaye ic tzaꞌn cye;
porque ate Cymane ojtzkiꞌmajtl tuꞌn alcyeju at tajbenxix cyeye,
naꞌnxtok t-xi cykanine te.
9 Cyjaꞌtzun che naꞌne Dios cyjaꞌ:
A Kman ata tuj cyaꞌj,
tenwt tchiylal tbiya keye.
10 E ttzaj ju tcawbila.
Bant-xwit ju tajbila twitz txꞌotxꞌ ic tzaꞌn in bant tuj cyaꞌj.
11 Kꞌontza kwaye jaꞌlo,
aju in ajben tcyakil kꞌij.
12 Ex najsama aju mya baꞌn in kbinchaꞌne twitza,
ic tzaꞌn keye in cub knajsaꞌne cypaltil keju in cybinchaꞌn mya baꞌn kiꞌje.
13 Ex miꞌn takꞌa ambil tuꞌn koque tuj joybil kiꞌje,
nok oꞌcx ko tcloma teju mya baꞌn.
Porque teya ju cawbil,
ex ipumalj,
ex ajwalil te jumajx.
Icxwitju.
14 Porque ka ma cub cynajsaꞌne aju mya baꞌn in cybinchaꞌn xjal cyiꞌje;
ax icx cbel najsaꞌn cyile tuꞌn Cymane aju at tuj cyaꞌj.
15 Pero ka mintiꞌ xcub cynajsaꞌne aju mya baꞌn in cybinchaꞌn xjal cyiꞌje,
ax icx te Cymane mlay cub najsaꞌn cyile tuꞌn.
In ko t-xnakꞌtzaꞌn Jesús tzaꞌn tten tuꞌn tcub kyoꞌn weꞌyaj
16 Ex oc tcub cyyoꞌne weꞌyaj,
miꞌn txi cyyecꞌune cywitze miyalnix ka in che bisune ic tzaꞌn ke xmletzꞌ;
porque miyalnix nnoꞌc cywitz tuꞌn cyyecꞌunte cyib cywitz xjal ka in cub cyyoꞌn weꞌyaj.
Ax toc cxel nmaꞌne cyeye,
oꞌcxtzun chꞌin chojbil cyeju.
17 Atzun cyeye,
oc tcub cyyoꞌne weꞌyaj,
cyxebancu cywiꞌye ex cytxꞌjoꞌmel cywitze,
18 tuꞌntzun miꞌn t-xi cyyecꞌune cye xjal ka in cub cyyoꞌne weꞌyaj,
nok oꞌcx te Cymane aju at tuj ewaj;
ex aju Cymane in queꞌyin tuj ewaj,
ctzajel tkꞌoꞌn t-xel cyeye.
Aju kꞌinumabl tuj cyaꞌj
19 Miꞌn baj cychmoꞌne cykꞌinumable twitz txꞌotxꞌ jatum in naj tuꞌn pocꞌ ex tuꞌn acom,
ex nnoꞌcx cylacuꞌn elekꞌ t-xe ja tuꞌn tetz cyelkꞌaꞌn.
20 Nok oꞌcx cychmome cykꞌinumable tuj cyaꞌj jatum mintiꞌ in naj tuꞌn pocꞌ ex tuꞌn acom,
ex mintiꞌ nnoꞌcx cylacuꞌn elekꞌ t-xe ja tuꞌn tetz cyelkꞌan.
21 Porque jatum taꞌ cykꞌinumable,
atzun toc cyanmiye tiꞌj.
Aju spicꞌun te kximlal
22 Aju spicꞌun te kximlal,
atzunju tbakꞌ kwitz;
cyjaꞌtzun ka baꞌn taꞌ tbakꞌ cywitze,
tcyakiltzun cyxmilale at tuj spicꞌun.
23 Katzun mya baꞌn taꞌ tbakꞌ cywitze,
tcyakil cyximlale at tuj klolj.
Katzun ma tzꞌoc te klolj aju spicꞌun at cyuje,
mas nimxix cchmetel ju klolj.
Dios ex ju kꞌinumabl
24 Mi jun xjal jacu bant tuꞌn tajben te cabe patrón:
porque cꞌelel ticꞌun jun,
atzun juntl oc tcꞌujlaꞌ,
ex ka oꞌcx oc cꞌajbel te jun patrón,
atzun juntl mintiꞌ taj tiꞌj.
Mlayx bant tuꞌn cyajbene te Dios ex te kꞌinumabl.
Ke tcꞌwaꞌl Dios cwentin ke tuꞌn
25 Cyjaꞌtzun cxel nmaꞌne cyeye:
Miꞌn baj cycꞌuꞌje tiꞌj cychwinklale,
ti cxel cywaꞌne ex ka ti cxel cycꞌane;
ex miꞌn baj cycꞌuꞌje tiꞌj cyximlale,
ti cꞌoquel cykꞌoꞌne cyiꞌje.
¿Myapetzun mas maꞌ t-xilen cychwinklale twitz wabj?
¿Ex myapetzun mas maꞌ t-xilen cyximlale twitz xbalun?
26 Cyqueꞌyinxe ke chyuꞌj;
mintiꞌ in che awan ex mintiꞌ in che chmon twitz awal,
ex mintiꞌ cytxꞌutxꞌ te chmobl cywa;
pero ate Cymane aju at tuj cyaꞌj nnoꞌc cꞌaꞌchante cye.
¿Myapetzun mas maꞌ cyxilene cywitz ke chyuꞌj?
27 ¿Ex alcye jun cyxole jacu bant tuꞌn tuꞌn toc tkꞌoꞌn cabe xcꞌachubtl twaꞌl tuꞌnju nimxix in baj tcꞌuꞌj tiꞌj?
28 ¿Ex tikuꞌn in baj cycꞌuꞌje tiꞌj cyxbalune?
Che ximane cyiꞌj bech tuj cꞌul tzaꞌn tten in che chꞌiy;
mintiꞌ in che akꞌnan,
ex mintiꞌ in che chkon.
29 Pero cxel nmaꞌne cyeye tiꞌj rey Salomón,
masque tbanilxix t-xbalun oc tkꞌoꞌn,
pero mintiꞌ pon jun t-xbalun ic tzaꞌn cye tal bech lu.
30 Katzun ka ic in t-xbalumiꞌn Dios tal cꞌul tuj cojbil at jaꞌlo ex nchiꞌj tzꞌocx kꞌoꞌn tuj kꞌakꞌ,
¿yajtzun cyeye,
mlaypelo che xbaluminjtze tuꞌn,
akeye xinak chꞌin cyocslable?
31 Cyjaꞌtzun miꞌn baj cycꞌuꞌje,
ex miꞌn cymaye:
¿Ti cxel kwaꞌne?
ex ka ¿ti cxel kcꞌane?
ex ka ¿jatum ctzajel kxbalune?
32 Porque ke txkantl xjal in che jyon tiꞌj tcyakil jlu;
pero at jun Cymane aju at tuj cyaꞌj ojtzkiꞌn tuꞌn ka at tajben tcyakil jlu cyeye.
33 Cynimanxe tnejelxix aju tcawbil Dios ex tuꞌn cybinchanteye aju tzꞌaklxix twitz;
tcyakiltzun jlu ctzajel kꞌoꞌn cyeye.
34 Cyjaꞌtzun,
miꞌn baj cycꞌuꞌje tiꞌj ju te nchiꞌj,
porque aju te nchiꞌj texte tbis ctzajel.
Aju nnicꞌx kuꞌn tuj jun kꞌij,
acuxju.