Miꞌn che yoline mya baꞌn cyiꞌj cyucꞌile
7
Miꞌn che yoline cyiꞌj cyucꞌile ka mya baꞌn ke,
tuꞌntzun miꞌn cyoque tuj xjel tuꞌn Dios.
2 Porque ic tzaꞌn in che yoline tiꞌj cyucꞌile,
ax icxtzun cbel cysentense tuꞌn Dios,
ex ax ju malbil cꞌajbel tuꞌn Dios cyeye jatum in xi cymaloꞌne te juntl.
3 ¿Ex tikuꞌn nnoꞌc cyqueꞌyine aju tal tzꞌis tocx tuj twitz cyermaniye,
ex mintiꞌ nnoꞌc cykꞌoꞌne cwent tiꞌj ju viga tocx tuj cywitze?
4 ¿Ex tzaꞌntzun tten tuꞌn t-xi cymaꞌne te cyermaniye:
Cꞌeletz kiꞌne ju tal tzꞌis tuj twitza erman,
ex lu ju viga tocx tuj cywitze?
5 Xmletzꞌ keye,
nej cyiꞌmetze aju viga tocx tuj cywitze,
entons kꞌanchaꞌlxix oc cylaꞌye tuꞌn tetz cyiꞌne ju tal tzꞌis tocx tuj twitz cyermaniye.
6 Miꞌn txi cykꞌoꞌne cye txꞌyan aju in ajben te Dios,
mya yajcu che ajtz meltzꞌaj ex jacu che baj tzakune cyuꞌn.
Ex miꞌn txi cyxoꞌne cyperlaye cywitz ke boch,
mya yajcu baj cywaban.
Cykaninxe, cyjyome ex cykꞌajtzan oque ttzi ja
7 Cykaninxe ex ctzajel kꞌoꞌn cyeye;
cyjyome ex cnetel cyuꞌne;
cykꞌajtzan oque,
ex cjaketel ttzi ja cywitze.
8 Porque alcye jun xjal in kanin tiꞌj,
oc tcꞌmaꞌ;
ex aju in jyon tiꞌj,
cnetel tuꞌn;
ex aju nnoꞌc tkꞌajtzaꞌn,
cjaketel ttzi ja twitz.
9 ¿Ex alcye jun xjal cyxole,
ka ma tzaj tkanin tcꞌwaꞌl jun twa pan,
maj cxel tkꞌoꞌn jun abj?
10 Ex ka ma tzaj tkanin cꞌwaꞌl jun tchiꞌ cyiẍ,
¿maj cxel tkꞌoꞌn jun lobaj?
11 Masque mya baꞌn keye,
pero in xi cykꞌoꞌne oyaj baꞌn cye cycꞌwaꞌle,
¿yajtzun te Cymane aju at tuj cyaꞌj,
mlaypelo tzaj tkꞌoꞌn aju baꞌn cye keju in che kanin te?
12 Cyjaꞌtzun tcyakilju cyajbile tuꞌn cybinchante xjal cyeye,
ax icxtzun cybinchame cye;
porque atzunju in tmaꞌn tley Moisés ex in cymaꞌn ke t-sanjel Dios.
Aju ttzi pwert chꞌin
13 Cyocxe ttzi pwert chꞌin;
porque aju ttzi pwert maꞌ ex ju be maꞌ tuj,
atzunju in pon tuj najen,
ex nimcu xjal in cheꞌx tuj.
14 Atzunju ttzi ja chꞌin ex ju be chꞌin tuj,
atzunju in pon tuj chwinklal,
ex nicꞌxi junjun xjal in cnet ttzi ja chꞌin cyuꞌn,
ex ju be chꞌin tuj.
Nneꞌl knicꞌ tiꞌj tzeꞌ nok tuꞌn twitz
15 Ten cycwente cyiꞌje tuꞌn miꞌn cycub sbuꞌne cyuꞌn pacbal nicꞌal yol che ul cyucꞌile,
ex cꞌoquel cykꞌon cyib ic tzaꞌn ẍneꞌl ke,
atzun tuj cyanmi ic cyten ic tzaꞌn ke xoꞌj in che tzekt tuꞌn t-xi cychyoꞌn ke ẍneꞌl.
16 Tiꞌj cybinchben cꞌelel cynicꞌe cyiꞌj.
¿Baka tiꞌj chꞌiꞌx nneꞌl kiꞌn kloꞌ uva,
ex baka tiꞌj chꞌiꞌx cꞌul nneꞌl kiꞌn kloꞌ higo?
17 Cyjaꞌtzun tcyakil tzeꞌ baꞌn,
in tkꞌoꞌn twitz baꞌn;
atzunju tzeꞌ mya baꞌn,
in tkꞌoꞌn twitz mya baꞌn.
18 Aju tzeꞌ baꞌn mlay tzaj tkꞌoꞌn twitz mya baꞌn;
ex aju tzeꞌ mya baꞌn mlay tzaj tkꞌoꞌn twitz baꞌn.
19 Tcyakil tzeꞌ ka mya baꞌn twitz in tkꞌoꞌn,
cjawil txꞌemit ex cꞌoquex kꞌot tuj kꞌakꞌ.
20 Cyjaꞌtzun cꞌelel cynicꞌe cyiꞌj ke xjal pacbal nicꞌal yol,
tuꞌnju cybinchben.
Mya cycyakil che oquex tuj cawbil in tzaj tuj cyaꞌj
21 Akeju in cymaꞌn weye:
Tat,
Tat,
mya cycyakil che oquex tuj cawbil in tzaj tuj cyaꞌj;
nok oꞌcx cꞌoquex aju in tbinchaꞌn tajbil Nmane aju at tuj cyaꞌj.
22 Nimcu xjal tuj tkꞌijlalil tzul oc cymaꞌ weye:
Tat,
Tat,
¿mintiꞌpetzun koclene tzaj tkꞌoꞌna tuꞌn kpacbane,
ex tuꞌn tipumala e jeꞌtz ke juꞌẍ tuj cyanmi xjal kuꞌne,
ex tuꞌn tipumala o kbinchaye nimcu binchben nim cyipumal?,
che chi.
23 Atzun weye cxel nmaꞌne cye:
Mintiꞌ ojtzkiꞌn cywitze wuꞌne;
cypaꞌmil cyibe wiꞌje akeye binchal mya baꞌn.
In yolin Jesús tiꞌj cabe simyent
24 Cyjaꞌtzun,
alcye jun xjal ma txi tbiꞌn ke nyole lu ex ma che japun tuꞌn,
ic tten ic tzaꞌn jun xjal at tnabl jaw tbinchaꞌn tja tibaj pcꞌat.
25 Tzajtzun jbal ex jaw chꞌiy aꞌ,
ex tzaj nim cykꞌikꞌ ex pon tilj tiꞌj ja;
pero mintiꞌ cub tzꞌak,
porque tcub t-simyentil ja tibaj pcꞌat.
26 Ex alcye jun xjal in tbiꞌn ke nyole lu ex mintiꞌ in che japun tuꞌn,
ic tten ic tzaꞌn jun xjal mintiꞌ tnabl jaw tbinchaꞌn tja tibaj ttxa tzꞌaꞌn.
27 Tzajtzun jbal ex jaw chꞌiy aꞌ,
ex tzaj nim cykꞌikꞌ ex pon tilj tiꞌj ja;
ex cub tzꞌak ja ex biꞌx cub xitj tcyakil,
chi Jesús.