Jesús tiꞌ chaꞌle cʌntisa tiꞌ contra chaꞌchajp bʌ i pensal
12
Cheꞌ chʌncol tyo ti tꞌan Jesús ti queji i muchꞌquiñob i bʌ ti mil tyac quixtyañujob jintyo mux i pepets tyecꞌob i yocob. Jesús ti queji i ñaxan suben jini ajcʌntꞌañob i chaꞌan: Wen cʌñʌtyan laꞌ bʌ chaꞌan i chaꞌchajplel bʌ i pensal jini fariseojob muꞌ bʌ i lolon pʌs i bʌ ti wen pero mach weñobic. Jiñʌch cheꞌ bajcheꞌ levadura muꞌ bʌ i yʌqꞌuen i wos i bʌ caxlan waj.2 Como maꞌix chʌ bʌ mucul bʌ wale iliyi machꞌʌ baꞌan mi quejel i tsictiyel. Machꞌan chʌ bʌ mucul machꞌʌ baꞌan mi quejel i luꞌ ñaꞌtyʌntyel.
3 Jin chaꞌan pejtyelel tsaꞌ bʌ laꞌ subu ti mucul mi quejel i jamʌl sujbel cheꞌ bajcheꞌ mi ti qꞌuinil. Jini tsaꞌ bʌ laꞌ mucu subu laꞌ bʌ cheꞌ ñupꞌul i tiꞌ otyot yubil mi quejel i jamʌl sujbel ti pejtyelel otyot tyac cheꞌ bajcheꞌ mi ti pam otyotyel. Cheꞌ ti yʌlʌ Jesús.
Jini yom bʌ bʌcꞌñʌntyel
4 Mic subeñetla pꞌuntyʌbilet bʌ c piꞌʌlob. Mach yom laꞌ lolon bʌcꞌñan jini muꞌ bʌ i tsʌnsañetla pero maꞌix chʌ bʌ chꞌujbi i más tyumbeñetla.
5 Pero mic subeñetla jini yom bʌ laꞌ bʌcꞌñan. Bʌcꞌñanla am bʌ i pꞌʌtyʌlel i yʌqꞌuetla ti sajtyel. Pero añʌch i pꞌʌtyʌlel jeꞌel i choqueꞌ majlel quixtyañu ti xotꞌeꞌ mulil ti cꞌajc. Jiñʌch jini yom bʌ mi laꞌ bʌcꞌñan.
6 ¿Machꞌa baꞌan mi chojñel joꞌcojt saj xmaꞌtyeꞌmut ti chaꞌwejch tyaqꞌuin? Pero maꞌan mi ñajʌyel i chaꞌan Dios mi juncojtic.
7 Como jinic tyo tsijquil i chaꞌan Dios jujuntꞌujm i tsutsel la col. Mach yom laꞌ chaꞌlen bʌqꞌuen cheꞌ jini. Como más an laꞌ cꞌʌjnibal bajcheꞌ cabʌl saj xmaꞌtyeꞌmut.
Jini muꞌ bʌ i tsictisʌben Cristo tiꞌ tyojlel quixtyañujob
8 Cheꞌ jeꞌel mic subeñetla: Joñon i Piꞌʌlon Quixtyañujob mi quejel c tsictisan tiꞌ tyojlel ajtroñel i chaꞌan Dios chꞌoyoloꞌ bʌ ti panchan mij cʌñeꞌ pejtyelelob muꞌ bʌ i tsictisan tiꞌ tyojlel quixtyañujob mi chʌncol i chꞌujbiñon.
9 Pero jini muꞌ bʌ i yʌl tiꞌ tyojlel quixtyañujob chaꞌan mach i cʌñon, joñon jeꞌel mi quejel cʌleꞌ tiꞌ tyojlel ajtroñelob i chaꞌan Dios chꞌoyoloꞌ bʌ ti panchan machꞌan mij cʌñeꞌ.
10 Chꞌujbi i ñusʌbentyel i mul majchical jach miꞌ chaꞌlen tꞌan tij contra Joñon i Piꞌʌlon bʌ Quixtyañujob. Pero mach ñusʌnti i mul jini muꞌ bʌ i chaꞌlen machꞌʌ wen bʌ tꞌan tiꞌ contra Chꞌujul bʌ i Chꞌujlel Dios.
11 Cheꞌ mi quejel i pʌyetla majlel ti melojel ti templo i chaꞌan bʌ israelob mi ti tyojlel juez o mi baꞌan am bʌ yeꞌtyel mach yom mi laꞌ pensalin bajcheꞌ mi quejel laꞌ jaqꞌueꞌ mi chʌ bʌ mi quejel laꞌ wʌleꞌ.
12 Como jini Chꞌujul bʌ i Chujlel Dios mi quejel i cʌntisañetla chʌ bʌ mi quejel laꞌ wʌleꞌ cheꞌ mi cꞌotyel i yorojlel laꞌ chaꞌlen tꞌan. Cheꞌ tiꞌ chaꞌle cʌntisʌ Jesús.
Bʌqꞌuentic cheꞌ an cabʌl chʌ bʌ an lac chaꞌan
13 Juntiquil yaꞌ bʌ an tiꞌ tꞌejl Jesús tiꞌ sube: Maestro, suben cʌscun chaꞌan miꞌ tꞌoxbeñon jini tsaꞌ bʌ i cʌybon lojon c tyat.
14 Pero Jesús tiꞌ sube: Pero ubin maꞌix queꞌtyel chaꞌan c tꞌoxbeñet chʌ bʌ an laꞌ chaꞌan.
15 Ti yʌlʌ jeꞌel: Bej qꞌuele laꞌ bʌ chaꞌan machꞌan mi laꞌ michꞌqꞌuel chʌ bʌ an i chaꞌan laꞌ piꞌʌl. Como machꞌan cuxul quixtyañu chaꞌan ti cabʌl chʌ bʌ an i chaꞌan, cheꞌ ti yʌlʌ Jesús.
16 Cheꞌ jini Jesús tiꞌ subeyob ili lajoñel: An juntiquil winic am bʌ cabʌl chʌ bʌ an i chaꞌan. Pejtyelel chʌ bʌ yes tiꞌ pʌcꞌʌ, ti wen yʌcꞌʌ i wut.
17 Cheꞌ jini, jini winic ti queji i bajñel pensalin: ¿Chuqui mi quejel c chaꞌlen? Mach jasʌl i yajnib baꞌ mic lotyeꞌ i wut c pʌcꞌʌb, cheꞌen.
18 Tiꞌ pensali: Cujil chʌ bʌ mi quejel c chaꞌlen. Mi quejel chejeꞌ jubel i yajnib chʌ bʌ an c chaꞌan. Mi quejel c meleꞌ más colem bʌ. Yaꞌi mi quejel c luꞌ lotyeꞌ i wut c pʌcꞌʌb tyac yicꞌot pejtyelel chʌ bʌ yes an c chaꞌan, cheꞌen.
19 Cheꞌ jini, mi quejel i bajñel pensalin: An cabʌl chʌ bʌ lotyol c chaꞌan wale iliyi. Jasʌl chaꞌan j cꞌʌn cabʌl jabil. Mi quejel c wen cꞌaj coj. Mi quejel c wen chaꞌlen uchꞌel. Mi quejel c wen tijicnisan c bʌ. Cheꞌ tiꞌ bajñel pensali tiꞌ pusicꞌal jini winic.
20 Pero Dios tiꞌ sube jini winic: Pero ubin. Machꞌan maꞌ ñaꞌtyan. Wale iliyi bʌ acꞌbʌlel mi quejel a sajtyel. Ixcu tsaꞌ bʌ a lotyo, ¿majchqui i chaꞌan mi quejel i majlel? Cheꞌ tiꞌ sube Dios.
21 Chʌꞌʌch mi yujtyel muꞌ bʌ i niqꞌui lotyeꞌ chaꞌan bʌ i bajñel chaꞌan. Pero pꞌumpꞌunjax tiꞌ tyojlel Dios como machꞌan miꞌ pensalin chʌ bʌ miꞌ mulan Dios. Chʌꞌʌch tiꞌ chaꞌle lajoñel Jesús.
Dios miꞌ cʌñʌtyan i chaꞌañoꞌ bʌ
22 Ti wiꞌil Jesús tiꞌ sube ajcʌntꞌañob i chaꞌan: Mic subeñetla mach yom mi laꞌ lolon cabʌl pensalin chʌ bʌ mi quejel laꞌ cꞌuxeꞌ chaꞌan bej cuxul mi laꞌ wajñel. Mach yom mi laꞌ lolon cabʌl pensalin laꞌ pislel muꞌ bʌ quejel laꞌ xojeꞌ.
23 Dios ti yʌqꞌueyetla chaꞌan cuxul mi laꞌ wajñel. ¿Machꞌa baꞌan mi yʌqꞌuetla i bʌl laꞌ ñʌcꞌ mi laꞌ wʌl jeꞌel? Dios ti yʌqꞌueyetla laꞌ bʌcꞌtyal, ¿machꞌa baꞌan mi quejel i yʌqꞌueñetla laꞌ pislel jeꞌel, mi laꞌ wʌl?
24 Ñaꞌtyanla jini xmaꞌtyeꞌmut bajcheꞌ an. Machꞌan miꞌ chaꞌlen pacꞌ. Machꞌan miꞌ chaꞌlen cꞌajbal. Maꞌix i yotyotlel baꞌ mi lotyeꞌ i bucꞌbal. Pero Dios miꞌ bej aqꞌuen i bucꞌbal. Más an tyo laꞌ cꞌʌjnibal bajcheꞌ jini xmaꞌtyeꞌmut.
25 ¿An ba majch yaꞌ baꞌ añetla muꞌ bʌ i colel i xinil metro chaꞌan ti caj cabʌl pensal mi laꞌ wʌl?
26 Mi mach chꞌujbi laꞌ bej colel xinil metro chaꞌan ti cabʌl pensal, ¿chucoch mi laꞌ lolon chaꞌlen cabʌl pensal chaꞌan yan tyac bʌ?
27 Ñaꞌtyanla bajcheꞌ mi colel jini nichꞌ pimel tyac. Mach an miꞌ chaꞌlen troñel. Machꞌan miꞌ jaleꞌ i pislel. Pero mic subeñetla mi jinic jini yumʌl Salomón am bʌ cabʌl i ricojlel maꞌix ñoj cꞌotyajax i pislel bajcheꞌ i cꞌotyajlel jini nichꞌ pimel.
28 Como Dios mi yʌqꞌuen i cꞌotyajlel jini pimel muꞌ bʌ ti colel wale iliyi pero ijcꞌʌl jach miꞌ pulelob ti yajnib cꞌajc. Más miꞌ pensaliñetla Dios bajcheꞌ jini pimel. Pero tsꞌityaꞌ jach mi laꞌ chꞌujbin Dios cheꞌ an tyo cabʌl laꞌ pensal.
29 Jin chaꞌan mach yom mi laꞌ lolon cabʌl pensalin bajcheꞌ mi quejel laꞌ tyajeꞌ chʌ bʌ mi quejel laꞌ cꞌuxeꞌ chʌ bʌ mi quejel laꞌ japeꞌ.
30 Como jini quixtyañu i chaꞌan jach mulawil miꞌ lolon cabʌl niqꞌui pensalin cheꞌ bajcheꞌ jini. Pero jatyetla añʌch laꞌ Tyat ti panchan muꞌ bʌ i luꞌ ñaꞌtyan chʌ bʌ yom laꞌ chaꞌan.
31 Más i cꞌʌjnibal mi laꞌ pensalin chʌ bʌ yom Dios. Cheꞌ jini mi quejel laꞌ wʌqꞌuentyel pejtyelel chʌ bʌ tyac yom chaꞌañetla. Cheꞌ ti yʌlʌ Jesús.
Enseñando Sobre Oración y Fe
Cabʌl chʌ bʌ an lac chaꞌan ti panchan
32 C ovejajet bʌ la mach yom mi laꞌ lolon chaꞌlen bʌqꞌuen. Maꞌix cabʌletla pero Dios mi yʌqꞌueñetla laꞌ ajñel laꞌ wicꞌot baꞌ mi quej i chaꞌlen yumʌl chaꞌan chʌꞌʌch mi mulan i chaꞌlen Dios.
33 Choñola chʌ bʌ yes an laꞌ chaꞌan, chaꞌan laꞌ cotyan machꞌʌ baꞌan i chaꞌañob. Cheꞌ jini chʌncol laꞌ chajpan i yajnib chʌ bʌ an laꞌ chaꞌan machꞌʌ baꞌan mi tsuculiyel. Añʌch laꞌ ricojlel yubil machꞌʌ yujil jilel ti panchan baꞌ mach och ajxujchꞌ i xujchꞌibeñetla laꞌ chaꞌan. Machꞌan mi yochel animal muꞌ bʌ i jisan chʌ bʌ yes lotyol yaꞌi.
34 Jini laꞌ chaꞌan muꞌ bʌ laꞌ más qꞌueleꞌ ti ñuc jiñʌch muꞌ bʌ laꞌ bej pensalin. Cheꞌ ti yʌlʌ Jesús.
Yom chajpʌbilonla
35 Jesús tiꞌ bej chaꞌle tꞌan. Ti yʌlʌ: Yom chajpʌbiletla yicꞌot yom tsꞌʌbʌl laꞌ cas, yubil.
36 Yom añetla cheꞌ bajcheꞌ ajtroñelob chʌncol bʌ i wen pijtyan chaꞌan i julel i yum tsaꞌ bʌ maji ti qꞌuiñejel chaꞌan ñujpuñel chaꞌan i waꞌ jamben i tiꞌ otyot cheꞌ mi cꞌotyel cheꞌ miꞌ sub i bʌ.
37 Cꞌajacña i yoj jini ajtroñelob cheꞌ pꞌixil tyo mi cꞌotyel i yum. Mic subeñetla melelʌch jini i yum mi quejel i chajpan i bʌ chaꞌan i chaꞌlen troñel. Mi quejel i subeñob buchtyʌl jini ajtroñelob chaꞌan i yʌqꞌueñob i chaꞌlen uchꞌel.
38 Aunque mi cꞌotyel ti xin acꞌbʌlel mi ti sʌcꞌan pero cꞌajacña i yoj jini ajtroñelob mi ti tyajle cheꞌ bej pꞌixil tyo i pijtyan i yum.
39 Ñaꞌtyanla jini. Mi ti pensali i yum jumpꞌej otyot bajcheꞌ ora mi quejel i cꞌotyel ajxujchꞌ bej pꞌixil cꞌʌlʌ mi cꞌotyel ajxujchꞌ. Machꞌan mi yʌcꞌ ochel i xujchꞌiben majlel chʌ bʌ yes an i chaꞌan. Cheꞌ ti yʌlʌ Jesús ti lajoñel.
40 Yom bej chajpʌbiletla jeꞌel como mi quejel c tyʌlel Joñon i Piꞌʌlon Quixtyañujob cheꞌ machꞌan mi laꞌ pensalin laꞌ pijtyañon. Cheꞌ ti yʌlʌ Jesús.
Jini xucꞌul bʌ ajtroñel yicꞌot mach bʌ xucꞌulic
41 Cheꞌ jini Pedro tiꞌ cꞌajtibe Jesús: C Yum, ¿tsaꞌ ba a wʌlʌ jini lajoñel chaꞌañon jach lojon o chaꞌan ti pejtyelel quixtyañujob? cheꞌen.
42 Lac Yum tiꞌ sube: ¿Majchqui jini xucꞌul bʌ ajcʌñʌtyaya troñelob muꞌ bʌ i ñaꞌtyan bajcheꞌ miꞌ chaꞌlen i troñel i yum? I yum miꞌ cʌyeꞌ ti i wenta pejtyelel am bʌ ti yotyot chaꞌan i luꞌ aqꞌueñob i yuchꞌel ti i yorojlel.
43 Cꞌajacña i yoj jini ajcʌñʌtyaya troñel cheꞌ mi quejel i cꞌotyel i yum i qꞌueleꞌ tsꞌʌcʌl chʌncol i chaꞌlen jini tsaꞌ bʌ subenti i chaꞌlen.
44 Melel mic subeñetla: I yum mi quejel i yotsan tiꞌ wenta jini xucꞌul bʌ ajcʌñʌtyaya troñel ti pejtyelel chʌ bʌ yes an i chaꞌan.
45 Pero mi tiꞌ lolon pensali jini ajcʌñʌtyaya troñel max tyo baꞌan mi quejel i waꞌ cꞌotyel i yum mi quejel i tyech i jatsꞌ yicꞌot i niqꞌui suben yambʌ ajtroñelob yicꞌot xꞌixicob. Mi quejel i wen bajñel chaꞌlen uchꞌel. Mi quejel ti qꞌuixnijel.
46 Cheꞌ jini i yum mi quejel i chaꞌ cꞌotyel cheꞌ machꞌan miꞌ saj pensalin i pijtyan i yum. Más tsʌts mi quejel i yʌqꞌuen i xotꞌeꞌ i mul. Mi quejel i yʌqꞌuen i yajñel yicꞌot jini machꞌʌ baꞌan miꞌ chꞌujbiñob.
47 Más mi quejel i yʌqꞌuentyel i xotꞌeꞌ i mul jini ajtroñel yujil bʌ isujm chʌ bʌ yom i yum pero machꞌan tiꞌ chajpʌbe. Machꞌan tiꞌ chꞌujbibe i tꞌan. Wen cabʌl mi quejel i yʌcꞌbentyel.
48 Pero jini ajtroñel machꞌʌ yujil isujm chʌ bʌ yom i yum aunque mach wen miꞌ chaꞌlen pero maꞌix wen cabʌl mi quejel i yʌcꞌbentyel. Jini cabʌl bʌ chʌ bʌ mi yʌqꞌuentyel ti i wenta, cabʌl chʌ bʌ an ti i wenta chaꞌan miꞌ cꞌʌñeꞌ ti wen. Jini cabʌl bʌ chʌ bʌ mi poj aqꞌuentyel chaꞌan miꞌ cʌñʌtyan más an tiꞌ wenta chaꞌan miꞌ cʌñʌtyan ti wen. Cheꞌ tiꞌ chaꞌle cʌntisʌ Jesús.
Miꞌ tꞌoxob i bʌ quixtyañu chaꞌan ti caj Jesús
49 Jesús ti yʌlʌ: Ti tyʌliyon chaꞌan tij caj mi quejel i ñusan wocol cheꞌ bajcheꞌ mi ti tsꞌʌbʌ cꞌajc yubil wʌꞌ ti mulawil. Comʌch muqꞌuiquix i waꞌ lejmel, cheꞌen.
50 Ti yʌlʌ jeꞌel: Ñoj wocol mi quejel c ñusan. Chʌꞌʌch mi quejel c ñusan cꞌʌlʌ jintyo mi yujtyel, cheꞌen.
51 ¿Muꞌ ba laꞌ lolon ñaꞌtyan ti tyʌliyon chaꞌan mi yajñelob ti ñʌchꞌʌl jini wʌꞌ bʌ añob ti mulawil? Machꞌan. Ti tyʌliyon chaꞌan miꞌ tꞌoxob i bʌ quixtyañujob.
52 Como wale iliyi mi quejel i tꞌoxob i bʌ quixtyañu ti jumpꞌej otyot. Mi an joꞌtiquil ti jumpꞌej otyot, uxtiquil miꞌ contrajin chaꞌtiquil yicꞌot chaꞌtiquil miꞌ contrajin uxtiquil.
53 Tyatyʌl mi quejel i contrajin aloꞌ bʌ i yalobil. I yalobil mi quejel i contrajin i tyat. I ñaꞌ miꞌ contrajin i yixicꞌal. I yixicꞌal miꞌ contrajin i ñaꞌ. I nijꞌañaꞌ miꞌ contrajin i yʌꞌlib. I yʌꞌlib miꞌ contrajin i nijꞌañaꞌ. Cheꞌ ti yʌlʌ Jesús.
I señʌjlel tyac bajcheꞌ mi quejel i yujtyel
54 Jesús tiꞌ sube quixtyañujob jeꞌel: Cheꞌ mi laꞌ wilan mi tyejchel tyʌlel tyocal baꞌ mi pꞌʌjquel qꞌuin mi laꞌ wʌl: Tyalix jaꞌal, cheꞌetla. Chʌꞌʌch mi yujtyel cheꞌ bajcheꞌ mi laꞌ ñaꞌtyan.
55 Cheꞌ mi tyʌlel icꞌ ti sur mi quejel ticwal, cheꞌetla. Chʌꞌʌch mi yujtyel bajcheꞌ mi laꞌ wʌleꞌ.
56 Chaꞌchajp laꞌ pensal. Mi laꞌ ñaꞌtyan cheꞌ mi quejel jaꞌal yicꞌot ticwal pero machꞌan mi laꞌ ñaꞌtyan chʌ bʌ yes mi quejel i yujtyel wʌꞌ ti mulawil aunque mi laꞌ qꞌuel seña tyac.
Jopꞌox a wajñel ti ñʌchꞌʌl yicꞌot a contra
57 ¿Chucoch machꞌan mi laꞌ bajñel ñaꞌtyan chʌ bʌ yom mi laꞌ chaꞌlen?
58 Mi an majch mi quejel i pʌyet chaꞌan maꞌ majlel baꞌan am bʌ yeꞌtyel jopꞌox a lajmisan periyal cheꞌ max tyo ti cꞌotiyetla baꞌan am bʌ yeꞌtyel chaꞌan machꞌan miꞌ wersa bej pʌyet majlel ti melojel. Como mi ti cꞌotiyet baꞌan am bʌ i yeꞌtyel mi quejel i yʌqꞌueñet tiꞌ wenta policía. Jini policía mi yotsañet ti cʌchol.
59 Mic subeñet maꞌix mi quejel a chaꞌ loqꞌuel jintyo tsaꞌix a luꞌ tsꞌʌctisʌ a tyoj a mul, cheꞌ ti yʌlʌ Jesús.