2 Jiñobʌch i cꞌabaꞌ jini docejob tsaꞌ bʌ otsʌntiyob ti yajcʌbiloꞌ bʌ ajsubtꞌañob ñumel. Ñaxan Simón muꞌ bʌ i pejcʌntyel jeꞌel ti Pedro, yicꞌot Andrés i yijtsꞌin Pedro, Jacobo yicꞌot Juan i yalobilob Zebedeo.

3 Felipe, Bartolomé, Tomás, Mateo jini xchꞌʌm tyojoñel, Jacobo i yalobil Alfeo yicꞌot Lebeo muꞌ bʌ i pejcʌntyel jeꞌel ti Tadeo.

4 Simón chꞌoyol bʌ baꞌan junmujchꞌoꞌ cananistajoꞌ bʌ i cꞌabaꞌ, yicꞌot Judas Iscariote muꞌ bʌ quejel i yʌcꞌ Jesús tiꞌ cꞌʌb i contra.

5 Jesús tiꞌ xiqꞌui majlel ti subtꞌan jini docejob. Tiꞌ subeyob: Mach yom laꞌ majlel baꞌan machꞌʌ israelob. Maꞌ mi laꞌ wochel ti i lum tyac yaꞌ ti pañimil Samaria bʌ i cꞌabaꞌ.

6 Pero yom mi laꞌ majlel yaꞌ baꞌan israelob como jiñʌch cheꞌ bʌ bajcheꞌ tiñʌmeꞌ tsaꞌ bʌ sʌtyʌ i bijlel como max tyo i chꞌujbiyob i tꞌan Dios.

7 Subula majlel tꞌan chaꞌan lʌcꞌʌlix i yorojlel mi quejel i yumintyel Dios am bʌ ti panchan.

8 Lajmisan cꞌamꞌoꞌ bʌ. Tyejchisan sajtyemoꞌ bʌ. Lajmisan am bʌ chʌ bʌ pasem tiꞌ pʌchʌlel muꞌ bʌ i pʌcꞌmisʌben majlel i bʌcꞌtyal. Choco loqꞌuel xibajob am bʌ tiꞌ pusicꞌal quixtyañujob. Ti a majtyan jach ti aqꞌuentiyetla ili laꞌ pꞌʌtyʌlel. Maꞌ mi laꞌ cꞌajtin laꞌ tyojol cheꞌ mi laꞌ cꞌʌñeꞌ.

9 Mach yom laꞌ chꞌʌm majlel tyaqꞌuin, mi oro mi plata mi cobre bʌ.

10 Mach yom laꞌ chꞌʌm majlel laꞌ morral mi yanic bʌ laꞌ bujc mi yanic bʌ laꞌ zapatos mi laꞌ ñʌꞌtyeꞌic. Como jini muꞌ bʌ i chaꞌlen toñel yom i yʌqꞌuentyel i yuchꞌel chaꞌan i tyojol yubil.

11 Cheꞌ mi laꞌ cꞌotyel ti lum mi ti ajchumtyʌl yom mi laꞌ sʌclan juntiquil muꞌ bʌ i qꞌuejlel ti ñuc. Mi laꞌ cꞌajtiben mi mux i yʌqꞌueñetla laꞌ wajñel ti yotyot. Yaꞌ mi laꞌ wajñel jintyo mi laꞌ chaꞌ loqꞌuel majlel.

12 Cheꞌ mi laꞌ wochel ti jumpꞌej otyot mi laꞌ wʌqꞌuen saludos. Mi laꞌ wʌleꞌ: Laꞌ tyʌlic i ñʌchꞌtyʌlel i pusicꞌal ili añoꞌ bʌ ti ili otyot, cheꞌetla. Cheꞌ ti yʌlʌ Jesús.

13 Mi tiꞌ qꞌueleyet ti wen jini am bʌ ti otyot, mux i chꞌʌmeꞌ i yutslel a tꞌan. Mi maꞌix miꞌ qꞌuelet ti wen mach i chaꞌañobix i yutslel a tꞌan.

14 Mi maꞌix miꞌ qꞌuelet ti wen mi mach yom i yubin a tꞌan yaꞌ ti jumpꞌej lum mi ti jumpꞌej otyot, loqꞌuen, cheꞌ jini. Chijcunla loqꞌuel i tsꞌubejñal laꞌ woc chaꞌan miꞌ ñaꞌtyañob mach wen bajcheꞌ miꞌ chaꞌleñob.

15 Melel mic subeñetla cheꞌ ti yorojlel melojel más wocol mi quejel i yʌjqꞌuelob ti xotꞌmulil jini machꞌʌ yom i yubin laꞌ tꞌan cheꞌ bajcheꞌ jini añoꞌ bʌ ti lum tyac Sodoma yicꞌot Gomorra bʌ i cꞌabaꞌ ti ñoj oniyix.

16 Jesús tiꞌ sube ajcʌntꞌañob i chaꞌan: Wale chʌncol c choquetla majlel ti subtꞌan yaꞌ baꞌan simaron bʌ quixtyañujob. Bʌbʌqꞌuen mi quejel laꞌ wubin. Mic choquetla majlel ti subtꞌan cheꞌ bajcheꞌ tiñʌmeꞌetla joyol bʌ ti colem bajlʌm yubil. Wen pensalin bajcheꞌ yom mi laꞌ wajñel. Yom bej listojetla cheꞌ bajcheꞌ lucum. Yom bej utsetla cheꞌ bajcheꞌ xmucuy.

17 Cʌñʌtyan laꞌ bʌ. Mi quejel laꞌ wʌjqꞌuel tiꞌ wenta ñuc bʌ yeꞌtyel. Mi quejel i jatsꞌetla ti pʌchij yaꞌ ti templo tyac israelob.

18 Mi quejel laꞌ pʌjyel majlel jinic tyo yaꞌ ti tyojlel ñucoꞌ bʌ yeꞌtyel yicꞌot ñuc bʌ yumʌlob chaꞌan tij caj joñon. Cheꞌ yaꞌ añetla chꞌujbi laꞌ subeꞌ c tꞌan tiꞌ tyojlelob yicꞌot yaꞌ tiꞌ tyojlel machꞌʌ israelob jeꞌel.

19 Cheꞌ miꞌ pʌyetla majlel yaꞌ baꞌ añoꞌ bʌ i yeꞌtyel mach yom laꞌ ñaxan pensalin chʌ bʌ mi quejel laꞌ wʌl mi jinic bajcheꞌ mi quej laꞌ subeñob como jini Chꞌujul bʌ i Chꞌujlel Dios mi quejel i yʌqꞌueñetla laꞌ wʌleꞌ cheꞌ mi cꞌotyel i yorojlel laꞌ chaꞌlen tꞌan.

20 Mach jatyeticla muqꞌuetla ti tꞌan yubil como jini Chꞌujul bʌ i Chꞌujlel Dios lac Tyat mi quejel i cꞌʌñeꞌ laꞌ tiꞌ chaꞌan yʌqꞌuetla ti tꞌan.

21 Jini machꞌʌ baꞌan miꞌ chꞌujbiñon mi quejel i lolon jopꞌbeñob i mul i yijtsꞌiñob muꞌ bʌ i chꞌujbiñon chaꞌan mi yʌcꞌob ti tsʌnsʌntyel. Winicob am bʌ i yalobil muꞌ bʌ i chꞌujbiñon mi quejel i chaꞌlen tꞌan tiꞌ contra chaꞌan mi yʌcꞌ ti tsʌnsʌntyel. Mi quejel i yujtyel jeꞌel chaꞌan alpꞌeñalob mi quejel i tsꞌaꞌqꞌuelob i tyat i ñaꞌ muꞌ bʌ i chꞌujbiñon. An muꞌ bʌ quejel i yʌcꞌob ti sajtyel. Cheꞌ ti yʌlʌ Jesús.

22 Ti pejtyelelob mi quejel i tsꞌaꞌqꞌueletla chaꞌan ti caj chʌncol laꞌ tsʌcleñon. Pero jini muꞌ bʌ i cucheꞌ ti wen i tsꞌaꞌqꞌuelol chʌ bʌyic jach bʌ i tyʌcꞌlʌntyel mi quejel i cotyʌntyel chaꞌan mi yajñel ti yumintyel Dios.

23 Cheꞌ miꞌ tyʌcꞌlañetla yaꞌ ti jumpꞌej lum, putsꞌtyañla majlel ti yambʌ. Melel mic subeñetla, maꞌix mi quejel laꞌ ñumel majlel yaꞌ ti pejtyelel i lum tyac israelob jintyo mic chaꞌ tyʌlel Joñon i Piꞌʌlon bʌ Quixtyañujob. Cheꞌ ti yʌlʌ Jesús.

24 Machꞌan más ñuc juntiquil ajcʌntꞌan bajcheꞌ i maestro. Machꞌan más ñuc ajtroñel bajcheꞌ i yum.

25 Jasʌl jach mi yajñel ajcʌntꞌan cheꞌ bajcheꞌ i maestro. Jasʌl jach mi yajñel jini ajtroñel cheꞌ bajcheꞌ i yum. Cheꞌ mi tsꞌaꞌqꞌuelon, cheꞌ miꞌ pejcañon ti Beelzebú i yajaw xiba, más tyo mi quejel i tsꞌaꞌqꞌueletla jatyetla muꞌ bʌ laꞌ tsʌcleñon. Cheꞌ ti yʌlʌ Jesús.

26 Jin chaꞌan mach yom mi laꞌ bʌcꞌñan quixtyañu chʌncol bʌ i tyʌcꞌlañetla como maꞌix chʌ bʌ mucul wale iliyi machꞌʌ baꞌan mi quejel i tsictisʌntyel. Maꞌix chʌ bʌ mucul machꞌʌ baꞌan mi quejel i luꞌ ñaꞌtyʌntyel.

27 Jini chʌncol bʌ c subeñetla cheꞌ lac bajñel jach, yom laꞌ puc majlel baꞌan pejtyel quixtyañujob. Jini chʌncol bʌ c mucul subeñetla yom laꞌ sub ti cꞌam bʌ tꞌan ti pejtyelel lum tyac.

28 Mach yom laꞌ lolon bʌcꞌñan quixtyañu muꞌ bʌ i tsʌnsañetla pero mach chꞌujbi i tsʌnsan laꞌ chꞌujlel. Jini yom bʌ laꞌ bʌcꞌñan jiñʌch jini am bʌ i pꞌʌtyʌlel i yʌqꞌuetla ti sajtyel, yicꞌot añʌch jeꞌel i pꞌʌtyʌlel i choquet majlel ti xotꞌmulil ti cꞌajc baꞌ miꞌ ñusan wocol i bʌcꞌtyal yicꞌot i chꞌujlel. Jin jach yom laꞌ bʌcꞌñan, cheꞌen.

29 Mi chojñel chaꞌcojt saj xmaꞌtyeꞌmut ti junwejch tyaqꞌuin, pero maꞌix mi juncojtic mi chʌmel mi maꞌix mi yʌcꞌ i tꞌan lac Tyat am bʌ ti panchan.

30 Jinic tyo i tsutsel la col tsaꞌix i luꞌ tsiqui Dios ti jujuntꞌujm.

31 Mach yom laꞌ chaꞌlen bʌqꞌuen, cheꞌ jini. Como más an laꞌ cꞌʌjnibal cheꞌ bajcheꞌ cabʌl saj xmaꞌtyeꞌmut. Cheꞌ tiꞌ chaꞌle cʌntisa Jesús.

32 Jesús ti yʌlʌ: Joñon mi quejel c tsictisan tiꞌ tyojlel c Tyat am bʌ ti panchan chaꞌan mij cʌñob pejtyelelob muꞌ bʌ i tsictisan ti tyojlel quixtyañujob mi chʌncol i chꞌujbiñon.

33 Pero jini muꞌ bʌ i yʌleꞌ tiꞌ tyojlel quixtyañujob machꞌʌ baꞌan miꞌ cʌñon, joñon jeꞌel mi quejel cʌleꞌ tiꞌ tyojlel c Tyat am bʌ ti panchan chaꞌan mach c chaꞌañob jeꞌel. Cheꞌ ti yʌlʌ Jesús.

34 Jesús ti yʌlʌ jeꞌel: Mach yom laꞌ lolon al ti tyʌliyon chaꞌan mi cʌcꞌob ti ajñel ti ñʌchꞌʌl wʌꞌ bʌ añob ti mulawil. Maꞌ ti tyʌliyon chaꞌan mic ñʌchꞌchocoñob pero chaꞌan jach mi cʌqꞌueñob i contrajiñob i bʌ chaꞌan ti caj miꞌ chꞌujbiñoñob.

35 Ti tyʌliyon cʌqꞌuen jini machꞌʌ baꞌan miꞌ chꞌujbiñon i contrajiñob jini muꞌ bʌ i chꞌujbiñon. Winic miꞌ contrajin i tyat, i yixicꞌal miꞌ contrajin i ñaꞌ, i yʌꞌlib miꞌ contrajin i nijꞌañaꞌ.

36 Jini muꞌ bʌ i chꞌujbiñon an i contrajintyel ti i piꞌʌlob yaꞌ ti yotyot machꞌʌ baꞌan miꞌ chꞌujbiñon.

37 Jini muꞌ bʌ i más pꞌuntyan i tyat o i ñaꞌ cheꞌ bajcheꞌ miꞌ pꞌuntyañon mach chꞌujbi i yajñel tic chaꞌan. Jini muꞌ bʌ i más pꞌuntyan aloꞌ bʌ i yalobil mi xcꞌalʌl bʌ i yalobil cheꞌ bajcheꞌ miꞌ pꞌuntyañon, mach chꞌujbi i yajñel tic chaꞌan.

38 Jini mach bʌ yom i yʌcꞌ i bʌ ti tsʌnsʌntyel chaꞌan ti caj miꞌ tsʌcleñon, mach chꞌujbi i yajñel tic chaꞌan.

39 Jini yom bʌ i bajñel lolon cʌñʌtyan i bʌ mi quejel i sʌtyeꞌ i cuxtyʌlel machꞌʌ yujil jilel. Pero jini muꞌ bʌ i yʌcꞌ i bʌ chaꞌañon aunque mi sajtyel chaꞌan tij caj mi quejel i yʌqꞌuentyel i cuxtyʌlel machꞌʌ yujil jilel. Cheꞌ ti yʌlʌ Jesús.

40 Jesús ti yʌlʌ jeꞌel: Jini muꞌ bʌ i pʌyetla ochel ti yotyot miꞌ pʌyon ochel yubil. Jini muꞌ bʌ i pʌyon ochel miꞌ pʌy ochel jeꞌel jini tsaꞌ bʌ i chocoyon tyʌlel.

41 Jini muꞌ bʌ i pʌyeꞌ ochel ti yotyot juntiquil tsaꞌ bʌ i xiqꞌui yʌleꞌ Dios chaꞌan miꞌ ñaꞌtyan miꞌ chaꞌlen tꞌan bajcheꞌ ti xijqꞌui ti Dios junlajal mi quejel i yʌqꞌuentyel i tyojol ti Dios cheꞌ bajcheꞌ mi yʌqꞌuentyel jini tsaꞌ bʌ i xiqꞌui yʌleꞌ Dios. Jini muꞌ bʌ i pʌyeꞌ ochel ti yotyot juntiquil muꞌ bʌ i chaꞌlen muꞌ bʌ i mulan Dios chaꞌan miꞌ ñaꞌtyan chaꞌan chʌꞌʌch miꞌ chaꞌlen, junlajal mi quejel i yʌqꞌuentyel i tyojol ti Dios cheꞌ bajcheꞌ mi yʌqꞌuentyel muꞌ bʌ i chaꞌlen muꞌ bʌ i mulan Dios.

42 Majchical jach muꞌ bʌ i yʌqꞌuen chʌ bʌ yom i chaꞌan aunque juntsimajic jachix tsʌwan bʌ jaꞌ chaꞌan miꞌ ñaꞌtyan ajcʌntꞌan c chaꞌan aunque maꞌix mi qꞌuejlel ti ñuc ti quixtyañujob mi quejel i yʌqꞌuentyel i tyojol ti Dios. Cheꞌ tiꞌ chaꞌle cʌntisa Jesús.