2 Yaꞌan jeꞌel ti i tyojel Jesús juntiquil cꞌam bʌ winic siꞌtꞌil bʌ.

3 Cheꞌ jini, Jesús tiꞌ cꞌajtibe jini ajcʌntisajob i chaꞌan israelob yicꞌot jini fariseojob: ¿Yom ba mi lajmisʌntyel juntiquil xcꞌamꞌan cheꞌ ti qꞌuinilel cꞌaj oj o mach yom? cheꞌen.

4 Cheꞌ jini, ñʌchꞌʌl ti cʌyleyob. Cheꞌ jini Jesús ti yʌcꞌʌ i cꞌʌb ti xcꞌamꞌan. Tiꞌ lajmisʌ. Tiꞌ xiqꞌui majlel.

5 Cheꞌ jini Jesús tiꞌ sube jini fariseojob: Pero jatyetla, anic laꞌ burro mi laꞌ tyat wacax tsaꞌ bʌ yajli ochel ti pozo, ¿machꞌa baꞌan mi quejel laꞌ waꞌ locꞌsan ti ora jach aunque i qꞌuinilelʌch cꞌaj oj? Cheꞌ ti yʌlʌ Jesús.

6 Pero jini fariseojob machꞌan ti mejli i saj jacꞌbeñob i tꞌan.

7 Cheꞌ ñac Jesús tiꞌ qꞌuele jini pʌyʌloꞌ bʌ ti qꞌuiñejel chʌncol i yajcan jini más wen bʌ buchlibʌl. Tiꞌ subeyob ili tꞌan:

8 Mi an juntiquil miꞌ pʌyet ti qꞌuiñejel chaꞌan ñujpuñel, mach yom maꞌ buchtyʌl ti más wen bʌ buchlibʌl ame mi cꞌotyel yambʌ pʌyʌl bʌ muꞌ bʌ i qꞌuejlel ti más ñuc bajcheꞌet.

9 Ame jini tsaꞌ bʌ i pʌyʌyetla mi tyʌlel i subeñet: Laꞌ buchlec jini yambʌ winic wʌꞌ baꞌ buchulet, cheꞌen. Cheꞌ jini, quisintic mi quejel a wubin chaꞌan maꞌ majlel ti buchtyʌl ti machꞌʌ lajal wen bʌ buchlibʌl.

10 Pero cheꞌ pʌyʌlet ti qꞌuiñejel yom maꞌ majlel ti buchtyʌl yaꞌ baꞌan jini machꞌʌ lajal wen bʌ buchlibʌl. Cheꞌ jini, cheꞌ mi cꞌotyel jini tsaꞌ bʌ i pʌyʌyet mi quejel i subeñet: Piꞌʌl, yom wʌꞌ maꞌ tyʌlel ti jini más wen bʌ buchlibʌl, cheꞌen. Cheꞌ jini, ñuc mi quejel i qꞌuelet ti pejtyelel yañoꞌ bʌ pʌyʌloꞌ bʌ yaꞌ bʌ buchulob ti qꞌuin a wicꞌot.

11 Como majchical jach miꞌ lolon chan isan i bʌ mi quejel i juꞌsʌntyel. Pero jini jubem bʌ i pusicꞌal mi quejel i qꞌuejlel ti ñuc. Cheꞌ ti yʌlʌ Jesús.

12 Jesús tiꞌ pejcʌ jini winic tsaꞌ bʌ i pʌyʌ ti uchꞌel. Tiꞌ sube: Cheꞌ maꞌ pʌy ti uchꞌel ti qꞌuinil o mi ti icꞌan mach yom jin jach maꞌ bej pʌyeꞌ jini utsoꞌ bʌ a wicꞌot, mi a wijtsꞌiñob a wʌscuñob, mi a piꞌʌlob, mi jini ricojoꞌ bʌ lʌcꞌʌloꞌ bʌ ti chumtyʌl. Como jini miꞌ chaꞌ pʌyet chaꞌan miꞌ qꞌuextyʌbeñet jini tsaꞌ bʌ a chaꞌle.

13 Pero cheꞌ maꞌ meleꞌ qꞌuiñejel, maꞌ pʌyeꞌ jini machꞌʌ baꞌan chʌ bʌ an i chaꞌañob, jini mach bʌ weñob i cꞌʌb i yoc, jini mach bʌ wen miꞌ chaꞌlen xʌmbal yicꞌot jini mutsꞌuloꞌ bʌ i wut.

14 Cꞌajacña a woj mi quejel a wubin mi chʌꞌʌch maꞌ chaꞌlen. Como jini mach chꞌujbi i chaꞌ qꞌuextyʌbeñetyob. Pero chaꞌan wen ti a chaꞌle mi quejel a qꞌuextyʌbentyel yaꞌ ti panchan cheꞌ mi quejel i tyejchel loqꞌuel baꞌan sajtyemoꞌ bʌ jini tsaꞌ bʌ i chaꞌle wen bʌ cheꞌ ñac cuxulob tyo. Cheꞌ ti yʌlʌ Jesús.

15 Cheꞌ ñac juntiquil yaꞌ bʌ an ti qꞌuiñejel yicꞌot Jesús ti yubi tsaꞌ bʌ ujti i yʌleꞌ Jesús ti yʌlʌ: Cꞌajacña i yoj jini muꞌ bʌ i ochel ti qꞌuiñejel yaꞌ baꞌ muꞌ ti yumʌl Dios, cheꞌen.

16 Cheꞌ jini Jesús ti yʌlʌ: Juntiquil winic ti queji i meleꞌ colem bʌ qꞌuiñejel. Tiꞌ pʌyʌ cabʌl quixtyañujob chaꞌan mi cꞌotyelob.

17 Cheꞌ ti cꞌoti mero i yorojlel qꞌuiñejel tiꞌ xiqꞌui majlel juntiquil ajtroñel i chaꞌan, chaꞌan mi majlel i suben pejtyelel jini pʌyʌloꞌ bʌ: Laꞌixla. Luꞌ listojix chaꞌan qꞌuiñejel, cheꞌ ti subentiyob.

18 Pero ti jujuntiquil jini pʌyʌloꞌ bʌ ti queji i yʌleꞌ chʌ bʌ och mach chꞌujbi i majlel. Jini ñaxan bʌ tsaꞌ bʌ i pejcʌ ti yʌlʌ: A wocolic ñusʌbeñon. Ujtyel c mʌñeꞌ jumpejt lum. Wersa mic majlel j qꞌueleꞌ. Cheꞌ ti yʌlʌ.

19 Yambʌ ti yʌlʌ: A wocolic ñusʌbeñon. Tsaꞌix c mʌñʌ diez tyat wacax. Chʌncol c majlel j qꞌuel mi yujil troñel. Cheꞌ ti yʌlʌ jini chaꞌticlel.

20 Yambʌ ti yʌlʌ: Ujtyel c ñujpuñel. Jin chaꞌan mach chꞌujbi c majlel, cheꞌen.

21 I yajtroñel jini winic chʌncol bʌ i meleꞌ qꞌuiñejel ti sujti i suben i yum bajcheꞌ tiꞌ luꞌ jacꞌʌyob. Cheꞌ jini ti michꞌʌ i yum. Tiꞌ sube i yajtroñel: Cucu ti ora jach yaꞌ ti lum yicꞌot ti pejtyelel calle tyac. Wʌꞌ maꞌ pʌy tyʌlel jini machꞌʌ baꞌan chʌ bʌ an i chaꞌañob yicꞌot mach weñob i cꞌʌb yicꞌot jini machꞌʌ wen miꞌ chaꞌlen xʌmbal yicꞌot mutsꞌuloꞌ bʌ i wut. Cheꞌ ti yʌlʌ jini xmel qꞌuin.

22 Cheꞌ ñac ujtyem i meleꞌ bajcheꞌ ti subenti, jini ajtroñel ti chaꞌ sujti yaꞌ baꞌan i yum. Ti yʌlʌ: C yum, tsaꞌix c luꞌ chaꞌle bajcheꞌ ti a xiqꞌuiyon. Pero max tyo butꞌul a wotyot, cheꞌen.

23 Cheꞌ jini i yum otyot tiꞌ chaꞌ xiqꞌui jini ajtroñel i chaꞌan. Cucu yaꞌ ti bij tyac yicꞌot ti mucu bij tyac. Maꞌ wersa subeñob quixtyañujob chaꞌan mi yochelob chaꞌan mi bujtꞌel cotyot, cheꞌen.

24 Como mic subeñet mi junticlec jini tsaꞌ bʌ c ñaxan pʌyʌ mi quejel i saj cꞌuxeꞌ jini tsaꞌ bʌ c chajpʌ. Cheꞌ ti yʌlʌ i yum qꞌuiñejel, cheꞌ Jesús.

25 Cabʌl quixtyañu tiꞌ tsʌcleyob majlel Jesús. Cheꞌ jini tiꞌ sutqui i bʌ chaꞌan i pejcañob. Tiꞌ subeyob:

26 Jini muꞌ bʌ i tsʌcleñon majlel yom i más pꞌuntyañon cheꞌ bajcheꞌ miꞌ pꞌuntyan i tyat mi i ñaꞌ, mi i yijñam mi i yalobilob, mi i yʌscuñob, mi i chichob mi i yijtsꞌiñob. Yom i más pꞌuntyañon cheꞌ bajcheꞌ miꞌ bajñel pꞌuntyan i bʌ. Mi mach cheꞌic miꞌ pꞌuntyañon mach chꞌujbi i yochel ti ajcʌntꞌan c chaꞌan.

27 Jini mach bʌ yom i tsʌcleñon aunque mi tsʌnsʌntyel chaꞌañon mach chꞌujbi i yochel ti ajcʌntꞌan c chaꞌan. Cheꞌ ti yʌlʌ Jesús.

28 Pero mi an juntiquil muꞌ bʌ laꞌ pensalin laꞌ meleꞌ colem bʌ laꞌ wotyot, ¿mach ba ñaxan mi laꞌ wen pensalin mi an baꞌ maꞌ tyajeꞌ pejtyelel chʌ bʌ yes yom chaꞌan mi mejlel i yujtyel troñel?

29 Ame cheꞌ ujtyem laꞌ meleꞌ i cꞌʌclib i yebal otyot, maꞌix mi laꞌ tyajeꞌ chʌ bʌ yes yom chaꞌan mi yujtyel laꞌ meleꞌ. Cheꞌ jini pejtyelelob muꞌ bʌ i qꞌueleꞌ mi wajleñetyob.

30 Mi quej i yʌlob: Jini winic ti queji i meleꞌ colem bʌ i yotyot pero machꞌan ti mejli i jolontisan. Chʌꞌʌch mi quejel i yʌlob.

31 Cheꞌ jeꞌel mi an juntiquil rey muꞌ bʌ i majlel ti guerra tiꞌ contra yambʌ rey, ¿mach ba mux i wʌ pensalin mi jasʌl diez mil i soldado chaꞌan miꞌ ganarin i contra muꞌ bʌ i tyʌlel yicꞌot veinte mil soldado?

32 Mi mach chꞌujbi i ganarin mi yubin, cheꞌ ñajt tyo an jini yambʌ rey mux i wʌ choqueꞌ majlel winicob chaꞌan miꞌ wersa cꞌajtiben chaꞌan lajmic contrajiya.

33 Cheꞌ bajcheꞌ jini, majchical jach yaꞌ baꞌ añetla mach bʌ yom i cʌyeꞌ i wen pꞌuntyan chʌ bʌ an i chaꞌan mach chꞌujbi i yochel ti ajcʌntꞌan c chaꞌan. Cheꞌ ti yʌlʌ Jesús.

34 Cꞌʌjnibal atsꞌam. Pero mi ti jili i tsajel maꞌix bajcheꞌ chꞌujbi i chaꞌ tsajꞌisʌntyel.

35 Cheꞌ maꞌix i tsajel atsꞌam, jilemix i cꞌʌjñibal. Mach saj wenix mi chaꞌanic lac lum mi chaꞌanic mi lac xʌcꞌtyun yicꞌot jini muꞌ bʌ laj cꞌʌn chaꞌan wenꞌac lac lum. Cheꞌ jach mi chojquel. Jini yom bʌ i chꞌʌmben isujm ili tꞌan, pensalinla. Cheꞌ tiꞌ chaꞌle cʌntisʌ Jesús.