2 Cheꞌ ñac ti ñumi wʌcpꞌej qꞌuin, Jesús tiꞌ pʌyʌyob majlel Pedro yicꞌot Jacobo yicꞌot Juan. Tiꞌ bajñel pʌyʌyob majlel ti chan bʌ wits. Ti yʌjni Jesús ti yilʌyob.

3 Lemlaw ti majli i pislel, ñoj sʌsʌc bajche i ñaꞌal tsʌñal. Machꞌan majch ti mulawil chꞌujbi bʌ i sʌc isan i pislel bajcheꞌ ti majli i pislel Jesús.

4 Yaꞌ ti yilʌyob Elías yicꞌot Moisés. Chʌncolob ti tꞌan yicꞌot Jesús.

5 Pedro tiꞌ sube Jesús: Maestro, cꞌotyajax cheꞌ wʌꞌ añonla wʌꞌwʌꞌi. Wʌꞌ yom c mel lojon uxpꞌej lechiꞌpat, jumpꞌej a chaꞌan, jumpꞌej i chaꞌan Moisés yicꞌot jumpꞌej i chaꞌan Elías. Cheꞌ ti yʌlʌ Pedro.

6 Maꞌ miꞌ ñaꞌtyan chʌ bʌ yom yʌleꞌ cheꞌ cu wen chʌncolob ti bʌqꞌuen.

7 Ti waꞌ tyʌli tyocal tsaꞌ bʌ mosoyob. Yaꞌ ti malil tyocal ti yubiyob ajtꞌan. Ti yʌlʌ: Jiñʌch pꞌuntyʌbil bʌ calobil. Ñʌchꞌtyʌbenla i tꞌan. Cheꞌ ti yʌlʌ jini ajtꞌan.

8 Cheꞌ jini tiꞌ waꞌ qꞌueleyob ti suttyʌlel jini uxtiquil ajcʌntꞌañob i chaꞌan Jesús. Maꞌ majch tsiquil yaꞌ baꞌañob. Jin jach Jesús yaꞌan.

9 Cheꞌ ñac chʌncol i jubelob tyʌlel ti wits, Jesús tiꞌ tiqꞌuiyob. Tiꞌ subeyob: Machꞌan majch mi laꞌ saj suben jini tsaꞌ bʌ laꞌ wilʌ jintyo mic chaꞌ tyejchel loqꞌuel baꞌan sajtyemoꞌ bʌ, Joñon i Piꞌʌlon Quixtyañujob, cheꞌen.

10 Jin chaꞌan machꞌan tiꞌ saj tsictisʌyob yañoꞌ bʌ. Tiꞌ cꞌajtibeyob i bʌ chuquiyes i sujmlel cheꞌ mi chaꞌ tyejchel loqꞌuel baꞌan sajtyemoꞌ bʌ.

11 Tiꞌ cꞌajtibeyob Jesús: ¿Chuquiyes i sujmlel cheꞌ mi yʌlob jini ajcʌntisajob chaꞌan i mandar israelob chaꞌan wersa mi tyʌlel Elías? cheꞌob. Cheꞌ tiꞌ cꞌajtibeyob Jesús.

12 Jesús tiꞌ subeyob: Melelʌch cheꞌ ñaxan mi tyʌlel Elías chaꞌan miꞌ tyoj isan pejtyel chʌ bʌ an. ¿Chuqui mi yʌl Tsꞌijbubil bʌ i Tꞌan Dios chaꞌan Joñon i Piꞌʌlon bʌ Quixtyañujob? Mi yʌl chaꞌan mi quejel c ñusan cabʌl wocol yicꞌot mi quejel c michꞌ qꞌuejlel.

13 Mic subeñet, tsaꞌix tyʌli Elías. Tiꞌ tyʌcꞌlʌyob jini quixtyañujob jin jach bajche yomob chʌꞌʌch bajcheꞌ wʌ tsꞌijbubil. Cheꞌ ti yʌlʌ Jesús.

14 Cheꞌ ñac Jesús yicꞌot uxtiquil ajcʌntꞌañob ti cꞌotiyob baꞌan jini yambʌ ajcʌntꞌañob i chaꞌan Jesús, ti yilʌyob yaꞌ suttyʌlob yonlel quixtyañu tiꞌ joytyʌlelob. Yaꞌ añob jeꞌel ajcʌntisajob chaꞌan i mandar israelob chʌncol i cʌlʌx pejcañob i bʌ yicꞌot.

15 Cheꞌ ñac ti yilʌyob Jesús tsijcꞌ cheꞌ i pusicꞌalob ti pejtyelel jini quixtyañu. Ti majliyob ti ajñel i pejcañob Jesús.

16 Jesús tiꞌ cꞌajtibeyob: ¿Chuqui ti tꞌan muqꞌuetla laꞌ wicꞌotyob? cheꞌen.

17 Juntiquil yaꞌ bʌ an tiꞌ jacꞌʌ: Maestro, tic pʌyʌ tyʌlel juntiquil calobil wʌꞌ baꞌañet. Ti sujti ti xꞌumaꞌ chaꞌan tyʌcꞌlʌbil ti xiba, cheꞌen.

18 Cheꞌ miꞌ tyʌcꞌlan miꞌ choc jubel i bʌ ti lum, miꞌ loqꞌuel i lojc i tiꞌ, miꞌ cꞌux i yej. Chʌncox i bej más cꞌun an. Tic subeyob ajcʌntꞌañob a chaꞌan chaꞌan i chocob loqꞌuel jini xiba pero machꞌan ti mejliyob. Cheꞌ ti yʌlʌ jini winic.

19 Jesús tiꞌ jacꞌbeyob: Max tyo baꞌan majch miꞌ chꞌujbin wʌꞌ bʌꞌan ti mulawil yubil. ¿Jaypꞌej tyoqui qꞌuin wʌꞌ añon quicꞌotyetla? ¿Jaypꞌej tyoqui qꞌuin chꞌujbi j cuchbeñetla i tsʌtslel laꞌ pusicꞌal? Pʌyʌla tyʌlel wʌꞌ baꞌañon, cheꞌen.

20 Tiꞌ pʌyʌyob tyʌlel jini alob yaꞌ baꞌan Jesús. Cheꞌ ñac ti yilʌ Jesús, jini xiba ti waꞌ yʌcꞌʌ ti jitsꞌcuyel jini alob. Ti yajli ti lum, tiꞌ pajchꞌi i bʌ. Ti loqꞌui i lojc i tiꞌ.

21 Jesús tiꞌ cꞌajtibe i tyat: ¿Jalixqui i quejel cheꞌ bajcheꞌ iliyi? cheꞌen. Jini winic tiꞌ jacꞌʌ: Cꞌʌlʌ cheꞌ ñac alʌl tyo ti queji.

22 Jini xiba cabʌl miꞌ choc ochel tiꞌ cꞌajc yicꞌot ti jaꞌ chaꞌan yom i tsʌnsan. Mi an bajcheꞌ chꞌujbi a chaꞌlen, pꞌuntyañon lojon, cotyañon lojon. Cheꞌ ti yʌlʌ jini winic.

23 Jesús tiꞌ sube: Chaꞌan jini muꞌ bʌ i chꞌujbin, luꞌ mejlʌch i melbentyel. Cheꞌ ti yʌlʌ Jesús.

24 I tyat jini alob ti cꞌam bʌ tꞌan ti queji i waꞌ aleꞌ: Chʌncox chꞌujbiñet. Cotyañon chaꞌan mic más chꞌujbiñet, cheꞌen.

25 Cheꞌ ñac ti yilʌ Jesús chʌncol i waꞌ muchꞌquiñob i bʌ yonlel quixtyañu tiꞌ tiqꞌui jini xiba. Ti yʌlʌ: Mic subeñet xꞌumaꞌet bʌ xiba xcojquet bʌ xiba loqꞌuen wʌꞌ ti alob. Mach chaꞌ sujtiquet ochel wʌꞌ tiꞌ pusicꞌal. Cheꞌ ti yʌlʌ Jesús.

26 Ti queji ti oñel jini xiba. Ti chaꞌ yʌcꞌʌ ti jitsꞌcuyel jini alob. Ti loqꞌui. Cheꞌ bajcheꞌ sajtyemix ti cʌyle jini alob. Jin chaꞌan ti queji i yʌlob: Sajtyemix, cheꞌob.

27 Pero Jesús tiꞌ chucbe i cꞌʌb chaꞌan tyejchic. Jini alob ti waꞌ waꞌle.

28 Cheꞌ ñac ti ochi ti otyot Jesús, jini ajcʌntꞌañob i chaꞌan tiꞌ bajñel cꞌajtibeyob: ¿Chucoch maꞌ ti mejli lojon c choc loqꞌuel jini xiba? cheꞌob.

29 Jesús tiꞌ jacꞌbeyob: Mach chꞌujbi i chojquel loqꞌuel jini xiba. Jin jach ti oración yicꞌot ti chꞌajb chꞌujbi chocol loqꞌuel. Cheꞌ ti yʌlʌ Jesús.

30 Cheꞌ ñac ti loqꞌuiyob yaꞌyaꞌi ti ñumiyob majlel ti Galilea. Jesús mach yom ubintic cheꞌ yaꞌan.

31 Como chʌncol i cʌntisañob ajcʌntꞌañob i chaꞌan. Tiꞌ subeyob: Joñon i Piꞌʌlon Quixtyañujob mi quej cʌjqꞌuel tiꞌ cꞌʌb quixtyañujob. Mi quejel i tsʌnsañoñob. Cheꞌ tsaꞌix tsʌnsʌntiyon, ti yuxpꞌejlel qꞌuin mi quejel c chaꞌ cuxtiyel. Cheꞌ ti yʌlʌ Jesús.

32 Pero jini ajcʌntꞌañob machꞌan tiꞌ ñaꞌtyʌbeyob chuqui ti yʌlʌ. Tiꞌ bʌcꞌñʌ i cꞌajtibeñob Jesús chʌ bʌ yes i sujmlel.

33 Ti cꞌotiyob ti lum Capernaum bʌ i cꞌabaꞌ. Cheꞌ ñac yaꞌ añob ti otyot, Jesús tiꞌ cꞌajtibeyob. ¿Chuquiyes chʌncol laꞌ cʌlʌx aleꞌ yaꞌ ti bij? cheꞌen.

34 Jini ajcʌntꞌañob ti ñʌchꞌleyob como cheꞌ ñac yaꞌ tyo añob tiꞌ bij ti cʌlʌx pejcʌyob i bʌ. Chʌncol i cꞌajtibeñob i bʌ majchqui más ñuc mi quej i qꞌuejlel.

35 Cheꞌ jini, ti buchle Jesús. Tiꞌ pʌyʌyob tyʌlel ti docejlel. Tiꞌ subeyob: Jini yom bʌ ajñel ti ñuc ti laꞌ tyojlel laꞌ i más juꞌsan i bʌ bajcheꞌ ti pejtyel jini yañoꞌ bʌ. Laꞌ i chaꞌlen cotyaj tiꞌ tyojlel i piꞌʌlob. Cheꞌ ti yʌlʌ Jesús.

36 Cheꞌ jini Jesús tiꞌ pʌyʌ tyʌlel juntiquil alʌl. Tiꞌ waꞌchoco yaꞌ tiꞌ xinilob. Tiꞌ meqꞌue. Ti queji i subeñob.

37 Jini muꞌ bʌ i pʌy ochel juntiquil alʌl chaꞌan i ñaꞌtyañon chʌncol i pʌyon ochel yubi. Jini muꞌ bʌ i pʌyon ochel mach joñon jach miꞌ pʌyon. Chʌncol i pʌy ochel jeꞌel jini tsaꞌ bʌ i chocoyon tyʌlel. Cheꞌ ti yʌlʌ Jesús.

38 Cheꞌ jini, Juan tiꞌ sube Jesús: Maestro, ti quilʌ lojon juntiquil winic muꞌ bʌ i choc loqꞌuel xibajob ti a cꞌabaꞌ bʌ miꞌ cꞌʌn. Tic tiqꞌui lojon como maꞌ miꞌ tsʌcleñonla ti xʌmbal, cheꞌ ti yʌlʌ Juan.

39 Pero Jesús tiꞌ sube: Mach laꞌ tiqꞌueꞌ. Maꞌ majch muꞌ bʌ i cꞌʌn j cꞌabaꞌ chaꞌan i pʌs ñuc bʌ i pꞌʌtyʌlel mi quej i yotsan i bʌ tij contra.

40 Jini machꞌʌ baꞌan miꞌ contrajiñonla chʌncox i cotyañonla.

41 Jini muꞌ bʌ i yʌqꞌueñetla chʌ bʌ yom laꞌ chaꞌan aunque juntsimajic jachix jaꞌ chaꞌan chʌncox i ñaꞌtyan mi ajcʌntꞌañetla i chaꞌan bʌ Cristo, melel mi quej i yʌqꞌuentyel i tyojol. Cheꞌ ti yʌlʌ Jesús.

42 Majchical jach mi yʌqꞌuen yotsan i mul juntiquil i saj bʌ muꞌ bʌ i chꞌujbiñon más wen tsʌꞌiquix cʌjchi tiꞌ bicꞌ yicꞌot jumpꞌej ñaꞌtyun chaꞌan chojquic ochel ti tyam bʌ jaꞌ.

43 Mi ti a wotsʌ a mul ti caj a cꞌʌb, waꞌ tsepe loqꞌuel. Más wen cheꞌ xmol cꞌʌbet maꞌ tyaj a cuxtyʌlel machꞌʌ yujil jilel. Mach jinic chaꞌtsꞌijt a cꞌʌb maꞌ majlel ti cꞌajc machꞌʌ chꞌujbi yajpic,

44 baꞌ machꞌan mi chʌmel i motsoꞌlel, baꞌ machꞌan mi saj yʌjpel i cꞌʌcꞌal.

45 Mi ti a wotsʌ a mul ti caj a woc, waꞌ tsepe loqꞌuel. Más wen cheꞌ xmol oquet maꞌ tyaj a cuxtyʌlel machꞌʌ yujil jilel. Mach jinic chaꞌtsꞌijt a woc maꞌ majlel ti cꞌajc machꞌʌ chꞌujbi yajpic,

46 baꞌ machꞌan mi chʌmel i motsoꞌlel, baꞌ machꞌan mi saj yʌjpel i cꞌʌcꞌal.

47 Mi ti a wotsʌ a mul ti caj a wut waꞌ locꞌsan. Más wen cheꞌ jumpꞌej jach a wut maꞌ wochel ti yumintyel Dios. Mach jinic chaꞌpꞌej a wut maꞌ majlel ti cꞌajc

48 baꞌ machꞌan mi chʌmel i motsoꞌlel, baꞌ machꞌan mi saj yʌjpel i cꞌʌcꞌal.

49 Como ti ñoj oniyix cꞌʌlʌ wale pejtyel tsʌnsʌbil bʌ i majtyan Dios miꞌ luꞌ chajpʌntyel ti atsꞌam. Wale iliyi ti pejtyelel mi quej i chajpʌntyel ti cꞌajc yubil chaꞌan tyojꞌac.

50 Weñʌch jini atsꞌam. Pero mi ti jili i tsajel machꞌan chʌ bʌ i cꞌʌñʌ i chaꞌ tsaj isʌntyel jini atsꞌam. Yom an laꞌ wʌtsꞌmil yubil chaꞌan mi laꞌ cotyan yañoꞌ bʌ chaꞌan mach asiyicob. Tyem ñʌchꞌʌl mi laꞌ wajñel. Cheꞌ ti yʌlʌ Jesús.