2 Cheꞌ jini Jesús tiꞌ pʌyʌ tyʌlel juntiquil alʌl. Ti yʌcꞌʌ ti waꞌtyʌl yaꞌ ti xinilob.

3 Ti yʌlʌ: Melelʌch mic subeñetla, mi machꞌan mi laꞌ qꞌuextyan laꞌ pensal chaꞌan mi laꞌ juꞌsan laꞌ bʌ cheꞌ bajcheꞌ alpꞌeñalob mach chꞌujbi i yumin Dios, cheꞌen.

4 Como jini muꞌ bʌ qꞌuejlel ti más ñuc yaꞌ baꞌ miꞌ chaꞌlen yumʌl Dios, jiñʌch tsaꞌ bʌ qꞌuextyʌ i pensal chaꞌan i juꞌsan i bʌ chaꞌan mi yajñel cheꞌ bajcheꞌ ili alʌl, cheꞌen.

5 Jini muꞌ bʌ i pʌyeꞌ ochel juntiquil alʌl cheꞌ bajcheꞌ jini chaꞌan miꞌ ñaꞌtyañon, chʌncox i pʌyon ochel yubil, cheꞌen.

6 Majchical jach mi yʌqꞌuen i yotsan i mul juntiquil i saj bʌ muꞌ bʌ i chꞌujbiñon más wen tsʌꞌic cʌjchi ti bicꞌ yicꞌot jumpꞌej ñaꞌtyun chaꞌan chojquic ochel ti tyam bʌ jaꞌ.

7 Wocol ajñel ti mulawil como bej an quixtyañu muꞌ bʌ i yʌqꞌuen i yotsañob i mul yañoꞌ bʌ. Pero pꞌumpꞌum cheꞌ bajcheꞌ mi quejel i ñusan wocol jini tsaꞌ bʌ yʌqꞌue i yotsan i mul yambʌ.

8 Mi ti a wotsʌ a mul chaꞌan ti caj a cꞌʌb mi a woc, waꞌ tsepe loqꞌuel. Choco ti ñajt. Más wen cheꞌ xmol cꞌʌbet, xmol oquet maꞌ tyaj a cuxtyʌlel machꞌʌ yujil jilel cheꞌ bajcheꞌ mi an chaꞌtsꞌijt a cʌb, chaꞌtsꞌijt a woc ti chojquiyet ochel ti cꞌajc machꞌʌ baꞌan mi yajpel, cheꞌen.

9 Mi ti a wotsʌ a mul ti caj a wut, waꞌ locꞌsan. Más wen maꞌ tyajeꞌ a cuxtyʌlel machꞌʌ yujil jilel cheꞌ jumpꞌej jach a wut cheꞌ bajcheꞌ mi an chaꞌpꞌej a wut ti chojquiyet ochel ti xotꞌmulil ti cꞌajc, cheꞌen.

10 Mach yom laꞌ qꞌuel cheꞌ bajcheꞌ maꞌix i cꞌʌjnibal mi junticlec alpꞌeñal chʌncol bʌ i chꞌujbiñon. Como chʌncol ti cʌñʌtyʌntyel ti ajtroñelob i chaꞌan bʌ Dios beleꞌ yaꞌ bʌ an ti panchan yaꞌ baꞌan c Tyat.

11 Como Joñon i Piꞌʌl bʌ Quixtyañujob ti tyʌliyon wʌꞌ ti mulawil chaꞌan mi cotyan xmulilob.

12 ¿Bajcheꞌ mi laꞌ pensalin? Mi an juntiquil an bʌ cien tiñʌmeꞌ pero tiꞌ sʌtyʌ i bijlel juncojt, ¿machꞌa baꞌan mi quejel i poj cʌyeꞌ jini noventa y nueve yaꞌ ti wits chaꞌan mi majlel i sʌclan jini tsaꞌ bʌ i sʌtyʌ i bijlel?

13 Mi tiꞌ tyaja, melel más tijicña mi yubin chaꞌan jini juncojt tsaꞌ bʌ i chaꞌ tyaja bajcheꞌ jini noventa y nueve machꞌʌ baꞌan tiꞌ sʌtyʌ i bijlel.

14 Cheꞌ bajcheꞌ lac Tyat am bʌ ti panchan mach yom miꞌ sʌt i bʌ mi junticlec jini saj alpꞌeñal, cheꞌen.

15 Mi tiꞌ chaꞌle mulil ti a contra a wermañu, cucu bajñel suben i mul. Mi ti jacꞌbet a tꞌan weñʌch mi yujtyel.

16 Pero mi mach yom i jacꞌbeñet, pʌyʌ majlel juntiquil mi chaꞌtiquil yañoꞌ bʌ a wicꞌot chaꞌan chaꞌtiquil mi uxtiquil miꞌ ñaꞌtyañob jujumpꞌal tꞌan tsaꞌ bʌ ajli.

17 Mi mach yom i jacꞌbeñob, subeñob ochemoꞌ bʌ tiꞌ tꞌan Dios. Mi mach yom i jacꞌbeñob jini ochemoꞌ bʌ, laꞌ ajnic cheꞌ jini. Yom laꞌ qꞌueleꞌ cheꞌ bajcheꞌ maꞌix ochem tiꞌ tꞌan Dios jini winic, o cheꞌ bajcheꞌ juntiquil xmulil, cheꞌen.

18 Mic subeñetla, jatyetla ajtroñeletla i chaꞌan Dios wʌꞌ ti mulawil. Jini muꞌ bʌ laꞌ wʌqꞌuen i chaꞌlen quixtyañu wʌꞌ ti mulawil chꞌujbi i chaꞌleñob. Chʌꞌʌch Dios jeꞌel mi yʌqꞌuen i chaꞌlen. Chʌ bʌ jach machꞌʌ baꞌan mi laꞌ wʌqꞌuen i chaꞌlen wʌꞌ ti mulawil mach yom i chaꞌlen. Chʌꞌʌch Dios jeꞌel machꞌan mi yʌqꞌuen i chaꞌlen, cheꞌen.

19 Mic subeñetla jeꞌel. Mi añetla chaꞌtiquil wʌꞌ ti mulawil muꞌ bʌ laꞌ lajal pensalin chʌ bʌ yom mi laꞌ cꞌajtiben Dios ti oración, mi quejel laꞌ wʌqꞌuentyel ti c Tyat am bʌ ti panchan.

20 Como baꞌical jach miꞌ muchꞌquiñob i bʌ chaꞌtiquil mi uxtiquil muꞌ bʌ i chꞌujbiñon, yʌꞌʌch añon quicꞌotyob. Cheꞌ ti yʌlʌ Jesús.

21 Cheꞌ jini ti tyʌli Pedro yaꞌ baꞌan Jesús. Ti yʌlʌ: C Yum, ¿jayyajlel yom c ñusʌben i mul quermañu cheꞌ an chʌ bʌ yes miꞌ chaꞌlen tij contra? ¿Yom ba cꞌʌlʌ siete yajlel mic ñusʌben i mul? cheꞌen.

22 Jesús tiꞌ sube: Mic subeñet, mach jasʌl cheꞌ siete yajlel jach. Pero yom cꞌʌlʌ setenta yajlel siete, cheꞌen.

23 Jesús tiꞌ subeyob yambʌ lajoñel. Ti yʌlʌ: Chꞌujbi lac lajeꞌ i yumintyel Dios bajcheꞌ juntiquil yumʌl tsaꞌ bʌ queji i ñaꞌtyan chaꞌan miꞌ wersa tyojob i bet jini ajtroñelob i chaꞌan.

24 Ti queji i pʌyob tyʌlel jini añoꞌ bʌ i bet. Cheꞌ jini tiꞌ pʌyʌ tyʌlel juntiquil yajtroñel ñoj on bʌ i bet. Ti mil ti mil pesos an i bet.

25 Pero machꞌan i tyaqꞌuin chaꞌan i tyojeꞌ. Jin chaꞌan i yum tiꞌ xiqꞌui ti chojñel jini winic chaꞌan mi yajñel ti lolom ajtroñel yicꞌot i yijñam yicꞌot i yalobilob yicꞌot ti pejtyelel chʌ bʌ an i chaꞌan chaꞌan i qꞌuexol i bet.

26 Cheꞌ jini, jini yajtroñel ti ñocle yaꞌ ti yebal yoc i yum. Ti wocol tꞌan ti yʌlʌ: C yum, pijtyan tyo. Muꞌ tyo c tyojbeñet ti pejtyelel c bet, cheꞌen.

27 Jini i yum tiꞌ qꞌuele ti pꞌumpꞌun chaꞌan yom i cotyan. Tiꞌ ñusʌbe i bet. Tiꞌ colo.

28 Pero cheꞌ ñac jini tsaꞌ bʌ ñusʌbenti i bet ti loqꞌui majlel yaꞌ baꞌan i yum, ti ora jach tiꞌ tyaja juntiquil i piꞌʌl ti toñel tsꞌityaꞌ jach bʌ i bet yicꞌot. Tiꞌ chucu tiꞌ bicꞌ. Ti queji i yʌtsꞌeꞌ. Ti yʌlʌ: Tyojbeñon a bet, cheꞌen.

29 Cheꞌ jini, jini tsꞌityaꞌ jach bʌ i bet bʌ ajtroñel ti ñocle yaꞌ ti yebal i yoc jini i piꞌʌl ti toñel. Ti wocol tꞌan ti yʌlʌ: Pijtyan tyo. Muꞌ tyo c tyojbeñet ti pejtyelel, cheꞌen.

30 Pero jini ajtroñel mach yom i jacꞌben i tꞌan i piꞌʌl ti toñel. Ti yotsʌ ti cʌchol jintyo miꞌ luꞌ tyojeꞌ i bet.

31 Cheꞌ ñac jini yambʌ ajtroñelob ti yilʌ chʌ bʌ ti ujti, chꞌʌjyem ti yubiyob chaꞌan jini i piꞌʌl tsaꞌ bʌ otsʌnti ti cʌchol yicꞌot ti queji i michꞌqꞌuelob jini yambʌ. Ti majli i subeñob i yum pejtyelel chʌ bʌ ti ujti.

32 Cheꞌ jini, i yum tiꞌ chaꞌ pʌyʌ tyʌlel jini tsaꞌ bʌ ñusʌbe i bet. Tiꞌ sube: Simaroñet bʌ ajtroñel. Tic luꞌ ñusʌbeyet a bet chaꞌan ti wocol tꞌan ti a cꞌajtibon.

33 Pero jatyet jeꞌel yom a qꞌuel ti pꞌumpꞌun a piꞌʌl ti toñel chaꞌan maꞌ ñusʌben i bet cheꞌ bajcheꞌ tij qꞌueleyet ti pꞌumpꞌun cheꞌ tic ñusʌbet a bet, cheꞌen.

34 Ti wen michꞌʌ jini i yum. Jin chaꞌan tiꞌ xiqꞌui ti otsʌntyel ti cʌchol jini i yajtroñel jintyo miꞌ luꞌ tyoj i bet. Cheꞌ ti yʌlʌ Jesús.

35 Cheꞌ ñac ti ujti i subeñob jini lajoñel Jesús ti yʌlʌ: Jini c Tyat am bʌ ti panchan, chʌꞌʌch mi quejel i chaꞌleñetla jeꞌel ti jujuntiquil mi machꞌan mi laꞌ ñusʌben i mul laꞌ wermañu ti jumpꞌej laꞌ pusicꞌal. Cheꞌ ti yʌlʌ Jesús.